Ɛsdrasi 7 - WE NU GALE 1995

Ɛsdrasi si dɛ Yeruzalɛmɛ do ogili winɔ

^1-6 Ma ɔa gbaa, nɛ do 'da fala Artasɛrsɛsi dungu zi gã nwa ngɔ nù Pɛrsɛ ni, nɛ Ɛsdrasi yula Babilɔnɛ, nɛ a si dɛ Yeruzalɛmɛ. A zi a be 'da Sɛraya, wi nu fɛlɛ kula 'da gã nwa nganga Aroni. Nɛ zélé li oyaa Ɛsdrasi: Elazarɛ, Pinasi, Abisua, Buki, Uzi, Zeraya, Mɛrayɔtɛ, Azaria, Amaria, Ahitubɛ, Sadɔkɛ, Salumɛ, Hilkia do Azaria. Ɛsdrasi zi a wi be mbula, kɛ NWA Gale 'da obe Israɛlɛ hã zi ma hã Mɔizɛ ni, nɛ a ĩ zi ti nɛ de wena. Nɛ nwa Artasɛrsɛsi hã mɛnɔ vɛ̃ kɛ Ɛsdrasi aka a we nɛ ni hã a, we kɛ NWA Gale 'da a do a boe.

^7-9 Do kɔ sambo sabɛlɛ dɛa to nwa 'da Artasɛrsɛsi, nɛ Ɛsdrasi kulu ngɔ tɛ Babilɔnɛ we si dɛ Yeruzalɛmɛ, fala nɛ kpo do ogili be Israɛlɛ, do onganganɔ, do olevitɛnɔ, do Owi ga zuma kɔ tɔa Tɛmpɛloe, do Owi gala olevitɛnɔ tɛ fala dɔnggɔ do Gale. Wa kulu ngɔ tɛ Babilɔnɛ do kuti tũ kɔ zɛkɛ 'da kpo, nɛ wa hɔa tɛ Yeruzalɛmɛ do kuti tũ kɔ zɛkɛ 'da mɔlɔ do kɔ kpo sabɛlɛ ni, we kɛ wila nui 'da Gale zi do wa boe.

¹⁰ Ɛsdrasi hã zi tɛ̃ a vɛ̃ we yambala mbula 'da NWA, do be ma hã obe Israɛlɛ, do dɛ mɛnɔ vɛ̃ kɛ mbula tɔ̃a ni.

Tonɔ kɛ Artasɛrsɛsi hã hã Ɛsdrasi

¹¹ Nɛ zélé we kɔ mbɛti kɛ gã nwa Artasɛrsɛsi ba ma hã nganga Ɛsdrasi, wi ĩ ti mbula kɛ NWA Gale hã ma hã obe Israɛlɛ ni.

¹² “Mi Artasɛrsɛsi, nwa 'da Onwanɔ, mi kɔma mbɛti gɛ hã nganga Ɛsdrasi, wi ĩ ti mbula 'da Gale kɛ li nza i ni.

¹³ “Mi ba nu mi na, wa é mɔ, hã mɔ si dɛ Yeruzalɛmɛ, mba do Oyudanɔ ngɔ nùi 'da mi gɛ vɛ̃: onganganɔ, do olevitɛnɔ, do tala Oyudanɔ vɛ̃ kɛ wa kɔ̃a we si dɛ i mɔ ni.

¹⁴ Mi zu mi kpo do owinɔ sambo, kɛ wa tɔ̃ mbula hã mi ni, lɛ tumba mɔ tɛ Yeruzalɛmɛ, tɛ ngɔ nù Yuda. Mɔ nɛ́, hã mɔ zɔ tɛlɛ tɛ kɛ owinɔ wa dɛ do mbula 'da Gale 'da mɔ, kɛ ma kɔ 'buki mɔ ba tole nɛ gɛ.

¹⁵ Nɛ fala kɛ mɔ si dɛ Yeruzalɛmɛ i ni, nɛ mɔ kala fɛ̃a mɔ bole, do mɔ mbali kɛ mi fala nɛ kpo do Owi tɔ̃ mbula hã mi, lɛ kɔ̃a we hã ma, we dɔnggɔ do Gale 'da obe Israɛlɛ, kɛ a do fala dɔnggɔ do a tɛ Yeruzalɛmɛ i ni.

¹⁶ Mɔ kala sɛ 'bɔ mɔ mbali do fɛ̃a mɔ bole vɛ̃, kɛ mɔ ngɛmɛ sɛ ma ngɔ nù Babilonia ni. Mɔ si sɛ 'bɔ do mɛnɔ kɛ onya mɔ Oyudanɔ, do onganganɔ, wa hã do dia sila we 'dafa do Tɛmpɛloe 'da Gale 'da wa tɛ Yeruzalɛmɛ i ni.

¹⁷ “Mɔ hɔ i mɔ, nɛ mɔ oso sɛ mbili ni do owili ngɔmbɔ, do owili bata, do obe bata. Mɔ oso sɛ 'bɔ fũ, do dɔ̃, nɛ mɔ dɔnggɔ Gale do ma vɛ̃ tɛ ngɔ gbagala kɛ wa gbɛ do sa'de kɔ Tɛmpɛloe 'da Gale 'da nɛ tɛ Yeruzalɛmɛ i ni.

¹⁸ Nɛ mɔ do ongba mɔ, nɛ zele sɛ owenɔ kɛ Gale tɔ̃ hã nɛ ni. Nɛ nɛ dɛ sɛ do tala fɛ̃a mɔ bole, do mɔ mbali kɛ ma 'bana ni ɔ nɛ kɛ nɛ kɔ̃a ni.

¹⁹ Mɔ kala sɛ okpana mɔ mbalinɔ we sambala Gale, kɛ wa gisa hã mɔ ni, nɛ mɔ a ma kɔ Tɛmpɛloe 'da Gale 'da mɔ tɛ Yeruzalɛmɛ i.

²⁰ Tabi mɔ nɛ oso ombé mɔ we to tɔa Tɛmpɛloe nde, nɛ mɔ oso sɛ do mbili kɔ kɛsi 'da mi nwa.

²¹ “Mi gà nwa Artasɛrsɛsi, mi ba nu mi hã Owi fɔmɔ mbilinɔ vɛ̃ ngɔ nùi kulu lì Efratɛ, kɛ si 'biti gɛ̃a wese ni na, wa dɛ mɛnɔ vɛ̃ kɛ nganga Ɛsdrasi a aka sɛ wa we nɛ ni do dia nɛ. Nganga Ɛsdrasi a wi ĩ ti mbula 'da Gale kɛ li nza i ni.

²² Wa hã sɛ mɛnɔ ni hã Ɛsdrasi do 'da kɛ ma wia ni. Mɛ sɛ a: fɛ̃a mɔ bolo kilo koto talɛ, kpalɛ ble kilo koto talɛ, dɔ̃ litrɛ koto nalɛ, nɔ litrɛ koto nalɛ. Nɛ wa hã sɛ tɔ̃ ɔ nɛ kɛ zã wa kɔ̃a ni.

²³ “Mbulanɔ vɛ̃ kɛ Gale kɛ li nza i ni, a hã we duzu Tɛmpɛloe 'da a ni, winɔ wa dɛ sɛ ma do wala olo nɛ ngboo. Da dɛ kɔ zã a nɔ̃lɔ̃ dɛ tɛ winɔ 'da mi, tabi dɛ tɛ mi, do obe zã mi gɔ.

²⁴ Dɛ ngɔ nɛ, lɛ mbese 'bɔ Owi fɔmɔ mbilinɔ na, ma wè na, wa kala mbili tako, do mbili mbɛti tambala nyanga wi kɔ̃ onganganɔ, do olevitɛnɔ, do Owi ga Zumanɔ kɔ Tɛmpɛloe, do Owi zɔ mɔ nu tɔanɔ, do Owi gala olevitɛnɔ, do tala owi dɛa tonɔ kɔ tɔa Tɛmpɛloe gɔ.

²⁵ “We mɔ Ɛsdrasi, do hã zã kɛ mɔ kpa kɔ 'buku mbula 'da Gale kɔ̃ mɔ gɛ, mɔ sáká Owi gɔnɔ we kɔ owinɔ. Toe 'da wa sɛ a 'bili we do bɔlɔ nɛ hã wanɔ vɛ̃ kɛ wa ĩ ti mbula 'da Gale ni. Nɛ wanɔ kɛ wa ĩ̀ ti mbula 'da Gale gɔ ni, mɔ be sɛ ma hã wa.

²⁶ Kɔ 'do nɛ, hã wele bɛ̃ we dɛ mbula 'da Gale, tabi a bɛ̃ mbula 'da mi gã nwa nde, nɛ wa hã́ etumbu kɛ ma wia do a ni hã a. Tabi wa gbɛ a, tabi wa ndaka a kɔ winɔ, tabi wa kala mɛnɔ 'da a vɛ̃, tabi wa fi a bɔlɔkɔ.”

Ɛsdrasi hã iɔ̃nae hã Gale

²⁷ Nɛ Ɛsdrasi tɔ̃ na: “E kɔ NWA Gale 'da oyaa lɛ kpa dɔ̃lɔ̃ li, we duzu kɛ a ia linggamɔ kɔ sila gã nwa we dɔnggɔ Tɛmpɛloe 'da a tɛ Yeruzalɛmɛ.

²⁸ NWA Gale bia dia zã 'da a hã mi dɛ gbali gã nwa, do Owi tɔ̃ mbula hã a, do ogã wi olo li a. Nɛ wila nu 'da Gale ma hã kpã sila hã mi. Ma kɛ mi ngbula li okpasa wi Israɛlɛ, we si do mi dɛ Yeruzalɛmɛ i.”