Ɛsdrasi 6 - WE NU GALE 1995

Gã nwa Dariusi gisa nu mbɛti

¹ Nɛ 'do nɛ, nɛ gã nwa Dariusi ba nu a na, wa fa kɔ otɔanɔ tɛ Babilɔnɛ kɛ wa usu do oã mbɛtinɔ do odia mɛnɔ ni.

² Nɛ wa fa gbaa, nɛ wa kpa kasa mbɛti kɛ wa kɔma gã gulu we olo nu nwa tɛ kɔ le Ɛkbatanɛ kɔ nɛ ni. Le ni ma tɛ ngɔ 'bili tɛ nù Medi, nɛ gba ngbo zĩ ma takpa. Nɛ wa kɔma kɔ mbɛti ni na:

³ “Do kɔ kuti sabɛlɛ kɛ Sirusi dɛa do to nwa ni, nɛ a hã mbula gɛ na: Tɛmpɛloe 'da Gale tɛ Yeruzalɛmɛ ma ndó dɛ tɛ̃ ɛ. Wa dɛ sɛ ma dɛ ã olo nɛ zɛ́ dati ni, takɔ wa gbɛ osa'de dɛ di ni we dɔnggɔ do Gale. Nɛ 'da du nɛ sɛ a mɛtrɛ 'bu nɛ talɛ, nɛ 'da dɔ nɛ sɛ a mɛtrɛ 'bu nɛ talɛ.

⁴ Wa a sɛ ngɔ gili ogã ta talɛ dɛ 'do ngbɛ ɛ, nɛ ngɔ gili oma'baya kpo. Mbili oso do mɛnɔ ni vɛ̃, ma yolo sɛ kɔ kɛsi 'da ɛ nwa.

⁵ Nɛ nde okpana mɔ mbalinɔ do ofɛ̃a mɔ bolonɔ, kɛ Nabukɔdɔnɔzɔrɛ kala zi tɛ kɔ Tɛmpɛloe 'da Gale tɛ Yeruzalɛmɛ, nɛ a si nɛ dɛ Babilɔnɛ i ni, wa gésé mɛnɔ ni kpo do kpo dɛ olo nɛ tɛ kɔ Tɛmpɛloe tɛ Yeruzalɛmɛ.”

⁶ We duzu ma, gã nwa Dariusi kɔma mbɛti hã Tatɛnai, gã wi fɔmɔ nùi kulu lì Efratɛ kɛ si 'biti gɛ̃a wese, do Sɛtarɛ-Boznai, do ongba wa wi fɔmɔ nùnɔ na: “Nɛ tɛ lè kɔ we ni gɔ.

⁷ Nɛ lá Oyudanɔ fioo, hã wa dɛ mbé Tɛmpɛloe 'da Gale. Ma wia na, gã wi fɔmɔ le do okpasa winɔ 'da Yudanɔ, wa dɛ mbé Tɛmpɛloe de ã olo nɛ ni.

⁸ “Mi tɔ̃ hã nɛ na, nɛ gálá okpasa winɔ 'da Yudanɔ tɛ dɛ mbé tɔa Tɛmpɛloe. Nɛ nɛ zɔ̀ na mbili oso do mɛnɔ vɛ̃, ma yóló fai kɔ kɛsi 'da mi nwa. Mbili ni, ma yolo do wala 'da tako kɛ wa kala kɔ owinɔ ngɔ nùi ni. Nɛ nɛ zɔ na ma dɛ tɛ̃ ɛ do wala olo nɛ ngboo.

⁹ Nɛ zɔ na tũ kpo kpo, nɛ nɛ hã mɛnɔ kɛ onganganɔ tɛ Yeruzalɛmɛ wa do wɔ nɛ ni hã wa, ɔ nɛ kɛ wa aka nɛ ni. Nɛ hã wili ngɔmbɔ, do wili bata, do obe nɛ, we dɔ we dɔnggɔ do Gale kɛ li nza i ni. Nɛ nɛ hã 'bɔ kpalɛ ble, do tɔ̃, do dɔ̃, do nɔ, we dɔnggɔ do Gale.

¹⁰ Na mɛ ni, nɛ wa hã sɛ mɛnɔ kɛ ma hã yangga hã Gale kɛ li nza i ni, we dɔnggɔ do a. Nɛ wa sambala sɛ we mi gã nwa, do we obulu benɔ 'da mi.

¹¹ “Hã fala kɛ wele kpo bɛ̃ we dɛ mbula gɛ, nɛ wa fó ma'baya kpo kɔ tɔa 'da a, nɛ wa zĩ́ ma, nɛ wa gãlã a nu nɛ, nɛ wa gbɛ a, nɛ wa 'danga tɔa 'da a do'do.

¹² E kɔ Gale kɛ a be ngawi 'da a tɛ Yeruzalɛmɛ fai ni, a do tɛ̃ a, a hã etumbu hã nwanɔ do nu kɔnggɔnɔ vɛ̃, kɛ wa bɛ̃ sɛ we dɛ mbulanɔ 'da mi, nɛ wa yamba sɛ we e kɔ̃ wa tɛ Tɛmpɛloe gɛ, we 'danga ma ni. Wi a mi gã nwa Dariusi, mi hã mbula gɛ na, ma dɛ tɛ̃ ɛ ngboo.”

¹³ We duzu ma, Tatɛnai, gã wi fɔmɔ nùi kulu lì Efratɛ kɛ si 'biti gɛ̃a wese, do Sɛtarɛ-Boznai, do ongba wa, wa zila mbula kɛ gã nwa Dariusi hã ni, nɛ wa dɛa mbula ni ngboo.

Ɛngga e tɔa Tɛmpɛloe dɛ kɔ̃ Gale

¹⁴ Nɛ okpasa winɔ 'da Yudanɔ wa ndua 'bɔ dɛ to Tɛmpɛloe do yangga, nɛ mbé mɔ kele ti wa bina. Wa kpa kpã sila ni we duzu owi gba olo nu Gale, Aze do Zakaria, be 'da Ido. Nɛ wa dɛa tɔa Tɛmpɛloe gbaa, nɛ ma ia nɛ́ tɛlɛ tɛ kɛ Gale 'da obe Israɛlɛ hã do mbula, do kɛ Sirusi, do Dariusi, do Artasɛrsɛsi, ogã nwa ngɔ nù Pɛrsɛ wa ba zi do nu wa ni.

¹⁵ Tɔa Tɛmpɛloe ia do zɛkɛ 'da 'bu ngɔ nɛ bɔa, tabi zɛkɛ Adarɛ, kɔ̃ nɛ talɛ, do kɔ gazɛlɛ sabɛlɛ dɛa to 'da gã nwa Dariusi.

¹⁶ Obe Israɛlɛ kɛ wa 'bana zi dɛ ngɔ nù Yuda, mba do onganganɔ, do olevitɛnɔ, do tala Oyudanɔ kɛ wa yula kɔlɔ 'duli ni, wa dungu ɛngga e tɔa Tɛmpɛloe dɛ kɔ̃ Gale do yangga.

¹⁷ Nɛ wa hã osa'denɔ gɛ we dɔnggɔ do Gale do 'da fala ɛngga ni: wili ngɔmbɔ kama kpo, do owili bata kama bɔa, do obe bata kama nalɛ. Nɛ wa hã 'bɔ wili dua 'bu ngɔ nɛ bɔa, dua kpo kpo do 'da zu nu kpala wele do wele, we gbɛ hã Gale, takɔ ma fo ku'da 'dã mɛnɔ zu obe Israɛlɛ vɛ̃.

¹⁸ Wa a onganganɔ, do olevitɛnɔ, do ngɔ gili wa kpi do kpi, nɛ wele do wele dɛa toe 'da Gale kɔ Tɛmpɛloe tɛ Yeruzalɛmɛ i, nɛ́ tɛlɛ tɛ kɛ Mɔizɛ kɔma zi kɔ 'buki 'da a ni.

Oyudanɔ wa dungu ɛngga Hɔ Nza kɔ Ngbá

¹⁹ Sabɛlɛ 'do ki ni, nɛ wanɔ vɛ̃ kɛ wa yula zi kɔlɔ 'duli i ni, wa dungu ɛngga Hɔ Nza kɔ Ngbá do zɛkɛ 'da bɔa, kɔ̃ nɛ 'bu ngɔ nɛ bɔa.

²⁰ Onganganɔ do olevitɛnɔ wa fɔla zi tɛ wa we hɔ sa wi li Gale, ɔ nɛ kɛ mbula tɔ̃a ni. Nɛ olevitɛnɔ wa gbɛa obe bata we dɔnggɔ do Gale, we lengge hɔa nza 'da wa obe Israɛlɛ kɔ ngbá. Olevitɛnɔ wa gbɛa osa'denɔ ni we owinɔ wa yula kɔlɔ 'duli, do onya wa onganganɔ, do we wa wele nɛ ngboo.

²¹ Nɛ obe Israɛlɛ vɛ̃, wanɔ wa yula kɔlɔ 'duli, mba do wanɔ wa 'bana zi dɛ ngɔ nù Yuda, nɛ wa bɛ̃a zi gɛnɛ 'dã dɛa mɛ 'da ogele winɔ di ni ni, wa mba ngba wa, nɛ wa nyɔngɔ mɔ ɛngga ni we dɔnggɔ NWA Gale 'da wa obe Israɛlɛ.

²² Nɛ wa dungu 'bɔ ɛngga Nyɔngɔ Mapa kɛ wa à ina hana mapa tɛ nɛ gɔ ni, do yangga kɔ sila wa 'do tũ sambo. NWA hã zi yangga hã wa wena, we kɛ a ia zi dia linggamɔ kɔ sila gã nwa Dariusi dɛ 'da wa obe Israɛlɛ. We duzu ma, wa kpa zi kpã sila we dɛ mbé Tɛmpɛloe 'da Gale 'da wa dɛ olo nɛ.