Ɛsdrasi 5 - WE NU GALE 1995

Oyuda wa ndua 'bɔ dɛa to Tɛmpɛloe

¹ Do 'da fala ni, nɛ Owi gba olo nu Gale, Aze, do Zakaria, be 'da Ido, wa tɔ̃ hã Oyudanɔ tɛ Yeruzalɛmɛ do wanɔ tɛ Yuda na: “Gale 'da lɛ obe Israɛlɛ kɔ̃a na, lɛ ndo 'bɔ dɛa to tɔa Tɛmpɛloe.”

² Nɛ Zorobabɛlɛ, be 'da Sealtiɛlɛ, do Yesua, be 'da Yosadakɛ, wa hã tɛ wa we dɛ to tɔa Tɛmpɛloe 'da Gale tɛ Yeruzalɛmɛ ni. Nɛ Owi gba olo nu Gale wa gala wa tɛ nɛ.

³ Do 'da fala ni, nɛ Tatɛnai, gã wi fɔmɔ nùi kulu lì Efratɛ kɛ si 'biti gɛ̃a wese, fala nɛ kpo do Sɛtarɛ-Boznai, do ongba wa, wa tɛa, nɛ wa kpa Oyudanɔ, nɛ wa aka wa na: “Wi hã nu ɛ hã nɛ na, nɛ ndo a dɛlɛ Tɛmpɛloe a wio nde?

⁴ Ma wia na, nɛ hã li winɔ kɛ wa dɛ toe gɛ hã lɛ.”

⁵ Nɛ nde Gale zi fala nɛ kpo do okumunɔ 'da Oyudanɔ. Nɛ Owi fɔmɔ lenɔ wa 'bili na, Oyudanɔ wa dɛ toe kpa, kɔ lo dɛ mbɛti hã nwa Dariusi, kɔ a tɔ̃ we si ngɔ nɛ sɛ nɛ de.

Owi fɔmɔ lenɔ wa tumba mbɛti hã gã nwa Dariusi

⁶ Nɛ zélé we kɔ mbɛti kɛ Tatɛnai, do Sɛtarɛ-Boznai, wi fɔmɔ nùnɔ, do ongba wa, wi fɔmɔ nù kulu li Efratɛ kɛ si 'biti gɛ̃a wese, wa tumba hã gã nwa Dariusi gɛ.

⁷ Wa kɔma na: “Aa gã nwa Dariusi, e kɔ mɔ kpa dia dungu!

⁸ Nwa, lɛ mbese mɔ na, lɛ nɛa ngɔ nù Yuda, nɛ lɛ hɔa tɛ Tɛmpɛloe 'da Gale 'da Yudanɔ. Lɛ hɔa i mɔ, nɛ nde wa ndua 'bɔ dɛ tɔa Tɛmpɛloe ni do ogã ta, nɛ wa a oma'baya zã dɛlɛnɔ. Wa dɛ tɔa ni do dia nɛ, do hɛ̃lɛ̃, nɛ ma gɔ nɔ wena.

⁹ “Lɛ aka okpasa wi lenɔ si ngɔ toe na, wa sa li wi kɛ a hã nu a hã wa na, wa a dɛlɛ tɔa Tɛmpɛloe ni.

¹⁰ Nɛ lɛ aka 'bɔ wa we hã li winɔ wa ka mɔ tɛ toe ni, takɔ lɛ kɔmɔ, hã lɛ tombo nɛ hã mɔ.

¹¹ Nɛ wa gisa hã lɛ na, lo a Owi dɛa tonɔ 'da Gale, kɛ a ngɔ li nza do nùi gɛ. Hã lo dɛ 'bɔ Tɛmpɛlo kɛ mbe gã nwa ngɔ nù Israɛlɛ kpo dɛa ma zɛ́ belee ni.

¹² Nɛ 'do kɛ oyaa lo wa nɔ̃lɔ̃ zã Gale kɛ li nza i ni, nɛ a a lo ti mbula 'da Nabukɔdɔnɔzɔrɛ, nwa ngɔ nù Babilonia, wi Salde. Nɛ nwa ni hã a 'danga Tɛmpɛloe 'da Gale, nɛ a kala winɔ si do wa kɔlɔ 'duli tɛ Babilɔnɛ i ni.

¹³ Ndo do kuti sabɛlɛ dɛa to 'da gã nwa Sirusi ngɔ nù Babilonia, nɛ a ba nu a na, lo Oyudanɔ, lo ndo dɛ mbé Tɛmpɛloe 'da Gale.

¹⁴ Nɛ a ba 'bɔ nu a na, wa le kɔ tɛmpɛlo tɛ Babilɔnɛ, hã wa ngɛmɛ li okpananɔ kɛ ma wia do to kɔ tɔa Tɛmpɛloe Yeruzalɛmɛ i ni. Kpananɔ ni, mɛ a kɛnɔ wa dɛa do mɔ mbali, do fɛ̃a mɔ bole kɛ zi Nabukɔdɔnɔzɔrɛ kala kɔ Tɛmpɛloe tɛ Yeruzalɛmɛ, we a kɔ tɛmpɛloe tɛ Babilɔnɛ i ni. Wa dɛa ní, nɛ Sirusi hã ma hã Sɛsɛbasarɛ, wi kɛ a saka a do gã wi fɔmɔ nù Yuda ni.

¹⁵ Nɛ a ba 'bɔ mbé nu a na, a sí do mɛnɔ ni, kɔ a gese sɛ dɛ kɔ Tɛmpɛloe tɛ Yeruzalɛmɛ, 'do kɛ lo dɛ sɛ 'bɔ ma dɛ ã olo nɛ ni.

¹⁶ Yolo do ngba soe ni, nɛ Sɛsɛbasarɛ tɛa dɛ Yeruzalɛmɛ, nɛ a ndua nyanga tɔa mbé Tɛmpɛloe 'da Gale. Nɛ ndo do 'da fala ni, dɛa tonɔ tɛ dɛ tɛ̃ ɛ, nɛ nde ma è gɔ.

¹⁷ “Aa Nwa, mɔ kɔ̃́, nɛ wa fá kɔ oã mbɛtinɔ 'da gã nwanɔ tɛ Babilɔnɛ, we ĩ na gã nwa Sirusi ba nu a na, wa ndo dɛ mbé Tɛmpɛlo tɛ Yeruzalɛmɛ do gbãlã we nde? Nɛ mɔ tɔ̃ 'bɔ linggamɛ 'da mɔ ngɔ nɛ hã lɛ.”