Ɛsdrasi 4 - WE NU GALE 1995

Owi sɛnɛ Oyuda wa fa we 'danga toe 'da wa

¹ Owi sɛnɛ Oyuda do Obɛnzamɛ, kɛ wa ɔ zi ngɔ nùi ni, wa nɛa we zele na, Oyudanɔ wa si kɔlɔ 'duli, kɔ wa tɛ dɛ mbé Tɛmpɛlo hã NWA Gale 'da wa obe Israɛlɛ ni,

² nɛ wa tɛa, nɛ wa kpa Zorobabɛlɛ do okpasa wi nu fɛlɛ kulanɔ, nɛ wa tɔ̃ hã wa na: “Lɛ kɔ̃a we gala nɛ tɛ dɛa to tɔa Tɛmpɛloe gɛ! Tua kɛ ndo do kɛ Asaradoni, nwa ngɔ nù Asiri 'dɔlɔ lɛ dɛ dɛ ni, lɛ dɔnggɔ kpo kpo Gale 'da nɛ, nɛ lɛ hã 'bɔ sa'de we gbɛ hã a.”

³ Nɛ Zorobabɛlɛ, do Yesua, do ombe gele kpasa wi nu fɛlɛ kulanɔ 'da Oisraɛlɛ, wa gisa hã wa na: “Lɛ kɔ̃̀ na, nɛ gala lɛ we dɛ to Tɛmpɛlo hã Gale 'da lɛ gɔ. Lɛ zu lɛ kpo, lɛ dɛ sɛ ma, we kɛ mɛ sɛ a Tɛmpɛlo 'da NWA Gale 'da lɛ. Sirusi, gã nwa ngɔ nù Pɛrsɛ do tɛ̃ a hã 'bɔ nu a ní.”

⁴ Winɔ ngɔ nùi ni, wa ma ngɔ fa we 'danga linggamɔ zu Oyudanɔ, takɔ kili ba wa, hã wa la fala dɛ tɔa Tɛmpɛloe.

⁵ Ndo do 'da fala dɛa to nwa 'da Sirusi, gã nwa ngɔ nù Pɛrsɛ, gbaa we hɔ tɛ kɛ 'da Dariusi, owinɔ ngɔ nùi ni wa tɛ hã mbili hã owi tɔ̃ mbula hã nwa na, wa 'danga linggamɛ 'da Oyudanɔ, kɔ wa la fala dɛ tɔa Tɛmpɛloe do'do.

Wa da Oyuda hã gã nwa Artasɛrsɛsi

⁶ Do ndo nyanga dɛa to nwa 'da gã nwa Sɛrsɛsi, nɛ owi sɛnɛ Oyudanɔ wa tombo mbɛti hã a. Nɛ dɛ kɔ mbɛti ni, wa tɔ̃a we 'da Owi Yeruzalɛmɛ, do owi ngɔ nù Yuda.

⁷ 'Da fala dɛa to nwa 'da Artasɛrsɛsi, gã nwa ngɔ nù Pɛrsɛ, nɛ Bisɛlamɛ, do Mitredatɛ, do Tabeɛlɛ do ongba wa, wa kɔma 'bɔ mbɛti hã gã nwa. Mbɛti ni, wa kɔma do tɛlɛ tɛ kɔma mɛ 'da Oaramenyɛ, do lɛnggɛ Aramenyɛ 'bɔ.

⁸ Rɛhumɛ, gã wi fɔmɔ le, do kosolo a Simɛsai, wa kɔma 'bɔ mbɛti ngɔ Yeruzalɛmɛ hã gã nwa Artasɛrsɛsi. Mbɛti ni ndua nɛ́ kɛ gɛ:

⁹ “Wi a mi Rɛhumɛ, wi fɔmɔ le, do Simɛsai, kosolo mi, lɛ kɔma mbɛti gɛ, fala nɛ kpo do ongba lɛ wanɔ tɛ ngɔ o'bili tɛ nùnɔ gɛ: Dinɛ, Afarsatakɛ, Talpɛlɛ, Afarasi, Erɛkɛ, Babilɔnɛ, Suzɛ, Deha do Elamɛ.

¹⁰ Lɛ kɔma mbɛti gɛ do zu li ogele winɔ kɛ nwa Asnaparɛ 'dɔlɔ lɛ, nɛ lɛ dungu tɛ kɔ lenɔ tɛ ngɔ nù Samaria, do ngɔ tala nùi kɛ kulu lì Efratɛ, si 'biti gɛ̃a wese ni.”

¹¹ Nɛ zélé 'bɔ we kɔ mbɛti ni: “Lɛ kɔma mbɛti gɛ hã mɔ gã nwa, wi a lɛ owi dɛa tonɔ 'da mɔ, kɛ lɛ a wi ngɔ nùi kulu lì Efratɛ i ni.

¹² “Nwa, lɛ tɛ mbese mɔ na, Oyudanɔ kɛ wa yula 'da mɔ i, hã wa si dɛ 'da lɛ nga gɛ, wa hɔa Yeruzalɛmɛ do linggamɔ na, wa 'dafa 'bɔ le dɛ olo nɛ. Nɛ nde owinɔ kɔ le ni sɛ a Owi nga zu, do Owi bɛ̃ we nu mɔ. Wa a nyanga nɛ ia, nɛ wa ma 'bɔ ngɔ a dɛlɛ nɛ ia.

¹³ Aa nwa, mɔ ĩ na, fala kɛ dɛlɛ ma e, kɔ wa zĩ ngbo nu nɛ vɛ̃, nɛ nde winɔ wa fútá sɛ 'bɔ tako, do mbɛti tambala nyanga wi gɔ. Nɛ ma gese sɛ kpamɛ 'da mɔ dɛ 'do wena.

¹⁴ Gulu nɛ a ma wè na, lɛ gɛ kɛ lɛ hã tɛ lɛ we dɛa toe 'da mɔ ni, lɛ kɔ̃̀ na wa hã sape hã mɔ gɔ. Ma kɛ lɛ tɔ̃ we nɛ hã mɔ na,

¹⁵ mɔ fa kɔ oã mbɛtinɔ olo wanɔ dati mɔ ni, nɛ mɔ kpa sɛ do gbãlã we na, owinɔ kɔ le gɛ wa bɛ̃ we nu Onwanɔ bɛ̃a fai. Nɛ wa dɛ 'dã mɔ hã ogã nwa, do ogã wi fɔmɔ 'bili tɛ nùnɔ, nɛ wa fai do linggamɔ dɛ nga zu. We duzu nɛ, ma kɛ wa 'danga zi le ni do'do ni.

¹⁶ Aa nwa, ma wia na lɛ mbese mɔ. Mɔ ĩ́ na, 'da fala wa dɛ le, hã ma e, kɔ wa zĩ ngbo nu nɛ, nɛ nde mɔ sɛ 'bɔ a nwa tɛ kulu lì Efratɛ nga gɔ.”

Gisa nu mbɛti 'da gã nwa Artasɛrsɛsi

¹⁷ Nɛ gã nwa Artasɛrsɛsi gisa nu mbɛti na: “Mi kɔma mbɛti gɛ hã Rɛhumɛ, gã wi fɔmɔ le, do kosolo a Simɛsai, do ongba wa kɛ wa dungu tɛ Samaria, do ngɔ tala nùi kulu lì Efratɛ, si 'biti gɛ̃a wese ni. Mi hã balɛ hã nɛ!

¹⁸ “Wa kifi mbɛti nɛ tumba hã mi ni, nɛ wa tɔlɔ ma hã mi.

¹⁹ Mi ba nu mi na, wa fa kɔ oã mbɛtinɔ, nɛ wa kpa ngboo na, zɛ́ tɛ mɛ fai ni, le Yeruzalɛmɛ bɛ̃ we hã Onwanɔ wena. Nɛ winɔ wa nyɛ́lɛ́ do linggamɔ ba mɔ bolo dɛ kɔ̃ wa, we bɛ̃ do we, do dɛ nga zu hã Onwanɔ gɔ.

²⁰ Zɛ́ dati, mbe Onwanɔ kɛ wa do ngawi wena ni zi tɛ le ni boe. Nɛ wa dungu zi nwa ngɔ 'bili tɛ nùnɔ vɛ̃ kulu lì Efratɛ, si 'biti gɛ̃a wese. Nɛ owinɔ wa futa tako 'da wa do mbɛti tambala nyanga wi dɛ kɔ Onwanɔ ni.

²¹ Kɔ di dɔ̃ ni, mi kɔ̃a na, nɛ ba nu nɛ hã Oyudanɔ na, wa da kɔ̃ wa tɛ dɛa tonɔ 'da wa. Ma wè na, wa 'dafa 'da le gɔ, gbaa na mi ba nu mi do tɛ mi sɛ nɛ de.

²² Nɛ tɛ zɔ̀ we gɛ yala iko, kɔ mi kpa 'bɔ gã ngamɔ kɔ dɛa to nwa 'da mi gbaa gɔ.”

²³ Rɛhumɛ, do kosolo a Simɛsai, do ongba wa, wa nɛa we ĩ wá ti we kɔ mbɛti 'da gã nwa ni, nɛ wa la tɛ Yeruzalɛmɛ i do gɔa nɔ, we e mbula ngɔ Oyudanɔ na, wa da kɔ̃ wa tɛ dɛ tɔa Tɛmpɛloe.

²⁴ Nɛ Oyudanɔ wa da kɔ̃ wa tɛ dɛa to tɔa Tɛmpɛloe 'da Gale tɛ Yeruzalɛmɛ. Nɛ dɛa to nɛ yula nù, gbaa we hɔ kɔ bɔa sabɛlɛ dɛa to nwa 'da Dariusi, gã nwa ngɔ nù Pɛrsɛ.