Ɛsdrasi 3 - WE NU GALE 1995

Yesua do Zorobabɛlɛ wa 'dafa 'da gbagala gbɛ do sa'de hã Gale

¹ Ma nɛa we hɔ tɛ zɛkɛ 'da sambo, nɛ nde obe Israɛlɛ wa si dɛ kɔ lenɔ 'da wa ia. Nɛ wa mba li ngba wa tɛ Yeruzalɛmɛ, nɛ sila wa zi vɛ̃ kpo.

² Nɛ Yesua, be 'da Yosadakɛ, kulu ngɔ do onya a onganganɔ, fala nɛ kpo do Zorobabɛlɛ, be 'da Sealtiɛlɛ do onya a, nɛ wa 'dafa gbagala gbɛ do sa'de hã Gale 'da obe Israɛlɛ. Wa dɛa fala ni we dɔ do sa'de we dɔnggɔ do Gale, nɛ́ kɛ mbula 'da Mɔizɛ, wi 'da Gale tɔ̃a ni.

³ Wa 'bana zi dɛ kili winɔ wa ɔ zi ngɔ nùi ni do 'da fala wa la kɔlɔ 'duli ni. Gɛnɛ kɔ na mɛ ni, nɛ nde wa 'dafa fala ni dɛ ã olo nɛ zɛ́ ni, takɔ wa gbɛ sa'de we dɔnggɔ do Gale. Nɛ wa gbɛa osa'de we dɔnggɔ do NWA Gale do titole, do gɛ̃a wese.

⁴ Nɛ wa dungu ɛngga Ɔ ti Da, nɛ wa gbɛ sa'de we dɔnggɔ do Gale tũ kpo kpo, nɛ́ kɛ mbula tɔ̃a ni.

⁵ Nɛ 'do ki ni, nɛ wa ma ngɔ dɔ sa'de we dɔnggɔ do Gale 'do ngbɛ ɛ do 'do ngbɛ ɛ, nɛ wa dɔa 'bɔ mbe we mbé hɔa zɛkɛ, nɛ mbe we ɛngganɔ 'da NWA kɛ a ia ma ni. Nɛ wa dɔa 'bɔ mbe we winɔ, kɛ wa dɔnggɔ nwa do mɛnɔ 'da wa do dia kɔ sila iko ni.

⁶ Ndo do kuti tũi kɔ zɛkɛ 'da sambo, gɛnɛ kɔ wa tɛ à nyanga Tɛmpɛloe 'da NWA gɔ, nɛ nde wa ndua dɔ sa'de we dɔnggɔ do a ia.

Wa ndua nyanga dɛ tɔa Tɛmpɛloe

⁷ 'Do nɛ, nɛ wa hã mbili hã Owi dɛa tonɔ na, wa gba ta, nɛ wa sɛ ma'baya. Nɛ wa tombo do nyɔngɔmɔ, do dɔ̃, do nɔ hã owi Sidoni do Owi Tirɛ, takɔ wa tombo do ma'baya sɛdrɛ ngɔ nù Libanɛ hã wa. Ma wia na, wa tombo do mɛnɔ ni do wala ngɔ gba lì, we hɔ tɛ nu lì tɛ Yafa. Wa wia zi we dɛ ni, we kɛ Sirusi, gã nwa ngɔ nù Pɛrsɛ ba zi wala hã wa we nɛ.

⁸ Yolo tɛ zɛkɛ 'da bɔa, kɔ bɔa sabɛlɛ 'do kɛ wa si dɛ Yeruzalɛmɛ, gã le kɛ Tɛmpɛloe 'da Gale kɔ nɛ ni, nɛ wa ndua dɛa to Tɛmpɛloe. Nɛ owinɔ wa dɛ zi toe ni, wi a Zorobabɛlɛ, be 'da Sealtiɛlɛ, do Yesua, be 'da Yosadakɛ, fala nɛ kpo do onya wa ombe onganganɔ, do olevitɛnɔ, do owanɔ vɛ̃ kɛ wa yula tɛ kɔlɔ 'duli i ni. Nɛ wa saka olevitɛnɔ, kɛ wa do 'bu sabɛlɛ bɔa, we la dɛ ngɔ ni, we zɔ mɔ tɛ dɛa to Tɛmpɛloe 'da NWA Gale.

⁹ Nɛ Yesua, do obenɔ 'da a, do onya a, wa zi a wi zɔ mɔ tɛ owinɔ kɛ wa dɛ toe kɔ tɔa Tɛmpɛloe 'da Gale ni. Nɛ owinɔ wa zɔa 'bɔ mɔ tɛ Owi dɛa tonɔ ni, wi a Kadmiɛlɛ do obenɔ 'da a, obenɔ 'da Yuda, obenɔ 'da Henadadɛ do obe yaa a, do onya wa olevitɛnɔ vɛ̃.

¹⁰ Do 'da fala kɛ Owi dɛ tɔanɔ wa tɛ a nyanga Tɛmpɛloe 'da NWA ni, nɛ wa tombo hã onganganɔ na, wa he'de tulu sambala 'da wa, kɔ wa tɛ, hã wa yolo do mɔtũlũ, nɛ wa dama we dɔnggɔ do NWA. Nɛ olevitɛnɔ kɛ wa a obe zã Asafɛ ni, wa yula kɛ 'da wa do mbala mɔ bolo kɛ wa zɛ do ngbɛ ɛ ni, tɛ dɔnggɔ 'bɔ NWA, nɛ́ kɛ Davidi, nwa ngɔ nù Israɛlɛ tɔ̃a zi nɛ ni.

¹¹ Wa dɔngga NWA, nɛ wa hã dɔ̃lɔ̃ li hã a, nɛ wa ga zuma, nɛ wa kɔ̃ nu nɛ do 'do ngba wa na: “NWA do kɔ̃a zã dɛ 'da Oisraɛlɛ, nɛ kɔ̃a zã ni do ndɔti nɛ bina!” Nɛ owinɔ wa hia mɔ dɛ ngɔ we dɔnggɔ NWA, we kɛ Owi dɛ tɔanɔ wa tɛ a nyanga tɔa Tɛmpɛloe 'da NWA.

¹² Nɛ do 'da fala kɛ wa tɛ a nyanga mbé tɔa Tɛmpɛloe ni, nɛ nde ogili onganganɔ, do olevitɛnɔ, do okpasa wi nu fɛlɛ kulanɔ, wa zi boe. Nɛ okpasa winɔ kɔ wanɔ wa zɔa zɛ́ ã Tɛmpɛloe zɔa ni, wa he wena. Nɛ gili ombe winɔ wa tɛ be yangga 'da wa, do kɔ̃ nu hiamɛnɔ dɛ ngɔ.

¹³ Na mɛ ni, wa wè zi tɛ gɔnɔ sanga hiamɔ yangganɔ do hia kɔ̃anɔ 'da winɔ gɔ, we kɛ winɔ vɛ̃ wa he zi mɔ nganda wena, nɛ ma wele zi nyɛlɛ wena.