Ɛsdrasi 10 - WE NU GALE 1995

Oyudanɔ wa bɛ̃a owuko gele nunɔ

¹ Do 'da fala kɛ Ɛsdrasi gu gba zugolo dɛ dati Tɛmpɛloe tɛ he nɛ, do sambala Gale we fo 'dã mɛ zu Oyudanɔ ni, nɛ nde ngɔ gili Yudanɔ, owi wili do owuko do obe, wa mba li ngba wa dɛ kɛ zã a. Nɛ owinɔ vɛ̃ wa mba tɛ mɛ 'bɔ do a tɛ he kɔ̃a ni.

² Nɛ Sɛkania, be 'da Yehiɛlɛ, nu fɛlɛ kula 'da Elamɛ, tɔ̃ hã Ɛsdrasi na: “Lɛ dɛa 'dã mɔ dɛ 'da Gale gã wena, we kɛ lɛ kala ogele wukonɔ ngɔ nùi gɛ. Kɔ gɛnɛ kɔ na mɛ ni, nɛ nde lɛ obe Israɛlɛ lɛ 'bana dungu nza.

³ Kɔ ma wia na, lɛ kpo mbulu hã Gale na, lɛ bɛ̃ sɛ owuko gele nunɔ do benɔ 'da wa vɛ̃. Lɛ dɛ sɛ olo mbula kɛ mɔ tɔ́a ni. Nɛ lɛ dɛ sɛ 'bɔ olo nu owinɔ kɛ wa dɛ kili mbula 'da Gale 'da lɛ dɛa ni. E kɔ lɛ dɛ mɛnɔ vɛ̃ kɛ mbula 'da Gale tɔ̃a ni.

⁴ Ma wia na, mɔ kulu ngɔ, kɔ mɔ dɛ toe 'da mɔ. Lɛ sɛ do mɔ fala nɛ kpo we gala mɔ. Mɔ kpãlã sila mɔ, kɔ mɔ dɛ́ mɛ kɛ mɔ ĩ na, ma wia ni.”

⁵ Ɛsdrasi kulu ngɔ, nɛ a tɔ̃ hã onwa nganganɔ, do olevitɛnɔ do tala okpasa wi nu fɛlɛ kula 'da Israɛlɛ na, wa kana tɛ wa nɛ́ kɛ Sɛkania tɔ̃a ni. Nɛ wa vɛ̃ wa kana tɛ wa na mɛ ni.

⁶ Nɛ Ɛsdrasi hɔa nza kɔ ngbo Tɛmpɛloe 'da Gale do'do, nɛ a nɛ dɛ nu tɔa 'da Yohananɛ, be 'da Eliasibɛ, nɛ a dungu nù dɛ di ni. Nɛ a bɛ̃a na, ɛ nyɔ́ngɔ́ mɔ, nɛ ɛ nɔ́ lì gɔ, we kɛ sila ɛ zɛlɛ wena we o'dã mɛnɔ kɛ onya ɛ obe Yuda wa dɛa ni.

⁷ Nɛ wa sa mbula tɛ Yeruzalɛmɛ, do ngɔ nù Yuda na, owinɔ vɛ̃ kɛ wa yula kɔlɔ 'duli i ni, wa mba li ngba wa dɛ Yeruzalɛmɛ.

⁸ Ogã winɔ do okpasa wi nu fɛlɛ kulanɔ, wa 'bili na, wa hã tũ talɛ hã wa, kɔ wi kɛ a hɔ́ gɔ, nɛ wa kálá mɛnɔ 'da a vɛ̃, nɛ wa ndáká a kɔ owinɔ 'da Gale do'do.

⁹ Olo nɛ la tũ talɛ, nɛ Owi nu kpala Yuda, do Owi nu kpala Bɛnzamɛ vɛ̃ wa tɛa dɛ Yeruzalɛmɛ. Wa hɔa do kɔ zɛkɛ 'bu nɛ bɔa, zɛkɛ 'da kusi, nɛ́ kɛ okpasa winɔ wa wia zi ni. Nɛ owinɔ wa mba li ngba wa tɛ li fanda Tɛmpɛloe 'da Gale. Do 'da fala ni, nɛ nde kolo tɛ zi wena. Nɛ tɛ winɔ tana zi wena, we lɛnggɛ kɛ wa zila ni, mba do kole.

¹⁰ Nɛ 'do nɛ, nɛ nganga Ɛsdrasi kulu ngɔ, nɛ a tɔ̃ hã wa na: “Aa onyae, obe Israɛlɛ, nɛ dɛa 'dã mɔ gã wena, we kɛ nɛ kala owuko gele nunɔ. Mɛ a 'dã mɔ kɛ nɛ dɛa dɛ ngɔ gele 'dã mɛnɔ 'da winɔ 'da lɛ.

¹¹ We duzu ma, ma wia na, nɛ gbala 'dã mɛnɔ 'da nɛ hã NWA Gale 'da oyaa lɛ, nɛ nɛ dɛ́ mbula 'da a. Nɛ gɔ́nɔ́ sanga tɛ ngba nɛ do ogele winɔ ngɔ nùi gɛ, nɛ nɛ bɛ̃ gɛnɛ owuko gele nunɔ do'do.”

¹² Nɛ owinɔ vɛ̃ kɛ wa mba zi li ngba wa ni, wa he mɔ na: “Mɔ tɔ̃a gbãlã we! Ma wia na, lɛ dɛ nɛ́ kɛ mɔ tɔ̃a hã lɛ ni.

¹³ Kɔ ɔ nɛ kɛ lɛ dɛlɛ wena, nɛ mɛ a zɔlɔ li kolo ni, ní a ma wé sɛ na lɛ yolo dɛ nza gɛ gɔ. Dɛ ngɔ nɛ, lɛ wé sɛ we 'dafa we gɛ 'do tũ kpo, tabi tũ bɔa iko gɔ, we kɛ we ni ba gba gili Owele kɔ lɛ gɛ wena.

¹⁴ Ma wia na, okpasa wi nu fɛlɛ kulanɔ 'da lɛ, wa 'bana dɛ Yeruzalɛmɛ gɛ, we 'dafa we gɛ ngɔ lɛ owinɔ 'da Gale. Wele do wele, kɛ a ba zi wuko gele nu ni, a hɔ sɛ dati wa do kɔ̃ tũi kɛ wa wia hã a ni. Nɛ ma wia na, okpasa winɔ do Owi gɔnɔ we kɔ le 'da a, wa tɛ sɛ fala nɛ kpo do a. Nɛ lɛ 'dafa we gɛ do dia nɛ, gbaa na gã nɔ̃lɔ̃ zã 'da Gale 'da lɛ ma e.”

¹⁵ Sanga owinɔ ni vɛ̃ Yonatanɛ, be 'da Asaɛlɛ, do Yazia, be 'da Tikava, wa kɔ̃̀ zi 'bili we ni gɔ. Nɛ Mɛsulamɛ, do Sabɛtai kɛ a a levitɛ ni, wa si 'do wa. Nɛ tati a owinɔ ni hã wa bɛ̃a 'bili we ni.

¹⁶ Nɛ tala obe Israɛlɛ kɛ wa yula kɔlɔ 'duli ni, wa kɔ̃a ma vɛ̃. Nganga Ɛsdrasi saka okpasa wi kɔ nu fɛlɛ kula kpo kpo, nɛ a kɔmɔ li wa. Nɛ kpasa wi nu fɛlɛ kulanɔ ni, wa mba ngba wa do zɛkɛ 'da 'bu, kɔ̃ nɛ kpo, we 'dafa wenɔ vɛ̃.

¹⁷ Nɛ do zɛkɛ 'da kpo, kɔ̃ nɛ kpo, kɔ sabɛlɛ 'do nɛ ni, nɛ wa 'dafa we 'da winɔ vɛ̃ kɛ wa kala zi owuko gele nunɔ ni, nɛ ma e.

LI OYUDANƆ KƐ WA KALA OWUKO GELE NUNƆ Onganganɔ

¹⁸ Kɔ onganganɔ wa kala owuko gele nunɔ do kɛnɛ wa ni, wi zi a: Obe zã Yesua do onya a, obenɔ 'da Yosadakɛ: Maseya, Eliezɛrɛ, Yaribɛ do Gɛdalia.

¹⁹ Wa kpua mbulu dɛ li winɔ vɛ̃ na, lo bɛ̃ sɛ wukonɔ 'da lo, nɛ lo hã wili ngɔmbɔ do dɔnggamɔ hã Gale na, a fo ku'da 'dã mɛ zu lo.

²⁰ Obe zã Imɛrɛ: Hanani do Zebadia.

²¹ Obe zã Harimɛ: Maseya, Elia, Sɛmaya, Yehiɛlɛ do Uzia.

²² Obe zã Pasɛhurɛ: Eliohenai, Maseya, Ismaɛlɛ, Nɛtaneɛlɛ, Yozabadɛ do Elasa.

Olevitɛnɔ

²³ Kɔ olevitɛnɔ, wi zi a: Yozabadɛ, Simei, Kelaya (kɛ mbee li a zi 'bɔ a Kɛlita), Pɛtahia, Yɛhuda do Eliezɛrɛ.

Owi ga Zumanɔ

²⁴ Kɔ owi ga Zumanɔ, wi zi a Eliasibɛ iko. Kɔ owi zɔ mɔ nu tɔa Tɛmpɛlo, wi zi a: Salumɛ, Telɛmɛ do Uri.

Owi zɔ mɔ nu tɔa Tɛmpɛloe Otala winɔ

²⁵ Kɔ ogele nu kɔnggɔ obe Israɛlɛ, wi zi a: Obe zã Parɔkɛ: Ramia, Izia, Malkia, Miaminɛ, Elazarɛ, Malkia do Bɛnaya

²⁶ Obe zã Elamɛ: Matania, Zakaria, Yehiɛlɛ, Abdi, Yɛremɔtɛ do Elia

²⁷ Obe zã Zatu: Eliohenai, Eliasibɛ, Matania, Yɛremɔtɛ, Zabadɛ do Aziza

²⁸ Obe zã Bebai: Yohananɛ, Hanania, Zabai do Atlai

²⁹ Obe zã Bani: Mɛsulamɛ, Malukɛ, Adaya, Yakubɛ, Sealɛ do Yɛremɔtɛ

³⁰ Obe zã Pahatɛ-Moabɛ: Adna, Kɛlalɛ, Bɛnaya, Maseya, Matania, Bɛsalɛlɛ, Binui do Manase

³¹ Obe zã Harimɛ: Eliezɛrɛ, Isia, Malkia, Sɛmaya, Simoni,

³² Bɛnzamɛ, Malukɛ do Sɛmaria

³³ Obe zã Hasumɛ: Matɛnai, Matata, Zabadɛ, Elifelɛtɛ, Yɛremai, Manase do Simei

^34-42 obe zã Bani: Madai, Amramɛ, Uɛlɛ, Bɛnaya, Bedia, Kɛluhu, Vania, Mɛremɔtɛ, Eliasibɛ, Matania, Matɛnai, Yasai, Bani, Binui, Simei, Selemia, Natanɛ, Adaya, Maknadɛbai, Sasai, Sarai, Azarɛlɛ, Selemia, Sɛmaria, Salumɛ, Amaria do Yozɛfu

⁴³ Obe zã Nebo: Yeyɛlɛ, Matitia, Zabadɛ, Zebina, Yadai, Yɔɛlɛ do Bɛnaya.

⁴⁴ Owinɔ ni vɛ̃ hã wa kala zi owuko gele nunɔ do kɛnɛ wa. Nɛ kɔ wukonɔ ni, ombee nɛ wa kua zi obe.