Ɛsdrasi 1 - WE NU GALE 1995

Sirusi ba nu a we dɛ mbé Tɛmpɛlo tɛ Yeruzalɛmɛ

¹ Do kuti sabɛlɛ dɛa to 'da Sirusi, gã nwa ngɔ nù Pɛrsɛ, nɛ NWA Gale kɔ̃a zi we dɛ olo nu a kɛ a wila zɛ́ do wala 'da wi gba olo nu a Yeremi ni. Nɛ a ia linggamɔ kɔ sila Sirusi na, a sa mbula ngɔ nùi 'da a vɛ̃, nɛ wa kɔmɔ 'bɔ ma do mbɛti. Lɛnggɛ ni ma kɛ:

² “Nɛ zélé wenɔ kɛ Sirusi, gã nwa ngɔ nù Pɛrsɛ tɔ̃a na, wa sa ma do mbula ni. NWA Gale kɛ li nza i, a ia mi na, mi ɔ nwa ngɔ nùnɔ vɛ̃. A hã to hã mi na, mi dɛ mbé tɔa Tɛmpɛlo hɛ̃ ɛ tɛ Yeruzalɛmɛ, ngɔ nù Yuda.

³ E kɔ winɔ sanga nɛ gɛ vɛ̃, kɛ wa a winɔ 'da a ni, wa si dɛ Yeruzalɛmɛ, tɛ ngɔ nù Yuda, kɔ wa dɛ mbé Tɛmpɛlo 'da NWA Gale 'da obe Israɛlɛ, kɛ wa dɔnggɔ a tɛ Yeruzalɛmɛ ni. E kɔ Gale 'da wa ɔ do wa!

⁴ Ma wia na, owinɔ ngɔ nùi 'da mi vɛ̃, wa gala obe Israɛlɛ kɛ wa ɔ sanga wa ni. Wa hã́ fɛ̃a mɔ bolo, do mɔ mbali, do ogele dia mɔ, do onadalamɔ hã wa. Nɛ wa gala 'bɔ wa do mɛnɔ nɛ́ kɛ zã wa kɔ̃a ni, takɔ wa 'dafa do Tɛmpɛlo 'da Gale tɛ Yeruzalɛmɛ i.”

Okuti wi 'dulinɔ wa si

⁵ Nɛ okpasa wi nu fɛlɛ kulanɔ 'da Yuda do Bɛnzamɛ, wa 'dafa tɛ wa we si dɛ Yeruzalɛmɛ, fala nɛ kpo do onganganɔ, do olevitɛnɔ. Nɛ Gale 'dafa linggamɔ zu owinɔ vɛ̃ na, wa ba tɛ wa we dɛ mbé tɔa Tɛmpɛlo tɛ Yeruzalɛmɛ i.

⁶ Ongba wa wi tɔanɔ wa gala wa do omɔ dɛa to, kɛ wa dɛa ma do fɛ̃a mɔ bolo do mɔ mbali. Wa gala 'bɔ wa do ogele dia mɔ, do omɔ olo gã gole, do onadalamɔ. Nɛ wa 'dɔlɔ 'bɔ ogili de mɛnɔ hã wa, takɔ wa 'dafa do Tɛmpɛloe.

⁷ Nɛ gã nwa Sirusi hã nu a, nɛ wa ngɛmɛ li saka mɛnɔ kɛ ma wia do to kɔ tɔa Tɛmpɛloe tɛ Yeruzalɛmɛ i ni. Mɛnɔ ni a mɛnɔ kɛ Nabukɔdɔnɔzɔrɛ kala zɛ́ kɔ Tɛmpɛloe 'da nwa, we a kɔ tɛmpɛlo 'da ogalenɔ 'da a ni.

⁸ Sirusi ba nu a hã Mitredatɛ, wi fɔmɔ mbili na, a hã mɛnɔ ni hã Sɛsɛbasarɛ, wi fɔmɔ nù Yuda.

⁹ Lì mɛnɔ ni, ma kɛ: gã sani mɔ mbali 'bu nɛ talɛ, gã sani fɛ̃a mɔ bolo koto kpo, kɔya 'bu nɛ bɔa ngɔ nɛ kusi,

¹⁰ kɔpɔ mɔ mbali 'bu nɛ talɛ, kɔpɔ fɛ̃a mɔ bolo kama nalɛ do ngɔ nɛ 'bu, do ogele omɔ koto kpo.

¹¹ Nɛ mɛnɔ vɛ̃ kɛ wa dɛa do mɔ mbali do fɛ̃a mɔ bolo ni, ma hɔa koto mɔlɔ do kama nalɛ. Nɛ 'da fala kɛ Sɛsɛbasarɛ kulu zi ngɔ tɛ Babilɔnɛ i, fala nɛ kpo do ombe wi 'dulinɔ, we si dɛ Yeruzalɛmɛ i ni, nɛ a si zi do mɛnɔ ni vɛ̃.