EZEKIƐLƐ 9 - WE NU GALE 1995Le Yeruzalɛmɛ kpa etumbu 1 'Do ki ni, nɛ mi zele gɛlɛ NWA Gale tɛ he mɔ nganda wena na: “Aa nɛ ogele winɔ, kɛ nɛ nɛ hã etumbu hã le gɛ ni, nɛ kálá bolonɔ 'da nɛ dɛ kɔ̃ nɛ, hã nɛ tɛ!” 2 Nɛ mi zɔ owi wili gazɛlɛ, wa yula do nu tɔa Tɛmpɛloe kɛ ngɔ, kɛ ma ka mɔ si gbãlã ngɔ ni, kɔ wa tɛ tɛ nɛ. Nɛ wele do wele do bole kɛ a nɛ 'danga do mɛnɔ ni dɛ kɔ̃ a. Nɛ mi zɔ wi wili dɛ gbogbo wa ni, a hi'da tulu linɛ, nɛ a do mɔ kɔmɔ do mɔ, a yulu ma dɛ kɔ 'dɛ̃ 'da a. Wa tɛa, nɛ wa yolo nù dɛ kɛ zã gbagala tũ mɔ bole ni. 3 Nɛ NWA Gale 'da obe Israɛlɛ, kɛ a dungu ngɔ ohi mɛnɔ kɛ wa ɔ nɛ wele, nɛ sala 'baka wa boe tɛ kɔ Tɛmpɛloe ni kulu ngɔ ngɔ kpongbo nwa do dɔ́lɔ́ li 'da a vɛ̃, nɛ a la dɛ nu tɔa i. Nɛ a sa mɔ hã wi kɛ a he'de tulu linɛ ni, 4 nɛ a tɔ̃ hã a na: “Mɔ bá 'da le, nɛ mɔ yɔlɔ mɔ dati owinɔ vɛ̃ kɛ wa dɛ 'bako, nɛ wa he kɔ̃a we duzu gã 'dã mɛnɔ wa zɔ ma kɔ le gɛ ni.” 5 Nɛ mi zele gɛlɛ Gale tɛ ba nu a hã ogele wi wilinɔ ni na: “Nɛ nɛ́ 'dɔkɔlɔ a, nɛ nɛ gbɛ owinɔ kɔ le. Nɛ tɛ ĩ̀ 'bako hã wa gɔ, nɛ nɛ tɛ dɛ mbɔkɔ li hã wa gɔ. 6 Nɛ gbɛ́ okpasa winɔ, do obe zagbãlãnɔ, obe zɔnganɔ, owukonɔ do obenɔ 'da wa. Nɛ nde nɛ tɛ 'bè tɛ wanɔ kɛ yɔlɔ mɛ dati wa ni gɔ. Nɛ ndó do kɔ Tɛmpɛloe 'da mi gɛ we la do nɛ.” Na mɛ ni, wa ndua do okpasa winɔ kɛ wa zi dɛ dati Tɛmpɛloe ni. 7 Nɛ Gale tɔ̃ 'bɔ na: “Nɛ fáká Tɛmpɛloe! Nɛ dɛ na, wɔlɔnɔ ma kpa do kɔ ngbonɔ gɛ vɛ̃, sɛ nɛ nɛ la dɛ dati de.” Wa la, nɛ wa ma ngɔ gbɛ owinɔ kɔ le. 8 Kɔ wa tɛ gbɛ winɔ ni, nɛ mi gu li mi nù, nɛ mi he mɔ na: “Ee NWA Gale, kɛ zã mɔ nɔ̃lɔ̃ dɛ tɛ le Yeruzalɛmɛ nɛ ge nde gɛ! Mɔ kɔ̃a we kumu tala obe Israɛlɛ kɛ wa 'bana gɛ vɛ̃ nde?” 9 Nɛ a gese hã mi na: “Owi ngɔ nù Israɛlɛ do Yuda, wa dɛa 'dã mɔ kɛ ma gã wena. Wa a tɔkɔ tɛ winɔ nù kpa do ngɔ nùi 'da wa vɛ̃, nɛ fo bɔlɔ zu dɛa mɔ kɔ le bina. Owinɔ wa tɔ̃ na, mi nwa, mi ba li mi ngɔ le gɛ do'do, nɛ mi zɔ́ lo gɔ. 10 Nɛ nde mi dɛ́ sɛ 'bako hã wa gɔ, nɛ mi dɛ́ sɛ mbɔkɔ li hã wa gɔ. Mi kɔ̃a na, wa kpa si olo 'dã mɛnɔ kɛ wa dɛa ni.” 11 Nɛ wi wili kɛ a hi'da tulu linɛ ni kpolo tɛ̃ ɛ, we be gulu mɛ a dɛa ni hã Gale. A na: “Mi dɛa ɔ nɛ kɛ mɔ tɔ́a ni.” |
Ngbaka DC Bible (We Nu Gale) Version © Bible Society of the Democratic Republic of Congo, 1995.
Bible Society of the Democratic Republic of Congo