EZEKIƐLƐ 8 - WE NU GALE 1995

Wa dɔnggɔ kpikima tɛ Yeruzalɛmɛ

¹ 'Do kɛ wa 'dɔlɔ obe Israɛlɛ ni ma la zi sabɛlɛ gazɛlɛ, nɛ do zɛkɛ 'da gazɛlɛ, kɔ̃ nɛ mɔlɔ, nɛ okumunɔ ngɔ nù Yuda wa tɛa 'da mi. Lɛ tɛ dungu do wa dɛ kɔ tɔa 'da mi ni, nɛ mi nɛ gbanga nɛ́, nɛ ngawi 'da NWA Gale le mi.

² Nɛ mi nɛ ka mɔ, nɛ mi zɔ mɔ ɔ nɛ wele ni. Yolo 'dɛ tili a dɛ ngɔ ma ndele wena, nɛ ma nyɛ ɔ nɛ we ni, nɛ kɛ dɛ nù ma to ɔ nɛ gã yele ngbala ni.

³ Nɛ mɔ ɔ nɛ kɔ̃ wi ni ma hɔ, nɛ ma 'be mili zu mi. Nɛ nde mɛnɔ ni vɛ̃, Gale bia ma li mi kɔ yalɛ. Nɛ Hi Wi 'da a ba mi la do mi do kɔ bũi, nɛ a e mi tɛ Yeruzalɛmɛ, do 'do nu ngbo le kɛ ma ka mɔ si gbãlã ngɔ. Mɛ a fala kɛ wa ia do kpikima kɛ ma hã sape hã Gale wena ni.

⁴ Mi tɛ yolo dɛ di ni, nɛ mi zɔ dɔ̃lɔ̃ li 'da NWA, ɔ nɛ kɛ mi zɔa zi tɛ nu kolo lì Kebarɛ i ni.

⁵ Nɛ NWA tɔ̃ hã mi na: “Be 'da wele, mɔ ká mɔ si gbãlã ngɔ!” Nɛ mi ka mɔ dɛ tɛ nu ngbo le si gbãlã ngɔ, nɛ mi zɔ gbagala. Nɛ dɛ kɛ zã gbagala ni, mi zɔa kpikima kɛ ma hã sape hã Gale wena ni.

⁶ Nɛ NWA tɔ̃ 'bɔ na: “Be 'da wele, mɔ zɔa mɛ wa dɛ i mɔ ni nde? Obe Israɛlɛ wa ba tɛ wa we dɛ ogã 'dã mɛnɔ, takɔ wa ndaka mi nyɛlɛ do Tɛmpɛloe 'da mi do'do. Nɛ nde mɔ zɔ sɛ 'bɔ ogele 'dã mɛnɔ, kɛ ma 'danga nɛa ngɔ kɛnɔ gɛ ni.”

⁷ Nɛ NWA ba mi, nɛ a e mi tɛ li fanda kɛ do 'do Tɛmpɛloe ni. Nɛ mi zɔ holo tɛ dɛlɛ.

⁸ Nɛ a tɔ̃ hã mi na: “Be 'da wele, mɔ 'dɔ́lɔ́ dɛlɛ!” Mi nɛa we 'dɔlɔ dɛlɛ, nɛ mi zɔ nu tɔa.

⁹ Nɛ a tɔ̃ na: “Mɔ lé, kɔ mɔ zɔ o'dã dɛa mɔ sapenɔ kɛ owinɔ wa dɛ ma dɛ gɛ.”

¹⁰ Nɛ mi lia, nɛ mi zɔ, nɛ nde wa gɛza hi ogɔ̃ do ogele sa'de ndi. Nɛ wa dɛa 'bɔ ohi gale bɛlɛnɔ kɛ obe Israɛlɛ wa dɔnggɔ wa ni vɛ̃.

¹¹ Nɛ mi zɔ okumu Israɛlɛ 'bu wa sambo, nɛ nde wa yula dɛ dati ohi mɛnɔ ni. Nɛ Yazania, be 'da Safanɛ zi sanga wa. Nɛ wele kpo kpo sanga wa 'bia kpana fũ yɔmbɔ dɛ kɔ̃ ɛ, nɛ zɛ̃ we fũ yɔmbɛ tɛ kutu dɛ ngɔ.

¹² Nɛ NWA aka mi na: “Be 'da wele, mɔ zɔa mɛ kɛ okumu Israɛlɛ wa usu tɛ wa, kɔ wa dɛ gɛ nde? Wele do wele dɛ ma dɛ kɔ 'bili tɔa kɛ a ia do kpikima 'da a ni. Nɛ wa tɔ̃ na, NWA zɔ́ lo gɔ, we kɛ a ba li a ngɔ nùi 'da lo do'do.”

¹³ Nɛ NWA tɔ̃ 'bɔ na: “Mɔ zɔ sɛ 'bɔ ogele 'dã mɛnɔ, kɛ ma 'danga nɛa ngɔ kɛnɔ gɛ ni.”

¹⁴ 'Do nɛ, nɛ NWA ba mi, nɛ a e mi dɛ nu tɔa Tɛmpɛloe kɛ ma ka mɔ si gbãlã ngɔ. Nɛ mi zɔ owuko wa dungu nù, kɔ wa tɛ he kɔ̃a fio gale hɛlɛ li a a Tamuzɛ ni.

¹⁵ Nɛ NWA aka mi na: “Mɔ zɔa ma nde? Mɔ zɔ sɛ 'bɔ ogele 'dã mɛnɔ kɛ ma 'danga nɛa ngɔ kɛ gɛ ni.”

¹⁶ Nɛ NWA ba mi, nɛ a e mi tɛ li fanda kɛ kɔ Tɛmpɛlo i ni. Nɛ mi zɔ Owi wili 'bu wa bɔa ngɔ wa mɔlɔ. Wa dɛ ngbala gbagala do nu tɔa kɛ ma le dɛ kɔ Tɛmpɛloe ni. Wa siki 'do wa si fala dɔnggɔ do Gale, nɛ wa ka mɔ si 'biti gba wese. Nɛ wa gu nù we dɔnggɔ wese.

¹⁷ Nɛ nwa tɔ̃ hã mi na: “Be 'da wele, mɔ zɔa nde? Kɔ mɔ ĩ́ na, obe Yuda wa tɛ dɛ gã 'dã mɛnɔ gɛ vɛ̃, nɛ nde sila wa gɛ gɔ. Wa tɛ bi 'bɔ bolo ngɔ nùi 'da wa vɛ̃, nɛ wa dɛ mɛnɔ ni vɛ̃ we nɔ̃lɔ̃ zã mi. Kɔ mɔ zɔ wa, wa kala nwá te vinɔ dɛ ngɔ, we dɔnggɔ do galenɔ 'da wa.

¹⁸ Nɛ nde wa ĩ sɛ ti nɔ̃lɔ̃ zã 'da mi. Mi ĩ́ sɛ 'bako hã wa gɔ, mi kumu sɛ wa vɛ̃. Mi dɛ́ sɛ mbɔkɔ li hã wa gɔ. Wa he sɛ mɔ nganda wena, nɛ wa ala nu wa hã mi, nɛ nde mi zélé sɛ gɔ.”