EZEKIƐLƐ 7 - WE NU GALE 1995

Obe Israɛlɛ wa kɔlɔ fala kumu nɛ ia

¹ NWA wila we hã mi na:

² “Aa mɔ, be 'da wele, mɔ zélé we mi NWA Gale, mi tɔ̃ hã obe Israɛlɛ gɛ. Mi na: Le 'da nɛ 'danga ia. Ma 'danga sɛ vɛ̃, yolo si gbãlã ngɔ we hɔ ba gɔtɔ, yolo si 'biti gba wese we hɔ 'biti gɛ̃a wese.

³ Ma ia do nɛ ia. Nɔ̃lɔ̃ zã 'da mi ma tɛ sɛ dɛ ngɔ nɛ. Mi nɛ 'bili we 'dã dɛa mɔ tɛ nɛ, nɛ nɛ kpa sɛ si olo 'dã dɛa mɛnɔ ni.

⁴ Mi NWA, mi kana tɛ mi na, mi ĩ́ sɛ 'bako hã nɛ gɔ. Mi dɛ́ sɛ mbɔkɔ li hã nɛ gɔ. Mi hã sɛ etumbu hã nɛ we 'dã dɛa mɛnɔ kɛ nɛ dɛa ni, sɛ nɛ nɛ ĩ sɛ na, mi a NWA de.

⁵ “Mi, NWA Gale, mi tɔ̃a hã nɛ na: Ongamɔ ma kpolo sɛ ngbɛ ɛ dɛ ngɔ nɛ kpula fai.

⁶ Ma kɔla we we dɛ te'de ia, ma ia do nɛ ia.

⁷ Nɛ, owinɔ ngɔ nùi gɛ, ngamɔ ma kpa sɛ nɛ. Ngba soe nɛ wia ia. Fo sɛ 'bɔ mbé zuma yangga bina. Nɛ zu nɛ ma vĩ sɛ vɛ̃.

⁸ Mi tílí sɛ ma gɔ. Zã mi nɛ nɔ̃lɔ̃ dɛ tɛ nɛ di dɔ̃ gɛ nganda wena. Mi nɛ 'bili we 'dã dɛa mɔ tɛ nɛ, nɛ nɛ kpa sɛ si olo 'dã dɛa mɛnɔ ni.

⁹ Mi mbɔ́kɔ́ sɛ li mi gɔ, mi ĩ́ sɛ 'bako hã nɛ gɔ. Mi hã sɛ etumbu hã nɛ we 'dã mɛnɔ kɛ nɛ dɛa ni, nɛ nɛ ĩ sɛ na, wi zɛ 'dã winɔ, wi a mi NWA.

¹⁰ “Kɔ̃ tũ gɔnɔ ngbangga 'da nɛ ma wia ia. Ngamɔ ma gbanga sɛ nɛ. Ngatɛ 'da nɛ la li vɛ̃, nɛ zɛlɛ tɛ ngba wi ma wena,

¹¹ nɛ ma gã dɛ dati gã fai. Nɛ 'báná sɛ gɔ, nɛ kpamɛnɔ 'da nɛ, do wali, do dɔ̃lɔ̃ li 'da nɛ ma 'danga sɛ vɛ̃.

¹² “Kɔ̃ tũi ni kɔla dɔ̃ɔ. Nɛ do kɔ̃ tũi ni, fo sɛ gulu oso gole tabi be gole bina, we kɛ mi Gale, mi hã sɛ etumbu hã winɔ vɛ̃ we kɔ̃.

¹³ Nɛ gɛnɛ kɔ wi be gole 'bana do tunu li a, nɛ nde a wé sɛ 'bɔ we kpa mbili olo gole 'da a gɔ. We kɛ ngamɛ mi nwa mi mbisa we nɛ ni, ma hɔ sɛ do gbãlã we. Mi kpóló sɛ nu mi gɔ. O'dã winɔ wa 'báná sɛ nza gɔ.

¹⁴ Nɛ gɛnɛ kɔ wa zɛ mɔtũlũ, we sa mɔ hã winɔ na, wa nɛ bolo, nɛ nde wele kpo kúlú sɛ ngɔ we nɛ bole ni gɔ. We kɛ nɔ̃lɔ̃ zã 'da mi we winɔ vɛ̃.

Wele kpo kpásá sɛ kɔ ngamɛnɔ gɔ

¹⁵ “Bolo kpa do li walanɔ vɛ̃, nɛ gba wɔ do 'dã zɛlɛ gbɛ winɔ dɛ kɔ tɔanɔ 'da wa. Wele kɛ a hɔ nza kɔ le, nɛ a fe sɛ li bolo. Nɛ wele kɛ a 'bana dɛ kɔ le, nɛ gba wɔ do 'dã zɛlɛ ma gbɛ sɛ a.

¹⁶ Nɛ tala wanɔ wa 'bana sɛ do tunu h wa ni, wa yu sɛ dɛ ngɔ kalanɔ i. Wa ɔ sɛ nɛ ngɔ gili onɔɛ kɛ mɔ ndaka wa, nɛ wa pɛsɛ ndusɛ̃ɛ ni. Nɛ wa he sɛ kɔ̃a 'dã mɛnɔ 'da wa.

¹⁷ Kɔ̃ wa sɛ do ngawi bina, nɛ zugolo wa ma tana sɛ.

¹⁸ Wa he'de sɛ tulu gɛla, nɛ wa kpolo mili zu wa ngɔ nɛ vɛ̃. Wa tana sɛ kili, nɛ sape ma ba sɛ li wa wena.

¹⁹ Wa da sɛ mbili 'da wa nù, nɛ wa zɔ mɔ mbali 'da wa li wa yala iko. Mba gɔ, do ngba soe kɛ zã mi ma nɔ̃lɔ̃ sɛ dɛ tɛ wa ni, nɛ fɛ̃a mɔ bolo do mɔ mbali wé sɛ we kpasa wa gɔ. Wa wé sɛ we nyɔngɔ do mɔ gɔ, nɛ fo sɛ nyɔngɔmɔ be sĩ na, wa nyɔngɔ bina. We kɛ mɔ mbali do lɛ̃a mɔ bolo ma tumba wa li wala dɛ 'dã mɔ.

²⁰ Wa dɔnggɔ zi tɛ wa do kpamɛnɔ 'da wa, nɛ wa dula ma do osɔ̃ kpikima. Ma kɛ mi dɛ sɛ na, kpamɛnɔ ni kifi 'dã mɔ we wa.

²¹ “Mi e sɛ ogele winɔ na, wa 'danga kpamɛnɔ 'da wa. Mi tombo sɛ oyia wi na, wa faka kpikimanɔ 'da wa, nɛ wa kala la do nɛ.

²² 'Da fala winɔ ni wa tɛ, nɛ wa faka sɛ Tɛmpɛloe, nɛ wa 'danga ma, nɛ nde mi gá sɛ wa gɔ.

²³ “Mɔ nɛ, hã mɔ dɛ fɛlɛ dɔkpɔ we ɛnzɛ do wele, we kɛ ngɔ nùi dunu do owi gbɛ wi, nɛ bolo kpa kɔ le vɛ̃.

²⁴ “Mi fa sɛ ombe 'dã zu wele, nɛ mi tɔ̃ hã wa na wa tɛ, hã wa kala tɔanɔ 'da obe Israɛlɛ. Mi dɛ sɛ na, ngatɛ 'da owi ngawinɔ ngɔ nù Israɛlɛ Sɔkpɔ, nɛ mi dɛ 'bɔ na, ogele wele wa faka fala sambala do galenɔ 'da wa.

²⁵ Kili ma ba sɛ wa wena, nɛ wa fa sɛ dungu fio, nɛ nde wa kpá sɛ ma gɔ.

²⁶ Ngamɔ ma kpolo sɛ ngbɛ ɛ dɛ ngɔ wa, nɛ o'dã sako ma hɔ sɛ hã wa dɔ wena. Wa ala sɛ nu wa hã wi gba olo nu Gale na, a tɔ̃ gulu mɛnɔ ni hã wa, nɛ nde a wé sɛ we tɔ̃ nɛ gɔ. Nganga bé sɛ 'bɔ we nu mi gɔ, nɛ okumunɔ wa tɔ̃́ sɛ 'bɔ mbula hã winɔ gɔ.

²⁷ Nwa ngɔ nùi a dungu sɛ gɛla, nɛ a sɛ 'bɔ do linggamɔ kpasi bina. Nɛ owinɔ wa tana sɛ kili. Mi hã sɛ etumbu hã wa we 'dã mɛnɔ 'da wa, nɛ mi 'bili sɛ wenɔ 'da wa, ɔ nɛ kɛ wa 'bili do kɛ 'da ogele winɔ ni. Na mɛ ni, nɛ wa ĩ sɛ na, mi a nwa.”