EZEKIƐLƐ 6 - WE NU GALE 1995

NWA sɛnɛ owi sambala kpikimanɔ wena

¹ NWA wila we hã mi na:

^2-3 “Be 'da wele, mɔ síkí li mɔ dɛ ngɔ kalanɔ ngɔ nù Israɛlɛ, nɛ mɔ dãlã dɛ tɛ owinɔ wa ɔ i mɔ ni, do wanɔ wa ɔ ngɔ kusu falanɔ, do kɔ gbangɔlɔ̃nɔ ni do zu li mi na, wa zele we mi nɛ tɔ̃ hã wa gɛ. We ni ma kɛ: Mi nɛ tombo bolo na, ma bi nɛ, nɛ ma 'danga fala sambala do kpikimanɔ 'da nɛ.

⁴ Wa 'danga sɛ ogbagalanɔ 'da nɛ, nɛ wa o sanga omɔ dɔ do fũ yɔmbɔnɔ. Nɛ mi dɛ sɛ na ogba gili winɔ 'da nɛ, wa fe dɛ dati kpikimanɔ 'da nɛ ni.

⁵ Na mɛ ni, mi tanda sɛ wɔlɔ nɛ obe Israɛlɛ dɛ dati kpikimanɔ 'da nɛ, nɛ mi pɛsɛ ogbãlã tɛ nɛ do kɛ zã gbagalanɔ 'da nɛ.

⁶ Nɛ Owi sɛnɛ nɛ wa 'danga sɛ olenɔ vɛ̃ nɛ ɔ kɔ nɛ ni. Nɛ wele kpo hɔ́ sɛ 'bɔ tɛ fala sambala do kpikimanɔ 'da nɛ gɔ. Wa faka sɛ gbagalanɔ 'da nɛ, nɛ wa gbini ma fala nɛ kpo do kpikimanɔ, do omɔ dɔ do fũ yɔmbɔnɔ 'da nɛ. Nɛ mɔ kpo kɔ mɛnɔ nɛ dɛa ni, ma 'báná sɛ gɔ.

⁷ Wa gbɛ sɛ gba gili Owele sanga nɛ. Na mɛ ni, nɛ nɛ ĩ sɛ na mi a NWA.

⁸ “Nɛ nde mi dɛ sɛ na, ombe wa kpasa li bole, nɛ mi 'dɔlɔ wa dɛ ngɔ gele nùnɔ.

⁹ Nɛ 'da fala wa ɔ sɛ sanga ogele winɔ ɔ nɛ ogɛnɛ ni, nɛ wa lengge sɛ do mi. Nɛ ta zu wa ma gba sɛ na, mi hã etumbu hã wa we duzu 'dã sila 'da wa. We kɛ wa siki 'do wa lua do mi, nɛ wa dɔngga osɛa tenɔ. Wa zɔ sɛ na mɛ ni, nɛ wa kpa sɛ sape we duzu 'dã mɛnɔ wa dɛa ni.

¹⁰ Nɛ wa ĩ sɛ na, mi a NWA, nɛ mi mbèsè wa yala iko gɔ.”

¹¹ NWA Gale tɔ̃a 'bɔ hã mi na: “Mɔ tá kɔ̃ mɔ, nɛ mɔ zɛ́ nyanga mɔ, nɛ mɔ he mɔ na: Ma ia wá ia! Obe Israɛlɛ wa dɛa 'dã mɛnɔ, do mɔ sapenɔ gbaa, kɔ ma wia dɛ tɛ nɛ ia. Bolo, do gba wɔ, do 'dã zɛlɛ, ma kumu sɛ wa.

¹² Wanɔ kɛ wa nyɛlɛ do nùi 'da wa ni, 'dã zɛlɛ ma gbɛ sɛ wa. Nɛ wanɔ kɛ wa 'bana dɛ ngɔ nùi 'da wa ni, wa fe sɛ li bolo. Nɛ tala wanɔ kɛ 'dã zɛlɛ do bole ma gbɛ̃ wa gɔ ni, gba wɔ ma gbɛ sɛ wa. Nɔ̃lɔ̃ zã 'da mi dɛ 'da wa ma gɛ̃́ sɛ gɔ.

¹³ Owɔlɔ wa ma pɛsɛ sɛ do falanɔ vɛ̃. Wa kpa sɛ wɔlɔ wa do kɛ zã gbagalanɔ, do ngbala osɛa tenɔ, do ngɔ ngala kalanɔ do obe kalanɔ. Wa kpa sɛ 'bɔ ma do ti otenɔ kɛ onwá nɛ ma 'bɔ wena, do tɛ mbe falanɔ vɛ̃ kɛ wa hã do dɔnggamɛnɔ hã kpikimanɔ ni. Na mɛ ni, nɛ wa ĩ sɛ na mi a NWA.

¹⁴ Mi be sɛ ngawi 'da mi hã wa, nɛ mi 'danga sɛ nùi 'da wa. Mi dɛ sɛ na, falanɔ vɛ̃ kɛ wa ɔ zi tɛ nɛ, yolo tɛ li gba zɔ̃ si ba gɔtɔ, we hɔ le Ribla si gbãlã ngɔ, wele kpo tɛ ɔ̃ di ni gɔ. Na mɛ ni, nɛ winɔ vɛ̃ wa ĩ sɛ na, mi a NWA.”