EZEKIƐLƐ 48 - WE NU GALE 1995

'Bili tɛ nùi 'da onu kpala obe Israɛlɛ si gbãlã ngɔ

^1-7 Li ngbala nùi ni ma la sɛ si 'biti gba wese, yolo do nu gba lì Meditɛrane we hɔ tɛ le Hɛtloni, Lɛbo-Hamatɛ, Hasarɛ-Enanɛ, do li ngbala sanga nù Damasi do Hamatɛ. Nɛ nu kpala obe Israɛlɛ kpo kpo wa kpa sɛ 'bili tɛ nùi, yolo do li ngbala si 'biti gba wese we hɔ tɛ nu gba lì Meditɛrane si 'biti gɛ̃a wese. Nɛ wa kpa sɛ 'bili tɛ nùi, yolo si gbãlã ngɔ we hɔ ba gɔtɔ dɛ 'do ngba wa na mɛ gɛ: Danɛ, Asɛrɛ, Nɛftali, Manase, Efraimɛ, Rubɛnɛ do Yuda.

'Bili tɛ nùi 'da NWA

⁸ Nɛ wa e sɛ 'bili tɛ nùi li ngbala nù Yuda ni do tɛ̃ ɛ. Ma yolo sɛ si 'biti gba wese we hɔ tɛ nu gba lì Meditɛrane. Nɛ 'da du nɛ ma we sɛ kɔ do 'da du 'bili tɛ nùi 'da nu kpala kpo kpo. Nɛ 'da dɔ nɛ sɛ a kilomɛtrɛ 'bu ngɔ nɛ bɔa do dɔ nɛ. Nɛ wa dɛ sɛ Tɛmpɛloe dɛ gbogbo 'bili tɛ nùi ni.

⁹ Nɛ 'da du 'bili tɛ nùi wa ia hã NWA ni sɛ a kilomɛtrɛ 'bu ngɔ nɛ bɔa do dɔ nɛ, nɛ 'da dɔ nɛ sɛ a kilomɛtrɛ 'bu.

¹⁰ Nɛ fala 'da onganganɔ sɛ dɛ kɔ 'bili tɛ nùi ni. 'Da du fala 'da wa, yolo si 'biti gba wese we hɔ si 'biti gɛ̃a wese sɛ a kilomɛtrɛ 'bu ngɔ nɛ bɔa do dɔ nɛ. Nɛ 'da dɔ nɛ yolo si gbãlã ngɔ we hɔ ba gɔtɔ sɛ a kilomɛtrɛ mɔlɔ. Nɛ tɔa Tɛmpɛloe 'da nwa sɛ dɛ gbogbo 'bili tɛ nùi ni.

¹¹ Nɛ wele fala ni sɛ a mɔ́ onganganɔ, kɛ wa a obe zã Sadɔkɛ ni. We kɛ wa dɛa zi to hã NWA do wala olo nɛ ngboo. Nɛ wa mbà zi do tala obe Israɛlɛ we siki 'do wa hã NWA, ɔ nɛ kɛ olevitɛnɔ wa dɛa zi ni gɔ.

¹² Ma kɛ wa kpa sɛ fala 'da wa dɛ kɔ 'bili tɛ nùi kɛ wa ia ma hã NWA, nɛ ma santo ni. Nɛ kɛ 'da olevitɛnɔ sɛ do kɛ zã wa si ba gɔtɔ.

¹³ 'Bili tɛ nùi 'da olevitɛnɔ ma we sɛ kɔ do kɛ 'da onganganɔ. 'Da du nɛ sɛ a kilomɛtrɛ 'bu ngɔ nɛ bɔa do dɔ nɛ, nɛ 'da dɔ nɛ sɛ a kilomɛtrɛ mɔlɔ.

¹⁴ Wele kpóló sɛ 'bili tɛ nù ngɔ nùi ni, do ngba a gɔ. Wele bé sɛ gole nɛ, tabi a 'dɔlɔ sɛ ma hã gele wele gɔ. We kɛ wa ia ma hã NWA, nɛ ma santo.

¹⁵ Nɛ nu tala nùi 'da NWA ma 'bana sɛ 'da dɔ nɛ kilomɛtrɛ bɔa do dɔ nɛ, nɛ 'da du nɛ kilomɛtrɛ 'bu ngɔ nɛ bɔa do dɔ nɛ. Nɛ fala ni ma sɛ santo gɔ, mɛ sɛ a fala 'da ombe obe Israɛlɛ. Wa kpa sɛ fala ɔinɔ 'da wa do fala nyɔngɔmɛ 'da onadalamɛnɔ 'da wa dɛ di ni, nɛ le sɛ dɛ gbogbo.

¹⁶ Nɛ 'da du le do 'da dɔ nɛ, ma we sɛ kɔ mɛtrɛ koto bɔa do kama bɔa do 'bu nɛ mɔlɔ.

¹⁷ Nɛ wa la sɛ fala zĩ 'do le pɛsɛ dɛ 'do mɛtrɛ kama do 'bu nɛ bɔa ngɔ nɛ mɔlɔ do 'da Sɔkpɔ nu le nalɛ ni we onadalamɛnɔ.

¹⁸ Nɛ tala nùi wa ia hã NWA ni, ma 'bana sɛ we kilomɛtrɛ mɔlɔ si 'biti gba wese, nɛ kilomɛtrɛ mɔlɔ si 'biti gɛ̃a wese. Nɛ winɔ kɔ le ni, wa dɛ sɛ fɔnɔ 'da wa dɛ di ni, nɛ wa kpa nyɔngɔmɔ.

¹⁹ Winɔ kɔ onu kpala obe Israɛlɛ vɛ̃ kɛ wa ɔ sɛ kɔ le ni, wa wa sɛ fɔɛ 'da wa dɛ di ni.

²⁰ Na mɛ ni, nùi kɛ wa ia ma hã NWA, mba do fala dɛ do le vɛ̃ ni, 'da du nɛ do 'da dɔ nɛ ma we sɛ kɔ̃ kilomɛtrɛ 'bu ngɔ nɛ bɔa do dɔ nɛ.

²¹ Nɛ tala nùi kɛ ma 'bana ni sɛ a mɔ́ gã wi ngɔ nù Israɛlɛ. 'Bili tɛ nùi 'da a ma fi sɛ nùi 'da NWA do le dɛ gbogbo. Nɛ 'da du nɛ yolo li ngbala si 'biti gba wese we hɔ tɛ nu gba lì Meditɛrane, mɛ sɛ a kilomɛtrɛ 'bu ngɔ nɛ bɔa do dɔ nɛ.

²² 'Bili tɛ nùi 'da olevitɛnɔ do fala we dɛ do le ni, ma 'bili sɛ sanga nùi 'da gã wi ni bɔa. Nɛ ma sɛ do li ngbala 'bili tɛ nùi 'da Yuda si gbãlã ngɔ, do kɛ 'da Bɛnzamɛ si ba gɔtɔ.

'Bili tɛ nùi 'da onu kpala obe Israɛlɛ si ba gɔtɔ

^23-27 Nɛ do ti nyanga 'bili tɛ nùi wa ia hã NWA si ba gɔtɔ ni, nɛ ombe nu kpalanɔ wa kpa sɛ 'bili tɛ nùi 'da wa dɛ di ni, yolo si 'biti gba wese we hɔ nu gba lì Meditɛrane, si 'biti gɛ̃a wese. Nɛ wa kpa sɛ 'bili tɛ nùi, yolo si gbãlã ngɔ we hɔ ba gɔtɔ dɛ 'do ngba wa na mɛ gɛ: Bɛnzamɛ, Simeoni, Isakarɛ, Zabuloni do Gadɛ.

²⁸ Nɛ li ngbala 'bili tɛ nùi 'da Gadɛ si ba gɔtɔ sɛ a li ngbala nùi vɛ̃. Ma yolo sɛ Tamarɛ, si 'biti gba wese, we hɔ tɛ lì Mɛriba tɛ Kadɛsɛ. Nɛ ma ba 'da fua lì gbaa we hɔ nu gba lì Meditɛrane.

²⁹ NWA tɔ̃a na: “Tɛlɛ tɛ kɛ nɛ kɛ̃ sɛ nùi dɛ kɔ nu kpala Israɛlɛ kpo kpo gɛ a ni. Mi NWA Gale, mi tɔ́a ni.”

Onu ngbo 'bu ngɔ nɛ bɔa tɛ kɔ le Yeruzalɛmɛ

^30-31 Onu ngbonɔ tɛ Yeruzalɛmɛ ma sɛ 'bu ngɔ nɛ bɔa, nɛ wa e sɛ li nu kpala kpo kpo dɛ zu nu ngbo kpo kpo. 'Da du dɛlɛ ngboe si gbãlã ngɔ sɛ a mɛtrɛ koto bɔa do kama bɔa do 'bu nɛ mɔlɔ. Nɛ nu ngbo sɛ di ni talɛ: nu ngbo Rubɛnɛ, nu ngbo Yuda do nu ngbo Levi.

³² Nɛ 'da du dɛlɛ ngbo kɛ si 'biti gba wese sɛ kpasaa ɔ nɛ kɛ dati ni. Nɛ ma sɛ 'bɔ do onu ngbo talɛ: nu ngbo Yozɛfu, nu ngbo Bɛnzamɛ do nu ngbo Danɛ.

³³ Nɛ 'da du dɛlɛ ngbo kɛ si ba gɔtɔ sɛ 'bɔ kpasaa ɔ nɛ kɛnɔ dati ni. Nɛ ma sɛ 'bɔ do onu ngbo talɛ: nu ngbo Simeoni, nu ngbo Isakarɛ do nu ngbo Zabuloni.

³⁴ Nɛ 'da du dɛlɛ ngbo kɛ si 'biti gɛ̃a wese ma we sɛ 'bɔ kɔ do kɛnɔ dati ni, nɛ ma sɛ 'bɔ do onu ngbo talɛ: nu ngbo Gadɛ, nu ngbo Asɛrɛ, do nu ngbo Nɛftali.

³⁵ Nɛ 'da du dɛlɛnɔ vɛ̃ kɛ ma zĩ sɛ 'do le ni a mɛtrɛ koto kusi. Nɛ yolo do ngba soe ni, nɛ wa sa sɛ li le ni na: “NWA dɛ boe.”