EZEKIƐLƐ 47 - WE NU GALE 1995

Lì kɛ ma fo do kɔ Tɛmpɛloe

¹ Nɛ wi ni la do mi dɛ nu ngbo Tɛmpɛloe, nɛ mi zɔ lì ma fo do kɔ tɔa Tɛmpɛloe, nɛ ma la si 'biti gba wese. We kɛ dati Tɛmpɛloe ma siki si 'biti gba wese. Nɛ lì ni ma zĩlĩ do kɔ Tɛmpɛloe si ngawili kɔ, nɛ ma fo do kɛ zã gbagala si ba gɔtɔ.

² Nɛ wi ni hɔa do mi nza kɔ ngbo Tɛmpɛloe do nu ngbo kɛ si gbãlã ngɔ. Nɛ a zĩ do mi do 'do ngboe gbaa we hɔ nu ngbo kɛ si 'biti gba wese. Nɛ lì ni ma fo do nu ngboe si ba gɔtɔ.

³ Nɛ wi ni ba fɛlɛ dɛ kɔ a, nɛ a la si 'biti gba wese, nɛ a we 'da du lì mɛtrɛ kama mɔlɔ, nɛ a le do mi do 'dɔ nɛ, nɛ ma ba mi nu gɛlɛ nyanga mi.

⁴ 'Do nɛ, nɛ a we 'bɔ mɛtrɛ kama mɔlɔ, nɛ a le do mi, nɛ ma ba mi zugolo mi. Nɛ a we 'bɔ mɛtrɛ kama mɔlɔ, nɛ a le do mi, nɛ ma ba mi 'dɛ tili mi.

⁵ Nɛ a we 'bɔ Sɔkpɔ nɛ mɛtrɛ kama mɔlɔ, nɛ nde mi wè tɛ kũ lì gɔ, we kɛ ma 'du wena. Ma hɔa gã fua lì, kɛ ma wia na, wele kanda ma, sɛ nɛ a hɔ nza de.

⁶ Nɛ wi ni aka mi na: “Be 'da wele, mɔ zɔa nde?” 'Do nɛ, nɛ a ba mi nu lì ni dɛ gele fala, nɛ 'da kala gɔ, nɛ a gese 'bɔ mi dɛ olo mi,

⁷ nɛ mi zɔ na, ote dɔ wena nu kolo lì do bɔa nɛ.

⁸ Nɛ wi ni tɔ̃ hã mi na: “Gba fua lì gɛ, ma fo dɛ ngɔ nùi si 'biti gba wese, nɛ ma zĩlĩ dɛ kɔ gbangɔlɔ̃ Yɔrdanɛ, nɛ ma a ngɔ gba lì Ndɔ Fio. 'Da fala ma a ngɔ gba lì Ndɔ Fio ni, nɛ ma kifi sɛ ndɔɛ ni do dia lì.

⁹ Nɛ osa'de lì kpi do kpi, do okɔyɔ, wa hɔ sɛ tɛ fala fua lì nɛ la nɛ ni. Ma kifi sɛ gba lì ni, nɛ ma hɔ dia lì, nɛ fala ma nɛ fo nɛ ni, nɛ ma hã sɛ kpasi.

¹⁰ Na mɛ ni, nɛ Owele wa gbɛ sɛ kɔyɔ 'dɔ lì ni, yolo tɛ Ɛnɛ-Gedi gbaa we hɔ Ɛnɛ-Eglaimɛ. Nɛ wa yɛlɛ sɛ gbandanɔ 'da wa dɛ nu kolo lì ni. Nɛ wa kpa sɛ okɔyɔ kpi do kpi 'dɔ lì ni nɛ ngɔ wanɔ 'dɔ gba lì Meditɛrane.

¹¹ Nɛ nde dɛka lì do o'bɛ̃tɛ̃nɔ nu gba lì ni, ma 'bana sɛ ní, ma kífí sɛ gɔ, sɛ a owinɔ wa kpa tɔ̃ di ni de.

¹² Nɛ otenɔ kɛ ma ko owala nɛ kpi do kpi ni, ma hɔ sɛ nu kolo lì ni do bɔa nɛ. Nɛ onwá tenɔ ni ma kóló sɛ gɔ, nɛ owala nɛ sɛ boe fai. Ma ko sɛ mbé wala nɛ zɛkɛ kpo kpo, we kɛ fua lì yolo kɔ Tɛmpɛloe i ni, ma tɛ 'bɔ gulu nɛ. Wa nyɔngɔ sɛ owala nɛ, nɛ wa dɛ onwá nɛ do ina.”

NWA 'bili li ngbala nù Israɛlɛ

¹³ NWA Gale tɔ̃a na: “Be 'da wele, mi nɛ be li ngbala nùi kɛ onu kpala 1 obe Israɛlɛ 'bu ngɔ wa bɔa, wa nɛ kɛ̃ dɛ kɔ̃ ngba wa ni hã mɔ. Nu kpala Yozɛfu wa kpa sɛ 'bili tɛ nù bɔa.

¹⁴ Mi kana zi tɛ mi hã oyaa nɛ na, mi hã sɛ nù Israɛlɛ hã wa do mɔ wa. Na mɛ ni, nɛ gba sɛ nùi dɛ kɔ̃ ngba nɛ we kɔ̃.

¹⁵ “Li ngbala kɛ si gbãlã ngɔ, ma yolo sɛ tɛ nu gba lì Meditɛrane, nɛ ma ba do wala kɛ ma la si tɛ ole Hɛtloni, do Lɛbo-Hamatɛ, do Sɛdadɛ.

¹⁶ Nɛ ma la 'bɔ si tɛ ole Bɛrɔta do Sibraimɛ (lenɔ ni ma dɛ ngbala nù Damasi do Hamatɛ). Nɛ ma la 'bɔ do le Hasɛrɛ-Tikoni (kɛ ma dɔ̃ɔ do li ngbala nù Hauranɛ).

¹⁷ Na mɛ ni, li ngbala kɛ si gbãlã ngɔ, ma yolo sɛ tɛ nu gba lì Meditɛrane gbaa we hɔ tɛ le Hasarɛ-Enanɛ, si 'biti gba wese. Nɛ ma 'bili do li ngbala nù Damasi do Hamatɛ si gbãlã ngɔ.

¹⁸ “Nɛ li ngbala kɛ si 'biti gba wese, ma yolo sɛ tɛ fala sanga nù Damasi do Hauranɛ ni, nɛ ma ba gbangɔlɔ̃ Yɔrdanɛ, kɛ ma 'bili ngbala sanga nù Galadɛ do Israɛlɛ ni. Nɛ ma la sɛ gbaa dɛ Tamarɛ, tɛ nu gba lì Ndɔ Fio.

¹⁹ Nɛ li ngbala kɛ si ba gɔtɔ, ma yolo sɛ Tamarɛ, gbaa we hɔ tɛ lì Mɛriba, kɔ le Kadɛsɛ. Nɛ ma ba 'da fua lì gbaa we hɔ nu gba lì Meditɛrane.

²⁰ Nɛ li ngbala kɛ si 'biti gɛ̃a wese sɛ a gba lì Meditɛrane, yolo si ba gɔtɔ gbaa we hɔ Lɛbo-Hamatɛ, si gbãlã ngɔ.

²¹ “Nɛ kɛ̃ sɛ sanga nùi dɛ kɔ̃ onu kpala nɛ.

²² Nɛ to sɛ zeke, sɛ nɛ nɛ gɔnɔ do sanga nɛ dɛ kɔ̃ ngba nɛ de. Nɛ ta zu nɛ tɛ èlè ngɔ ogɛnɛnɔ wa ɔ sanga nɛ, nɛ wa kua obe ni gɔ. Nɛ zɔ sɛ wa ɔ nɛ obe Israɛlɛ kɛ wa ɔ ngɔ nùi ni. Nɛ wa kpa sɛ tɛ mɛ 'bɔ 'bili tɛ nu mɔ wa fala nɛ kpo do nɛ, onu kpala Israɛlɛ.

²³ Wele do wele a kpa sɛ 'bili tɛ nù mɔ́ a dɛ kɔ nu kpala wi kɛ a ɔ kɔ nɛ ni. Mi NWA Gale, mi tɔ́a ni.”