EZEKIƐLƐ 46 - WE NU GALE 1995

Mbulanɔ kɛ ma zɔa gã wi ngɔ obe Israɛlɛ

¹ NWA Gale tɔ̃a na: “Nu ngbo Tɛmpɛloe kɔ nɛ i, kɛ si 'biti gba wese ni, ma 'bana sɛ do kpia nɛ 'do tũnɔ gazɛlɛ, kɛ wa dɛ do toe ni. Nɛ nde wa hũi sɛ ma do kɔ̃ tũ kpe tɛ wi, do 'da fala ɛngga mbé hɔa zɛkɛ.

² Gã wi ngɔ obe Israɛlɛ a yolo sɛ kɔ gã ngbo kɛ nza nga, nɛ a le do kɔ gã 'bili tɔa ma kɔlɔ do nu ngboe ni, nɛ a yolo dɛ kɛ zã gbangga do 'da fala onganganɔ wa dɔ sɛ sa'denɔ kɛ a hã ma we dɔnggɔ do mi, nɛ wa gbɛ 'bɔ sa'denɔ kɛ a hã ma we be dɛa na ni. 'Do nɛ, nɛ a gu sɛ gba zugolo dɛ kpongbo nu tɔa ni, nɛ a hɔ nza. Nɛ nde wa kpé sɛ nu tɔa ni gɔ gbaa we hɔ gɛ̃a wese.

³ Mba gɔ, do kɔ̃ tũ ɔmɔ tɛ winɔ, do ngba soe ɛngga mbé hɔa zɛkɛ, nɛ owinɔ wa tɛ sɛ dɛ nu tɔa ni, nɛ wa gu gba zugolo we dɔnggɔ mi NWA.

⁴ “Do ngba soe kɔ̃ tũ ɔmɔ tɛ wi, nɛ gã wi ngɔ obe Israɛlɛ a tɛ sɛ do obe bata gazɛlɛ, do wili bata kpo, kɛ fo kunda tɛ wa bina ni dɛ dati mi, nɛ wa dɔ sɛ batanɔ ni we dɔnggɔ do mi.

⁵ Nɛ a hã sɛ dɔnggamɔ fũ kilo 'bu nɛ talɛ we wili bata ni, nɛ a hã ble ɔ nɛ kɛ zã a kɔ̃a ni, we mba do obe batanɔ gazɛlɛ ni. Nɛ a a sɛ nɔ litrɛ gazɛlɛ we ble kilo 'bu nɛ talɛ.

⁶ Do kɔ̃ tũ ɛngga mbé hɔa zɛkɛ, nɛ a hã sɛ dɔnggamɔ wili ngɔmbɔ kpo, do obe bata gazɛlɛ, do wili bata kpo. Nɛ wa vɛ̃ wa tɛ ɔ̃ do kunda tɛ wa gɔ.

⁷ Nɛ a mba sɛ ma do ble kilo 'bu nɛ talɛ we wili ngɔmbɛ, do wili bata. Nɛ a hã sɛ ble ɔ nɛ kɛ zã a kɔ̃a ni, we mba do obe batanɔ gazɛlɛ ni. Nɛ a a sɛ nɔ litrɛ gazɛlɛ we ble kilo 'bu nɛ talɛ talɛ.

⁸ Gã wi ngɔ obe Israɛlɛ a le sɛ, nɛ a hɔ do kpo nu ngbo Tɛmpɛloe kɔ nɛ i ni.

⁹ “'Da fala owinɔ wa tɛ we dɔnggɔ mi NWA do ngba soe ɛngganɔ ni, nɛ wanɔ kɛ wa lia do nu ngbo kɛ si gbãlã ngɔ ni, wa hɔ sɛ do nu ngbo kɛ si ba gɔtɔ. Nɛ wanɔ wa le sɛ do nu ngbo kɛ si ba gɔtɔ ni, wa hɔ sɛ do nu ngbo kɛ si gbãlã ngɔ. Wele kpo hɔ́ sɛ nza do kpo wala a lia nɛ ni gɔ. Nɛ nde a hɔ sɛ nza do nu ngbo kɛ ma zɔ mɔ dɛ dati a ni.

¹⁰ Nɛ nde we duzu gã wi ngɔ obe Israɛlɛ, a le sɛ do 'da fala owinɔ wa le kɔ Tɛmpɛloe ni, nɛ a hɔ sɛ 'bɔ nza do 'da fala wa hɔ tɛ mɛ 'bɔ nza ni.

Mbula ngɔ dɔnggamɛnɔ kpi do kpi

¹¹ “Do ngba soe ɛngganɔ, nɛ owinɔ wa hã sɛ dɔnggamɔ ble kilo 'bu nɛ talɛ we wili ngɔmbɔ kpo, tabi we wili bata kpo kɛ wa nɛ dɔ a ni. Nɛ we duzu obe batanɔ, wele do wele a hã sɛ ble, ɔ nɛ kɛ zã a kɔ̃a ni. Nɛ wa a sɛ nɔ litrɛ gazɛlɛ we ble kilo 'bu nɛ talɛ.

¹² “'Da fala kɛ gã wi ngɔ obe Israɛlɛ kɔ we hã sa'de kɛ wa dɔ sɛ we dɔnggɔ do mi NWA, tabi we hã dɔnggamɛ kɛ ma be dɛa na ni, nɛ wa hũi sɛ nu ngbo kɛ si 'biti gba wese gɛ hã a, nɛ a le, nɛ a hã dɔnggamɛnɔ ni, ɔ nɛ kɛ a hã do kɔ tũ ɔmɔ tɛ wi ni. Nɛ 'do kɛ a hɔ nza ni, nɛ wa kpe sɛ nu ngboe dɛ olo nɛ.

¹³ “Tũ kpo kpo, nɛ wa dɔ sɛ be bata kɛ a ɔa sabɛlɛ kpo, nɛ fo kunda tɛ̃ a bina ni, we dɔnggɔ do mi NWA. Nɛ wa hã sɛ dɔnggamɛ ni do titole.

¹⁴ Nɛ titole kpo kpo, wa hã sɛ 'bɔ kilo fũ mɔlɔ, nɛ wa zanga ma do nɔ we dɔnggɔ do mi NWA. Mbula ngɔ dɔnggamɛ ni ma ɔ sɛ fai.

¹⁵ Wa dɔ sɛ be bata, nɛ wa hã dɔnggamɔ fũ do nɔ titole kpo kpo fai.”

Mɛnɔ kɛ benɔ 'da gã wi wa wia we kpa olo a ni

¹⁶ NWA Gale tɔ̃a na: “Fala kɛ gã wi ngɔ obe Israɛlɛ 'dɔlɔ mbe nùi 'da a hã mbe be 'da a kpo, nɛ nùi ni ma hɔ sɛ mɔ be ni fai. Nɛ wele nɛ sɛ tɛ mɛ 'bɔ a mɔ́ obe zã be ni.

¹⁷ Nɛ nde fala kɛ gã wi ni 'dɔlɔ mbe nùi 'da a hã mbe kɔ wi dɛa tonɔ 'da a, nɛ ma 'bana sɛ do mɔ́ a gbaa we hɔ sabɛlɛ Yubile. Nɛ do 'da fala ni, nɛ a gese sɛ nùi ni hã gã wi ni. Mba gɔ, mɛnɔ 'da gã wi vɛ̃ a mɔ́ obe zã a fai.

¹⁸ Nɛ gã wi wè do dolo zu nù mɔ́ mbe be Israɛlɛ gɔ. Obe zã a wa kpa sɛ a nùi 'da a ngboo ni na, da dɛ kɔ wele kpo sanga winɔ 'da mi NWA zɔ́lɔ́ nù gɔ.”

Fala gi do dɔnggamɛnɔ tɛ kɔ ngbo Tɛmpɛloe

¹⁹ 'Do nɛ, nɛ wi ni kã mi do nu tɔa kɛ ma dɔ̃ɔ do nu ngboe ni. Nɛ a le do mi dɛ kɔ o'bili tɔanɔ 'da onganganɔ, kɛ ma siki li ɛ si gbãlã ngɔ ni. Nɛ a be mbe fala di ni hã mi do Sɔkpɔ tɔa i, nɛ nde ma do si 'biti gɛ̃a wese.

²⁰ Nɛ a tɔ̃ hã mi na: “Kɛ gɛ mɛ a fala onganganɔ wa nɛ gi do sa'denɔ, takɔ Gale fo ku'da 'dã mɛnɔ ni. Nɛ wa gi sɛ 'bɔ mbe dɔnggamɛnɔ dɛ di ni. Wa dɛ sɛ na mɛ ni na, da dɛ kɔ wa hɔ́ do dɔnggamɔ santonɔ ni dɛ li fanda kɛ winɔ wa nɛ ni, kɔ wa kpa 'dã mɔ gɔ.”

²¹ 'Do nɛ, nɛ a hɔ do mi do li fanda Tɛmpɛloe kɛ kɔ ngbo nza nga ni, nɛ a kã mi dɛ li gbala ngboe nalɛ ni. Nɛ wa dɛa li fanda tɛ li gbala ngbo kpo kpo.

²² Li fandanɔ nalɛ ni, ma gã̀ zi gɔ, nɛ 'da du nɛ vɛ̃ wia kɔ̃ mɛtrɛ 'bu nɛ bɔa, nɛ 'da dɔ nɛ we kɔ mɛtrɛ 'bu ngɔ nɛ mɔlɔ.

²³ Nɛ ngbo zĩ li fandanɔ ni kpo kpo takpa, nɛ wa dɛa ofuru dɛ tɛ ngbonɔ ni vɛ̃.

²⁴ Nɛ wi ni tɔ̃ hã mi na: “Mɛ a fala gi do mɔ. Owinɔ wa dɛ to kɔ Tɛmpɛloe ni, wa gi sɛ sa'denɔ kɛ owinɔ wa tɛ do ma we hã do dɔnggamɛ ni dɛ di ni.”