EZEKIƐLƐ 45 - WE NU GALE 1995

'Bili tɛ nùi kɛ wa ia ma hã NWA

¹ NWA tɔ́a na: “'Da fala kɛ wa kɛ̃ sɛ sanga nùi dɛ kɔ nu kpala obe Israɛlɛ ni, nɛ wa ba sɛ mbe nùi ni, nɛ wa e ma hã NWA Gale. Mɛ sɛ a 'bili tɛ nù kɛ 'da du nɛ a kilomɛtrɛ 'bu ngɔ nɛ bɔa do dɔ nɛ, nɛ 'da dɔ nɛ a kilomɛtrɛ 'bu. Nɛ wa zɔ sɛ fala ni vɛ̃ na, ma santo.

² Wa la sɛ mbe fala kɔ 'bili tɛ nùi ni, kɛ 'da du nɛ do da dɔ nɛ wia kɔ̃ we mɛtrɛ kama bɔa do 'bu nɛ mɔlɔ ni, takɔ wa dɛ do tɔa Tɛmpɛloe. Nɛ wa la sɛ wila fala kɛ ma pɛsɛ dɛ 'do mɛtrɛ 'bu nɛ bɔa ngɔ nɛ mɔlɔ zĩ 'do fala Tɛmpɛloe takpa ni.

³ Nɛ wa 'bili sɛ sanga fala wa ia hã nwa ni bɔa. Nɛ wa we 'da du mbee fala ni we kilomɛtrɛ 'bu ngɔ nɛ bɔa do dɔ nɛ, nɛ 'da dɔ nɛ kilomɛtrɛ mɔlɔ, nɛ ma sɛ santo. Nɛ wa dɛ sɛ Tɛmpɛloe kɛ ma santo wena ni dɛ di ni.

⁴ Nɛ wa e tala nɛ hã onganganɔ kɛ wa dɛ toe 'da nwa kɔ Tɛmpɛloe 'da a ni, nɛ wa dɛ tɔanɔ 'da wa dɛ di ni.

⁵ Nɛ mbee 'bili tɛ nùi kɛ 'da du nɛ 'bɔ a kilomɛtrɛ 'bu ngɔ nɛ bɔa do dɔ nɛ, nɛ 'da dɔ nɛ a kilomɛtrɛ mɔlɔ ni sɛ a mɔ́ olevitɛnɔ, kɛ wa zɔ mɔ tɛ tonɔ kɔ Tɛmpɛloe na, ma nɛ do dia nɛ ni. Nɛ wa dɛ sɛ lenɔ 'da wa, nɛ wa ɔ dɛ di ni.

⁶ “Nɛ dɛ nu 'bili tɛ nùi 'da NWA ni, wa 'bili sɛ fala kɛ 'da du nɛ a kilomɛtrɛ 'bu ngɔ nɛ bɔa do dɔ nɛ, nɛ 'da dɔ nɛ a kilomɛtrɛ bɔa do dɔ nɛ, takɔ obe Israɛlɛ vɛ̃ wa dɛ tɔanɔ 'da wa dɛ di ni.

⁷ “Nɛ wa e sɛ 'bɔ 'bili tɛ nù hã gã wi ngɔ obe Israɛlɛ, nɛ ma fi sɛ nùi 'da NWA, do kɛ 'da gele obe Israɛlɛ dɛ gbogbo. 'Bili tɛ nùi ni kpo sɛ si 'biti gba wese, nɛ mbee nɛ si 'biti gɛ̃a wese. Nɛ 'da du nɛ ma yolo sɛ si 'biti gɛ̃a wese gbaa we hɔ nu gba lì Meditɛrane. Nɛ ma yolo si 'biti gba wese gbaa we hɔ li ngbala nù Israɛlɛ. Nɛ 'da du nɛ ma we sɛ kɔ̃ do 'bili tɛ nùi 'da nu kpala obe Israɛlɛ kpo kpo.

⁸ Na mɛ ni, ogã wi ngɔ obe Israɛlɛ wa kpa sɛ 'bili tɛ nù tɛ ngɔ nù Israɛlɛ, nɛ wa zɛ́lɛ́ sɛ 'bɔ tɛ winɔ 'da NWA Gale gɔ. Nɛ wa la sɛ tala nùi hã onu kpala obe Israɛlɛ.”

Dɛa tonɔ kɛ gã wi ngɔ obe Israɛlɛ wia tɛ dɛ nɛ

⁹ NWA tɔ̃a na: “Aa nɛ, ogã wi ngɔ nù Israɛlɛ, mɛnɔ nɛ dɛ gɛ ma la li do'do. Nɛ lá fala dɛ ngatɛ do zɛlɛ tɛ winɔ, nɛ nɛ dɛ́ bɔlɔ zu dɛa mɔ. Nɛ lá fala kala mɔ tɛ winɔ 'da mi. Mi NWA Gale, mi tɔ̃ hã nɛ ni.

¹⁰ “Ma wia na, wele do wele dɛ to do mɔ we do mɔ kɛ ma a dia ngboo ni.

¹¹ A ba mɔ we do gbãlã kpalɛ kɛ li nɛ a Efa, do mɔ we do nɔɛ kɛ li nɛ a Batɛ ni, nɛ ma we kɔ̃. Efa do Batɛ ma le kɔ Hɔmɛrɛ 'bu 'bu. Nɛ wa kala mɔ we do mɛnɔ do 'da Hɔmɛrɛ.

¹² Fɛ̃a mɔ bolo Siklɛ kpo, mɛ a Gera 'bu nɛ bɔa. Nɛ Minɛ kpo, mɛ a Siklɛ 'bu nɛ gazɛlɛ.

¹³ “Nɛ fo sɛ zu dɔnggamɛnɔ 'da nɛ we hã ma hã mi na mɛ gɛ: Nɛ gɔnɔ sɛ sanga kpalɛnɔ 'da nɛ, ble do ɔrzɛ 'bu nɛ gazɛlɛ, nɛ nɛ hã kpo mbe 'bu nɛ gazɛlɛ hã mi.

¹⁴ Nɛ nɛ gɔnɔ sanga nɔɛ 'da nɛ kama kpo, nɛ nɛ hã kpo mbe kama hã mi. Nɛ we sɛ nɔɛ 'da nɛ do Batɛ, kɛ ma le kɔ Hɔmɛrɛ fala 'bu, nɛ ma le 'bɔ kɔ Kɔrɛ fala 'bu ni.

¹⁵ Nɛ kɔ ba'denɔ tɛ ngɔ nù Israɛlɛ, fala kɛ obata tabi dua wa hɔ kama bɔa, nɛ nɛ fo sɛ sa'de kpo kɔ nɛ hã mi NWA. Nɛ nɛ hã sɛ mɛnɔ kɛ nɛ fua ni do dɔnggamɔ fũ, tabi dɔ sa'de we dɔnggɔ do mi, tabi dɔnggamɔ kɛ ma be dɛa na, takɔ ma fo ku'da 'dã mɛnɔ 'da nɛ. Mi NWA Gale, mi tɔ̃a ni.

¹⁶ “Winɔ ngɔ nù Israɛlɛ vɛ̃ wa fo sɛ zu dɔnggamɛnɔ ni, nɛ wa nɛ do ma hã gã wi ngɔ nù Israɛlɛ.

¹⁷ Mba gɔ, 'da fala ɛngga mbé hɔa zɛkɛ, do kɔ̃ tũ ɔmɔ tɛ winɔ, do ogele 'da fala kɛ winɔ wa mba ngba wa ni, nɛ wi sɛ a gã wi ni hã a nɛ hã sa'denɔ we dɔ wa we dɔnggɔ do mi, mba do dɔnggamɔ fũ do dɔ̃. Do 'da falanɔ ni, a hã sɛ dɔnggamɛnɔ we fo ku'da 'dã mɔ, do dɔnggamɔ ble, do dɔnggamɔ dɔa sa'de, do dɔnggamɛnɔ kɛ ma be dɛa na ni, takɔ ma vɛ̃ ma fo ku'da 'dã mɛnɔ zu obe Israɛlɛ.”

¹⁸ NWA Gale tɔ̃a na: “Do kuti zɛkɛ, kɔ̃ nɛ kpo, nɛ wa gbɛ sɛ wili ngɔmbɔ kɛ fo kunda tɛ̃ a bina ni do dɔnggamɔ, takɔ wa fo ndi tɛ Tɛmpɛloe, hã ma hɔ sa li mi.

¹⁹ Nɛ nganga a ba sɛ tɔkɔ sa'de dɔnggamɛ, nɛ a kɔ tɛ ogbangga nu tɔa Tɛmpɛloe, do li gbala gbagala nalɛ nɛ, do tɛ ogbangga nu tɔa li fanda Tɛmpɛloe kɔ nɛ i ni.

²⁰ Ma hɔ kɔ̃ zɛkɛ sambo, zɛkɛ 'da kpo, nɛ wa dɛ sɛ 'bɔ kpasaa na mɛ ni, we duzu wanɔ kɛ wa dɛa 'dã mɔ, nɛ nde wa ĩ̀ fala nɛ gɔ, nɛ wa dɛ̀ 'bɔ do mbana gɔ ni. Nɛ do wala ni, nɛ Tɛmpɛloe ma hɔ sɛ sa li mi.

²¹ “Ma hɔ kɔ̃ zɛkɛ 'bu ngɔ nɛ nalɛ, zɛkɛ 'da kpo, nɛ nɛ dungu sɛ ɛngga Hɔ Nza kɔ Ngbá. Nɛ ɛngga ni ma ɔ sɛ tũ sambo. Nɛ kɔ̃ tũnɔ ni kpo kpo nɛ nyɔngɔ sɛ a mapa kɛ wa à ina hana mapa tɛ nɛ gɔ ni.

²² Nɛ do kɔ̃ tũ ɛngga ni, nɛ gã wi ngɔ obe Israɛlɛ a hã sɛ wili ngɔmbɔ do dɔnggamɔ na, ma fo ku'da 'dã mɔ zu a wele nɛ, do zu obe Israɛlɛ.

²³ Do kɔ̃ tũnɔ sambo we dungu do ɛngga ni, tũ kpo kpo, nɛ a hã sɛ wili ngɔmbɔ sambo do wili bata sambo, kɛ fo kunda tɛ wa bina ni na, wa dɔ we dɔnggɔ do mi NWA. Nɛ tũ kpo kpo, nɛ a hã sɛ 'bɔ wili dua kpo do dɔnggamɔ we fo ku'da 'dã mɔ.

²⁴ A hã sɛ dɔnggamɔ ble kilo 'bu nɛ talɛ, nɛ a mba do nɔ litrɛ gazɛlɛ we wili ngɔmbɔ kpo kpo, do wili bata kpo kpo.

²⁵ Nɛ 'da fala ɛngga kɛ wa dungu do zɛkɛ 'da sambo, kɔ̃ nɛ 'bu ngɔ nɛ mɔlɔ ni, nɛ a dɛ sɛ ɔ nɛ kɛ a dɛa zi 'da fala ɛngga Hɔ Nza kɔ Ngbá ni. Do kɔ̃ tũnɔ sambo we dungu do ɛngga ni, tũ kpo kpo, nɛ a hã sɛ kpo dɔnggamɛnɔ we fo ku'da 'dã mɛ ni, do kpo sa'denɔ we dɔ wa we dɔnggɔ do mi NWA, do kpo dɔnggamɔ ble do nɔɛ.”