EZEKIƐLƐ 44 - WE NU GALE 1995

Mbula ngɔ nu ngbo kɛ si 'biti gba wese

¹ Nɛ wi ni kã mi dɛ nu ngbo Tɛmpɛloe nza nga, kɛ ma siki li ɛ si 'biti gba wese ni, nɛ nde nu nɛ a kpia nɛ.

² Nɛ NWA tɔ̃ hã mi na: “Nu ngboe gɛ ma 'bana sɛ do kpia nɛ, nɛ wa hũi sɛ ma fala kpo gɔ. Wele lá sɛ do di ni gɔ, we kɛ mi NWA Gale 'da nɛ obe Israɛlɛ, mi lia do di ni. Ma 'bana sɛ fai do kpia nɛ.

³ Nɛ nde wi a gã wi ngɔ nùi a le sɛ do kɔ 'bili tɔa tɛ nu ngboe ni, nɛ a nyɔngɔ sɛ nyɔngɔmɔ santo di ni dɛ gbali mi. 'Do nɛ, nɛ a hɔ sɛ nza do kpo wala ni.”

Mbula ngɔ winɔ kɛ wa wia we le kɔ Tɛmpɛloe

⁴ Nɛ wi ni kã 'bɔ mi dɛ nu ngbo Tɛmpɛloe kɛ ma siki li ɛ si gbãlã ngɔ ni. Nɛ mi zɔ na, gã dɔ̃lɔ̃ li 'da nwa kpa kɔ Tɛmpɛloe vɛ̃. Nɛ mi te, nɛ mi gu li mi nu.

⁵ Nɛ NWA tɔ̃ hã mi na: “Be 'da wele, mɔ gɛ́ zala mɔ, nɛ mɔ hṹi li mɔ, kɔ mɔ zele mbulanɔ mi nɛ a ma ngɔ Tɛmpɛloe 'da mi gɛ. Nɛ mɔ dɛ sɛ zĩ wena do mbulanɔ kɛ ma zɔa winɔ kɛ wa wia do le kɔ Tɛmpɛloe 'da mi, nɛ wa hɔ nza ni.

⁶ “Mɔ gba sɛ olo nu mi NWA Gale hã obe Israɛlɛ, wi nga zunɔ ni na: Aa nɛ obe Israɛlɛ, 'dã mɛnɔ 'da nɛ kɛ nɛ dɛ ni ma ngba mi do'do.

⁷ Nɛ faka Tɛmpɛloe 'da mi, nɛ nɛ la ogele winɔ, kɛ wa a omanda'ba, nɛ wa zélé mi gɔ ni na, wa le kɔ Tɛmpɛloe do 'da fala nɛ tɛ do nyɔngɔmɛ 'da mi, do kɛndɔ, do tɔkɔ sa'denɔ we dɔnggɔ do mi ni. Nɛ nɛ yala gba tɔkɛ 'da mi do nɛ do'do, we duzu gã 'dã mɛnɔ nɛ dɛa ni.

⁸ Nɛ bà tɛ nɛ we dɛ to hã mi gɔ. Nɛ nde nɛ ia omanda'banɔ na, wa dɛ ma olo nɛ.

⁹ Mi NWA Gale, mi tɔ̃a na, sanga manda'banɔ kɛ wa dɛ́ olo nu mi gɔ ni, wele kpo lé sɛ 'bɔ kɔ Tɛmpɛloe 'da mi gɔ. Gɛnɛ kɔ a ɔ dɛ sanga obe Israɛlɛ, nɛ nde a lé sɛ i mɔ gɔ.”

Mbula we olevitɛnɔ

¹⁰ NWA tɔ̃a hã mi na: “Olevitɛnɔ wa mba zi do tala obe Israɛlɛ, nɛ wa siki 'do wa hã mi, nɛ wa dɔnggɔ kpikimanɔ. Ma kɛ wa kpa sɛ etumbu olo 'dã mɛnɔ 'da wa.

¹¹ Wa wia sɛ we dɛ to hã mi kɔ Tɛmpɛloe kpaa. Wa zɔ sɛ mɔ nu ngbonɔ, nɛ wa dɛ tonɔ kpi do kpi kɔ Tɛmpɛloe ni. Wa 'bili sɛ 'bɔ gɛlɛ sa'denɔ we dɔ ma hã mi, tabi we hã do ogele dɔnggamɛnɔ. Nɛ ma wia na, wa gala obe Israɛlɛ kɛ wa tɛ we dɔnggɔ mi ni.

¹² Nɛ nde mi NWA Gale, mi kana tɛ mi na, mi siki sɛ li mi dɛ tɛ wa, we kɛ wa kpia dati owinɔ we sambala kpikimanɔ, nɛ wa kã wa dɛ li 'dã wala. Ma kɛ mi nɛ hã etumbu hã wa olo 'dã mɛnɔ 'da wa.

¹³ Wa wé sɛ 'bɔ we yolo dati mi, takɔ wa dɛ to nganga 'da wa gɔ. Nɛ ma wè 'bɔ na, wa kɔlɔ do mɛnɔ kɛ wa ia ma hã mi kɔ Tɛmpɛloe ni gɔ. Nɛ wa kɔ́lɔ́ sɛ 'bɔ do Fala kɛ ma santo wena ni gɔ. Na mɛ ni, nɛ wa kpa sɛ si olo 'dã mɔ sapenɔ wa dɛa ni.

¹⁴ Mi hã sɛ hã wa tati a gele be tonɔ kɛ ma zɔa Tɛmpɛloe ni iko.

Mbula we onganganɔ

¹⁵ “Gɛnɛ kɔ obe Israɛlɛ wa siki zi 'do wa hã mi nwa ni, nɛ nde onganga levitɛnɔ kɛ wa a obe zã Sadɔkɛ ni, wa 'bana zi kɛ 'da wa tɛ dɛ olo nu mi do wala olo nɛ ngboo. Kɔ we duzu ki ni, ma kɛ tati a wa hã wa wia sɛ we dɛ to hã mi, nɛ wa hã kɛndɔ do tɔkɔ sa'denɔ do dɔnggamɔ hã mi. Mi NWA Gale, mi tɔ́a ni.

¹⁶ Tati a wa hã wa le sɛ kɔ Tɛmpɛloe 'da mi, nɛ wa kɔlɔ do mɛsa kɛ wa ia ma we toe 'da mi ni. Wa dɛ sɛ mbulanɔ mi a ma ngɔ Tɛmpɛloe ni do wala olo nɛ ngboo.

¹⁷ 'Da fala wa nɛ we le li fanda kɛ nu tɔa Tɛmpɛloe ni, nɛ wa he'de sɛ tulu linɛ. 'Da fala kɛ wa dɛ sɛ toe 'da wa li fanda ni, do kɔ Tɛmpɛlo i ni, nɛ nde wa hé'dé sɛ tulu sala bata gɔ.

¹⁸ Wa kpo sɛ kitambala linɛ, do nu tulu linɛ 'dɛ tili wa. Nɛ wa hé'dé sɛ mɔ kɛ ma wia we gi tɛ wa ni gɔ.

¹⁹ Nɛ dati kɛ na, wa hɔ nza dɛ li fanda fala owinɔ wa dungu nɛ ni, nɛ wa hɔlɔ sɛ tulunɔ wa hi'da 'da fala dɛa toe ni. Nɛ wa a ma kɔ 'bili tɔanɔ kɛ ma santo ni, nɛ wa he'de gele tulu, sɛ nɛ wa hɔ de. Wa dɛ sɛ na mɛ ni na, da dɛ kɔ winɔ wa 'bé tɛ tulu santonɔ ni, kɔ wa kpa 'dã mɔ gɔ.

²⁰ “Onganganɔ wa kpóló sɛ mili zu wa ngɔ nɛ gɔ. Nɛ nde zu wa hɛ̃, nɛ wa kɛlɛ sɛ ngɔ nɛ, nɛ ma 'bana do bɔlɔ nɛ.

²¹ Wele kpo kɔ wa tɛ nɔ̀ dɔ̃ dati kɛ na, a le tɛ li fanda kɛ nu tɔa Tɛmpɛloe ni gɔ.

²² Nganga tɛ bà wuko fio wili, tabi wuko kɛ wili a bɛ̃a a bɛ̃a ni gɔ. A ba sɛ a be zɔnga Israɛlɛ, tabi wuko olo mbe nganga kɛ a fia ni.

²³ “Onganganɔ wa be sɛ gɔnɔ sanga mɔ kɛ ma santo do kɛ ma santo gɔ, mɔ kɛ ma a sa do mɔ ndi ni hã owinɔ 'da mi.

²⁴ Wa sɛ a Owi 'bili we do 'da fala tɔ̃ ngbangga. Nɛ wa 'bili sɛ wenɔ do bɔlɔ nɛ do 'da mbulanɔ 'da mi. Wa dungu sɛ ɛngganɔ do 'da mbulanɔ kɛ mi a ngɔ nɛ ni. Nɛ wa e sɛ kɔ̃ tũ ɔmɔ tɛ wi hã mi do wala olo nɛ ngboo.

²⁵ “Ma wè na, nganga 'be tɛ wɔlɔ wele, kɔ a hɔ wi ndi li mi gɔ. Fo tati a wɔlɔ baa a, tabi naa a, tabi mbe kɔ benɔ 'da a, tabi nya a, tabi boko nya a kɛ a tɛ bà wili gɔ ni.

²⁶ Fala kɛ a hɔ wi ndi nde, nɛ a dɛ sɛ mɔ fo ndi tɛ̃ a we hɔ sa wi li mi mbé nɛ. Nɛ 'do nɛ, nɛ a 'bɔ sɛ 'do tũ sambo, sɛ nɛ a ĩ ti ndo toe 'da a de.

²⁷ Do ngba soe a nɛ kpolo tɛ̃ a dɛ li fanda kɛ nu tɔa Tɛmpɛloe i ni, nɛ a gbɛ sɛ sa'de do dɔnggamɔ hã mi, we fo ku'da 'dã mɔ zu a. Mi NWA Gale, mi tɔ̃a ni.

²⁸ “Onganganɔ wa kpá sɛ nù tɛ Israɛlɛ gɔ. Wa dɛ sɛ to hã mi, nɛ mi sɛ a kpamɛ 'da wa.

²⁹ Wa nyɔngɔ sɛ dɔnggamɛnɔ, do sa'denɔ wa gbɛ do dɔnggamɔ hã mi we fo ku'da 'dã mɔ ni. Nɛ mɛnɔ vɛ̃ kɛ obe Israɛlɛ wa ia hã mi ni sɛ a mɔ́ wa.

³⁰ Wa kpa sɛ kuti kpalɛnɔ do mɛnɔ kɛ obe Israɛlɛ wa fo kɔ kpalɛnɔ 'da wa hã mi ni. Owinɔ wa tɛ sɛ do fũi 'da wa kɛ ma dia nɛ ge nde ni hã wa, takɔ mi wele nu mi tɛ nu fɛlɛ wa.

³¹ Nɛ nde onganganɔ wa nyɔ́ngɔ́ sɛ onɔɛ do osa'de kɛ wa fia iko, tabi gele sa'de gbɛa wa ni gɔ.”