EZEKIƐLƐ 43 - WE NU GALE 1995

Gã dɔ̃lɔ̃ li 'da Gale kpula tɛ ɛ dɛ kɔ Tɛmpɛloe

¹ Nɛ wi ni kã mi dɛ nu ngbo kɛ si 'biti gba wese.

² Nɛ mi zɔ Gale 'da obe Israɛlɛ, a yula si 'biti gba wese, kɔ a tɛ tɛ do gã dɔ̃lɔ̃ li 'da a vɛ̃. Nɛ giti a tɛ dɔ̃lɔ̃ ɔ nɛ giti gba fua lì ni. Nɛ yele ngbala dɔ̃lɔ̃ li 'da a, ma yele nùi.

³ Mɛ mi zɔa li yalɛ ni, ma wia kɔ̃ do kɛ mi zɔa zi do 'da fala Gale tɛa zi we 'danga le Yeruzalɛmɛ ni. Nɛ ma wia 'bɔ kɔ̃ do kɛ mi zɔa zi tɛ nu lì Kebarɛ i ni. Mi zɔa ní, nɛ mi te, nɛ mi gu li mi nù.

⁴ Nɛ NWA le do gã dɔ̃lɔ̃ li 'da a dɛ kɔ Tɛmpɛloe do nu ngbo kɛ si 'biti gba wese.

⁵ Nɛ Hi Wi 'da Gale ba mi, nɛ a la do mi dɛ li fanda kɛ dati Tɛmpɛloe ni. Nɛ mi zɔ na, gã dɔ̃lɔ̃ li 'da nwa ma kpa kɔ Tɛmpɛloe vɛ̃.

⁶ Nɛ mi zele gɛlɛ wele do kɔ Tɛmpɛloe i tɛ wele we hã mi. Mɛ ni, nɛ nde wi kɛ a kã mi ni, a fai dɛ kɛ zã mi ni.

⁷ Nɛ nwa tɔ̃ hã mi na: “Aa mɔ, be 'da wele, mɔ zɔ́, dɛ gɛ mɛ a kpongbo nwa 'da mi. Mɛ a fala kɛ mi a do nyanga mi ni. Mi nɛ dungu dɛ dɛ, nɛ mi 'bana dɛ sanga obe Israɛlɛ fai. Obe Israɛlɛ do Onwanɔ 'da wa, wa fáká sɛ 'bɔ zu li mi kɛ ma santo ni gɔ. Wa dɔ́nggɔ́ sɛ 'bɔ ogele galenɔ gɔ, nɛ wa mí sɛ 'bɔ wɔlɔ nwanɔ 'da wa dɛ gɔ.

⁸ Onwanɔ wa ia gbangga nu tɔanɔ 'da wa ngboo dɛ dati kpongbo nu tɔa Tɛmpɛloe 'da mi. Nɛ dɛlɛ tɔa 'da mi lɛa ngbɛ ɛ do kɛ 'da wa. Wa faka zu li mi kɛ ma santo do dɛ gã 'dã mɛnɔ. Gulu nɛ a zã mi nɔ̃lã, nɛ mi kumu wa.

⁹ Yolo do sɔɛ gɛ, obe Israɛlɛ wa la sɛ fala dɛ vĩ zu dɛa mɔ dɛ ngɔ li mi. Nɛ wa fo sɛ wɔlɔ Onwanɔ 'da wa ngɔ li mi do'do. Kɔ wa dɛ na mɛ ni, nɛ mi ɔ sɛ dɛ sanga wa fai.

¹⁰ “Nɛ nde mɔ, be 'da wele, mɔ bé tɛlɛ tɛ Tɛmpɛloe gɛ hã obe Israɛlɛ. Nɛ mɔ e wa, kɔ wa yambala ma na, sape ba li wa olo 'dã mɛnɔ 'da wa.

¹¹ Kɔ fala kɛ sape ba li wa we mɛnɔ wa dɛa ni, nɛ mɔ be hi Tɛmpɛloe hã wa, do 'bili kɔ nɛ, do nu ngbonɔ kɛ wa le do nɛ, do kɛ wa hɔ do nɛ ni. Nɛ mɔ be 'bɔ tɛlɛ tɛ kɛ wa 'dafa do mɛnɔ ni vɛ̃ hã wa. Nɛ mɔ kɔmɔ ombula ngɔ dɛa tonɔ kɔ Tɛmpɛloe hã wa na, wa dɛ ma.

¹² Kɛ gɛ a gã mbula ngɔ Tɛmpɛloe: Falanɔ vɛ̃ kɛ ma zĩ Tɛmpɛloe takpa tɛ zu kala i ni, ma santo wena.”

Gbagala dɔ do odɔnggamɛnɔ

¹³ Kɛ gɛ a tɛlɛ tɛ gbagala wa wia ma do kpo kpo te wa wia do Tɛmpɛloe ni. Wa zã kɔ̃ 'du nɛ sãtimɛtrɛ 'bu nɛ mɔlɔ kɛ zã gbagala zĩ takpa. Nɛ 'da pɛsɛ nu kɔ̃ɛ ni 'bɔ a sãtimɛtrɛ 'bu nɛ mɔlɔ. Nɛ wa kele kɛ zã kɔ̃ɛ nza nga dɛ ngɔ sãtimɛtrɛ 'bu nɛ bɔa ngɔ nɛ mɔlɔ.

¹⁴ Nɛ wa zĩ nyanga gbagala mɛtrɛ kpo dɛ ngɔ. Nɛ wa gbɔtɔ zu nɛ dɛ kɔ nɛ sãtimɛtrɛ 'bu nɛ mɔlɔ zĩ takpa. Nɛ ma la 'bɔ dɛ ngɔ we mɛtrɛ bɔa. Nɛ wa gbɔtɔ 'bɔ zu nɛ dɛ kɔ nɛ sãtimɛtrɛ 'bu nɛ mɔlɔ zĩ takpa.

¹⁵ Nɛ ma la 'bɔ dɛ ngɔ we mɛtrɛ bɔa, nɛ wa hɔ tɛ fala wa dɔ do sa'denɔ ni. Nɛ wa dɛa li gbala nɛ do nalɛ nɛ, nɛ ma kusu dɛ ngɔ nɛa ngɔ tala zu gbagala.

¹⁶ Nɛ 'da du fala dɔ do sa'de do 'da dɔ nɛ wia kɔ̃ vɛ̃ mɛtrɛ gazɛlɛ gazɛlɛ.

¹⁷ Nɛ gbogbo gbagala ma wia 'bɔ kɔ̃ vɛ̃ mɛtrɛ sambo sambo. Nɛ wa dɛa oli gbala nɛ kusu dɛ ngɔ sãtimɛtrɛ 'bu nɛ bɔa ngɔ nɛ mɔlɔ. Nɛ wa zã be kɔ̃ kɛ zã nɛ sãtimɛtrɛ 'bu nɛ mɔlɔ. Wa 'dafa 'dinggili do si 'biti gba wese we kũ do ma dɛ i mɔ.

¹⁸ NWA tɔ̃a hã mi na: “'Da fala kɛ wa dɛ gbagala e do'do, nɛ mɔ dɔ sɛ osa'de ngɔ nɛ we dɔnggɔ do mi, nɛ mɔ kpã sɛ tɔkɔ sa'denɔ ngɔ nɛ, takɔ mɔ e ma hã mi.

¹⁹ 'Do nɛ, nɛ mɔ sa sɛ mɔ hã onganganɔ kɛ wa a obe zã Sadɔkɛ ni, we dɛ to dɔnggamɛnɔ. We kɛ tati a wa hã mi ba nu mi hã wa na, wa kɔlɔ do mi we dɛ to hã mi. Nɛ mɔ hã sɛ be wili ngɔmbɔ hã wa, takɔ wa hã do dɔnggamɔ we si olo ku'da 'dã mɔ.

²⁰ Mɔ kpɔ sɛ tɔkɔ sa'de ni, nɛ mɔ kpã ma tɛ li gbala gbagala, kɛ wa dɛa ma kusu dɛ ngɔ, do gbogbo zã gbagala, do fala wa kila do nu gbagala zĩ takpa ni. Mɔ dɛ sɛ na mɛ ni, takɔ gbagala hɔ santo li mi, nɛ mɔ e ma hã mi.

²¹ 'Do nɛ, nɛ mɔ tɛ sɛ do ngɔmbɔ, nɛ mɔ dɔ mbee nɛ do dɔnggamɔ we fo ku'da 'dã mɔ. Nɛ wa la do tala nɛ dɛ fala wa 'dafa do nza i ni, nɛ wa dɔ ma dɛ di ni.

²² Do tũ kɛ 'do nɛ ni, nɛ mɔ ba wili dua kɛ fo kunda tɛ̃ a bina ni, nɛ mɔ gbɛ a we hã do dɔnggamɔ we fo ku'da 'dã mɔ. Nɛ mɔ dɛ do a ɔ nɛ kɛ mɔ dɛa do wili ngɔmbɛ ni, takɔ gbagala ma hɔ santo li mi.

²³ “'Da fala mɔ hã dɔnggamɛnɔ ni do'do, nɛ mɔ ba sɛ wili ngɔmbɔ kpo do wili bata kpo, kɛ fo kunda tɛ wa bina ni,

²⁴ nɛ mɔ tɛ do wa hã mi NWA. Nɛ onganganɔ wa a sɛ tɔ̃ tɛ wa, nɛ wa dɔ wa hã mi we dɔnggɔ do mi.

²⁵ Nɛ tũ kpo kpo gbaa we hɔ tũ sambo, mɔ ba sɛ wili dua kpo, do wili ngɔmbɔ kpo, do wili bata kpo, kɛ fo kunda tɛ wa bina ni, nɛ mɔ gbɛ wa, we fo ku'da 'dã mɔ.

²⁶ Onganganɔ wa dɛ sɛ na mɛ ni 'do tũ sambo, takɔ gbagala ma hɔ santo li mi, nɛ wa e ma hã mi, sɛ a wa dɛa to ngɔ nɛ de.

²⁷ Kɔ̃ tũnɔ ni ma e, kɔ ma hɔ kɔ̃ tũ kɛ ngbɛ'dɛ'dɛ, nɛ onganganɔ wa wia sɛ we dɔ osa'de ngɔ gbagala, do hã odɔnggamɔ kɛ ma be dɛa na ni hã mi. Wa dɛ na mɛ ni, nɛ zã mi ma kɔ̃ sɛ gɛnɛ nɛ owinɔ 'da mi. Mi NWA Gale, mi tɔ̃a ni.”