EZEKIƐLƐ 42 - WE NU GALE 1995

Wa dɛa tɔa bɔa kɛ zã Tɛmpɛloe

¹ Nɛ wi ni kã mi dɛ li fanda kɛ kɔ ngbo Tɛmpɛloe nza nga ni. Nɛ a la do mi dɛ kɔ tɔa kɛ zã Tɛmpɛloe si gbãlã ngɔ, kɛ ma siki li ɛ dɛ ti mɔnggɔlɔ tɔa do 'do Tɛmpɛloe ni.

² Nɛ 'da du tɔa ni a mɛtrɛ 'bu nɛ mɔlɔ, nɛ 'da dɔ nɛ a mɛtrɛ 'bu nɛ bɔa ngɔ nɛ mɔlɔ.

³ Nɛ mbe kulu tɔa ni, ma siki li ɛ dɛ fala ma zĩ Tɛmpɛloe mɛtrɛ 'bu ni. Nɛ mbee nɛ ma siki li ɛ dɛ tɛ li fanda Tɛmpɛloe kɛ wa 'dafa li nɛ do gã tanɔ kɛ ma a pɛrr ni. Wa dɛa tɔa dɛ ngɔ ngbɛ ɛ etazɛ talɛ. Nɛ wa dɛ mɔnggɔlɔ tɔa ti nɛ kpo kpo vɛ̃.

⁴ Nɛ wa gba 'bɔ wala do dati tɔa ni, 'da dɔ wala ni a mɛtrɛ mɔlɔ, nɛ 'da du nɛ a mɛtrɛ 'bu nɛ mɔlɔ. Nɛ wa le kɔ tɔa ni do si gbãlã ngɔ.

⁵ Nɛ o'bili tɔanɔ ngɔ i ni ma bi sĩ nɛa ngɔ kɛnɔ nù nga ni, we kɛ wa tili tɔa ngɔ i dɛ kɔ nɛ, nɛ mɔnggɔlɔ nɛ gã nɛa ngɔ kɛ gbogbo do kɛ nù nga.

⁶ Wa dɛa tɔa dɛ ngɔ ngbɛ ɛ etazɛ talɛ, nɛ nde wa è bɛlɛduma ti nɛ ɔ nɛ gele tɔanɔ li fanda Tɛmpɛloe ni gɔ. Mɔ ma ngɔ kũ dɛ kɔ etazɛnɔ ngɔ i, nɛ nde o'bili kɔ tɔanɔ tɛ mɔɛ dɛ tɛ ngbɛ ɛ.

⁷ Dɛlɛnɔ tɛ Sɔkpɔ ngboe ma siki li ɛ dɛ tɛ o'bili tɔanɔ li fanda Tɛmpɛloe nza nga. Nɛ du nɛ mɛ a mɛtrɛ 'bu nɛ bɔa ngɔ nɛ mɔlɔ.

⁸ We kɛ 'da du tɔa kɛ ma siki li ɛ dɛ kɔ ngbo Tɛmpɛloe nza nga ni a mɛtrɛ 'bu nɛ bɔa ngɔ nɛ mɔlɔ. Nɛ 'da du kɛ ma ka mɔ dɛ tɛ Tɛmpɛloe ni a mɛtrɛ 'bu nɛ mɔlɔ.

⁹ Do ti tɔa ni si 'biti gba wese, wa dɛa nu tɔa di ni, takɔ owinɔ wa yolo li fanda nza nga ni wa le do ma.

¹⁰ Nɛ nu tɔa ni do fala ngbo kɛ li fanda Tɛmpɛloe ndua nɛ ni. Do si ba gɔtɔ, tɔa 'bɔ di ni, ma siki li ɛ dɛ li fanda, do tɛ tɔa 'do Tɛmpɛloe ni.

¹¹ Wala la do dati tɔa ni. Nɛ tɛlɛ tɛ kɛ wa dɛa do tɔa ni, do walanɔ ma le dɛ kɔ nɛ, do kɛnɔ wa hɔ nɛ nza ni, ma wia kɔ̃ do tɔa kɛ si gbãlã ngɔ ni.

¹² Ma 'bɔ na mɛ ni we duzu nu tɔanɔ si ba gɔtɔ. Nɛ do nyanga wala ma le dɛ kɔ tɔanɔ ni, nu tɔa di ni ma siki li ɛ dɛ tɛ ngbo kɛ ma kele fala dɔnggɔ do Gale ni. Nɛ wa kũ dɛ i mɔ do si 'biti gba wese.

¹³ Nɛ wi ni tɔ̃a hã mi na: “Tɔanɔ si gbãlã ngɔ do kɛ si ba gɔtɔ, nɛ ma siki li ɛ dɛ li fanda Tɛmpɛloe ni, mɛ a otɔa kɛ ma santo. Onganganɔ kɛ wa wia we le tɛ fala dɔnggɔ do nwa ni, wa nyɔngɔ dɔnggamɛnɔ kɛ ma santo wena ni dɛ di ni. Mba gɔ, wa ia tɔanɔ ni hã NWA, nɛ wa a dɔnggamɛnɔ kɛ ma santo wena ni dɛ di ni. Mɛ a mɛnɔ kɛ wa 'dɔlɔ hã NWA, do sa'denɔ kpi do kpi kɛ wa gbɛ wa hã Gale, takɔ a fo ku'da 'dã mɔ zu owinɔ ni.

¹⁴ Dɛ ngɔ nɛ, onganganɔ kɛ wa le tɛ fala dɔnggɔ do NWA ni, wa wè tɛ hɔ dɛ li fanda ogele winɔ wa dungu nɛ ni do ti iko gɔ. Nɛ nde ma wia na, wa hɔlɔ otulu santonɔ kɛ wa hi'da we dɛ toe hã NWA ni, nɛ wa la ma dɛ kɔ tɔanɔ ni, sɛ nɛ wa ĩ ti hɔ dɛ fala winɔ wa mba do ngba wa ni de.”

Wa wia 'da du ngbo Tɛmpɛloe

¹⁵ 'Da fala wi ni wia 'da du tɔanɔ tɛ kɔ ngbo Tɛmpɛloe ia do'do, nɛ a hɔ do mi do nu tɔa kɛ si 'biti gba wese. Nɛ a ma ngɔ we 'da du li fanda kɛ ma zĩ Tɛmpɛloe takpa ni.

¹⁶ A ba te a we do mɛ ni, nɛ a kpa na, 'da du li fanda kɛ si 'biti gba wese ni a mɛtrɛ 'bu nɛ mɔlɔ.

^17-19 A dɛa 'bɔ na mɛ ni we falanɔ si gbãlã ngɔ, do si ba gɔtɔ, do si 'biti gɛ̃a wese, nɛ a kpa na, du nɛ vɛ̃ wia kɔ̃ mɛtrɛ kama bɔa do 'bu nɛ mɔlɔ.

²⁰ Ki ni a tɛlɛ tɛ kɛ wi ni wia do 'da du ngboe ma zĩ Tɛmpɛloe takpa si 'biti falanɔ nalɛ gɛ a ni. 'Da du dɛlɛ ngboe wia kɔ̃ vɛ̃ mɛtrɛ kama bɔa do 'bu nɛ mɔlɔ. Wa dɛa ma we gɔnɔ sanga fala kɛ wa ia ma hã Gale, do gele fala kɛ ma santo gɔ ni.