EZEKIƐLƐ 40 - WE NU GALE 1995

Ezekiɛlɛ zɔa mbé Tɛmpɛlo do li yalɛ

¹ Do kɔ sabɛlɛ kɛ 'bu nɛ bɔa ngɔ nɛ mɔlɔ, zɛkɛ 'da kpo, kɔ̃ nɛ 'bu, 'do kɛ lɛ la kɔlɔ 'duli ni, nɛ ngawi 'da NWA ba mi la do mi. Ma zi do kɔ sabɛlɛ kɛ 'bu ngɔ nɛ nalɛ 'do kɛ le Yeruzalɛmɛ tia dɛ kɔ̃ owi sɛnɛ Oyuda ni.

² Nɛ Gale la do mi do li yalɛ dɛ ngɔ nù Israɛlɛ, nɛ a e mi tɛ 'bɛ̃lɛ̃ zu kala kpo. Nɛ mi ka mɔ dɛ nù si ba gɔtɔ, nɛ mi zɔ otɔa, ɔ nɛ gã le ni.

³ Nɛ NWA kã mi i mɔ, nɛ mi zɔ wele a yula dɛ nu ngbo. Wi ni, a ɔ nɛ wa dolo a do tũ mɔ bolo ni. A 'bia fɛlɛ do te we do mɔ dɛ kɔ̃ a.

⁴ Nɛ nwa tɔ̃ hã mi na: “Be 'da wele, mɔ gɛ́ zala mɔ, nɛ mɔ hũi li mɔ, kɔ mɔ zɔ mɛ mi nɛ be hã mɔ ni. We kɛ mi tɛa do mɔ dɛ dɛ, takɔ mɔ zɔ ma. 'Do nɛ, nɛ mɔ nɛ 'da obe Israɛlɛ, nɛ mɔ tɔ̃ we mɛnɔ vɛ̃ mɔ zɔa ni hã wa.”

Li fanda do nu ngbonɔ

⁵ Mi nɛ ka mɔ, nɛ mi zɔ ngbo ma zĩ 'do Tɛmpɛloe takpa. Nɛ wi kɛ a ba sɔ te kɛ ma a mɛtrɛ talɛ dɛ kɔ̃ a ni, a we 'da ngala ngboe do 'da pɛsɛ li nɛ. A wia, nɛ nde mɛ a mɛtrɛ talɛ talɛ.

⁶ 'Do nɛ, nɛ a la si nu ngbo kɛ ma ka mɔ si 'biti gba wese ni. Nɛ a kũ do ngɔ 'dinggili wa 'dafa we kũ do ma dɛ kɔ ngboe i ni, nɛ a we 'da du gbangga nu tɔa, nɛ nde mɛ a mɛtrɛ talɛ.

⁷ Nɛ dɛ 'do gbangga ni, be wala kɛ wa le do ma dɛ kɔ 'bili tɔanɔ ni boe. Nɛ do kulu be wala ni do bɔa nɛ, be 'bili kɔ tɔa talɛ kɛ owi zɔ mɔ nu ngbonɔ wa yolo dɛ kɔ nɛ ni boe. Nɛ 'da du 'bili tɔa kpo kpo do 'da dɔ nɛ ma wia kɔ̃ mɛtrɛ talɛ talɛ. Nɛ dĩ nu dɛlɛ kɛ wa 'bili do kɔ tɔanɔ ni mɛ a mɛtrɛ bɔa do dɔ nɛ. Nɛ do Sɔkpɔ be wala wa le do ma dɛ kɔ 'bili tɔanɔ ni, gbangga nu tɔa di ni boe we le do ma dɛ kɔ gã 'bili tɔa ma siki li ɛ dɛ nu Tɛmpɛlo i ni. Nɛ 'da du gbangga ni a mɛtrɛ talɛ.

^8-9 Nɛ wi ni we 'bɔ 'da gã 'bili kɔ tɔa ma siki li ɛ dɛ nu Tɛmpɛloe ni. Nɛ 'da du kɔ nɛ a mɛtrɛ nalɛ. Nɛ 'da dĩ nu dɛlɛnɔ nza nga ni a mɛtrɛ kpo. Nɛ gã 'bili kɔ tɔa ni ma kɔlɔ dɔ̃ɔ do Tɛmpɛloe.

¹⁰ Nɛ obe 'bili tɔanɔ gazɛlɛ si 'biti gba wese kɛ owi zɔ mɔ nu ngbonɔ wa yolo dɛ kɔ nɛ ni, ma wia kɔ̃ vɛ̃. Ma ka mɔ dɛ li ngbɛ ɛ talɛ talɛ, nɛ dĩ nu dɛlɛnɔ wa gɔnɔ do sanga 'bili tɔanɔ ni, ma wia kɔ̃ vɛ̃.

¹¹ 'Do nɛ, nɛ wi ni we 'da nu tɔa we le do ma dɛ li fanda Tɛmpɛloe i ni. Nɛ a kpa na, gã nu nɛ a mɛtrɛ mɔlɔ, nɛ 'da du nɛ a mɛtrɛ gazɛlɛ do dɔ nɛ.

¹² Nɛ tɛ nu be 'bili tɔanɔ 'da Owi zɔ mɔ nu ngbonɔ ni kpo kpo, wa wia we kpe nu nɛ dɛ ngɔ we sãtimɛtrɛ 'bu nɛ mɔlɔ.

¹³ 'Do nɛ, nɛ a we 'da du gã 'bili kɔ tɔa, nɛ nde ma mɛtrɛ 'bu.

¹⁴ Nɛ ngbo zĩ nu gã 'bili kɔ tɔa ni takpa.

¹⁵ Yolo tɛ kuti nu ngboe nza nga we hɔ tɛ Sɔkpɔ dɛlɛ nu gã 'bili kɔ tɔa, mɛ a mɛtrɛ 'bu nɛ bɔa ngɔ nɛ mɔlɔ.

¹⁶ Nɛ tɛ dɛlɛnɔ nza nga, do kɛnɔ wa gɔnɔ do kɔ tɔanɔ, do tɛ dɛlɛ gã 'bili kɔ tɔa ni, wa dɛa oli holo kɛ ma gã si kɔ tɔa i, nɛ ma mɔɛ dɛ nza nga ni. Nɛ wa gɛzɛ onwá 'bete tɛ dɛlɛnɔ kɔ tɔa i ni.

¹⁷ Nɛ wi sɔ ni la do mi dɛ li fanda 'do Tɛmpɛloe i, nɛ nde 'bili kɔ tɔa 'bu nɛ talɛ zĩ Tɛmpɛloe takpa. Nɛ wa a ogã ta kɛ ma a pɛrr kpa do nu 'bili tɔanɔ ni.

¹⁸ Nɛ gã tanɔ ni zĩ li fanda takpa. Li fanda ni do nù, nɛ li fanda kɛ kɔ Tɛmpɛloe i ni do ngɔ.

¹⁹ Nɛ nu tɔa kɛ ma le dɛ li fanda kɛ kɔ Tɛmpɛloe i ni, ma ngala dɛ ngɔ wena. Nɛ wi ni wia 'da nu ngboe kɛ nù nga we hɔ tɛ nu ngbo kɛ ngɔ i tɛ si 'biti gba wese, do kɛ si gbãlã ngɔ ni, nɛ nde ma bɔa nɛ a mɛtrɛ 'bu nɛ mɔlɔ mɔlɔ.

²⁰ 'Do nɛ, nɛ wi sɔ ni nɛ, nɛ a we 'bɔ 'da du nu ngbo kɛ si gbãlã ngɔ, kɛ wa le do ma dɛ li fanda Tɛmpɛloe nza nga ni.

²¹ Nɛ a we 'bɔ be 'bili kɔ tɔanɔ talɛ do kulu wala ni do bɔa nɛ, do gã 'bili kɔ tɔa do Sɔkpɔ wala ni. Ĩ na, 'bili kɔ tɔanɔ do dɛlɛnɔ ma vɛ̃ wia kɔ̃ do 'da kɛnɔ tɛ nu ngbo kɛ si 'biti gba wese gɛ. 'Da du nu ngboe a mɛtrɛ 'bu nɛ bɔa ngɔ nɛ mɔlɔ, nɛ 'da dɔ nɛ a mɛtrɛ 'bu ngɔ nɛ bɔa do dɔ nɛ.

²² Nɛ gã 'bili kɔ tɔa ni, do li holonɔ, do nwá 'betenɔ wa gɛzɛ tɛ dɛlɛnɔ ni, ma wia kɔ̃ do kɛnɔ si tɛ mbee nu ngboe ni. We le dɛ nu ngboe si gbãlã ngɔ ni, nɛ wa kũ dɛ ngɔ nyanga wi sambo. Nɛ gã 'bili kɔ tɔa ma siki li ɛ dɛ tɛ Tɛmpɛloe.

²³ Nɛ nu ngboe we le do ma dɛ li fanda Tɛmpɛloe nza nga ni, ma ka mɔ dɛ tɛ mbe nu ngbo kɛ wa le do ma dɛ li fanda nu Tɛmpɛloe i, kpasaa ɔ nɛ kɛ tɛ nu ngbo kɛ ma si 'biti gba wese gɛ ni. Nɛ wi ni we 'da du wala, yolo te nu ngbo kɛ dati, we hɔ tɛ kɛ 'do nɛ ni, nɛ nde ma mɛtrɛ 'bu nɛ mɔlɔ.

²⁴ 'Do nɛ, nɛ wi ni kã mi dɛ nu ngbo kɛ si ba gɔtɔ, nɛ mi zɔ 'bɔ mbé nu ngbo di ni. Nɛ a we 'da du be 'bili tɔanɔ kɛ owi zɔ mɔ tɛ nu ngbonɔ wa yolo kɔ nɛ ni, nɛ a kpa na, nu ngboe ni wia kɔ̃ do tala gele nu ngbonɔ dati ni.

²⁵ Nɛ li holo tɛ mɛ 'bɔ tɛ dɛlɛ 'bili tɔanɔ ni boe, nɛ ma wia kɔ̃ do kɛnɔ tɛ dɛlɛnɔ tɛ gele nu ngbonɔ ni. 'Da du nu ngboe ni, mɛ a mɛtrɛ 'bu nɛ bɔa ngɔ nɛ mɔlɔ, nɛ 'da dɔ nɛ a mɛtrɛ 'bu ngɔ nɛ bɔa do dɔ nɛ.

²⁶ We le do nu ngboe ni, nɛ wa kũ dɛ ngɔ nyanga wi sambo. Nɛ gã 'bili kɔ tɔa ma siki li ɛ dɛ tɛ Tɛmpɛloe. Wa gɛzɛ 'bɔ onwá 'bete tɛ dɛlɛnɔ kulu wala do bɔa nɛ.

²⁷ Nɛ nu ngboe we le do ma dɛ li fanda Tɛmpɛloe nza nga ni, ma siki li ɛ dɛ tɛ mbe nu ngbo kɛ wa le do ma dɛ li fanda nu Tɛmpɛloe i ni. Nɛ wi ni we 'da du wala, yolo tɛ nu ngbo kɛ dati we hɔ tɛ kɛ 'do nɛ ni, nɛ nde mɛ a mɛtrɛ 'bu nɛ mɔlɔ.

Li fanda do nu ngbonɔ kɔ Tɛmpɛloe

²⁸ Nɛ wi ni kã mi dɛ nu ngbo kɛ si ba gɔtɔ, nɛ a le do mi dɛ li fanda Tɛmpɛloe kɛ kɔ nɛ i ni. Nɛ a we 'da du nu ngboe, nɛ nde ma wia kɔ̃ do nu ngbonɔ nza nga ni.

^29-30 Nɛ be 'bili tɔanɔ kɛ owi zɔ mɔ nu ngbonɔ wa yolo kɔ nɛ ni, do dɛlɛnɔ ma gɔnɔ sanga 'bili tɔanɔ, do gã 'bili kɔ tɔa, ma wia kɔ̃ do kɛnɔ tɛ nu gele ngbonɔ ni. Oli holo tɛ gã 'bili kɔ tɔa zĩ takpa, nɛ 'da du 'bili tɔa ni mɛ a mɛtrɛ 'bu nɛ bɔa ngɔ nɛ mɔlɔ, nɛ 'da dɔ nɛ a mɛtrɛ 'bu ngɔ nɛ bɔa do dɔ nɛ.

³¹ Nɛ nu gã 'bili tɔa ni ma siki li ɛ dɛ li fanda Tɛmpɛloe kɛ nza nga ni. Nɛ wa gɛzɛ onwá 'bete tɛ dɛlɛnɔ kulu wala kɔ nɛ mɔ ni do bɔa nɛ. We le do nu ngboe ni, nɛ wa kũ dɛ ngɔ nyanga wi ngbɛ'dɛ'dɛ.

³² Nɛ wi ni la do mi do nu ngbo kɛ si 'biti gba wese we le dɛ li fanda kɛ kɔ Tɛmpɛloe i ni. Nɛ a we 'da nu ngboe kɔ nɛ mɔ ni, nɛ a kpa na, ma wia kɔ̃ do kɛnɔ dati ni.

³³ Nɛ be 'bili tɔanɔ kɛ Owi zɔ mɔ nu ngbonɔ wa yolo dɛ kɔ nɛ, do dɛlɛnɔ wa gɔnɔ do sanga 'bili kɔ tɔanɔ, do gã 'bili kɔ tɔa ni ma wia kɔ̃ do kɛnɔ tɛ nu gele ngbonɔ ni. Nɛ oli holo ma tɛ nu ngboe, do tɛ gã 'bili tɔa zĩ takpa. 'Da du 'bili tɔa mɛ a mɛtrɛ 'bu nɛ bɔa ngɔ nɛ mɔlɔ, nɛ 'da dɔ nɛ a mɛtrɛ 'bu ngɔ nɛ bɔa do dɔ nɛ.

³⁴ Nɛ nu gã 'bili kɔ tɔa ma siki li ɛ dɛ li fanda Tɛmpɛloe kɛ nza nga ni. Nɛ wa gɛzɛ onwá 'bete tɛ dɛlɛnɔ kulu wala kɔ tɔa i do bɔa nɛ. We le do nu ngboe ni, nɛ wa kũ dɛ ngɔ nyanga wi ngbɛ'dɛ'dɛ.

³⁵ Nɛ wi ni kã 'bɔ mi dɛ nu ngbo kɛ si gbãlã ngɔ ni, nɛ a we 'da du nɛ. Nɛ nde ma wia kɔ̃ do kɛnɔ dati ni.

³⁶ Nɛ nu ngboe ni tɛ mɛ 'bɔ do obe 'bili kɔ tɔa kɛ Owi zɔ mɔ nu ngbonɔ wa yolo kɔ nɛ ni boe, do dɛlɛnɔ ma gɔnɔ sanga 'bili tɔanɔ, do gã 'bili tɔa do oli holo zĩ ma takpa. Nɛ 'da du 'bili tɔa ni mɛ a mɛtrɛ 'bu nɛ bɔa ngɔ nɛ mɔlɔ, nɛ 'da dɔ nɛ a mɛtrɛ 'bu ngɔ nɛ bɔa do dɔ nɛ.

³⁷ Nɛ nu gã 'bili tɔa ni ma siki li ɛ dɛ li fanda Tɛmpɛloe kɛ nza nga ni. Nɛ wa gɛzɛ onwá 'bete tɛ dɛlɛnɔ kulu wala kɔ tɔa i do bɔa nɛ. We le do nu ngboe ni, nɛ wa kũ dɛ ngɔ nyanga wi ngbɛ'dɛ'dɛ.

³⁸ Mbee gbangga nu tɔa ma hũi, nɛ ma kele nu gã 'bili kɔ tɔa kɛ si gbãlã ngɔ ni. Mɛ a fala wa fɔlɔ o'bili sa'denɔ kɛ wa gbɛ we dɔ do dɔnggamɛnɔ ni.

³⁹ Nɛ kɔ gã 'bili tɔa ni, wa a omɛsa nalɛ, bɔa do mbe Sɔkpɔ tɔa, nɛ mbe bɔa do kulu nɛ. Mɛ a mɛsanɔ kɛ wa gbɛ osa'de dɔnggamɛnɔ ngɔ nɛ ni. Nɛ mɛ a dɔnggamɛnɔ kɛ wa dɔ mbee nɛ dɔa, nɛ mbe nɛ we fo ku'da 'dã mɔ, tabi we si olo ku'da 'dã mɔ.

⁴⁰ Nɛ omɛsa nalɛ 'bɔ do nza nga. 'Da fala mɔ yolo dɛ nu ngbo kɛ si gbãlã ngɔ, nɛ mɔ zɔ ma bɔa tɛ kulu wala kpo kpo.

⁴¹ Wa a omɛsa vɛ̃ ngbɛ'dɛ'dɛ we dɛ to 'bili gɛlɛ osa'de dɔnggamɛnɔ ngɔ nɛ. Wa a ma nalɛ do kɔ nɛ, nɛ nalɛ do li fanda nza nga.

⁴² Nɛ wa sɛa 'bɔ omɛsa nalɛ do ta, takɔ wa 'dafa sa'denɔ dɛ ngɔ nɛ we dɔ wa. Nɛ gã li mɛsanɔ ni a sãtimɛtrɛ 'bu nɛ gazɛlɛ ngɔ nɛ mɔlɔ, nɛ 'da ngala nɛ a sãtimɛtrɛ 'bu nɛ mɔlɔ. Nɛ wa a omɔ gbɛ do osa'de dɔnggamɛnɔ dɛ ngɔ nɛ.

⁴³ Wa zã gbongbo dɛ 'do sãtimɛtrɛ ngbɛ'dɛ'dɛ zĩ mɛsanɔ ni takpa. Nɛ wa a mulu sa'de dɔnggamɛnɔ ngɔ mɛsanɔ ni.

⁴⁴ Nɛ wi ni la do mi dɛ li fanda kɛ nu Tɛmpɛloe i. Nɛ nde gã 'bili kɔ tɔa di ni bɔa. Mbe gã 'bili tɔa kpo do kɛ zã nu ngboe si gbãlã ngɔ, nɛ ma siki li ɛ si ba gɔtɔ. Nɛ mbee nɛ do kɛ zã nu ngboe si ba gɔtɔ, nɛ ma siki li ɛ si gbãlã ngɔ.

⁴⁵ Nɛ wi ni tɔ̃ hã mi na, gã 'bili tɔa kɛ ma siki li ɛ si ba gɔtɔ ni, mɛ a kɛ wa ia ma hã onganganɔ wa dɛ toe kɔ Tɛmpɛloe ni.

⁴⁶ Nɛ gã 'bili tɔa kɛ ma siki li ɛ si gbãlã ngɔ ni, mɛ a kɛ wa ia ma hã onganganɔ wa dɛ toe tɛ fala gbagala dɔ do sa'denɔ ni. Onganganɔ ni vɛ̃ wa a obe zã Sadɔkɛ. Nɛ kɔ nu kpala Levi, tati a obe zã Sadɔkɛ hã wa wia we kɔlɔ do NWA we dɛ to hã a.

Tɛlɛ tɛ Tɛmpɛloe

⁴⁷ Wi ni nɛa 'bɔ, nɛ a we 'da du li fanda kɔ ngbo Tɛmpɛloe ni. Nɛ nde 'da du nɛ do 'da dɔ nɛ wia kɔ̃ vɛ̃ mɛtrɛ 'bu nɛ mɔlɔ. Nɛ gbagala ma do dati Tɛmpɛloe.

⁴⁸ Nɛ wi ni kã mi dɛ kɔ gã 'bili tɔa we le dɛ kɔ Tɛmpɛloe i ni. Nɛ gã nu te gbangganɔ kpo kpo a mɛtrɛ bɔa do dɔ nɛ. Nɛ 'da gã nu ngboe mɛ a mɛtrɛ sambo.

⁴⁹ Nɛ 'da ngala nu gã 'bili tɔa ni dɛ ngɔ mɛ a mɛtrɛ 'bu, nɛ 'da dɔ nɛ a mɛtrɛ gazɛlɛ. We le do nu gã 'bili tɔa ni, wa kũ dɛ ngɔ nyanga wi 'bu. Nɛ wa zĩ bɛlɛduma bɔa nu gã 'bili tɔa ni.