EZEKIƐLƐ 4 - WE NU GALE 1995

NWA bia mɔ kɛ ma kpa sɛ obe Israɛlɛ ni hã wa

¹ Nɛ NWA tɔ̃ 'bɔ na: “Aa mɔ, be 'da wele, mɔ bá biliki, kɔ mɔ e ma dɛ dati mɔ, nɛ mɔ gɛzɛ le Yeruzalɛmɛ dɛ ngɔ nɛ.

² 'Do nɛ, nɛ mɔ bɔ́lɔ́ mɔ zĩ do 'do le we be na ogele soda wa zĩ 'do le. Nɛ mɔ gɛzɛ fala ɔinɔ 'da wa, nɛ mɔ gɛzɛ nùi kɛ wa sua ma gbaa, nɛ ma we kɔ̃ do zu ngboe ni, nɛ mɔ gɛzɛ 'bɔ omɔ bi bolonɔ 'da wa kpi do kpi.

³ Ma e do'do, nɛ mɔ ba mbala mɔ bolo, nɛ mɔ e ma dɛ ngbala mɔ do le mɔ gɛza ni ɔ nɛ ngbo ni. Nɛ mɔ kala li mɔ tɛ soko do le ni. Ĩ na, osodanɔ wa linggi sɛ le, we kɛ mɔ yɔla mɛ zĩ 'do nɛ ni. Nɛ ki ni sɛ a mɔ kɛ mɔ bia ma hã obe Israɛlɛ.

⁴ “Ma e do'do, nɛ mɔ ɔ́ nù dɛ ngɔ gale kɔ̃ mɔ. Kɔ mɔ ɔ nù ní, nɛ mi e sɛ dĩ tole 'dã mɛnɔ 'da obe Israɛlɛ dɛ ngɔ mɔ.

⁵ Nɛ dĩ tole 'dã mɛnɔ 'da Oisraɛlɛ ma ɔ sɛ dɛ ngɔ mɔ 'do tũ kama talɛ do 'bu nɛ kusi. Mba gɔ, Oisraɛlɛ wa dɛa 'dã mɔ 'do sabɛlɛ kama talɛ do 'bu nɛ kusi. Na mɛ ni, tũ kpo kɛ mɔ ɔ sɛ nù ni, ma wia kɔ̃ do sabɛlɛ kpo, kɛ wa dɛa do 'dã mɛ ni. Nɛ mɔ ba sɛ ku'da 'dã mɛnɔ 'da Oisraɛlɛ dɛ zu mɔ.

⁶ Kɔ̃ tũnɔ ni ma e, nɛ mɔ síkí tɛ mɔ si ngɔ ngawili kɔ̃ mɔ. Nɛ dĩ tole 'dã mɛnɔ 'da obe Yuda, ma ɔ sɛ dɛ ngɔ mɔ 'do 'bu tũ nalɛ. Tũ kpo kɛ mi hã ma hã mɔ ni, ma wia kɔ̃ do sabɛlɛ kpo, kɛ Oyuda wa dɛa do 'dã mɔ ni.

⁷ Nɛ mɔ kálá li mɔ tɛ soko do le Yeruzalɛmɛ, kɛ osodanɔ wa linggi ma ni. Nɛ mɔ lámá kɔ̃ mɔ, nɛ mɔ dãlã dɛ tɛ le do zu li mi.

⁸ Mi ɛnzɛ sɛ mɔ do fɛlɛ na, da dɛ kɔ mɔ kífí tɛ mɔ gɔ gbaa na, kɔ̃ tũnɔ kɛ osodanɔ wa nɛ linggi do le ni e, sɛ nɛ de.

⁹ “Nɛ nde ngangga ni, mɔ nɛ́, nɛ mɔ so lɔsɔ, ble, ɔrzɛ, madesu, do sindi, nɛ mɔ mba li nɛ vɛ̃ dɛ kɔ kpana kpo we dɛ do mapa. Nɛ mɛ sɛ a nyɔngɔmɛ 'da mɔ 'do tũnɔ kama talɛ do 'bu nɛ kusi kɛ mɔ nɛ ɔ sɛ nù ni.

¹⁰ Tũ kpo kpo, nɛ mɔ nyɔngɔ sɛ be 'bili mapa kɛ dĩ nɛ gramɛ kama bɔa ni. Nɛ mɔ ɔ do ma gbaa na fala sa.

¹¹ Tũ kpo kpo, nɛ wa tɛ sɛ do lì litrɛ kpo hã mɔ, nɛ mɔ nɔ.

¹² Mɔ dɛ sɛ be mapa ɔ nɛ bisikiti kɛ wa dɛ do ɔrzɛ ni. Nɛ mɔ kala sɛ kula 'dɔlɔ go'do winɔ, nɛ mɔ dã do we, nɛ mɔ dɔ do mapa 'da mɔ dɛ gbali winɔ vɛ̃, nɛ mɔ e we nyɔngɔ ma.”

¹³ Nɛ NWA tɔ̃ 'bɔ na: “Nyɔngɔmɛ mɔ nɛ nyɔngɔ ma ni, ma be nyɔngɔmɔ ndi kɛ obe Israɛlɛ wa nyɔngɔ sɛ ngɔ gele nùi mi nɛ ndaka wa dɛ ngɔ nɛ ni.”

¹⁴ Nɛ nde mi gisa na: “Aa NWA Gale, ma wé sɛ gɔ. Mi dɛ̃ mbe mɔ ndi fala kpo gɔ. Nɛ yolo do be tɛ mi, mi nyɔngɔ mbe sa'de kɛ a fia iko, tabi kɛ sa'de zamɔ a gbɛa a ni gɔ.”

¹⁵ Nɛ NWA gese na: “Mi kɔ̃a. Kɔ mɔ tɛ kàlà 'dɔlɔ go'do wele gɔ. Nɛ nde mɔ kala 'dɔlɔ ngɔmbɔ, nɛ mɔ dã do we, takɔ mɔ dɔ do mapa 'da mɔ.”

¹⁶ Nɛ a tɔ̃ 'bɔ na: “Aa mɔ, be 'da wele, mi dɛ sɛ na, mapa kpo tɛ lè 'bɔ kɔ le Yeruzalɛmɛ gɔ. Nɛ owinɔ kɔ le ni wa nyɔngɔ sɛ be nyɔngɔmɔ sĩ, kɛ wa we sɛ ma hã wa wia ni. Nɛ ma hã sɛ kili do 'bako hã wa.

¹⁷ Fo sɛ 'bɔ nyɔngɔmɔ, do lì bina, nɛ wa mbɔkɔ sɛ vɛ̃, nɛ wa fe we duzu 'dã mɛnɔ 'da wa.”