EZEKIƐLƐ 39 - WE NU GALE 1995

Nwa Gɔgɛ a fe sɛ li bolo

¹ Nɛ NWA tɔ̃ hã mi na: “Mɔ, be 'da wele, mɔ nɛ́ kɔ mɔ dãlã dɛ tɛ nwa Gɔgɛ do zu li mi. Nɛ mɔ gbá nu we mi NWA Gale, mi tɔ̃ gɛ hã a na: Mɔ, Gɔgɛ, gã nwa ngɔ onu kɔnggɔ Mesɛkɛ do Tubalɛ, mi nɛ siki li mi dɛ tɛ mɔ.

² Mi fo sɛ mɔ ngɔ nùi 'da mɔ kɛ ma si gbãlã ngɔ i ni, nɛ mi tombo sɛ mɔ do ngawi dɛ ngɔ kalanɔ tɛ Israɛlɛ, takɔ mɔ bi obe Israɛlɛ di ni.

³ Mɔ hɔ i mɔ, nɛ mi zɛ sɛ kɔ̃ mɔ, nɛ nzabele mɔ 'bia do gale kɔ̃ mɔ ni, ma gbini sɛ. Nɛ kpilinɔ mɔ 'bia do ngawili kɔ̃ mɔ ni, ma ala sɛ.

⁴ Nɛ mɔ do osodanɔ 'da mɔ, do wanɔ kɛ wa mba do mɔ ni, nɛ fe sɛ dɛ ngɔ kalanɔ tɛ Israɛlɛ ni. Nɛ nɔɛnɔ do sa'de zamɛnɔ wa nyɔngɔ sɛ wɔlɔ nɛ.

⁵ Nɛ fe sɛ dɛ zamɔ, ɔ nɛ kɛ mi NWA Gale, mi tɔ̃a zi hã mɔ ni.

⁶ Mi fi sɛ we tɛ nù Magɔgɛ do olenɔ nu lì, tɛ fala winɔ wa ɔ tɛ nɛ, nɛ nde wa lénggé mɔ gɔɛ ni. Nɛ winɔ vɛ̃ wa ĩ sɛ na, mi a NWA.

⁷ Mi dɛ sɛ na, obe Israɛlɛ wa ĩ ti mi kɛ mi a santo ni, nɛ mi kɔ̃́ sɛ 'bɔ na, wa 'danga zu li mi gɔ. Nɛ ogele winɔ wa ĩ sɛ na, mi a NWA Gale santo 'da obe Israɛlɛ.

⁸ “Mɔ ĩ na, ngba soe kɛ mɛnɔ mi tɔ̃a we nɛ ni nɛ dɛ do tɛ̃ ɛ ni, ma kɔlɔ ia.

⁹ Obe Israɛlɛ wa hɔ sɛ nza kɔ lenɔ 'da wa, nɛ wa nɛ sɛ we kala mɔ bi bolonɔ 'da Owi sɛnɛ wa, nɛ wa fi sɛ we tɛ nɛ. Wa ngɛmɛ sɛ Ongele do onzabele, okpili, osɛlɛ do odu kɔya, nɛ wa fi sɛ we tɛ nɛ. Na mɛ ni, nɛ wa kpa sɛ gua dã do we gbaa 'do sabɛlɛ sambo.

¹⁰ Nɛ Owele wa nɛ́ sɛ 'bɔ fɔ we fa gua gɔ, nɛ wa nɛ́ sɛ 'bɔ zã kɔlanɔ we 'bili gua gɔ. We kɛ wa kala sɛ mɔ bi do bolonɔ ni, nɛ wa dã do we 'da wa. Wa kala sɛ odia mɔ tɛ osodanɔ kɛ wa kala zi tɛ mɛ 'bɔ odia mɔ tɛ wa ni, nɛ wa si do ma. Mi NWA Gale, mi tɔ̃a ni.”

Wa mi sɛ nwa Gɔgɛ

¹¹ Nɛ nwa tɔ̃ na: “'Da fala ma hɔ sɛ na mɛ ni, nɛ mi hã sɛ fala zã do zunu Gɔgɛ dɛ ngɔ nù Israɛlɛ ni. Ma sɛ tɛ kɔ gbangɔlɔ̃ 'da Owi la Walanɔ, kɛ ma do 'do gba lì Ndɔ Fio si 'biti gba wese ni. Nɛ zuni ni, ma kele sɛ wala ti Owi la walanɔ do'do. Wa mi sɛ Gɔgɛ do sodanɔ 'da a vɛ̃ dɛ di ni. Nɛ wa kifi sɛ li gbangɔlɛ̃ ni na: ‘Gbangɔlɔ̃ 'da gba gili winɔ 'da Gɔgɛ.’

¹² Ma dɛ sɛ zɛkɛ sambo, takɔ obe Israɛlɛ wa mi wɔlɔnɔ ni vɛ̃, kɔ wa dɛ na, nùi 'da wa ma hɔ sa li mi.

¹³ Owinɔ vɛ̃ di ni ni, wa mba sɛ ngba wa kpo we dɛ toe ni. Nɛ ngba soe mi be sɛ tɛ mi do dɔ̃lɔ̃ li 'da mi vɛ̃ ni, nɛ wa kpa sɛ dɔ̃lɔ̃ li olo toe 'da wa.

¹⁴ 'Da fala sabɛlɛnɔ sambo ni ma la, nɛ wa tombo sɛ Owele, takɔ wa fa wɔlɔnɔ kɛ ma 'bana ngɔ nùi ni, nɛ wa mi ma. Na mɛ ni, nɛ wa dɛ sɛ na, nùi ma hɔ sa li mi.

¹⁵ Wa yɛnggɛ sɛ ngɔ nùi vɛ̃, kɔ 'da fala wa hɔ ngɔ ogbãlã wele, nɛ wa a sɛ ota di ni we be fala gbãlãnɔ ni. Na mɛ ni, nɛ wanɔ kɛ wa tɛ do 'do wa, takɔ wa mi gbãlãnɔ ni, wa kala sɛ ma, nɛ wa la do ma dɛ kɔ gbangɔlɔ̃ 'da Gba gili winɔ 'da Gɔgɛ i we mi ma.

¹⁶ Na mɛ ni, nɛ nùi ma hɔ sɛ sa li mi.” Wa kpa sɛ le dɛ kɛ zã gbangɔlɛ̃ ni. Nɛ wa kifi sɛ li le ni na, Hamona. Gulu nɛ na: “Gba gili.”

^17-18 Nɛ NWA Gale tɔ̃ 'bɔ hã mi na: “Be 'da wele, mɔ sá mɔ hã nɔɛnɔ do sa'de zamɛnɔ falanɔ vɛ̃ kɔ wa tɛ, nɛ wa ngɛmɛ ngba wa we nyɔngɔ dɔnggamɛnɔ mi nɛ gbɛ hã wa ni. Mɛ sɛ a gbalimɔ tɛ ngɔ kalanɔ tɛ Israɛlɛ. Wa nyɔngɔ sɛ mulu tɛ onga sodanɔ, nɛ wa nɔ tɔkɔ tɛ Onwanɔ ngɔ nyanga nza gɛ. We kɛ mi gbɛ sɛ wa, ɔ nɛ kɛ wele gbɛ do wili bata, be bata, dua, do be ngɔmbɔ kɛ a dɛ nɔ wena ni.

¹⁹ Nɛ 'da fala mi gbɛ winɔ ni, nɛ nɔɛnɔ do sa'de zamɛnɔ wa nyɔngɔ sɛ kɛndɔ tɛ wa, ɔ nɛ kɛ zã wa kɔ̃a ni. Nɛ wa nɔ sɛ tɔkɔ tɛ wa gbaa, nɛ ma ba wa.

²⁰ Wa nyɔngɔ sɛ mbalatanɔ, do Owi kũ mbalatanɔ, sodanɔ, do onwa bolonɔ vɛ̃. Mi NWA Gale, mi tɔ̃a ni.

²¹ “Mi be sɛ dɔ̃lɔ̃ li 'da mi hã ogele winɔ. Wa zɔ sɛ ngawi 'da mi do 'da fala mi hã sɛ etumbu hã wa, ɔ nɛ kɛ mi 'bili zi ni.

²² Nɛ yolo do ngba soe ni, nɛ obe Israɛlɛ wa ĩ sɛ na, mi a NWA Gale 'da wa.”

Gale a gese sɛ dia dungu hã obe Israɛlɛ

²³ NWA tɔ̃a na: “Ogele winɔ wa ĩ sɛ na, obe Israɛlɛ wa la zi kɔlɔ 'duli, we duzu 'dã mɛnɔ wa dɛa zi dɛ 'da mi ni. Mi siki zi 'do mi lua do wa, nɛ mi ia Owi sɛnɛ wa na, wa nɛ ngɔ wa, nɛ wa gbɛ wa li bolo.

²⁴ Mi kifi 'do mi hã wa, nɛ mi dɛa do wa wia do 'da gã 'dã mɛnɔ wa dɛa ni.

²⁵ “Nɛ nde nɛ zélé we mi NWA, mi tɔ̃ gɛ! Yolo do sɔɛ gɛ, mi ĩ sɛ 'bako hã obe Israɛlɛ, kɛ wa a obe zã Yakɔbɔ ni. Mi dɛ sɛ na, wa kpa 'bɔ dia mɔ olo ngamɛ wa zɔa zi ni, nɛ mi dɛ 'bɔ na, wa vɛ̃ wa dɔnggɔ zu li mi kɛ ma santo, ɔ nɛ kɛ ma wia ni.

²⁶ Wa ɔ sɛ 'bɔ mbé nɛ dɛ ngɔ nùi 'da wa, nɛ wa kpa sɛ dungu fio, nɛ fo sɛ wi a kili tɛ wa bina. Do 'da fala ni, nɛ tɛ wa ma ele sɛ ngɔ sape wa kpa zi we duzu 'dã mɛnɔ wa dɛa dɛ 'da mi ni.

²⁷ Mi fo sɛ wa ngɔ gele nùnɔ tɛ sanga owi sɛnɛ wa, nɛ mi gese sɛ wa dɛ ngɔ nùi 'da wa. Nɛ 'da fala ogele winɔ kɛ zã wa ni, wa zɔ sɛ mɛ mi dɛa do wa, owinɔ 'da mi ni, nɛ wa ĩ sɛ na, mi a Gale santo.

²⁸ Nɛ owinɔ 'da mi wa ĩ sɛ tɛ mɛ 'bɔ na, mi a NWA Gale 'da wa. We kɛ wa zɔa na, mi tumba zi lo kɔlɔ 'duli, nɛ 'do nɛ, nɛ mi gisa lo dɛ ngɔ nùi 'da lo, nɛ mi là wele kpo i mɔ gɔ ni.

²⁹ Mi tombo sɛ Hi Wi 'da mi dɛ ngɔ obe Israɛlɛ, nɛ mi bá sɛ 'bɔ li mi ngɔ wa gɔ. Mi NWA Gale, mi tɔ̃a ni.”