EZEKIƐLƐ 37 - WE NU GALE 1995

Ezekiɛlɛ zɔa gbangɔlɔ̃ ma dunu do gbãlã wele

¹ Ngawi 'da NWA lia mi, nɛ Hi Wi 'da a ba mi, nɛ a e mi kɔ gbangɔlɔ̃. Nɛ mi zɔa na, gbãlã wele dunu kɔ gbangɔlɛ̃ ni ngurr.

² Nɛ NWA kã mi, nɛ a yɛnggɛ do mi do sanga gbãlãnɔ ni vɛ̃. Nɛ mi zɔ na, gbãlãnɔ dɛlɛ wena, nɛ ma vɛ̃ ma kula kpakala kpakala.

³ Nɛ a aka mi na: “Be 'da wele, mɔ lengge na, gbãlãnɔ gɛ ma wia tɛ tunu nɛ, nɛ ma kpasa 'bɔ mbé nɛ nde?” Nɛ mi gese hã a na: “NWA, wi ĩ ki ni, wi a mɔ zu mɔ kpo.”

⁴ Nɛ NWA tɔ̃ 'bɔ na: “Mɔ wélé we do zu li mi hã kula gbãlãnɔ gɛ na, wa zele we mi NWA, mi tɔ̃ hã wa gɛ.

⁵ Mi NWA Gale, mi tɔ̃ hã wa na: Mi nɛ tunu nɛ, nɛ mi hã mbé kpasi hã nɛ.

⁶ Mi gese sɛ nĩnɔ do mulu tɛ nɛ dɛ olo nɛ, nɛ mi kele tɛ nɛ do ndala. Mi gese sɛ bũ dɛ zã nɛ na, nɛ ɔmɔ, takɔ nɛ tunu. Na mɛ ni, nɛ nɛ ĩ́ sɛ na, mi a NWA.”

⁷ Mi zila ní, nɛ mi wele we hã gbãlãnɔ, ɔ nɛ kɛ NWA ba do nu a hã mi ni. Mi 'bana tɛ wele we iko, nɛ mi zele giti gbãlãnɔ tɛ to ngbɛ ɛ. Ma ma ngɔ yɛkɛ tɛ̃ ɛ, nɛ ma to ngbɛ ɛ, nɛ ma le dɛ kɔ ngbɛ ɛ.

⁸ Nɛ mi zɔ na, nĩnɔ do mulunɔ ma hɔa dɛ 'do gbãlãnɔ, nɛ ndala kele ma. Nɛ nde wɔlɔnɔ wa tùnù gɔ.

⁹ Nɛ NWA tɔ̃ hã mi na: “Mɔ, be 'da wele, mɔ wélé we do zu li mi hã bũ kpasi, nɛ mɔ tɔ̃ hã ma na: Mɔ bũ kpasi, NWA ba nu a hã mɔ na, mɔ yolo tɛ nyanga nzanɔ vɛ̃, nɛ mɔ tɛ, nɛ mɔ pɛpɛ dɛ ngɔ wɔlɔnɔ gɛ, takɔ wa ɔ do kpasi mbé nɛ.”

¹⁰ Mi wila wenɔ NWA tɔ̃a hã mi ni. Nɛ bũ kpasi lia kɔ wɔlɔnɔ ni, nɛ wa tunu. Nɛ wa yula do nyanga wa, nɛ wa hɔ gba gili owi bolo.

¹¹ Nɛ NWA tɔ̃ 'bɔ hã mi na: “Be 'da wele, mɔ zélé! Obe Israɛlɛ wa ɔ nɛ gbãlãnɔ gɛ. Mba gɔ, wa tɔ̃ na, lo ɔ nɛ kula gbãlã ni. Fo 'bɔ wala kpasi we lo bina, ma ia do lo ia.

¹² Kɔ mɔ mbese wa do zu li mi na: Mi NWA Gale, mi nɛ hũi nu zununɔ 'da nɛ owinɔ 'da mi, nɛ mi fo sɛ nɛ dɛ nza, nɛ mi gese nɛ dɛ ngɔ nù Israɛlɛ.

¹³ Nɛ 'da fala mi hũi sɛ nu zununɔ, nɛ mi fo sɛ nɛ dɛ nza ni, nɛ nɛ ĩ sɛ na, mi a NWA.

¹⁴ Mi hã sɛ bũ kpasi hã nɛ, nɛ nɛ tunu sɛ, nɛ mi gese sɛ nɛ dɛ ngɔ nùi 'da nɛ ngboo. Nɛ nɛ ĩ sɛ na, mi NWA, mi wila we, nɛ mi dɛa olo nu mi. Mi NWA Gale, mi tɔ̃a ni.”

NWA a mba sɛ 'bɔ li obe Israɛlɛ kpo

¹⁵ Nɛ NWA wele 'bɔ mbé we hã mi na:

¹⁶ “Be 'da wele, mɔ bá dɔ te, nɛ mɔ kɔma dɛ ngɔ nɛ na: ‘Yuda do tala Oisraɛlɛ kɛ wa lia kɔ Oyuda ni.’ Nɛ mɔ ba 'bɔ mbé dɔ te, nɛ mɔ kɔmɔ ngɔ nɛ na: ‘Yozɛfu (tabi Efraimɛ) do tala Oisraɛlɛ kɛ wa lia kɔ obe zã Yozɛfu ni.’

¹⁷ Mɔ a dɔ tenɔ bɔa ni, nɛ nu nɛ to ngbɛ ɛ do tɛlɛ tɛ kɛ na, ma kpɔ ngbɛ ɛ kpo dɛ kɔ̃ mɔ ni.

¹⁸ Kɔ fala kɛ onya mɔ, obe Israɛlɛ, wa aka mɔ we gulu mɛ mɔ dɛa ni,

¹⁹ nɛ mɔ tɔ̃ hã wa na: Mi NWA Gale, mi nɛ ba dɔ te kɛ ma be Oyuda, nɛ mi kpɔ nu nɛ do dɔ te kɛ ma be Oisraɛlɛ ni. Nɛ dɔ tenɔ bɔa ni ma hɔ sɛ te kpo dɛ kɔ̃ mi.

²⁰ “Mɔ, be 'da wele, mɔ 'bé dɔ tenɔ bɔa ni dɛ kɔ̃ mɔ do tɛlɛ tɛ kɛ na, owinɔ vɛ̃ wa zɔ ma.

²¹ Nɛ mɔ tɔ̃ hã wa na, mi NWA Gale, mi nɛ fo obe Israɛlɛ sanga ogele winɔ kɛ wa la zi dɛ 'da wa ni. Nɛ mi ngbolo sɛ li wa, nɛ mi gese wa dɛ ngɔ nùi 'da wa.

²² Nɛ mi mba sɛ li wa dɛ ngɔ kalanɔ tɛ Israɛlɛ, nɛ wa hɔ sɛ nu kɔnggɔ wele kpo. Nɛ nwa kɛ a dungu sɛ ngɔ wa ni, a sɛ kpo iko. Wa kɛ sɛ 'bɔ sanga ngba wa do nu kɔnggɔ bɔa gɔ.

²³ Nɛ wa dɔ́nggɔ́ sɛ 'bɔ okpikima na, wa hɔ wi ndi li mi gɔ. Wa 'dángá sɛ 'bɔ sila wa we dɛ 'dã mɔ kpi do kpi gɔ. Mi fɔlɔ sɛ ndi 'dã mɛnɔ 'da wa tɛ wa, nɛ wa sɛ a winɔ 'da mi, nɛ mi sɛ a Gale 'da wa.

²⁴ Mi e sɛ nwa ngɔ wa, nɛ a kpe sɛ dati wa ɔ nɛ kɛ 'da nwa Davidi ni. Wa mba sɛ ngba wa vɛ̃ dɛ ti nwa ni zu a kpo. Nɛ wa zele we nu mi, nɛ wa dɛ mbulanɔ kɛ mi hã ma hã wa ni.

²⁵ Wa ɔ sɛ ngɔ nùi kɛ mi hã zi ma hã wi toe 'da mi Yakɔbɔ, nɛ okpasa yaa wa wa ɔa zi ngɔ nɛ ni. Nɛ wa ɔ sɛ dɛ di ni fai. Nɛ obenɔ 'da wa, do obe zã wa wa ɔ sɛ 'bɔ dɛ di ni. Nɛ wi to mɔ́ mi kpo ɔ nɛ Davidi ni, a sɛ a nwa ngɔ wa fai.

²⁶ Mi gba sɛ tɔkɔ do wa, nɛ mi hã sɛ gɛ̃a dungu hã wa fai. Mi 'dafa sɛ nùi 'da wa, nɛ wa ɔ sɛ dɛ ngɔ nɛ. Nɛ mi dɛ sɛ na, wa dɛlɛ wena. Nɛ mi zɔ sɛ mɔ tɛ Tɛmpɛloe 'da mi na, ma 'bana dɛ sanga wa fai.

²⁷ Mi ɔ sɛ fala nɛ kpo do wa, nɛ mi sɛ a Gale 'da wa, nɛ wa sɛ a winɔ 'da mi.

²⁸ Mi zĩ sɛ Tɛmpɛloe 'da mi dɛ sanga wa, nɛ ma 'bana sɛ dɛ di ni fai. Ogele winɔ wa zɔ sɛ ma, nɛ wa ĩ sɛ na, mi a NWA, nɛ mi saka Oisraɛlɛ na, wa ɔ winɔ 'da mi ngboo.”