EZEKIƐLƐ 36 - WE NU GALE 1995

NWA wila nu a tɛ obe Israɛlɛ

^1-2 NWA tɔ̃a hã mi na: “Aa mɔ, be 'da wele, mɔ dálá dɛ tɛ owinɔ ngɔ kalanɔ tɛ Israɛlɛ do zu li mi. Mɔ tɔ̃ hã wa na, wa zélé we kɛ mi NWA Gale, mi tɔ̃ hã wa gɛ! Owi sɛnɛ nɛ wa fi tɔɛ zu nɛ, nɛ wa tɔ̃ na, wele ã falanɔ ngɔ kalanɔ i a mɔ́ lo.

³ Ma kɛ mi tombo mɔ, be 'da wele na, mɔ tɔ̃ hã obe Israɛlɛ do zu li mi na: Ogele winɔ wa yula zi falanɔ vɛ̃, nɛ wa tɛa, nɛ wa ba falanɔ 'da nɛ tɛ ngɔ kalanɔ i ni, nɛ wa 'danga ma. Nɛ nɛ hɔa mɔ gbɔlɔ mɔmu li wa.

⁴ Nɛ nde nɛ zélé toe kɛ mi tɔ̃ hã winɔ ngɔ gã kalanɔ do be kalanɔ, do nu lìnɔ, do kɔ gbangɔlɔ̃nɔ, do falanɔ kɛ ma 'danga, do lenɔ kɛ winɔ wa kulu kɔ nɛ, nɛ wa hɔa mɔ gbɔlɔ mɔmu li ogele owinɔ kɛ zã wa ni. Toe ni ma kɛ:

⁵ Gã nɔ̃lɔ̃ zã 'da mi NWA Gale tombo mi na, mi dãlã dɛ tɛ ogele winɔ kɛ zã nù Israɛlɛ ni, nɛ nde wena a Oedɔmɛ. Wa mɔmɔ obe Israɛlɛ, nɛ wa yɔndɔ sila wa, nɛ wa ba nùi 'da wa, nɛ wa 'danga fala nyɔngɔmɛ 'da nadalamɛnɔ 'da wa vɛ̃.

⁶ “Ma kɛ mɔ, be 'da wele, mɔ gbá olo nu mi hã obe Israɛlɛ. Mɔ tɔ̃ hã wanɔ ngɔ gã kalanɔ, do be kalanɔ, do nu lìnɔ, do kɔ gbangɔlɔ̃nɔ na, mi NWA Gale, mi do nɔ̃lɔ̃ zã, do gã mãlã, we kɛ ogele winɔ wa hã sape hã nɛ, nɛ wa dã nɛ.

⁷ Nɛ nde mi NWA Gale, mi 'bili na, mi hã sɛ 'bɔ sape hã ogele winɔ kɛ zã nɛ ni.

⁸ Do 'da fala ni, nwá tenɔ tɛ ngɔ kalanɔ tɛ Israɛlɛ ma 'bɔ sɛ, nɛ ma wala sɛ hã nɛ, owinɔ 'da mi, we kɛ nɛ kɔlɔ we kpolo tɛ nɛ dɛ ngɔ nùi 'da nɛ ia.

⁹ Mi 'do nɛ boe, nɛ mi zɔ sɛ mɔ tɛ nɛ na, nɛ wa mbé ofɔ ngɔ nù Israɛlɛ, nɛ nɛ mi ma.

¹⁰ Mi dɛ sɛ na, winɔ 'da nɛ wa dɛlɛ, nɛ wa kpa ngɔ nùi 'da nɛ vɛ̃. Nɛ 'dafa sɛ 'da lenɔ 'da nɛ, nɛ nɛ ɔ dɛ kɔ nɛ.

¹¹ Mi dɛ sɛ na, Owele do osa'de wa dɛlɛ, nɛ nɛ dɛlɛ sɛ wena nɛ ngɔ kɛ zi dati ni, nɛ nɛ ko sɛ obe zã nɛ wena. Nɛ mi hã sɛ 'bɔ kpamɔ hã nɛ nɛ ngɔ kɛ zi dati ni. Na mɛ ni, nɛ nɛ ĩ sɛ na, mi a NWA.

¹² Nɛ yɛnggɛ sɛ ngɔ nù Israɛlɛ vɛ̃, nɛ nɛ ba sɛ ma do mɔ́ nɛ. Wele nɛ sɛ a mɔ́ nɛ. Nɛ zu be mɔ́ nɛ kpo yɔ́ sɛ ngɔ nùi ni gɔ.

¹³ “Mi NWA Gale, mi tɔ̃a na: Winɔ wa tɔ̃ na, nù Israɛlɛ a nù nyɔngɔ Owele, nɛ ma nyɔngɔ benɔ kɔ nɛ ni ngboo.

¹⁴ Nɛ nde yolo do sɔɛ gɛ, nùi sɛ 'bɔ a nù nyɔ̀ngɔ̀ wele gɔ, nɛ ma nyɔ́ngɔ́ sɛ 'bɔ benɔ 'da nɛ gɔ. Mi NWA Gale, mi tɔ́a ni.

¹⁵ Nɛ zélé sɛ 'bɔ gɛlɛ ogele winɔ tɛ dã nɛ do mɔmɔ nɛ gɔ. Nɛ nùi 'da nɛ ma nyɔ́ngɔ́ sɛ 'bɔ obenɔ 'da nɛ gɔ. Mi NWA Gale, mi tɔ́a ni.”

NWA a ngɛmɛ sɛ li obe Israɛlɛ

¹⁶ NWA wila we hã mi na:

¹⁷ “Be 'da wele, mɔ zélé! 'Da fala obe Israɛlɛ wa zi a tɛ ngɔ nùi 'da wa ni, nɛ wa faka ma do 'dã mɛnɔ kɛ wa dɛa zi ni. Dɛa to tɛ wa hɔa mɔ ndi li mi, ɔ nɛ tɔkɔ zɛlɛ zã ni.

¹⁸ Kpikimanɔ wa dɔnggɔ wa, do tɔkɔ tɛ winɔ wa gbɛ wa ni, ma faka nùi 'da wa. Mi zɔa ní, nɛ mi sulu dã 'da mi dɛ ngɔ wa.

¹⁹ Mi hã etumbu hã wa we 'dã mɛnɔ kɛ wa dɛa ni, nɛ mi pɛsɛ wa dɛ sanga ogele winɔ.

²⁰ Ĩ na, 'da fala wa hɔa i mɔ ni, nɛ wa 'danga zu li mi kɛ ma santo ni. Mba gɔ, ogele winɔ wa tɔ̃ na: ‘Nɛ zɔ́ owinɔ 'da NWA Gale! Owele wa ndaka wa ngɔ nùi 'da a do'do.’

²¹ Mi zila ní, nɛ ma zɛlɛ sila mi, we kɛ zu li mi kɛ ma santo ni, ma 'danga we owinɔ 'da mi.

²² “We duzu ki ni, mɔ, be 'da wele, mɔ nɛ́, nɛ mɔ gba nu we mi NWA Gale, mi tɔ̃ gɛ hã wa na: Mi kɔ̃a we dɛ mɔ. Nɛ nde mi nɛ dɛ̃ ma we duzu nɛ obe Israɛlɛ gɔ. Mi nɛ dɛ ma we 'dafa zu li mi kɛ ma santo, nɛ nɛ 'danga ma tɛ ngɔ nùnɔ vɛ̃ kɛ nɛ nɛa zi tɛ nɛ ni.

²³ Gɛnɛ kɔ nɛ hã sape li ogele winɔ, nɛ nde mi nɛ be hã wa na, mi a Gale kɛ mi do nganda vɛ̃, nɛ mi a santo. Nɛ mi dɛ sɛ ma do wala 'da nɛ. Na mɛ ni, nɛ ogele winɔ ni wa ĩ́ sɛ na, mi a NWA.

²⁴ “Mi nɛ sɛ, nɛ mi kala sɛ sanga ogele winɔ kɛ nɛ ɔ dɛ kɔ wa ni. Nɛ mi ngbolo sɛ li nɛ, nɛ mi gese nɛ dɛ ngɔ nùi 'da nɛ ngboo.

²⁵ Mi sulu sɛ gɛ̃lɛ̃ li lì dɛ ngɔ nɛ, nɛ ma fɔlɔ ndi kpikimanɔ do gele ndinɔ tɛ nɛ do'do.

²⁶ Mi kpolo sɛ sila nɛ, nɛ mbé linggamɔ ma le sɛ kɔ nɛ gɔ. Mi fo sɛ sila nɛ kɛ ma nganda ɔ nɛ ta ni, nɛ mi kpolo ma do sila wi kɛ ma kɔ̃ we kɔ̃a ni.

²⁷ Mi tombo sɛ Hi Wi 'da mi dɛ ngɔ nɛ, nɛ nɛ dɛ sɛ mbulanɔ 'da mi, kɛ mi hã ma hã nɛ ni.

²⁸ Nɛ ɔ sɛ ngɔ nù kɛ mi hã zi ma oyaa nɛ ni. Nɛ nɛ sɛ a owinɔ 'da mi, nɛ mi sɛ a Gale 'da nɛ.

²⁹ Mi fo sɛ mɛnɔ vɛ̃ kɛ ma hã ndi hã nɛ ni. Mi dɛ sɛ na, fɔnɔ 'da nɛ ma ko kpalɛ dɛlɛ wena, nɛ wɔ bá sɛ 'bɔ ngɔ nùi 'da nɛ gɔ.

³⁰ Otenɔ ma wala sɛ wena, nɛ kpalɛ li fɔnɔ sɛ a gbɔɔ. Nɛ ogele winɔ wa mɔ́mɔ́ sɛ 'bɔ nɛ gɔ, we kɛ nyɔngɔmɔ zɔ́lɔ́ sɛ 'bɔ 'da nɛ gɔ.

³¹ Na mɛ ni, nɛ tɛ nɛ ma gba sɛ ngɔ 'dã dɛa to tɛ nɛ, do 'dã mɛnɔ kɛ nɛ dɛa zi ni. Nɛ zu nɛ ma dĩlĩ sɛ do sape olo gã 'dã mɛnɔ nɛ dɛa zi ni.

³² Mi NWA Gale, mi tɔ́a hã nɛ na: Mɛ mi nɛ dɛ nɛ ni, mi dɛ́ sɛ ma we duzu nɛ gɔ. Nɛ, obe Israɛlɛ, ma wia na, nɛ ĩ fala nɛ, nɛ sape ba li nɛ olo 'dã mɛnɔ kɛ nɛ dɛa ni.”

³³ NWA Gale tɔ́a na: “'Da fala mi fɔlɔ sɛ nɛ olo 'dã mɛnɔ 'da nɛ ni, nɛ mi e sɛ nɛ na, nɛ ɔ kɔ lenɔ 'da nɛ, nɛ nɛ 'dafa 'da nɛ.

³⁴ Nɛ wa sɛ 'bɔ fɔnɔ kɛ ma kulu zi ni, nɛ owi la walanɔ, wa zɔ́ sɛ 'bɔ bili fɔ gɔ.

³⁵ Nɛ wa tɔ̃ sɛ na: ‘Nùi kɛ ma 'danga zi gɛ, ma a ma hɔa nɛ́ fɔ Edɛnɛ gɛ nde? Lenɔ kɛ wa gbini zi tɔa kɔ nɛ, nɛ Owele nɛ wa kulu zi kɔ nɛ do'do ni, wa kpolo 'bɔ tɛ wa dɛ kɔ nɛ, nɛ wa 'dafa ma, nɛ kɔ nɛ dunu do Owele dɛ olo nɛ.’

³⁶ Na mɛ ni, nɛ ogele winɔ kɛ zã nɛ ni, wa ĩ sɛ na, mi NWA, mi 'dafa 'da lenɔ ma 'danga zi ni, nɛ mi mi 'bɔ fɔnɔ ma kulu zi ni. Mi NWA, mi tɔ́a ni, nɛ mi dɛ sɛ olo nu mi.”

³⁷ NWA Gale tɔ̃a na: “Mi la sɛ 'bɔ obe Israɛlɛ na, wa ala nu wa hã mi, nɛ mi zele sɛ wa. Nɛ mi dɛ sɛ na, wa dɛlɛ ɔ nɛ onadalamɔ kɔ ba'de ni.

³⁸ Lenɔ kɛ ma 'danga zi ni, ma dunu sɛ 'bɔ do Owele. Winɔ wa dunu sɛ kɔ nɛ, ɔ nɛ kɛ zɛ́ dati, onadalamɛnɔ wa dunu zɛ́ kɔ le Yeruzalɛmɛ, do 'da fala kɛ wa tɛ do wa we gbɛ wa tɛ gã ɛngganɔ ni. Na mɛ ni, nɛ winɔ wa ĩ sɛ na, mi a NWA.”