EZEKIƐLƐ 35 - WE NU GALE 1995

NWA dãlã dɛ tɛ Oedɔmɛ

¹ NWA wila we hã mi na:

² “Aa mɔ, be 'da wele, mɔ síkí li mɔ dɛ ngɔ kala Edɔmɛ, nɛ mɔ dãlã dɛ tɛ owinɔ di ni do zu li mi.

³ Mɔ tɔ̃ hã wa na, wa zele we mi NWA Gale, mi tɔ̃ hã wa gɛ: Mi nɛ siki li mi dɛ tɛ nɛ, Oedɔmɛ, nɛ mi be sɛ ngawi 'da mi hã nɛ. Mi 'danga sɛ nù Edɔmɛ, nɛ mi kifi sɛ ma do li go.

⁴ Mi 'danga sɛ lenɔ 'da nɛ vɛ̃. Na mɛ ni, nɛ nɛ ĩ sɛ na, mi a NWA.

⁵ “Aa nɛ, Oedɔmɛ, nɛ zɛ́ belee fai a owi sɛnɛ obe Israɛlɛ. Do 'da fala kɛ wa kpa zi etumbu olo 'dã mɛnɔ 'da wa, nɛ wa zɔ zi ngamɔ wena ni, nɛ nɛ la zi wa na, Owele wa gbɛ wa li bolo.

⁶ Ma kɛ mi NWA Gale, mi kana tɛ mi na, fio 'bɔ 'da nɛ 'bɔa, nɛ nɛ wé sɛ we yu ma gɔ. Tɔkɔ tɛ nɛ ma a sɛ nù we si olo tɔkɔnɔ kɛ nɛ a ma nù ni.

⁷ Mi 'danga sɛ nùi 'da nɛ Oedɔmɛ, nɛ mi kifi sɛ ma do li go. Nɛ mi gbɛ sɛ owinɔ vɛ̃ kɛ wa nɛ la do di ni ni.

⁸ Wɔlɔ ma dunu sɛ ngɔ kalanɔ 'da nɛ, nɛ wanɔ kɛ wa fe sɛ li bolo ni, wa ala sɛ fatata do ngɔ kalanɔ do kɔ gbangɔlɔ̃nɔ.

⁹ Nù Edɔmɛ ma kifi sɛ li go, nɛ ma 'bana sɛ na mɛ ni fai. Nɛ wele ɔ́ sɛ 'bɔ kɔ lenɔ 'da nɛ gɔ. Na mɛ ni, nɛ nɛ ĩ sɛ na, mi a NWA.

¹⁰ “Aa nɛ, Oedɔmɛ, nɛ tɔ̃a na, lo bi sɛ nùnɔ bɔa gɛ, Israɛlɛ do Yuda. Nɛ nɛ tɔ̃ 'bɔ na, gɛnɛ kɔ mi a Gale 'da wa, nɛ lo ba sɛ nùi 'da wa iko.

¹¹ Nɛ nde nɛ zélé we mi NWA Gale, mi tɔ̃ gɛ! Nɛ sɛnɛ owinɔ 'da mi, nɛ zã nɛ nɔ̃lɔ̃ dɛ tɛ wa nganda wena, nɛ nɛ zɛlɛ tɛ wa 'danga wena. Ma kɛ mi kana tɛ mi na, mi nɛ gese olo 'dã mɛnɔ kɛ nɛ dɛa do wa ni hã nɛ. Wa zɔ sɛ ma, nɛ wa ĩ sɛ na, mi hã etumbu hã nɛ olo 'dã mɛnɔ 'da nɛ.

¹² Nɛ nɛ ĩ sɛ na, mi NWA, mi zila lɛnggɛnɔ nɛ tɔ̃a we zɛlɛ tɛ mi ni. Nɛ tɔ̃a na, lenɔ ngɔ kalanɔ tɛ Israɛlɛ ma 'danga ia, lo wia we bi ma, nɛ lo kala dia mɛnɔ kɔ nɛ vɛ̃.

¹³ Kafi bina, mi zila lɛnggɛ nga zui do lɛnggɛ yɔndɔ wi nɛ tɔ̃a hã mi ni.

¹⁴ “Mi NWA Gale, mi tɔ̃ hã nɛ na, mi 'danga sɛ nùi 'da nɛ vɛ̃. Nɛ owinɔ kɛ zã nùi 'da nɛ wa dɛ sɛ yangga ma,

¹⁵ ɔ nɛ kɛ nɛ dɛa zi yangga 'da fala nùi 'da mi Israɛlɛ ma 'danga ni. Kpo mɛ kɛ ma dɛa zi obe Israɛlɛ ni, ma dɛ sɛ tɛ mɛ 'bɔ nɛ. Kalanɔ do nùi 'da nɛ vɛ̃ ma kifi sɛ li go. Na mɛ ni, nɛ winɔ vɛ̃ wa ĩ sɛ na, mi a NWA.”