EZEKIƐLƐ 33 - WE NU GALE 1995

Gale ia Ezekiɛlɛ ɔ nɛ wi zɔ mɔ nu le

¹ NWA wila we hã mi na:

² “Be 'da wele, mɔ gbá ta zu obe Israɛlɛ ngɔ mɛ kɛ ma dɛ tɛ̃ ɛ, do 'da fala kɛ mi tombo gili osoda na, wa bi mbe le kpo ni. Owinɔ kɔ le ni, wa saka sɛ wele kpo sanga wa, takɔ a ɔ wi zɔ mɔ nu le.

³ 'Da fala wi zɔ mɔ nu le ni zɔ sodanɔ 'da wi sɛnɛ wa tɛ tɛ nɛ ia, nɛ a dama sɛ mɔtũlũ we mbese onya a kɔ le ni.

⁴ Hã fala kɛ wele zele mɔtũlĩ ni, kɔ a dɛ mbuma, hã a lènggè do ma gɔ, kɔ Owi sɛnɛ a wa gbanga a, kɔ wa gbɛ a, nɛ nde a fia we mbuma 'da a wele nɛ.

⁵ Mba gɔ, a zila mɔtũlĩ, nɛ a kɔ̃̀ we lengge do ma gɔ. Fala kɛ a lengge sɔ do ma, nɛ a kpasa sɔ.

⁶ Kɔ fala kɛ wi zɔ mɔ nu le zɔ osodanɔ 'da owi sɛnɛ wa, hã a dàmà mɔtũlũ we mbese onya a kɔ le ni gɔ, hã owi sɛnɛ wa wa gbanga mbe wele sanga wa, kɔ wa gbɛ a, nɛ nde ki ni, wi zɔ mɔ nu le dɛ̀ de gɔ. Nɛ mi e sɛ we fie 'da wi ni dɛ zu a.

⁷ “Be 'da wele, mi ia mɔ do wi zɔ mɔ nu le, takɔ mɔ mbese obe Israɛlɛ. Kɔ fala kɛ mi wele we, nɛ mɔ zele, nɛ mɔ mbese obe Israɛlɛ do zu li mi.

⁸ Fala kɛ mi tɔ̃ hã wi dɛ 'dã mɔ na, a fe sɛ, hã mɔ mbèsè a do we nɛ na, a kpolo dɛa to tɛ̃ a gɔ, nɛ a fe sɛ we duzu 'dã mɛnɔ 'da a. Nɛ mi e sɛ we fie 'da a dɛ zu mɔ.

⁹ Nɛ nde fala kɛ mɔ mbese a na, a kpolo dɛa to tɛ̃ a, hã a dɛ̃ ma gɔ, nɛ a fe sɛ we duzu 'dã mɛnɔ 'da a. Nɛ mɔ, mɔ kpasa sɛ, mɔ fé sɛ gɔ.”

Wi dɛ 'dã mɔ kifi sila a, nɛ a kpasa sɛ

¹⁰ NWA tɔ̃a hã mi na: “Be 'da wele, mɔ tɔ̃́ hã obe Israɛlɛ na: Mi zɔa na, nɛ bi tɛ nɛ wena, nɛ nɛ tɔ̃ na, lo bɛ̃a we dɛ olo nu NWA, nɛ lo dɛa 'dã mɔ. Nɛ dĩ tole 'dã mɛ ni ma sɔ̃ɛ 'do lo, nɛ fo 'bɔ wala na lo kpasa bina.

¹¹ Kɔ nɛ zélé, mi NWA Gale, mi kana tɛ mi na, wi dɛ 'dã mɔ fe, nɛ nde ma hã́ yangga hã mi gɔ. Mi kɔ̃a na, wi dɛ 'dã mɔ kifi sila a, hã a kpasa. Nɛ, obe Israɛlɛ, nɛ lá fala dɛ 'dã mɔ. Gulu kɛ nɛ fa fio we ge nde?

¹² “Be 'da wele, mɔ tɔ̃ 'bɔ hã onya mɔ, obe Israɛlɛ na: Fala kɛ wi bɔlɔ zu dɛ 'dã mɔ, nɛ dia mɛ kɛ a dɛa zi dati ni ma kpásá sɛ a gɔ. Nɛ fala kɛ wi dɛ 'dã mɔ la fala 'dã mɛnɔ 'da a, nɛ nde a kpá sɛ etumbu we 'dã mɛnɔ kɛ a dɛa zi dati ni gɔ. Nɛ fala kɛ wi bɔlɔ zu ndo dɛ 'dã mɔ, nɛ nde a kpásá sɛ we dia mɛnɔ kɛ a dɛa zi dati ni gɔ.

¹³ “Fala kɛ mi tɔ̃ hã wi bɔlɔ zu na, a kpasa sɛ, kɔ a ndo dɛ 'dã mɔ, kɔ a lengge na, dia mɛ kɛ ɛ dɛa zi dati ni ma kpasa sɛ ɛ, nɛ a ĩ́ na, mi lénggé sɛ 'bɔ do dia mɛnɔ 'da a gɔ. Nɛ a fe sɛ we duzu 'dã mɛ a dɛa ni.

¹⁴ Nɛ nde fala kɛ mi mbese 'dã wi na, a fe sɛ, hã a kifi 'dã dɛa mɔ tɛ̃ a, kɔ a ndo dɛ dia mɔ, do dɛ bɔlɔ zu dɛa mɔ, nɛ nde a fé sɛ gɔ.

¹⁵ Fala kɛ wi ni la fala dɛ 'dã mɔ, kɔ a gese mɛnɔ kɛ wa ia zi do tikɔɛ 'da a ni, nɛ a gese mɛnɔ kɛ a zũ ni, kɔ a ndo dɛ mbulanɔ kɛ wele dɛ ma, nɛ ma hã kpasi hã a ni, nɛ a kpasa sɛ, nɛ nde a fé sɛ gɔ.

¹⁶ Mi ele sɛ 'dã mɛnɔ 'da a, nɛ a kpasa sɛ, we kɛ a dɛa dia mɔ do bɔlɔ zu dɛa mɔ.

¹⁷ “Onya mɔ, obe Israɛlɛ, wa tɔ̃ na, mɛ kɛ mi NWA mi dɛ ni, ma a bɔlɔ gɔ. Nɛ nde ĩ na, wi a wa hã wa dɛ mɛnɔ kɛ ma a bɔlɔ gɔ ni.

¹⁸ Fala kɛ wi bɔlɔ zu la fala dɛ dia mɔ, kɔ a dɛ 'dã mɔ, nɛ a fe sɛ we duzu 'dã mɛ a dɛ ni.

¹⁹ Nɛ nde fala kɛ 'dã wi la fala dɛ 'dã mɔ, kɔ a dɛ dia mɔ, do bɔlɔ zu dɛa mɔ, nɛ a kpasa sɛ we duzu ma.

²⁰ Nɛ nde nɛ, obe Israɛlɛ, nɛ tɔ̃a na, mɛ kɛ mi dɛ ni, ma a bɔlɔ gɔ. Nɛ nde nɛ ĩ́ na, mi gɔnɔ sɛ ngbangga 'da wele do wele we do 'da dɛa mɔ tɛ̃ a ngboo.”

Le Yeruzalɛmɛ 'danga

²¹ Do kɔ sabɛlɛ kɛ 'bu ngɔ nɛ bɔa, zɛkɛ 'da 'bu, kɔ̃ nɛ mɔlɔ, 'do kɛ lɛ la kɔlɔ 'duli ni, nɛ mbe wi yu bolo yula Yeruzalɛmɛ, nɛ a hɔ. A kpasa zi li bolo, nɛ a ma ngɔ tɔ̃ hã mi na, le Yeruzalɛmɛ 'danga do'do.

²² Ĩ na, do gɛ̃a wese dati kɛ na wi ni hɔ ni, nɛ ngawi 'da NWA tia ngɔ mi, nɛ nu mi lɔnda. Nɛ fala sa do titole, do 'da fala wi ni hɔa ni, nɛ NWA hũi nu mi na, mi wele 'bɔ we.

²³ Nɛ NWA tɔ̃ hã mi na:

²⁴ “Be 'da wele, mɔ ĩ́ na, winɔ kɛ wa 'bana tɛ bili tɔanɔ ngɔ nù Israɛlɛ i gɛ, wa tɔ̃ na: ‘Abrahama zi zu a kpo, nɛ nde wele nùi zi vɛ̃ a mɔ́ a. Nɛ lɛ, lɛ dɔ wena, na mɛ ni, wele nùi vɛ̃ a mɔ́ lɛ.’

²⁵ Kɔ mɔ gba nu we mi NWA Gale, mi tɔ̃ gɛ hã wa na: Nɛ nyɔngɔ mulu sa'de kɛ tɔkɔ 'bana zã nɛ ni, nɛ nɛ dɔnggɔ okpikima, nɛ nɛ gbɛ Owele. Nɛ kɔdɛ kɛ nɛ tɔ̃ na, wele nùi a mɔ́ lo ni nɛ nde?

²⁶ Nɛ gbini zã nɛ do omɔ bi do bolonɔ 'da nɛ iko, nɛ nɛ dɛ ogã 'dã mɔ, nɛ nɛ ɔ do wukonɔ 'da ongba nɛ. Nɛ kɔdɛ kɛ nɛ tɔ̃ na, wele nùi a mɔ́ lo ni nɛ nde?

²⁷ “Mɔ mbésé wa do we mi tɔ̃ gɛ na: Mi NWA Gale, mi kana tɛ mi na, Owele wa gbɛ sɛ winɔ kɛ wa 'bana tɛ bili lenɔ i ni. Nɛ osa'de zamɔ wa nyɔngɔ wanɔ kɛ wa zamɔ i ni. Nɛ 'dã zɛlɛ ma ba sɛ wanɔ kɛ wa usu tɛ wa ngɔ kalanɔ, do kɔ tanɔ ni.

²⁸ Mi 'danga sɛ nùi, nɛ mi kifi sɛ ma do li go. Nɛ ngawi 'da wa kɛ wa dɛ zi wali nɛ ni, ma Sɔkpɔ sɛ vɛ̃. Nɛ ngɔ kalanɔ ma kifi sɛ zamɔ, nɛ wele lá sɛ 'bɔ di ni gɔ.

²⁹ Nɛ 'da fala mi hã sɛ etumbu hã obe Israɛlɛ olo gã 'dã mɛnɔ 'da wa, nɛ mi kifi nùi 'da wa do li go ni, nɛ wa ĩ sɛ na, mi a NWA.”

³⁰ Nɛ NWA tɔ̃ na: “Be 'da wele, onya mɔ, obe Israɛlɛ wa ngɛmɛ ngba wa dɛ li ngbala lenɔ do nu tɔanɔ 'da wa, nɛ wa wele we do zu li mɔ na: ‘Lɛ nɛ́, hã lɛ zélé toe NWA tumba hã lɛ gɛ!’

³¹ Nɛ owinɔ 'da mi wa mba ngba wa dɛ 'da mɔ we zele mɔ. Wa zele, nɛ nde wa dɛ́ kɛ wa zila ni gɔ. Wa kɔ do nu wa iko, nɛ nde wa dɛ tati a mɔ kɛ ma gala wa wele nɛ ni.

³² Mɔ ɔ li wa nɛ ã wi ga zuma, kɛ gɛlɛ a de wena, nɛ a zɛ kundu we kã do dia zuma ni. Wa zele wenɔ 'da mɔ, nɛ nde wa é ma fala dɛa to gɔ.

³³ Nɛ nde 'da fala mɛnɔ mɔ tɔ̃ we nɛ ni, ma hɔ, nɛ wa ĩ sɛ na, wi gba olo nu mi Gale zi kɔ lo boe.”