EZEKIƐLƐ 32 - WE NU GALE 1995

Nwa ngɔ nù Ezipeto a ɔ nɛ fele ni

¹ Do kɔ sabɛlɛ kɛ 'bu ngɔ nɛ bɔa, zɛkɛ 'da 'bu ngɔ nɛ bɔa, kɔ̃ nɛ kpo, 'do kɛ lɛ la kɔlɔ 'duli ni, nɛ NWA wila we hã mi na:

² “Aa mɔ, be 'da wele, mɔ gá zuma 'bakoe gɛ dɛ ngɔ nwa ngɔ nù Ezipeto na: Mɔ be tɛ mɔ sanga ogele winɔ ɔ nɛ be wili gbɔgbɔ ni. Nɛ nde mɔ ɔ nɛ fele iko ni. Mɔ kindi tɛ mɔ do 'dɔ gba lì, nɛ nyanga mɔ dɛa ndi 'dɔ nɛ, nɛ lìnɔ dɛa gbutu.

³ “Hã mɔ zélé we mi NWA Gale, mi tɔ̃ gɛ! Gba gili ogele winɔ wa ngɛmɛ sɛ ngba wa, do 'da fala mi da sɛ gbanda 'da mi dɛ ngɔ mɔ, nɛ ma ba mɔ ni. Nɛ ogele winɔ ni wa ba sɛ mɔ tɛ do mɔ dɛ nu lì nga.

⁴ Nɛ mi da sɛ mɔ dɛ ngɔ nù nza nga. Nɛ nɔɛnɔ wa zĩlĩ sɛ dɛ ngɔ mɔ, nɛ osa'de zamɛnɔ wa nyɔngɔ sɛ wɔlɔ mɔ.

⁵ Mi pɛsɛ sɛ tala mbulu mɔ do ngɔ kalanɔ do kɔ gbangɔlɔ̃nɔ.

⁶ Mi a sɛ tɔkɔ tɛ mɔ dɛ ngɔ kalanɔ, nɛ nùi nɔmɔ ma, nɛ lìnɔ ma dunu sɛ do tɔkɛ ni.

⁷ 'Da fala mɔ fe sɛ do'do ni, nɛ mi dɛ sɛ na, li nza tũ, nɛ sɔlanɔ tɛ to 'bɔ gɔ. Mi usu sɛ wese dɛ 'do kutunɔ, nɛ li zɛkɛ ma tũ sɛ mbĩi.

⁸ Mi bi sɛ nyɛa wenɔ li nza gɛ vɛ̃ we duzu mɔ, nɛ mi fi sɛ gba tũ ngɔ nù 'da mɔ. Mi NWA Gale, mi tɔ̃a ni.

⁹ “Gba gili ogele winɔ wa zele sɛ we tia 'da mɔ, we kɛ mi yɛ'bɛ sɛ sako nɛ gbaa dɛ ngɔ nùnɔ kɛ mɔ ĩ̀ ti nɛ gɔ ni.

¹⁰ Kɔ wa zele we 'bako kɛ mi tumba dɛ ngɔ mɔ ni, nɛ wa gɔnɔ sɛ kɛ̃lɛ̃ɛ. Nɛ nwanɔ 'da wa wa zɔ sɛ du kɔya kɛ mi fi ma do ngɔ zu wa ni, nɛ wa tana sɛ kili tuku tuku. Nɛ ngba soe kɛ mi zɛ sɛ mɔ na mɛ ni, nɛ wa tana sɛ kili fai. Wele do wele a lengge sɛ do kpasi 'da a wele nɛ.

¹¹ “Mi NWA Gale, mi tɔ̃ hã mɔ na: Sodanɔ 'da nwa ngɔ nù Babilonia wa gbini sɛ dɛ ngɔ mɔ.

¹² Mi kala sɛ Owi bolo kɛ li wa kolo wena ni sanga ogele nu kɔnggɔnɔ vɛ̃, nɛ mi tombo sɛ wa, nɛ wa gbɛ sɛ gba gili winɔ 'da mɔ. Wa 'danga sɛ kpamɛnɔ kɛ mɔ dɔnggɔ tɛ mɔ do ma ni, nɛ wa kumu sɛ winɔ 'da mɔ vɛ̃.

¹³ Mi gbɛ sɛ onadalamɛnɔ 'da mɔ kɛ mɔ dala wa tɛ nu lìnɔ ni. Nɛ nyanga wele, tabi nyanga sa'de kpo dɛ́ sɛ 'bɔ gbutu 'dɔ lìnɔ ni gɔ.

¹⁴ Mi dɛ sɛ na, lìnɔ gɛ̃ nzioo, nɛ li nɛ ma gɛ̃lɛ̃, nɛ ma fo gɛɔ. Mi NWA Gale, mi tɔ̃a ni.

¹⁵ Mi dɛ sɛ na, nù Ezipeto ma hɔ li go, nɛ fɔnɔ ma kó sɛ 'bɔ kpalɛ gɔ, nɛ wele ó sɛ 'bɔ di ni gɔ. Na mɛ ni, nɛ wa ĩ sɛ na, mi a NWA.

¹⁶ “Mbisa wenɔ kɛ mi tɔ̃ gɛ, ma hɔ sɛ zuma 'bako, nɛ wukonɔ kɔ nu kɔnggɔnɔ vɛ̃ wa ga sɛ ma dɛ ngɔ nù Ezipeto do owinɔ ngɔ nɛ ni. Mi NWA Gale, mi tɔ̃a ni.”

Zuma 'bako dɛ ngɔ nu kɔnggɔnɔ kɛ wa ala li bolo

¹⁷ Do kɔ sabɛlɛ kɛ 'bu ngɔ nɛ bɔa, zɛkɛ 'da 'bu ngɔ nɛ bɔa, kɔ̃ nɛ 'bu ngɔ nɛ mɔlɔ, 'do kɛ lɛ la kɔlɔ 'duli ni, nɛ NWA wila we hã mi na:

¹⁸ “Be 'da wele, mɔ álá nu mɔ dɛ ngɔ Oezipeto! E kɔ zuma ala nui 'da mɔ ma kã wa gbaa dɛ kɔ le 'da fionɔ, kɛ ombe gã nu kɔnggɔnɔ wa zĩlĩ zi dɛ kɔ nɛ mɔ dati ia ni.

¹⁹ Mɔ tɔ̃ hã wa na: Nɛ lengge na, lo dia nɛa ngɔ ogele winɔ nde? Gɔ, nɛ zĩ́lĩ́ dɛ kɔ le 'da ofionɔ i, kɔ nɛ ɔ nu dɛ sanga ogele manda'banɔ kɛ wa ala li bolo ni.

²⁰ “Mba gɔ, Oezipeto wa fe sɛ li bolo ɔ nɛ gele winɔ kɛ wa ala li bole ni. Wa gbɔtɔ du kɔyanɔ li foko nɛ ia, ma gbɛ sɛ osoda Ezipeto vɛ̃.

²¹ Tɛ kɔ le 'da fionɔ i, onga sodanɔ, do Onwanɔ wa si zi 'do Ezipeto ni, wa mba gɛlɛ wa kpo, nɛ wa he mɔ na: ‘Nɛ zɔ́ manda'banɔ kɛ wa fia li bole, kɔ wa zĩlĩ we ɔ dɛ sanga lɛ gɛ!’

²² “Nwa ngɔ nù Asiri hɔa zi i mɔ ia. Zunu sodanɔ 'da a ma zĩ 'do zunu a takpa. Wa gbɛa wa vɛ̃ li bolo.

²³ Zunu wa ma gbaa go'do le 'da fionɔ i. Nɛ zunu nwa 'da wa dɛ gbogbo. Zi dati, wa a zi kili tɛ winɔ wa 'bana nza ni, nɛ wa gbɛa wa wena. Nɛ nde wa vɛ̃ wa ala li bolo.

²⁴ “Nwa ngɔ nù Elamɛ do sodanɔ 'da a, wa hɔa i mɔ ia. Zunu sodanɔ 'da a ma zĩ 'do kɛ 'da a takpa. Wa gbɛa wa vɛ̃ li bolo. Omanda'banɔ ni wa a zi kili tɛ winɔ wa 'bana nza ni, nɛ nde wa zĩlĩ dɛ kɔ le 'da fionɔ i. Wa 'bɔ do dĩ bina, wa ɔ nɛ tala gele fionɔ vɛ̃ ni.

²⁵ Gbãlã we, nwa ngɔ nù Elamɛ do sodanɔ 'da a, wa ɔa nù sanga wanɔ wa fia zi li bolo dati ni. Wa gbɛa manda'banɔ ni vɛ̃ li bolo. Zunu sodanɔ ma zĩ 'do kɛ 'da nwa 'da wa takpa. Zi dati, wa a zi kili tɛ winɔ wa 'bana nza ni. Nɛ nde ngangga ni, wa 'bɔ do dĩ bina, wa ɔa nù sanga ogele wanɔ kɛ wa ala li bolo ni.

²⁶ “Onwa ngɔ nù Mesɛkɛ do Tubalɛ do sodanɔ 'da wa, wa hɔa 'bɔ di ni ia. Zunu sodanɔ 'da wa ma zĩ 'do kɛ 'da wa takpa. Wa gbɛa wa vɛ̃ li bolo. Omanda'banɔ ni wa a zi kili tɛ winɔ wa 'bana nza ni, nɛ nde wa fia li bolo.

²⁷ Wa mì wa ɔ nɛ onga soda bolonɔ zɛ́ dati ni gɔ. Onga sodanɔ ni wa hã zi kili hã winɔ wa 'bana nza ni wena, nɛ wa zĩlĩ dɛ kɔ le 'da fionɔ i do dɔ́lɔ́ li vɛ̃. Wa mi wa fala nɛ kpo do mɔ bi bolonɔ 'da wa vɛ̃, du kɔya 'da wa dɛ ti zu wa, nɛ ngele 'da wa dɛ ngu'du wa. Nɛ nde wa mì manda'banɔ ni ɔ na mɛ ni gɔ.

²⁸ “Nɛ nɛ, Oezipeto, wa gbɛ sɛ tɛ mɛ 'bɔ nɛ li bolo, nɛ wa mi sɛ nɛ dɛ sanga manda'banɔ kɛ wa ala li bole ni.

²⁹ “Oedɔmɛ do nwanɔ 'da wa do ogã winɔ 'da wa, wa hɔa tɛ mɛ 'bɔ i mɔ ia. Gɛnɛ kɔ wa nganda zi li bolo wena, nɛ nde wa kpia wala kpo do gele wanɔ kɛ wa ala li bolo ni. Wa zĩlĩ dɛ 'da manda'banɔ tɛ kɔ le 'da fionɔ i.

³⁰ “Onwanɔ ngɔ nu kɔnggɔnɔ si gbãlã ngɔ vɛ̃, mba do osodanɔ 'da wa, wa tɛ mɛ 'bɔ i mɔ boe. Wa nganda zi li bolo wena, nɛ wa a zi kili tɛ winɔ vɛ̃. Nɛ nde ngangga ni, manda'banɔ ni wa zĩlĩ dɛ kɔ le 'da fionɔ i, dɛ 'da ogele wanɔ kɛ wa fia li bolo ni. Wa 'bɔ do dĩ bina, wa ɔ nɛ tala ogele wanɔ kɛ wa zĩlĩ dɛ ti nù i ni.

³¹ “Nɛ 'da fala nwa ngɔ nù Ezipeto, kɛ wa gbɛ sɛ a li bolo, fala nɛ kpo do sodanɔ 'da a ni, a zɔ sɛ na sodanɔ vɛ̃, wa ala li bolo ni, nɛ sila a ma gɛ̃ sɛ. Mi NWA Gale, mi tɔ̃a ni.

³² Mi la zi nwa ngɔ nù Ezipeto na, a a kili tɛ winɔ wa 'bana nza ni. Nɛ nde ngangga ni, wa mi sɛ a fala nɛ kpo do sodanɔ 'da a, nɛ wa zĩlĩ sɛ dɛ 'da manda'banɔ wa ala li bolo ni. Mi NWA Gale, mi tɔ̃a ni.”