EZEKIƐLƐ 31 - WE NU GALE 1995

Nwa ngɔ nù Ezipeto a ɔ nɛ te sɛdrɛ ni

¹ Do kɔ sabɛlɛ kɛ 'bu ngɔ nɛ kpo, zɛkɛ 'da talɛ, kɔ̃ nɛ kpo, 'do kɛ lɛ la kɔlɔ 'duli ni, nɛ NWA wila we hã mi na:

² “Be 'da wele, mɔ nɛ́, nɛ mɔ tɔ̃́ hã nwa ngɔ nù Ezipeto do gba gili winɔ a dungu nwa ngɔ wa ni na: Mɔ nwa ngɔ nù Ezipeto, mɔ nganda wena. Mi nɛ we mɔ do ge nde?

³ Mɔ ɔ nɛ te sɛdrɛ tɛ Libanɛ. Mɛ zi a te kɛ nwá nɛ ɔ yɛɛ, nɛ ma hã gɔ̃lɔ̃ wena. Ma ngala gbaa, nɛ 'bɛ̃lɛ̃ zu nɛ to kutunɔ.

⁴ Lì yula ti nù, nɛ ma fo dɛ ti te, nɛ ma 'bɔ oliã nɛ, nɛ nùi gɛ̃a de wena. Nɛ ogbakɔ̃ lì ma pɛsa, nɛ ma fo dɛ ti ogele te zamɔ.

⁵ Nɛ te sɛdrɛ ni ngala dɛ ngɔ, nɛ ma la tala gele tenɔ vɛ̃, we duzu lì kɛ ma fo do ti nɛ ni. Gbakɔ̃ nɛ dulu, nɛ ma 'bɔ wena.

⁶ Nɛ onɔɛ kpi do kpi wa dɛa tɔa ngɔ nɛ, nɛ osa'de zamɔ wa tɛa, nɛ wa ko dɛ ti nɛ. Gele winɔ kpi do kpi wa tɛa, nɛ wa ɔ ti gɔ̃lɔ̃ nɛ.

⁷ Te ni ma dia la li ngele, ma ngala wena, nɛ ogbakɔ̃ nɛ dulu wena, nɛ oliã nɛ lia nù nyɛlɛ gbaa dɛ 'dɔ lìnɔ ti nù i.

⁸ Gɛnɛ kɔ kɔ fɔɛ 'da mi Gale, nɛ nde te kɛ ma dia nɛ́ ki ni bina. Te siprɛ kɛ gbakɔ̃ nɛ dia wena ɔ nɛ ma ni bina, nɛ te platanɛ 'bɔ na mɛ ni bina.

⁹ Mi dɛa zi ma de wena, nɛ tenɔ vɛ̃ kɔ fɔɛ 'da mi Gale, ma dɛa bɔnɛ hã ma.

¹⁰ “Nɛ nde mɔ, nwa ngɔ nù Ezipeto, mɔ zélé we mɛ ma dɛa te sɛdrɛ ni. Mi NWA Gale, mi tɔ̃a na: Te ni zɔa na, ɛ gã, nɛ ɛ ngala gbaa, nɛ zu ɛ tua kutunɔ ni, nɛ ma dɛa wali do'do.

¹¹ Ma kɛ mi fɛ kɔ̃ mi tɛ nɛ, nɛ mi e ma dɛ kɔ̃ nwa kɛ a nganda nɛa ngɔ nwanɔ vɛ̃ ni. Nɛ a zɛlɛ tɛ̃ a wia do 'da 'dã mɛnɔ kɛ a dɛa ni.

¹² Mbe ogele winɔ, kɛ li wa kolo wena ni, wa gɔmɔ sɛ te ni, nɛ wa fi ma nù. Nɛ ogbakɔ̃ nɛ do nwá nɛ ma gbini sɛ, nɛ ma pɛsɛ do ngɔ kalanɔ do kɔ gbangɔlɔ̃nɔ. Nɛ ogele winɔ vɛ̃ kɛ wa ɔ zi ti gɔ̃lɔ̃ nɛ ni, wa yu, nɛ wa la di ni do'do.

¹³ Nɛ onɔɛ kpi do kpi wa tɛa, nɛ wa hɔ ngɔ ngindo te kɛ ma mangga ni, nɛ wa dɛ tɔa 'da wa dɛ di ni. Nɛ osa'de zamɛnɔ wa ma ogbakɔ̃ nɛ do nyanga wa.

¹⁴ Na mɛ ni, mbé te ga sɛ 'bɔ nɛ́ ki ni gɔ. Gɛnɛ kɔ ma ɔ kɛ zã nu lì, nɛ nde ma ngálá sɛ 'bɔ gbaa, nɛ ma to kutunɔ gɔ. We kɛ te ma ɔ nɛ wele ni. A fe, nɛ a zĩlĩ dɛ 'da wanɔ kɛ wa ɔ kɔ le 'da fionɔ i ni.

¹⁵ “Mɔ zélé we mi NWA Gale, mi tɔ̃ gɛ! Ngba soe te sɛdrɛ ma zĩlĩ dɛ kɔ le 'da fionɔ ni, nɛ mi dɛa na, lìnɔ ti nù gɛ fo do ngɔ nɛ, nɛ ma kele ma we be na, ma dungu gɛla. Nɛ mi dɛa 'bɔ na, gã lìnɔ do ogbakɔ̃ lìnɔ ni ma tɛ fò 'bɔ gɔ, nɛ kɔla Libanɛ ma dungu gɛla we duzu te sɛdrɛ ni. Mi dɛ sɛ na, gba tũ kpe ngɔ kalanɔ, nɛ tenɔ zamɔ i ma kolo vɛ̃.

¹⁶ 'Da fala kɛ mi gɔmɔ sɛ te sɛdrɛ, nɛ mi tombo ma dɛ kɔ le 'da fionɔ ni, nɛ gele nu kɔnggɔnɔ wa zele giti tia nɛ, nɛ wa tana kili. Nɛ nde kɔ le 'da fionɔ i, dia ote kɔ fɔ Edɛnɛ do kɔ kɔla Libanɛ kɛ wa 'bɔ de wena, nɛ wa zĩlĩ zi dɛ kɔ le 'da fionɔ i dati ni, wa zɔa te sɛdrɛ a hɔa 'da wa, nɛ wa dɛa yangga.

¹⁷ We kɛ tenɔ ni wa zĩlĩ zi dɛ kɔ le 'da fionɔ fala nɛ kpo do wanɔ wa ala zi li bolo ni. Wa kpa sɛ ngba wa do winɔ kɛ wa yolo zi 'do te sɛdrɛ, nɛ wa kpasa zi dɛ ti gɔ̃lɔ̃ a ni.

¹⁸ “Te sɛdrɛ ni, wi a nwa ngɔ nu Ezipeto do owinɔ 'da a. Nɛ te kpo kɔ fɔ Edɛnɛ kɛ ma dia la a ni bina. A ngala nɛa ngɔ tenɔ kɔ fɔɛ ni vɛ̃. Nɛ nde a zĩlĩ sɛ 'do tenɔ ni dɛ ti nù i, nɛ a ɔ sɛ fala nɛ kpo do manda'banɔ do wanɔ wa ala zi li bolo ni. We 'da nwa ngɔ nù Ezipeto do winɔ 'da a, ma Sɔkpɔ sɛ na mɛ ni. Mi NWA Gale, mi tɔ̃a ni.”