EZEKIƐLƐ 30 - WE NU GALE 1995

NWA a hã sɛ etumbu hã Oezipeto

¹ NWA wila 'bɔ we hã mi na:

² “Aa mɔ, be 'da wele, mɔ dala we do zu li mi, nɛ mɔ wele wenɔ kɛ mi NWA Gale, mi tɔ̃ gɛ. Mi na: Nɛ hé mɔ do 'bako we ngba soe ma nɛ tɛ nɛ ni.

³ We kɛ kɔ̃ tũi mi NWA, mi nɛ be do nɔ̃lɔ̃ zã 'da mi ni, ma kɔlɔ ia. Mɛ sɛ a kɔ̃ tũ kɛ ogele winɔ vɛ̃ wa kpa sɛ si olo 'dã mɛnɔ 'da wa, nɛ kili ma ba sɛ wa la li.

⁴ Bolo ma bi sɛ nù Ezipeto, nɛ winɔ vɛ̃ gbaa we hɔ Etiopi, wa tana sɛ kili. Wa gbɛ sɛ wele tɛ ngɔ nù Ezipeto wena, nɛ wa kala sɛ kpamɛnɔ 'da wa si do ma, nɛ wa 'danga sɛ lenɔ 'da wa.

⁵ Nɛ bole ni ma gbɛ sɛ 'bɔ sodanɔ kɛ wa kala wa tɛ ngɔ nù Etiopi, Putɛ, Ludɛ, Arabi do Libi, mba do wanɔ kɛ wa yula 'bɔ sanga owinɔ 'da mi ngboo ni.

⁶ “Mi NWA, mi tɔ̃a na: Winɔ vɛ̃ kɛ wa bi ngɔ Ezipeto ni, wa ala sɛ li bolo, yolo Migdɔlɛ si gbãlã ngɔ, gbaa we hɔ Asuanɛ si ba gɔtɔ. Nɛ osoda Ezipeto, kɛ wa dɛ wali wena ni, wa kumu sɛ. Mi NWA Gale, mi tɔ̃a ni.

⁷ Lenɔ ngɔ nù Ezipeto ma kifi sɛ olo tɔa, nɛ nyanga nza gɛ vɛ̃, wa kpá sɛ nù kpo kɛ ma 'danga ɔ nɛ nù Ezipeto ni gɔ. Wa la sɛ tati a Ogbɛsa tɔanɔ iko.

⁸ Nɛ 'da fala mi fi sɛ we tɛ nù Ezipeto, nɛ mi kumu winɔ wa si 'do Oezipeto ni, nɛ Owele wa ĩ sɛ na, mi a NWA.

⁹ Nɛ 'da fala mi 'danga sɛ nù Ezipeto ni, nɛ sako nɛ ma la sɛ do masua gbaa tɛ ngɔ nù Etiopi. Nɛ ma gbanga sɛ owinɔ i mɔ ni, nɛ kili ma ba sɛ wa nganda wena. Ĩ na tũi ni ma kɔlɔ ia.”

¹⁰ NWA Gale tɔ̃a 'bɔ na: “Mi tombo sɛ Nabukɔdɔnɔzɔrɛ, nwa ngɔ nù Babilonia na, a nɛ, kɔ a 'danga dia mɛnɔ ngɔ nù Ezipeto vɛ̃.

¹¹ A nɛ sɛ do sodanɔ 'da a, kɛ li wa kolo wena ni, nɛ wa 'danga sɛ nùi vɛ̃. Wa bi sɛ owinɔ do du kɔyanɔ 'da wa, nɛ wɔlɔ Owele ma kpa sɛ do ngɔ nùi farr.

¹² Mi dɛ sɛ na, gbakɔ̃ lì Nilɛ ma ɔ̃sɔ̃, nɛ owi kula li wa ba nù Ezipeto. Ogele winɔ wa 'danga sɛ kpamɛnɔ ngɔ nùi ni vɛ̃.”

¹³ NWA tɔ̃a 'bɔ na: “Mi 'danga sɛ kpikimanɔ do ogale bɛlɛnɔ tɛ Mɛmfisi vɛ̃. Nɛ fo sɛ 'bɔ nwa we dungu ngɔ nù Ezipeto bina. Mi dɛ sɛ na, kili ba winɔ vɛ̃.

¹⁴ Mi 'danga sɛ lenɔ tɛ ngɔ nù Ezipeto si ba gɔtɔ, nɛ mi fi we tɛ le Soanɛ si gbãlã ngɔ, nɛ mi hã etumbu hã gã le No.

¹⁵ Mi dɛ sɛ na, winɔ kɔ le Sinɛ, kɛ gba ngbo zĩ ma takpa ni, wa ĩ fala nɔ̃lɔ̃ zã 'da mi. Nɛ mi gbɛ sɛ gba gili winɔ kɔ gã le No.

¹⁶ Mi fi sɛ we tɛ nù Ezipeto, nɛ owinɔ kɔ le Sinɛ, wa zɛ sɛ nu wa do 'bako. Osoda wa gbini sɛ ngbonɔ tɛ No, nɛ wa dunu sɛ kɔ le fɛɔɔ.

¹⁷ Wa gbɛ sɛ obe zagbãlãnɔ tɛ Ɔnɛ do Pi-Bɛsɛtɛ li bolo, nɛ wa kala tala winɔ la do wa kɔlɔ 'duli.

¹⁸ Nɛ 'da fala mi gbini sɛ ngawi 'da Oezipeto, nɛ mi kpe nu wali 'da wa ni, nɛ wese hɔ́ sɛ 'bɔ kɔ le Tapanɛsi gɔ. Kutu ma kpe sɛ nùi kpã kpã, 'da fala kɛ wa kala sɛ winɔ la do wa kɔlɔ 'duli ni.

¹⁹ Mi hã sɛ etumbui ni hã Oezipeto, nɛ wa ĩ sɛ na, mi a NWA.”

Gale a tombo sɛ nwa ngɔ nù Babilonia we bi Ezipeto

²⁰ Do kɔ sabɛlɛ kɛ 'bu ngɔ nɛ kpo, zɛkɛ 'da kpo, kɔ̃ nɛ sambo, 'do kɛ lɛ la kɔlɔ 'duli ni, nɛ NWA wila we hã mi na:

²¹ “Be 'da wele, mi zɛa 'baka nwa ngɔ nù Ezipeto nɛ ma gbini. Nɛ fo wi fɔlɔ li dani tɛ̃ a, tabi ɛnzɛ ma na, 'baka a le dɛ olo nɛ, kɔ a 'be du kɔya bina.

²² Hã mɔ zélé we mi NWA Gale, mi tɔ̃ gɛ! Mi siki sɛ li mi dɛ tɛ nwa ngɔ nù Ezipeto, nɛ mi gbini sɛ 'bɔ mbee 'baka a, kɛ ma 'bana do dia nɛ ni, hã ma 'danga bɔa nɛ. Nɛ du kɔya ma te sɛ kɔ̃ a.

²³ Nɛ mi pɛsɛ sɛ Oezipeto dɛ sanga winɔ tɛ ngɔ gele nùnɔ.

²⁴ Nɛ mi hã sɛ mbé ngawi hã nwa ngɔ nù Babilonia, nɛ mi e sɛ du kɔya 'da mi kɔ̃ a. Nɛ nde mi gbini sɛ 'baka nwa ngɔ nù Ezipeto, nɛ a gɔfɔ sɛ, nɛ a fe dɛ ti nyanga Owi sɛnɛ a.

²⁵ Do gbãlã we, mi dɛ sɛ na, kɔ̃ nwa ngɔ nù Babilonia ma nganda, nɛ kɔ̃ nwa ngɔ nù Ezipeto ma mbɔkɔ vɛ̃. Nɛ 'da fala mi e sɛ du kɔya 'da mi kɔ̃ nwa ngɔ nù Babilonia na, a bi nù Ezipeto ni, nɛ owinɔ vɛ̃ wa ĩ sɛ na, mi a NWA.

²⁶ Mi pɛsɛ sɛ Oezipeto dɛ sanga winɔ tɛ ngɔ gele nùnɔ, nɛ wa ĩ sɛ na, mi a NWA.”