EZEKIƐLƐ 3 - WE NU GALE 1995

¹ Nɛ NWA tɔ̃ hã mi na: “Aa mɔ be 'da wele, mɔ bá kasa 'buki gɛ, hã mɔ nyɔ́ngɔ́. 'Do nɛ, nɛ mɔ nɛ́, kɔ mɔ wele we hã obe Israɛlɛ.”

² Nɛ mi 'bã nu mi, nɛ a fi kasa 'buki kɔ nu mi, nɛ mi nyɔngɔ.

³ Nɛ a na: “Mɔ, be 'da wele, mɔ nyɔ́ngɔ́ kasa 'buki kɛ mi hã hã mɔ gɛ, hã ma hɛ̃ zã mɔ.” Nɛ mi nyɔngɔ ma, nɛ nde ma ɛ̃fɛ̃ ɔ nɛ nɔ gɔlɔ ni.

⁴ Nɛ a tɔ̃ hã mi na: “Be 'da wele, mɔ kúlú ngɔ, nɛ mɔ nɛ́ 'da obe Israɛlɛ, nɛ mɔ gba olo nu mi hã wa.

⁵ Owinɔ kɛ mi tombo mɔ hã wa ni, wa tɔ̃́ gele nu kɛ ma nganda wena ni do kɛ na, mɔ zele ma zãa gɔ. Nɛ nde mi tombo mɔ 'da obe Israɛlɛ.

⁶ Ɔ do kɛ mi tombo sɔ mɔ 'da ogba dɔa winɔ kɛ wa tɔ̃ gele nu ni, nɛ wa zele sɔ nu mɔ.

⁷ Nɛ nde obe Israɛlɛ wa kɔ̃́ sɛ we zele nu mɔ gɔ, we kɛ wa kɔ̃̀ we zele nu mi Gale gɔ.

⁸ Ma kɛ mi dɛ sɛ na, zu mɔ nganda ɔ nɛ zu wa ni.

⁹ Nɛ zu mɔ ma nganda sɛ ɔ nɛ kpangba ta, tabi ɔ nɛ nga ta li nɛ a diamã ni. Mɔ tɛ dɛ̀ kili dɛa mɔ tɛ wa gɔ, we kɛ wa a Owele zu wa nganda wena.”

¹⁰ Nɛ a tɔ̃ 'bɔ na: “Be 'da wele, mɔ gɛ́ zala mɔ, hã mɔ zélé wenɔ mi nɛ tɔ̃ hã mɔ ni, nɛ mɔ usu ma dɛ kɔ sila mɔ.

¹¹ Nɛ mɔ nɛ 'da onya mɔ obe Israɛlɛ, kɛ wa kala wa, nɛ wa tɛa do wa kɔlɔ 'duli dɛ dɛ gɛ, nɛ mɔ tɔ̃ we kɛ mi NWA Gale, mi nɛ tɔ̃ nɛ ni hã wa. Gɛnɛ kɔ wa zele, tabi wa zèlè gɔ nde, nɛ mɔ tɔ̃ tɛ mɛ hã wa tɔ́a iko.”

¹² 'Do nɛ, nɛ Hi Wi 'da NWA ba mi dɛ ngɔ, nɛ mi zele gɛlɛ wele do 'do mi tɛ he mɔ nganda wena na: “E kɔ wa dɔnggɔ NWA tɛ fala kɛ a be do gã dɔ̃lɔ̃ li 'da a ni.”

¹³ Nɛ mi zele 'bɔ giti osala 'baka Otunu li mɛnɔ kɛ ma dĩ ngbɛ ɛ ni do giti kolonɔ kɛ zã wa ni. Ma dɔlɔ ɔ nɛ nùi ta tana ni.

¹⁴ Nɛ ngawi 'da Hi Wi 'da NWA lia kɔ mi nganda wena, nɛ 'da fala a la do mi ni, nɛ a yaka mi, nɛ zã mi nɔ̃lɔ̃.

¹⁵ Nɛ mi hɔa tɛ le Tɛlɛ-Abibɛ, tɛ fala kɛ Owi 'dulinɔ wa ɔ nɛ tɛ nu kolo lì Kebarɛ ni. Nɛ mi 'bana do wa dɛ di ni 'do tũ sambo. Mɛ ni, nɛ nde zu mi vĩ vɛ̃.

Gale ia Ezekiɛlɛ do wi mbese obe Israɛlɛ

¹⁶ Tũnɔ sambo ni ia, nɛ NWA wila we hã mi na:

¹⁷ “Be 'da wele, mi ia mɔ do wi zɔ mɔ tɛ obe Israɛlɛ. Kɔ fala kɛ mi wele we, nɛ mɔ zele, nɛ mɔ mbese wa do zu li mi.

¹⁸ Fala kɛ mi tɔ̃ hã wi dɛ 'dã mɔ na, a fe sɛ, nɛ ma wia na mɔ mbese a, hã a kpolo dɛa to tɛ̃ a, kɔ a kpasa. Kɔ fala kɛ mɔ dɛ̃ ni gɔ, nɛ a fe sɛ we duzu 'dã mɛnɔ 'da a. Nɛ mi e sɛ we fie 'da a dɛ zu mɔ.

¹⁹ Kɔ fala kɛ mɔ mbese a, hã a kìfì sila a, hã a la 'dã mɛnɔ 'da a gɔ, nɛ a fe sɛ. Nɛ mɔ, mɔ kpasa sɛ, mɔ fé sɛ gɔ.

²⁰ “Nɛ fala kɛ wi bɔlɔ zu la fala dɛ dia mɔ, kɔ a ma ngɔ dɛ 'dã mɔ, nɛ mi e sɛ a na, a kpa ngamɔ, nɛ a fe. Fala kɛ mɔ mbèsè a gɔ, nɛ a fe sɛ we duzu 'dã mɛnɔ 'da a, nɛ mi lénggé sɛ 'bɔ do dia mɛ kɛ a dɛa zi dati ni gɔ. Nɛ mi e sɛ we fie 'da a dɛ zu mɔ.

²¹ Kɔ fala kɛ mɔ mbese a na, a tɛ dɛ̀ 'bɔ 'dã mɔ gɔ, kɔ a zele nu mɔ, nɛ a kpasa sɛ we duzu mɔ, we kɛ mɔ mbese a ni. Nɛ mɔ, mɔ kpasa sɛ, mɔ fé sɛ gɔ.”

NWA dɛa na Ezekiɛlɛ tɛ wèlè we gɔ

²² Ngawi 'da NWA lia kɔ mi, nɛ a tɔ̃ hã mi na: “Mɔ kúlú ngɔ, kɔ mɔ la dɛ kɔ gbangɔlɔ̃ i, we kɛ mi nɛ wele we hã mɔ.”

²³ Na mɛ ni, mi kulu ngɔ, nɛ mi la dɛ kɔ gbangɔlɛ̃ i. Nɛ mi zɔ dɔ̃lɔ̃ li 'da NWA, ɔ nɛ kɛ mi zɔa zi nu kolo lì Kebarɛ i ni. Mi nɛa we zɔ ma, nɛ mi te, nɛ mi gu li mi nù.

²⁴ Nɛ Hi Wi 'da Gale lia kɔ mi, nɛ a zĩ mi do nyanga mi. Nɛ a tɔ̃ hã mi na: “Mɔ nɛ́, kɔ mɔ le kɔ tɔa 'da mɔ, nɛ mɔ kpe nu nɛ dɛ ngɔ mɔ.

²⁵ Be 'da wele, wa ɛnzɛ sɛ mɔ do fɛlɛ, nɛ mɔ wé sɛ 'bɔ we hɔ nza we dungu sanga winɔ gɔ.

²⁶ Mi nãlã sɛ lɛfɛ mɔ dɛ kɔ langgala gɛlɛ mɔ, nɛ mɔ wé sɛ 'bɔ we dãlã we dɛ tɛ Owi dɛ nga zunɔ gɛ gɔ.

²⁷ Nɛ 'da fala mi wele sɛ mbé we hã mɔ ni, nɛ mi hũi sɛ nu mɔ, nɛ mɔ tɔ̃ sɛ we mi NWA Gale, mi nɛ wele hã mɔ ni hã wa. Nɛ ombe wa zele sɛ nu mɔ, nɛ nde ombe wa zélé sɛ nu mɔ gɔ. We kɛ wa a Owi dɛ nga zu.”