EZEKIƐLƐ 29 - WE NU GALE 1995

Gale dãlã dɛ tɛ nwa ngɔ nù Ezipeto

¹ Do kɔ sabɛlɛ kɛ 'bu, zɛkɛ 'da 'bu, kɔ nɛ 'bu ngɔ nɛ bɔa, 'do kɛ lɛ la kɔlɔ 'duli ni, nɛ NWA wila we hã mi

² na: “Aa mɔ, be 'da wele, mɔ síkí li mɔ dɛ tɛ nwa ngɔ nù Ezipeto, nɛ mɔ dãlã dɛ tɛ̃ a do owinɔ 'da a vɛ̃ do zu li mi.

³ Mɔ mbésé a do we mi NWA Gale, mi tɔ̃ hã a ni na: Mi siki sɛ li mi dɛ tɛ mɔ, nwa ngɔ nù Ezipeto. Mɔ ɔ nɛ gba sɔ sa'de lì, kɛ a ɔ 'dɔ lì Nilɛ ni. Mɔ na, ɛ a wele lì Nilɛ, nɛ ɛ hã ɛ dɛa ma.

⁴ Hã mɔ zélé! Mi kɔ'bɔ sɛ kunggu tɛ 'bangga mɔ, nɛ mi dɛ sɛ na, okɔyɔnɔ 'dɔ lì 'da mɔ ni, wa nãlã dɛ tɛ kɔa tɛ mɔ. Mi fo sɛ mɔ 'dɔ lì Nilɛ dɛ nza, mba do kɔyɔnɔ wa nãlã dɛ tɛ kɔa tɛ mɔ ni.

⁵ Nɛ mi da sɛ mɔ do kɔyɔnɔ ni vɛ̃ dɛ li go i, nɛ mɔ fe dɛ bulu nù gɛ. Nɛ mi hã sɛ wɔlɔ mɔ hã onɔɛnɔ do osa'de zamɛnɔ na, wa nyɔngɔ. Nɛ wele dɔ́lɔ́ sɛ gbãlã mɔ we mi ma gɔ.

⁶ Na mɛ ni, nɛ Oezipeto vɛ̃ wa ĩ sɛ na, mi a NWA. “Obe Israɛlɛ wa gbini zi zã wa do mɔ, nɛ nde ĩ na mɔ ɔ zi nɛ sala tɔ̃ kɛ ma dɛ so wena ni.

⁷ Wa gãlã zi dɛ tɛ mɔ, nɛ mɔ gbini, nɛ wa ala, nɛ wa kpa dani zu 'baka wa. Mɔ fua kpã sila 'da wa do'do.

⁸ Ma kɛ mi NWA Gale, mi hã sɛ etumbu hã mɔ. Mi tombo sɛ gba gili osoda, nɛ wa bi sɛ mɔ, nɛ wa gbɛ sɛ winɔ do sa'denɔ ngɔ nùi 'da mɔ vɛ̃.

⁹ Nɛ nù Ezipeto ma hɔ sɛ li go, nɛ mɔ kpo 'báná sɛ 'bɔ di ni gɔ. Nɛ wa ĩ sɛ na, mi a NWA. “Mɔ tɔ̃a na, wele gba lì Nilɛ a mɔ ɛ, nɛ ɛ hã ɛ dɛa ma.

¹⁰ Ma hã mi siki sɛ li mi dɛ tɛ mɔ do lì Nilɛ. Mi 'danga sɛ nùi 'da mɔ, nɛ ma hɔ sɛ li go, yolo tɛ le Migdɔlɛ si gbãlã ngɔ, gbaa we hɔ tɛ le Asuanɛ do li ngbala Etiopi si ba gɔtɔ.

¹¹ Nɛ 'do 'bu sabɛlɛ nalɛ, wele tabi sa'de ɔ̃ sɛ 'bɔ di ni gɔ.

¹² Nɛ wa kpá sɛ 'bɔ nù kɛ ma hɔa li go nɛa ngɔ nù Ezipeto ni gɔ. Nɛ lenɔ vɛ̃ ma hɔ sɛ olo tɔa, nɛ wa kpá sɛ kulu tɔa ɔ na mɛ ni gele fala gɔ. Nɛ ma ɔ sɛ ni 'do 'bu sabɛlɛ nalɛ. Mi pɛsɛ sɛ Oezipeto vɛ̃, nɛ wa sɛ a ogɛnɛ tɛ ngɔ gele nùnɔ.

¹³ “Mi NWA Gale, mi tɔ̃a na: Sabɛlɛ 'bu nɛ nalɛ ni ma e, nɛ mi fo sɛ Oezipeto sanga owinɔ wa pɛsɛ zi dɛ kɔ wa ni, nɛ mi ngɛmɛ sɛ li wa.

¹⁴ Mi hã sɛ fala hã wa tɛ ngɔ nù Ezipeto, si do zu lì Nilɛ, tɛ fala oyaa wa wa yula zɛ se'de ni. Wa dɛ sɛ be le di ni, nɛ nde ma gã́ sɛ ngboo gɔ.

¹⁵ Nɛ owinɔ kɔ tala gele lenɔ vɛ̃, wa nɛ sɛ ngɔ wa. Nɛ Oezipeto wa wé sɛ 'bɔ we e mbula ngɔ gele winɔ gɔ, we kɛ mi dɛ sɛ na, wa tɛ dɔ̃ gɔ, nɛ wa tɛ nɛ̀ ngɔ gele winɔ gɔ.

¹⁶ Wa sɛ 'bɔ do ngawi we gbaka obe Israɛlɛ bina. Nɛ obe Israɛlɛ wa ĩ sɛ na, 'da fala lo gbini zi zã lo do Oezipeto ni, nɛ nde lo dɛa zi yɔa ti dɛa mɔ gã wena. Na mɛ ni, nɛ wa ĩ sɛ na, mi a NWA.”

Nwa Nabukɔdɔnɔzɔrɛ a bi sɛ nù Ezipeto

¹⁷ Do kɔ sabɛlɛ kɛ 'bu nɛ bɔa ngɔ nɛ sambo, zɛkɛ 'da kpo, kɔ̃ nɛ kpo, 'do kɛ lɛ la kɔlɔ 'duli ni, nɛ NWA wila we hã mi na:

¹⁸ “Be 'da wele, nwa Nabukɔdɔnɔzɔrɛ tumba zi osodanɔ 'da a we bi le Tirɛ. Nɛ bole ni ma nganda zi do osodanɔ 'da a wena. Zu wa kpɔ̃lɔ̃ zi, nɛ zu 'baka wa dɛ zi dani we gã tole ni. Nɛ nde nwa Nabukɔdɔnɔzɔrɛ do osodanɔ 'da a, wa kpà mɔ kpo olo bole ni gɔ.

¹⁹ Ma kɛ mi NWA Gale, mi tɔ̃ na, mi e sɛ nù Ezipeto dɛ kɔ̃ Nabukɔdɔnɔzɔrɛ, nwa ngɔ nù Babilonia. Nɛ a kala sɛ kpamɛnɔ ngɔ nù Ezipeto vɛ̃, nɛ a kɛ̃ ma hã osodanɔ 'da a olo tonɔ 'da wa, nɛ nù Ezipeto ma 'danga sɛ.

²⁰ Mi hã sɛ nù Ezipeto hã a, we si olo toe kɛ a dɛa hã mi ni. We kɛ mɛnɔ vɛ̃ kɛ osodanɔ 'da a wa dɛa ni, wa dɛa ma do zu li mi. Mi NWA Gale, mi tɔ̃a ni.

²¹ “Nɛ 'da fala a dɛ ni do'do, nɛ mi hã sɛ mbé ngawi hã obe Israɛlɛ. Nɛ mi hã sɛ wala hã mɔ, be 'da wele na, mɔ wele we dɛ li obe Israɛlɛ vɛ̃, takɔ wa ĩ na, mi a NWA.”