EZEKIƐLƐ 28 - WE NU GALE 1995

Gale dãlã dɛ tɛ nwa kɔ le Tirɛ

¹ NWA tɔ̃a hã mi na:

² “Mɔ, be 'da wele, mɔ nɛ́ 'da nwa kɔ le Tirɛ, nɛ mɔ mbese a do wenɔ kɛ mi NWA Gale, mi tɔ̃ hã a gɛ na: Mɔ, nwa kɔ le Tirɛ, mɔ hɔa wi wali, nɛ mɔ na, ɛ a gale, ɛ dungu ngɔ kpongbo nwa dɛ gbogbo gba lì ɔ nɛ gale ni. Nɛ nde ĩ na, mɔ a gale gɔ, mɔ a wele yala iko.

³ Mɔ lengge na, mɔ do hã zã nɛa ngɔ Daniɛlɛ, nɛ mɔ ĩ ti 'du gulu mɛnɔ vɛ̃.

⁴ Mɔ kala gili mɔ mbali do fɛ̃a mɔ bolo, nɛ mɔ hɔa do kpamɔ wena, we duzu hã zã do ĩ ti mɛ 'da mɔ.

⁵ Mɔ ĩ ti be gole wena, nɛ kpamɛnɔ 'da mɔ dɔa dɛ dati wena, nɛ ma hã wali hã mɔ.

⁶ “Kɔ mɔ zélé we mi NWA Gale, mi tɔ̃ hã mɔ gɛ! Mi na: Nɛ́ kɛ mɔ lengge na ɛ a gale ni,

⁷ mi nɛ tombo owi sɛnɛ mɔ kɛ li wa kolo wena ni, nɛ wa bi sɛ mɔ, nɛ wa 'danga sɛ kpamɛnɔ 'da mɔ, kɛ mɔ kpa ma do hã zã 'da mɔ ni vɛ̃. Nɛ wa fo sɛ gã dɔ̃lɔ̃ li zu mɔ do'do.

⁸ Mɔ fe sɛ nga fio dɛ ngɔ gba lì, nɛ wa tombo sɛ mɔ dɛ kɔ le 'da ofionɔ i.

⁹ Hã fala wa gbɛ mɔ, nɛ mɔ lengge sɛ 'bɔ na, mɔ a gale nde? 'Da fala mɔ te sɛ dɛ kɔ̃ Owi gbɛ winɔ ni, nɛ mɔ ĩ sɛ na, mɔ a gale gɔ, nɛ nde mɔ a wele yala iko.

¹⁰ Ogele wele wa gbɛ sɛ mɔ, nɛ mɔ fe sɛ fio sape ɔ nɛ manda'ba ni. Mi NWA Gale, mi tɔ̃a ni.”

¹¹ NWA wila 'bɔ mbé we hã mi na:

¹² “Be 'da wele, mɔ gá zuma 'bako do zu li nwa kɔ le Tirɛ. Mɔ tɔ̃ hã a na, mi NWA Gale, mi na: Mɔ zi a saka wele ngboo. Mɔ zi do hã zã wena, nɛ mɔ de zagbãlã wena.

¹³ Mɔ ɔ zi tɛ Edɛnɛ, fɔɛ 'da mi Gale. Mɔ hi'da zi tulu kɛ wa gɛza ma do odia ta olo gã golenɔ gɛ: sardɔanɛ, topazɛ, yaspɛ, krizolitɛ, berilɛ, ɔniksi, lazulitɛ, ɛskarbukɛlɛ do emɛrɔdɛ. Mɔ hi'da zi omɔ 'dafa tɛ wi, kɛ wa dula ma do mɔ mbali. Wa dula zi ma do tũi mi Gale, mi dɛa do mɔ ni.

¹⁴ Mi ia zi anzɛ kɛ zã mɔ, nɛ a tata sala 'baka a we kele zu mɔ. Nɛ mɔ ɔ zi ngɔ kala santo 'da mi, nɛ mɔ yɛnggɛ zi do sanga ota kɛ ma to zoko zoko.

¹⁵ Yolo do tũi mi Gale, mi dɛa zi do mɔ ni, mɔ dɛa zi mɔ tɛ mɔ do bɔlɔ nɛ gbaa we hɔ do ngba soe kɛ 'dã mɔ lia kɔ mɔ ni.

¹⁶ Mɔ zi tɛ be gole, nɛ ma gã zi gã fai, nɛ ma ka mɔ dɛ li wala dɛ 'dã mɔ, nɛ mɔ hɔa wi dɛ ngatɛ. Mi zɔa na mɛ ni, nɛ mi ndaka mɔ tɛ ngɔ kala santo 'da mi do'do. Nɛ anzɛ kɛ a zɔ mɔ tɛ mɔ ni, ndaka mɔ nyɛlɛ do tanɔ ma to zoko zoko ni.

¹⁷ Dia zagbãlã 'da mɔ hã wali hã mɔ, nɛ gã dɔ̃lɔ̃ li 'da mɔ ma 'danga gbãlã zã mɔ. Ma kɛ mi fi mɔ nù, nɛ mi ia mɔ nɛ́ mbisa we ni hã ogele nwanɔ.

¹⁸ Mɔ bia mɔ golenɔ 'da mɔ do 'dã hã, nɛ we duzu ma, mɔ faka fala sambalanɔ 'da mɔ. Ma kɛ mi fi sɛ we tɛ le, nɛ ma bɛlɛ mɔ vɛ̃. Nɛ owinɔ vɛ̃ kɛ wa nɛ sɛ we zɔ mɔ ni, wa kpa sɛ tati a bũ olo mɔ iko.

¹⁹ Nɛ owinɔ vɛ̃ kɛ wa ĩ ti mɔ ni, wa zɔ sɛ mɔ, nɛ sila wa ma gɔnɔ sɛ. Mba gɔ, mɔ hɔ sɛ mɔ hã gã kili, nɛ mɔ kpo 'báná sɛ olo mɔ gɔ.”

Gale dãlã dɛ tɛ Owi kɔ le Sidoni

²⁰ NWA tɔ̃a hã mi na:

^21-22 “Be 'da wele, mɔ síkí li mɔ dɛ tɛ le Sidoni, nɛ mɔ dãlã dɛ tɛ winɔ di ni do zu li mi NWA Gale na: Aa nɛ, owinɔ kɔ le Sidoni, mi siki sɛ li mi dɛ tɛ nɛ, nɛ mi hã etumbu hã nɛ. Ma be sɛ dɔ̃lɔ̃ li 'da mi hã winɔ vɛ̃, nɛ wa ĩ sɛ na, mi a NWA, nɛ mi a Gale santo.

²³ Mi tombo sɛ 'dã zɛlɛ dɛ ngɔ nɛ, nɛ tɔkɔ tɛ wele ma fo sɛ do ngɔ walanɔ 'da nɛ. Owi sɛnɛ nɛ wa bi sɛ nɛ si 'biti falanɔ vɛ̃, nɛ owinɔ wena wa fe sɛ. Na mɛ ni, nɛ winɔ vɛ̃ wa ĩ sɛ na, mi a NWA!”

Obe Israɛlɛ wa kpa sɛ dungu fio

²⁴ NWA tɔ̃a na: “Ogele winɔ kɛ zã obe Israɛlɛ, wa zɔ wa fai li wa yala. Ogele winɔ ni, wa ɔ zi we duzu wa nɛ hɛlɛ do tɛ̃, kɛ ma dumu wele, nɛ ma 'bili a ni. Nɛ nde ma Sɔkpɔ ia, wa ɔ́ sɛ 'bɔ ni gɔ. Nɛ wa ĩ sɛ na, mi a NWA.”

²⁵ NWA Gale tɔ́a na: “Mi ngɛmɛ sɛ li obe Israɛlɛ sanga ogele winɔ kɛ mi pɛsɛ wa dɛ kɔ wa ni, nɛ mi gese sɛ wa dɛ olo wa. Na mɛ ni, nɛ tala ogele winɔ wa ĩ sɛ na, mi a Gale santo. Obe Israɛlɛ wa ɔ sɛ ngɔ nùi 'da wa ngboo. Mɛ a nùi kɛ mi hã zi ma hã wi toe 'da mi Yakɔbɔ ni.

²⁶ Wa kpa sɛ dungu fio tɛ ngɔ nùi 'da wa, nɛ wa dɛ sɛ otɔa, nɛ wa mi ote vinɔ. Nɛ mi hã sɛ etumbu hã ogele winɔ kɛ zã nù Israɛlɛ kɛ wa zɔa obe Israɛlɛ li wa yala ni. Na mɛ ni, nɛ wa ĩ sɛ ngboo na, mi a NWA.”