EZEKIƐLƐ 27 - WE NU GALE 1995

Ezekiɛlɛ ga zuma 'bako dɛ ngɔ le Tirɛ

¹ NWA wila we hã mi na:

² “Mɔ, be 'da wele, mɔ gá zuma 'bako dɛ ngɔ le Tirɛ.

³ Mɛ a le kɛ ma tɛ nu gba lì. Nɛ Owi kɔ nɛ wa be gole sanga ngba wa do winɔ kɔ le nu lìnɔ kɛ ma nyɛlɛ wena ni. Mɔ mbésé wa do we mi NWA Gale, mi tɔ̃ hã wa ni na: Aa nɛ, owi kɔ le Tirɛ, nɛ dɔnggɔ tɛ nɛ, nɛ nɛ tɔ̃ na, lo dia la li ngele.

⁴ Le 'da nɛ ma tɛ ngɔ gba lì, wa dɛa ma ɔ nɛ dia masua ni.

⁵ Wa kala te siprɛnɔ tɛ ngɔ kala Sɛnirɛ, takɔ wa dɛ do kpangbata go'do nɛ, nɛ wa fa te sɛdrɛ tɛ Libanɛ we zĩ kɔ masua, nɛ wa kpo bɛndɛlɛ tɛ nɛ.

⁶ Wa gɔmɔ te sɛnɛnɔ tɛ Basanɛ, nɛ wa sɛ do te lu do masua. Wa gba te sɛdrɛ tɛ Siprɛ we dɛ do kpongbo kɔ nɛ, nɛ wa sɛ gogo fɔlɔ, nɛ wa yulu ngbala nɛ we gɛzɛ ma.

⁷ Wa fa tulu linɛ tɛ ngɔ nù Ezipeto, takɔ wa kpo ma tɛ masua na, bũi le kɔ nɛ, nɛ ma ba masua la nɛ. Wa gɛzɛ tɛ tuli ni de wena na, mɔ yolo ndũu, nɛ mɔ zɔ, nɛ mɔ ĩ ti ma. Wa ba tulu tɛ Siprɛ, nɛ wa gɛzɛ tɛ nɛ de wena do fila langi, do langi kɛ ma a bɔtɔlɔtɔ ni. Nɛ wa dɛa ma do tande we gu ngɔ tolenɔ.

⁸ Owi lu masua wi a Osidoni do Oarvadi. Nɛ nde owinɔ 'da nɛ ngboo kɛ wa ĩ ti to nɛ de wena ni, hã wa ba masua do tɛ wa.

⁹ Nɛ kala odia wi dɛ to kabinda tɛ Biblɔsɛ, nɛ nɛ a wa do Owi 'dafa masua. Omasuanɔ vɛ̃ kɛ ma yɛnggɛ ngɔ gba lì ni, ma yolo nù, nɛ wa kpo ma dɛ nu kolo lì 'da nɛ, takɔ Owi kɔ nɛ wa oso tolenɔ 'da nɛ.

¹⁰ “Sanga osodanɔ 'da nɛ, Opɛrsɛ do Oludɛ do Oputɛ wa boe. Wa gãlã ndasanɔ do ngelenɔ 'da wa tɛ kɔ ngbo 'da sodanɔ 'da nɛ. Nɛ nɛ kpa dɔ̃lɔ̃ li we ngawi 'da wa.

¹¹ Oarvadi wa mba do osodanɔ 'da nɛ, nɛ wa kũ ngɔ ngbonɔ 'da nɛ we zɔ mɔ tɛ le. Nɛ owinɔ wa kũ gba'danɔ 'da nɛ, wi a Ogamadɛ. Wa gãlã ngelenɔ 'da wa tɛ ngbonɔ kɛ ma zĩ nɛ takpa ni. Wa 'dafa le 'da nɛ dia la li ngele.

¹² “Owele wena wa tɛa zi kɔ le 'da nɛ we be gole sanga ngba wa do nɛ. Owi Tarsisi wa tɛ zi do fɛ̃a mɔ bolo do omɔ bolo kpi do kpi we oso do tolenɔ 'da nɛ.

¹³ Ogrɛkɛ do Otubalɛ do Omesɛkɛ, wa tɛ zi do ongbá do mɛnɔ kɛ wa dɛa do tũ mɔ bolo ni, nɛ wa oso do tolenɔ kɔ le 'da nɛ.

¹⁴ Nɛ be zi golenɔ 'da nɛ hã Owi Bɛtɛ-Togarma, nɛ wa oso zi ma kɔ̃ nɛ do ombalata dɛ to, do ombalata nɛ bolo, do opunda.

¹⁵ Owi Dedanɛ wa tɛ zi tɛ mɛ 'bɔ we be gole sanga ngba wa do nɛ. Nɛ nɛa zi kɔ gba gili ngolo lìnɔ we be golenɔ 'da nɛ, nɛ owinɔ i mɔ ni, wa oso zi ma kɔ̃ nɛ do gogo fɔlɔ, do te kalɔkpɛ.

¹⁶ Oedɔmɛ wa oso zi gba gili mɔ golenɔ kɔ̃ nɛ, nɛ wa hã odia tulu do odia ta olo gã gole hã nɛ.

¹⁷ Oyuda do Oisraɛlɛ wa oso zi gba gili mɔ golenɔ kɔ̃ nɛ, do ble, do kpalɛ kɛ ma yolo Minitɛ, do lɔsɔ, do nɔ gɔlɔ, do nɔ rɛzinɛ kɛ ma unu sirr ni.

¹⁸ Nɛ Owi Damasi wa kala zi mɔ golenɔ 'da nɛ tɛ̃ ɛ do tɛ̃ ɛ, nɛ wa oso ma kɔ̃ nɛ do dɔ̃ kɛ ma yula tɛ Hɛlboni, do sala bata kɛ ma yula Saharɛ.

¹⁹ Nɛ onu kpala Danɛ do Yavanɛ wa yula tɛ kɔ le Uzalɛ, nɛ wa tɛa do mɔ bolo kɛ wa dolo ma dula ni, do kɔa te dɛ do dia nɔ yɔmbɔ, we kpolo do mɔ golenɔ 'da nɛ.

²⁰ Owi Dedanɛ wa kpolo zi mɔ golenɔ 'da nɛ kɔ̃ nɛ do otulu sala mbalata.

²¹ Nɛ Owi Arabi do onwa ngɔ nù Kedarɛ, wa zi a Owi oso mɔ golenɔ 'da nɛ. Wa oso zi mɔ golenɔ kɔ̃ nɛ do ogã bata do obe nɛ, do odua.

²² Owi be golenɔ kɛ wa yolo zi tɛ kɔ le Saba do Ragma, wa kpolo zi mɔ golenɔ kɔ̃ nɛ do odia nɔ yɔmbɔ, do dia ta olo gã gole kpi do kpi, do mɔ mbali.

²³ Ole Haranɛ do Kane do Edɛnɛ, mba do Owi be golenɔ kɔ le Saba do Asurɛ do Kilmadɛ, wa be zi gole sanga ngba wa do nɛ.

²⁴ Wa tɛa do odia tulu hã nɛ, kɛnɔ ma yoo, do kɛnɔ wa gɛzɛ ma do olangi kpi do kpi, do onga fɛlɛ, do ogele tulu kɛ wa ngbɔa ma nɔ wena ni, nɛ wa bia gole nɛ tɛ kɔ le 'da nɛ.

²⁵ “Ogã masua kɛ ma yula zi Tarsisi, ma yɔnggɔ zi otolenɔ 'da nɛ. Le 'da nɛ Tirɛ ma ɔ zi nɛ gã masua kɛ ma dunu do otole, nɛ ma la do ngɔ gba lì ni.

²⁶ Nɛ owi lu masuanɔ 'da nɛ wa ba ma, nɛ wa la nɛ gbaa dɛ gbogbo gba lì i. Nɛ bũ yula si 'biti gba wese, nɛ ma ba masua, nɛ ma gbini sanga nɛ.

²⁷ Nɛ otolenɔ do kpamɛnɔ 'da nɛ, do owi dɛ to kɔ masua, do owi 'dafa ma, do osodanɔ, do gele winɔ vɛ̃ kɔ nɛ ni, wa bindi 'dɔ gba lì fala nɛ kpo do masua.

²⁸ Owinɔ wa ɔ nu gba lì ni, wa zila hiamɔ gɛlɛ wi tonɔ kɔ masua, nɛ wa tana kili.

²⁹ Nɛ owi dɛa to kɔ gele masuanɔ, wa hɔa nza kɔ masuanɔ 'da wa, nɛ wa la wila nɛ dɛ di ni.

³⁰ Wa zɔa le 'da nɛ, nɛ wa he kɔ̃a nɛ, nɛ wa kimili tɛ wa do zã bũ, nɛ wa so fumbɛlɛ dɛ zu wa.

³¹ Sila wa dunu do 'bako, nɛ wa hia kɔ̃a le 'da nɛ. Wa kpula zu wa vɛ̃, nɛ wa he'de saki, nɛ wa dungu gɛla le 'da nɛ.

³² Nɛ wa ga zuma kɔ̃a fio na: ‘Aa mɔ le Tirɛ, wi ɔ zi na mɔ gɛ a wio nde? Mɔ a gã le kɛ ma dɛ gbogbo gba lì.

³³ Mɔ dala gba gili Owele do mɔ golenɔ 'da mɔ, kɛ mɔ tɛ zi nɛ hã wa do ngɔ gba lìnɔ ni. Nɛ kpamɛnɔ 'da onwanɔ nyanga nza gɛ ma gã dɛ dati, we duzu dia mɔ golenɔ kɛ mɔ kpolo do wa ni.

³⁴ Nɛ nde mɔ bindi 'dɔ gba lì, nɛ mɔ zĩlĩ gbaa ti go'do lì i, nɛ tolenɔ do owi dɛa tonɔ 'da mɔ vɛ̃, wa bindi do mɔ fala nɛ kpo.

³⁵ Owinɔ wa ɔ nu gba lì nyɛlɛ wena ni, wa zɔa, nɛ kili ba wa, nɛ sila nwanɔ 'da wa gɔna, nɛ sanga li wa 'danga.

³⁶ Ogele winɔ wa be zi gole sanga ngba wa do mɔ ni, wa hia hiamɔ kili we mɛ ma hɔa hã mɔ ni. We kɛ mɔ 'danga vɛ̃, nɛ wa zɔ̃ sɛ 'bɔ mbé tɛ mɔ gɔ.’ ”