EZEKIƐLƐ 26 - WE NU GALE 1995

Gale dãlã dɛ tɛ owi kɔ le Tirɛ

¹ Do kɔ sabɛlɛ kɛ 'bu ngɔ nɛ kpo, kɔ̃ zɛkɛ kpo, 'do kɛ lɛ la kɔlɔ 'duli ni, nɛ NWA wila 'bɔ we hã mi

² na: “Be 'da wele, Owi kɔ le Tirɛ wa dɛ yangga, nɛ wa mɔmɔ Yeruzalɛmɛ na: ‘Le Yeruzalɛmɛ, kɛ ma dunu zi do owi be golenɔ gɛ, ma 'danga do'do. Kpamɛnɔ 'da wa di ngangga ni vɛ̃ a mɔ́ lɛ.’

³ Nɛ nde nɛ, owi Tirɛ, nɛ zélé we mi NWA Gale, mi tɔ̃ gɛ! Mi siki sɛ li mi dɛ tɛ nɛ, nɛ mi be sɛ ngawi 'da mi hã nɛ. Mi tombo sɛ gba gili Owele, nɛ wa bi sɛ lenɔ 'da nɛ, nɛ wa nɛ sɛ ngɔ nɛ fɛɔɔ, ɔ nɛ hɛ̃a lì ni.

⁴ Wa gbini sɛ ngbonɔ, nɛ wa 'danga gba'danɔ 'da nɛ. Nɛ mi mili sɛ olo nɛ, nɛ mɛ ma 'bana sɛ tati a kpangba ta iko.

⁵ Ma ɔ sɛ nɛ be ngolo lì 'dɔ gba lì tɛ fala kɛ Owi da galĩnɔ wa yɛlɛ do gbandanɔ 'da wa ni. Mi nwa, mi tɔ̃a ni. Ogele wele wa tɛ sɛ, nɛ wa kala mɛnɔ kɔ le,

⁶ nɛ wa 'danga be lenɔ kɛ zã nu kolo lì ni. Na mɛ ni, nɛ owinɔ wa ĩ sɛ na, mi a NWA.

⁷ “Aa nɛ, Owi Tirɛ, nɛ zélé 'bɔ we mi NWA Gale, mi tɔ̃ gɛ! Mi dɛ sɛ na Nabukɔdɔnɔzɔrɛ, nwa ngɔ nù Babilonia, kɛ a gã nɛa ngɔ Onwanɔ ni a tɛ we bi nɛ. A yolo sɛ si gbãlã ngɔ, nɛ a tɛ do ombalata, do ongilingili, do owi kũ mbalata, do gba gili osoda.

⁸ Nɛ wa 'danga sɛ obe lenɔ kɛ zã nu lì ni. 'Do nɛ, nɛ osodanɔ 'da a wa nɛ sɛ tɛ le 'da nɛ, nɛ wa zã sɛ kɔ̃, nɛ wa so nù dɛ ngɔ zĩ do 'do ngbo le. Nɛ wa 'dafa sɛ ngelenɔ 'da wa, nɛ ma kele zu wa ɔ nɛ ngbo ni.

⁹ Nɛ wa 'dɛnɛ sɛ zã dɛlɛ ngbo le 'da nɛ do ogã dɔnɔ, nɛ wa zã sɛ ngala tɔanɔ dɛ nù do konggonɔ 'da wa.

¹⁰ Fumbɛlɛ olo gba gili mbalatanɔ ma kutu sɛ dɛ ngɔ. Nɛ 'da fala kɛ wa gbini sɛ nu ngboe ni, nɛ osoda kũ mbalatanɔ do ngilingilinɔ wa le sɛ do nu ngbo lenɔ ni, nɛ giti nyanga wa ma tana sɛ tɔanɔ.

¹¹ Olo nyanga mbalatanɔ ma kpa sɛ do li walanɔ, nɛ owi kũ mbalatanɔ wa gbɛ sɛ owinɔ do du kɔyanɔ 'da wa. Nɛ osoda wa gbini sɛ ogã bɛlɛduma tɔanɔ, nɛ ma te nù.

¹² Wa kala sɛ kpamɛnɔ do mɛnɔ winɔ wa be gole nɛ kɔ le ni. Wa zã sɛ dɛlɛ ngbonɔ, nɛ wa gbini sɛ odia tɔanɔ 'da nɛ. Nɛ wa kala sɛ tanɔ, do tenɔ, nɛ wa so fũ tanɔ ni, nɛ wa vukpu ma 'dɔ gba lɛ

¹³ Owinɔ wa gá sɛ 'bɔ zumanɔ kɔ le 'da nɛ gɔ, nɛ giti kundunɔ 'da nɛ ma wélé sɛ 'bɔ gɔ.

¹⁴ Mi la sɛ tati a kpangba ta iko, ɔ nɛ be ngolo lì, kɛ wi da galĩnɔ wa yɛlɛ do gbandanɔ 'da wa ni. Wa 'dáfá sɛ 'bɔ le dɛ olo nɛ gɔ. Mi NWA Gale, mi tɔ̃a ni.

¹⁵ “Aa nɛ, owi Tirɛ, nɛ zélé we mi NWA Gale, mi tɔ̃ gɛ! Mi na: 'Da fala Owi sɛnɛ nɛ wa 'danga sɛ le 'da nɛ, nɛ wa gbɛ owinɔ 'da nɛ ni, nɛ owinɔ kɛ wa ɔ nu gba lì ni, wa zele sɛ hiamɔ gɛlɛ fionɔ, nɛ wa tana sɛ kili gbulu gbulu.

¹⁶ Nɛ onwanɔ 'da wa wa kulu sɛ ngɔ ngɔ kpongbo nwa 'da wa, nɛ wa hɔlɔ sɛ gã tulunɔ tɛ wa do tulunɔ kɛ wa ngbɔa ma dia nɛ ge nde ni. Nɛ wa dungu sɛ dɛ bulu nù gɛ, nɛ tɛ wa ma gɛ̃ sɛ. Nɛ wa tana sɛ tana fai, we kili kɛ ma ba wa we mɛ ma hɔa hã nɛ ni.

¹⁷ Wa ga sɛ zuma 'bako na: ‘Gã le kɛ li ma dɔ́lɔ́ zi nɛ ge nde ni, wa 'danga ma do'do. Wa fɔlɔ masuanɔ 'da wa ngɔ gba lì tɔkpɔɔ. Owinɔ kɔ le ni hã wa e zi mbula ngɔ gba lì, nɛ owinɔ vɛ̃ wa dɛ zi kili wa wena.

¹⁸ Nɛ nde ngangga ni le ni ma tia, nɛ owinɔ nu lì do ngɔ ngolo lì, wa zɔa ma, nɛ kili ba wa, nɛ wa tana gbulu gbulu.’

¹⁹ “Mi NWA Gale, mi tɔ̃a na: Aa nɛ, owi Tirɛ, mi dɛ sɛ na, le 'da nɛ ɔ nɛ le kɛ ma 'danga vɛ̃, nɛ wele ɔ́ 'bɔ kɔ nɛ gɔ ni. Mi dɛ sɛ na, gba lì go'do, nɛ ma nɛ ngɔ le fɛɔɔ.

²⁰ Mi da sɛ nɛ dɛ kɔ le 'da ofionɔ, tɛ 'da winɔ kɛ wa fia zɛ́ dati belee ni. Nɛ nɛ ɔ sɛ dɛ sanga winɔ wa fia zi dati hã nɛ ni. Nɛ le 'da nɛ sɛ dɛ sanga olo tɔanɔ kɛ ma 'danga zɛ́ belee ni. Nɛ kpóló sɛ 'bɔ tɛ nɛ gɔ, nɛ nɛ ɔ́ sɛ 'bɔ mbé nɛ ngɔ nùi 'da owinɔ kɛ wa 'bana do tunu li wa ni gɔ.

²¹ Winɔ vɛ̃ wa tana sɛ kili 'da fala kɛ wa zɔ sɛ le 'da nɛ, nɛ nde ma dɛa bili tɔa vɛ̃ ni. Wa fa sɛ nɛ, nɛ nde wa zɔ́ sɛ 'bɔ olo nɛ gɔ. Mi NWA Gale, mi tɔ́a ni.”