EZEKIƐLƐ 25 - WE NU GALE 1995

Gale dãlã dɛ tɛ Oamoni

¹ NWA tɔ̃a hã mi na:

² “Be 'da wele, mɔ nɛ́, hã mɔ dãlã dɛ tɛ Oamoni do zu li mi.

³ Mɔ tɔ̃ hã wa na, wa zele we mi NWA Gale, mi tɔ̃ hã wa gɛ. Mi na: Nɛ, Oamoni, nɛ zɔa kɛ wa faka tɔa Tɛmpɛlo 'da mi, nɛ wa 'danga nùi 'da mi, nɛ wa kala owinɔ 'da mi la do wa kɔlɔ 'duli ni, nɛ nɛ dɛa yangga.

⁴ Kɔ we duzu ma, mi dɛ sɛ na, Owele wa yolo tɛ li gba zɔ̃ si 'biti gba wese, nɛ wa tɛ, nɛ wa ba nùi 'da nɛ. Wa 'dafa sɛ fala ɔinɔ 'da wa dɛ ngɔ nùi 'da nɛ, nɛ wa ɔ dɛ di ni. Wa nyɔngɔ sɛ wala tenɔ, nɛ wa nɔ lì bele nadalamɛnɔ 'da nɛ.

⁵ Mi dɛ sɛ na, gã le 'da nɛ Raba kifi li zɔ̃ dala do osamo. Nɛ nù Amoni vɛ̃ ma hɔ sɛ fala dala do obata. Na mɛ ni, nɛ nɛ ĩ sɛ na, mi a NWA.

⁶ “Nɛ zélé we mi NWA Gale, mi tɔ̃ gɛ! Mi na: Nɛ zɔa ngamɛnɔ kɛ ma kpa obe Israɛlɛ ni, nɛ nɛ ta kɔ̃ nɛ, nɛ nɛ bũlũ do yangga, nɛ nɛ fi tɔɛ zu wa wena.

⁷ Ma kɛ mi nɛ siki li mi dɛ tɛ nɛ, nɛ mi 'dɔlɔ nɛ hã ogele winɔ, nɛ wa kala sɛ omɔ tɛ nɛ vɛ̃. Mi kumu sɛ nɛ vɛ̃, nɛ wa sá sɛ 'bɔ li nu kɔnggɔ nɛ sanga nu kɔnggɔ owinɔ ngɔ nù gɛ gɔ. Nɛ sɛ 'bɔ do nù mɔ́ nɛ bina. Na mɛ ni, nɛ nɛ ĩ sɛ na, mi a NWA.”

Gale dãlã dɛ tɛ Omoabɛ

⁸ “Nɛ zélé we mi NWA Gale, mi tɔ̃ gɛ! Mi na: Omoabɛ wa na, obe Israɛlɛ wa là ngba wa do ogele winɔ gɔ.

⁹ Ma kɛ mi dɛ sɛ na, Owi sɛnɛ wa, wa bi lenɔ 'da wa kɛ ma tɛ li ngbala nùi 'da wa ni, nɛ wa 'danga ma vɛ̃. Gɛnɛ kɔ odia lenɔ 'da wa ɔ nɛ Bɛtɛ-Yɛsimɔtɛ, Bala-Meoni do Kiriataimɛ, nɛ wa 'danga sɛ ma.

¹⁰ Mi dɛ sɛ na, Owele wa yolo tɛ li gba zɔ̃ si 'biti gba wese, nɛ wa tɛ, nɛ wa ba nùi 'da wa, ɔ nɛ kɛ wa ba do nùi 'da Oamoni ni. Nɛ ta zu wele gbá sɛ 'bɔ ngɔ nù Moabɛ gɔ.

¹¹ Mi hã sɛ etumbu hã Omoabɛ, nɛ wa ĩ sɛ na, mi a NWA.”

Gale dãlã dɛ tɛ Oedɔmɛ

¹² “Nɛ zélé we mi NWA Gale, mi tɔ̃ gɛ! Mi na: Oedɔmɛ wa dɛa gã 'dã mɔ, we kɛ wa bili nu gbã hã Owi ngɔ nù Yuda.

¹³ Ma kɛ mi NWA Gale, mi tɔ̃a na, mi be sɛ ngawi 'da mi hã Oedɔmɛ, nɛ mi kumu sɛ owinɔ do osa'denɔ ngɔ nùi 'da wa vɛ̃, yolo tɛ le Temanɛ gbaa we hɔ kɔ le Dedanɛ, nɛ nùi 'da wa, ma kifi sɛ li gba zɔ. Nɛ owinɔ ngɔ nɛ ni, wa fe sɛ li bolo.

¹⁴ Mi tombo sɛ Oisraɛlɛ na, wa bili nu gbã hã Oedɔmɛ do zu li mi. Wa dɛ sɛ wa 'danga wena we do 'da nɔ̃lɔ̃ zã 'da mi dɛ tɛ wa. Na mɛ ni, nɛ Oedɔmɛ wa ĩ sɛ na, mi NWA Gale, mi bili nu gbã hã lo.”

Gale dãlã dɛ tɛ Ofilisti

¹⁵ “Nɛ zélé we mi NWA Gale, mi tɔ̃ gɛ! Mi na: Gbaa mɔ zɛ́ belee, sila Ofilisti 'danga dɛ tɛ obe Israɛlɛ wena. Wa zɔ obe Israɛlɛ li wa yala, nɛ wa fa fai we bili nu gbã hã wa.

¹⁶ Ma kɛ mi NWA Gale, mi tɔ̃a na, mi be sɛ ngawi 'da mi hã wa, nɛ mi gbɛ sɛ Ofilisti kɛ wa yula tɛ Kaftɔrɛ ni, nɛ mi kumu sɛ wanɔ kɛ wa ɔ nu kolo gba lì ni vɛ̃.

¹⁷ Mi bili sɛ nu gbã hã wa. Mi zɛlɛ sɛ tɛ wa 'danga wena, nɛ wa ĩ sɛ na, mi a NWA.”