EZEKIƐLƐ 24 - WE NU GALE 1995

Le Yeruzalɛmɛ ɔ nɛ gã saso

¹ Do kɔ sabɛlɛ kɛ kusi, zɛkɛ 'da 'bu, kɔ̃ nɛ 'bu, 'do kɛ lɛ la kɔlɔ 'duli ni, nɛ NWA wila we hã mi na:

² “Mɔ, be 'da wele, mɔ kɔ́mɔ́ kɔ̃ zɛkɛ sɔɛ gɛ, we kɛ sɔɛ gɛ, nwa ngɔ nù Babilonia a ndo sɛ linggi le Yeruzalɛmɛ.

³ Nɛ mɔ wele we hã owinɔ 'da mi kɛ zu wa nganda nɛ ge nde ni. Mɔ tɔ̃ gba we kɛ mi NWA Gale, mi tɔ̃ gɛ hã wa. Mɔ é gã saso li we, nɛ mɔ a lì kɔ nɛ.

⁴ Nɛ mɔ 'bili dia mulu sa'de, o'baka nɛ do okũ nɛ, nɛ mɔ a ma kɔ gã sasoe ni. Nɛ mɔ kala 'bɔ odia gbãlãnɔ, nɛ mɔ a dɛ ngɔ nɛ.

⁵ Mɔ saka sɛ a obatanɔ kɛ wa dɛ nɔ wena ni. Nɛ mɔ toso nu guanɔ dɛ ti sasoe na, lì anga, nɛ gɛnɛ kɔ gbãlãnɔ, nɛ ma mbɔkɔ.

⁶ “Mɔ zélé we mi NWA Gale, mi tɔ̃ gɛ: 'Bako do le kɛ ma dunu do Owi gbɛ winɔ ni. Ma ɔ nɛ gã saso kɛ kɔ nɛ tua ngangge, nɛ wa fɔ̃lɔ̃ ma fala kpo gɔ ni. Wa fó mulu sa'de kɔ sasoe kpo kpo dɛ nza, nɛ wila kɔ nɛ ma ɔ iko.

⁷ Tɔkɔ tɛ winɔ kɛ wa gbɛa zi wa ni, ma 'bana dɛ kɔ le gɛ. Ma fò do ngɔ nùi gɔ, nɛ wele à 'bɔ nù ngɔ nɛ gɔ. Nɛ nde ma hulu dɛ ngɔ kpangba ta, nɛ ma 'bana dɛ di ni.

⁸ Mi la tɔkɛ ni dɛ wila fala na, ma gba ta zu mi, nɛ zã mi nɔ̃lɔ̃, nɛ mi fa we bili nu gbã.

⁹ “Ma kɛ mi NWA Gale, mi tɔ̃a na: 'Bako do le kɛ ma dunu do owi gbɛ winɔ ni, we kɛ mi nɛ dã gba nyɛa we kɔ nɛ.

¹⁰ Wa tɛ́ do guanɔ, nɛ wa fi we tɛ nɛ, nɛ lì nɔ̃lɔ̃, nɛ ma ɔ̃sɔ̃, nɛ sa'de ngutu, nɛ gbãlãnɔ te bũ.

¹¹ 'Do nɛ, nɛ wa e wila sasoe dɛ ngɔ kalĩnɔ, takɔ ma hɔ we, nɛ ndi tɛ nɛ ma e, nɛ sasoe sa.

¹² Gɛnɛ kɔ wa dɛ na mɛ ni, nɛ nde ma yala iko. We kɛ hɔa we sasoe wè tɛ fo ndinɔ vɛ̃ gɔ.

¹³ “Le Yeruzalɛmɛ dunu do Sɔkpɔ tala 'dã mɛnɔ vɛ̃. Nɛ mi kɔ̃a zi we fɔlɔ ma takɔ ma sa, nɛ nde ma kɔ̃̀ we sa nɛ gɔ. Ma kɛ ma 'bana sɛ do ndi na mɛ ni gbaa na, mi hɔ Sɔkpɔ nɔ̃lɔ̃ zã 'da mi dɛ tɛ nɛ sɛ nɛ de.

¹⁴ Mi nwa, mi tɔ̃a ni, nɛ ma dɛ sɛ tɛ̃ ɛ. Mi zĩ́ sɛ tɛ mi gɔ. Mi nɛ dɛ ma di dɔ̃ ni, nɛ 'bako sɛ li mi bina. Le Yeruzalɛmɛ ma kpa sɛ si olo 'dã mɛnɔ kɛ owinɔ wa dɛa kɔ nɛ ni. Mi NWA Gale, mi tɔ̃a ni.”

Ezekiɛlɛ dungu gɛla

¹⁵ NWA tɔ̃a hã mi na:

¹⁶ “Be 'da wele, mi nɛ fo wi kɛ mɔ kɔ̃a gɛnɛ a wena ni kɔ̃ mɔ do gbanga nɛ. Nɛ ma wè na mɔ te nzɛlɛ, tabi mɔ he kɔ̃a fio gɔ.

¹⁷ Mɔ úsú 'bakoe 'da mɔ dɛ kɔ sila mɔ na, dɔ wele ĩ́ we nɛ gɔ. Mɔ tɛ dùngù gɛla gɔ, mɔ tɛ dɛ̃ 'bɔ mɔ gɛla gɔ. Nɛ nde mɔ 'dáfá tɛ mɔ ɔ nɛ kɛ mɔ 'dafa dɛ fai ni.”

¹⁸ Nɛ do titole, nɛ mi wila we do winɔ, nɛ ma nɛ hɔ gɛ̃a wese, nɛ wuke 'da mi fe. Fala sa, nɛ mi dɛa ɔ nɛ kɛ NWA tɔ̃a hã mi ni.

¹⁹ Owinɔ wa zɔa ni, nɛ wa aka mi we gulu kɛ mi dɛa na mɛ ni.

²⁰ Nɛ mi gese hã wa na: “NWA wila we hã mi, nɛ a tɔ̃a hã mi na,

²¹ mi mbese nɛ, obe Israɛlɛ do toe ni. NWA tɔ̃a na, nɛ dɛ wali Tɛmpɛloe 'da ɛ, nɛ kɔ̃a gɛnɛ yɛnggɛ we zɔ ma, nɛ nɛ gbini zã nɛ do ma. Nɛ nde ɛ 'danga sɛ ma. Nɛ obulu benɔ do oboko benɔ 'da nɛ kɛ wa 'bana dɛ Yeruzalɛmɛ ni, wa fe sɛ li bolo.

²² Kɔ nɛ zele we nɛ, nɛ nɛ dɛ sɛ ɔ nɛ kɛ mi Ezekiɛlɛ, mi dɛa ni. Nɛ kélé sɛ bula li nɛ we dɛ 'bako gɔ, nɛ nɛ nyɔngɔ sɛ mɔ nu tɔa fio wa gɔ.

²³ Nɛ kpo sɛ kitambala zu nɛ, nɛ nɛ he'de mɔ nyanga nɛ. Nɛ dúngú sɛ gɛla gɔ, nɛ nɛ té sɛ nzɛlɛ gɔ, nɛ nɛ hé sɛ kɔ̃a gɔ. Nɛ nde tɛ nɛ ma zɛlɛ sɛ we duzu 'dã mɛnɔ kɛ nɛ dɛa ni. Nɛ wele do wele a ala sɛ nu a hã nya a.

²⁴ Mi Ezekiɛlɛ, mi dɛa ni, takɔ ma be mɔ hã nɛ. Nɛ dɛ sɛ mɛnɔ vɛ̃ kɛ mi dɛa gɛ. Nɛ 'da fala mɛnɔ ni ma hɔ sɛ ni, nɛ nɛ ĩ sɛ ngboo na, Gale a NWA.”

²⁵ Nɛ nwa tɔ̃a hã mi na: “Be 'da wele, mi nɛ 'danga fala kɛ wa dɛ wali nɛ, nɛ wa kɔ̃a we yɛnggɛ we zɔ ma, nɛ wa gbini zã wa do ma ni kɔ̃ wa do'do. Mi fo sɛ obulu benɔ do oboko benɔ 'da wa do'do.

²⁶ Kɔ 'da fala ma hɔ na mɛ ni, nɛ mbe wele kpo kɛ a kpasa kɔ ngamɛ ni, a tɛ sɛ, nɛ a tɔ̃ sako nɛ hã mɔ.

²⁷ Nɛ do kpo soe ni, mɔ sɛ 'bɔ a wi lɔndɔ nu gɔ, mɔ wele sɛ 'bɔ we mbé nɛ. Mɔ wele sɛ we do wi kɛ a tɛa ni. Na mɛ ni, nɛ mɔ ɔ sɛ nɛ mbisa we we owinɔ 'da mi. Nɛ wa ĩ sɛ ngboo na, mi a NWA.”