EZEKIƐLƐ 23 - WE NU GALE 1995

Le Samaria do Yeruzalɛmɛ ma ɔ nɛ owuko ndumba

¹ NWA tɔ̃a hã mi na:

² “Be 'da wele, mɔ zélé! 'Da fala zɛ́ kpo, nɛ owuko bɔa, naa wa kua wa dɛ kɔ zã kpo.

³ Wa 'bana zi be zɔnga iko, nɛ wa ndua dɛ ndumba tɛ ngɔ nù Ezipeto i. Nɛ owi wili wa ndua fa wa, nɛ wa 'be bele wa, nɛ wa ɔ do wa dɛ di ni.

⁴ Li kuti wele kɛ a Ohola, nɛ li hɔ dɛ 'do a a Oholiba. Kpasa wele kɛ a le Samaria, nɛ hɔ dɛ 'do a a le Yeruzalɛmɛ. Mi kala wa bɔa nɛ do wukonɔ 'da mi, nɛ wa kua obulu be do oboko be hã mi.

⁵ Nɛ gɛnɛ kɔ mi ba Ohola do wuke 'da mi ni, nɛ nde a là fala dɛ ndumba gɔ. A dɛa wɔ tɛ Owi wili Asiri, nɛ a ma ngɔ fa wa.

⁶ A fa ogã wi ngɔ lenɔ, do osodanɔ kɛ wa hi'da tulu olo gã golenɔ ni. Owinɔ ni vɛ̃ wa de zi zagbãlã wena, nɛ tɛ wa hãsã tɛ kũ ngɔ mbalatanɔ wena.

⁷ Nɛ Ohola hɔa makangoe 'da ogã wi ngɔ osoda Asiri. Nɛ wɔ kili tɛ̃ a tombo zi a na, a dɔnggɔ okpikimanɔ 'da Oasiri.

⁸ Nɛ a yɛnggɛ makango dɛ dati, ɔ nɛ kɛ a ndua zi dɛ ma tɛ ngɔ nu Ezipeto i ni. Yolo ngɔ be zɔnga tɛ̃ a, a dɛa zi ndumba tɛ ngɔ nù Ezipeto. Nɛ owi wili wa ndua fa a, nɛ wa 'be bele a, nɛ wa ɔ do a dɛ di ni.

⁹ Na mɛ ni, mi hã a hã Oasiri, kɛ a dɛ zi wɔ tɛ wa wena ni.

¹⁰ Nɛ wa hɔlɔ tulu tɛ̃ a vɛ̃, nɛ wa kala obulu benɔ do oboko benɔ 'da a, nɛ wa ba a, nɛ wa gbɛ a do du kɔya. Nɛ mɛ wa dɛa do a ni, ma hɔa mbisa we we duzu wukonɔ vɛ̃.

¹¹ “Nɛ boko nya a Oholiba, kɛ a hɔa dɛ 'do a ni 'danga 'bɔ nɛa ngɔ a. Nɛ a dɛa ndumba 'danga nɛa ngɔ kɛ nya a dɛa zi ni.

¹² A fa ogã wi ngɔ lenɔ, do osodanɔ kɛ wa hi'da tulu olo gã golenɔ ni. Owinɔ ni vɛ̃ wa de zi zagbãlã wena, nɛ tɛ wa hãsã tɛ kũ ngɔ mbalatanɔ wena.

¹³ Mi zɔa na, a hɔa wi ndi ngboo, nɛ a 'danga kpasaa ɔ nɛ nya a ni.

¹⁴ Nɛ nde Oholiba dɛa nulĩ wena nɛa ngɔ nya a. “Mbe tũ kpo, nɛ a zɔa ohi wele tɛ dɛlɛ tɔa, wa gɛzɛ ma do fila mɔ. Nɛ ohi winɔ ni a Obabilɔnɛ.

¹⁵ Wa do 'dɛ̃ 'dɛ tili wa, nɛ wa kpua fila tulu zu wa. Wa zi a osoda dɛ wali bolo, nɛ wa dɛa ohi wa kpasaa ɔ nɛ kɛ wa yɛnggɛ nɛ ngɔ nùi 'da wa i ni.

¹⁶ Oholiba zɔa ma, nɛ wɔ tɛ wa lia kɔ sila a do ti, nɛ a tombo to hã wa dɛ ngɔ nùi 'da wa i.

¹⁷ Obabilɔnɛ wa zila toe ni, nɛ wa tɛa, nɛ wa ɔ do a gbaa, nɛ wa nũlũ a gbutu gbutu. A zɔa ni, nɛ wɔ tɛ wa e tɛ̃ a, nɛ wa 'danga wá li a.

¹⁸ A bia kũlĩ tɛ̃ a dɛ li winɔ vɛ̃, nɛ winɔ wa ĩ ti a na, a a ndumba ngboo. Kɔ mi zɔa ni, nɛ wɔ tɛ̃ a ia tɛ mi, ɔ nɛ kɛ wɔ tɛ nya a ia tɛ mi ni.

¹⁹ Gɛnɛ kɔ na mɛ ni, nɛ nde a ɔmɔ tɛ dɛ ndumba gɔ, a 'danga dɛ dati 'danga fai, ɔ nɛ 'da fala a zi ngɔ be zɔnga tɛ̃ a tɛ ngɔ nù Ezipeto i ni.

²⁰ A dɛa yangga we e tɛ̃ a hã owi wilinɔ kɛ wa do wɔ tɛ ɔ do wuko wena, ɔ nɛ owili punda tabi owili mbalata ni.

Le Yeruzalɛmɛ kpa etumbu

²¹ “Mɔ, Oholiba, mɔ 'bana zi be zɔnga iko, nɛ mɔ la zi Owi wili Ezipeto na, wa 'be bele mɔ, nɛ wa ɔ do mɔ. Kɔ mɔ zɔ, mɔ kpula 'bɔ tɛ mɔ tɛ dɛ kpo ndumba mɔ dɛa zi i mɔ ni.

²² Kɔ mɔ zélé we mi NWA Gale, mi tɔ̃ hã mɔ gɛ. Mi na: Wɔ tɛ Owi fa mɔ ia zi tɛ mɔ, nɛ wa 'danga li mɔ. Nɛ nde mi dɛ sɛ na, zã wa nɔ̃lɔ̃ dɛ tɛ mɔ, nɛ wa yolo si falanɔ vɛ̃, nɛ wa zĩ mɔ takpa.

²³ Mi ngɛmɛ sɛ li Obabilɔnɛ, Okalde, Owi kɔ le Pekɔdɛ, Soa do Koa vɛ̃, nɛ Oasiri wa mba sɛ 'bɔ do wa. Mi sa sɛ mɔ hã owinɔ kɛ wa de zagbãlã wena ni, owi fɔmɔ le, do owi 'bili we, do osoda, do owi dĩ, do osodanɔ kɛ tɛ wa hãsã tɛ kũ ngɔ mbalatanɔ nɛ ge nde ni,

²⁴ nɛ wa yolo sɛ si gbãlã ngɔ, nɛ wa tɛ do ongilingili, ombalata do gba gili osoda. Wa he'de sɛ ndasa bolo, nɛ wa kele tɛ wa do ngele, nɛ wa zĩ mɔ takpa. Mi e sɛ mɔ dɛ kɔ̃ wa, nɛ wa gɔnɔ sɛ we 'da mɔ do 'da mbulanɔ 'da wa.

²⁵ Nɛ we duzu kɛ zã mi nɔ̃lɔ̃ dɛ tɛ mɔ wena ni, mi e sɛ wa na, zã wa nɔ̃lɔ̃ tɛ mɛ 'bɔ dɛ tɛ mɔ nganda wena. Wa 'bili sɛ zɔ̃ mɔ do zala mɔ, nɛ wa gbɛ sɛ obenɔ 'da mɔ do du kɔya. Do gbãlã we, wa kala sɛ obulu benɔ do oboko benɔ 'da mɔ, do tala wanɔ kɛ wa 'bana ni, nɛ wa dɔ wa do tunu li wa.

²⁶ Wa hɔlɔ sɛ tulu tɛ mɔ do mɔ 'dafa tɛ winɔ 'da mɔ.

²⁷ Mi dɛ sɛ na, 'dã dɛa ndumba kɛ mɔ ndua zi ma tɛ Ezipeto i ni ma Sɔkpɔ. Mɔ dɛ́ sɛ 'bɔ wɔ tɛ wi wili gɔ. Mɔ lénggé sɛ 'bɔ do Oezipeto gɔ.

²⁸ “Mi nwa, mi tɔ̃a na, mi nɛ la mɔ dɛ kɔ̃ owinɔ kɛ mɔ kɔ̃̀ gɛnɛ wa gɔ, do wanɔ kɛ wɔ tɛ wa ia tɛ mɔ ni.

²⁹ Nɛ zã wa ma nɔ̃lɔ̃ sɛ dɛ tɛ mɔ, nɛ wa zɛlɛ sɛ tɛ mɔ 'danga wena. Wa kala sɛ mɔ olo toe 'da mɔ, nɛ wa la mɔ do kũlĩ tɛ mɔ iko. Nɛ owinɔ wa zɔ sɛ mɔ li wa na, mɔ a ndumba.

³⁰ Wa dɛ sɛ do mɔ na mɛ ni, we duzu 'dã mɔ sapenɔ mɔ dɛa ni. Mɔ dɛa ndumba do owinɔ ngɔ gele nùnɔ, nɛ mɔ hɔa wi ndi we duzu kɛ mɔ dɔngga kpikimanɔ 'da wa.

³¹ Mɔ dɛa mɔ olo kɔ̃ boko nya mɔ. Ma kɛ mi ba sɛ 'bɔ kpo bila nɔ̃lɔ̃ zã 'da mi, kɛ mi ia zi nu boko nya mɔ ni, nɛ mi e sɛ ma nu mɔ.

³² “Mɔ zélé we mi NWA Gale, mi tɔ̃ gɛ! Mi na: Mɔ nɔ sɛ kpo bila olo boko nya mɔ ni. Bila nɛ ma a gã, nɛ kɔ nɛ 'du wena. Wa mɔmɔ sɛ mɔ, nɛ wa fi tɔɛ zu mɔ, we kɛ bila ni dunu ngurr.

³³ Mɛ a bila kili do zɛlɛ tɛ̃, nɛ boko nya mɔ nɔa ia. Mɔ nɔ sɛ, nɛ ma ba mɔ, nɛ tɛ mɔ ma zɛlɛ sɛ wena.

³⁴ Mɔ nɔ sɛ ma e kpɛrr, nɛ mɔ o bila do gogo mɔ, nɛ o'bulu nɛ ma 'bili sɛ bele mɔ. Mi NWA Gale, mi tɔ̃a ni.

³⁵ “Mɔ zélé we mi NWA mi tɔ̃ gɛ! Tɛ mɔ ila ngɔ mi, nɛ mɔ kifi 'do mɔ lua do mi. Ma kɛ mɔ kpa sɛ si olo 'dã mɔ sapenɔ mɔ dɛa ni.”

Gale gɔnɔ ngbangga 'da le Samaria do Yeruzalɛmɛ

³⁶ NWA tɔ̃a hã mi na: “Be 'da wele, mɔ 'dáfá tɛ mɔ, kɔ mɔ 'bili we 'da Ohola do Oholiba. Mɔ bé 'dã mɛnɔ wa dɛa ni dɛ li wa.

³⁷ Wa ɔa do wilinɔ 'da ngba wa, nɛ wa gbɛa Owele. Wa hã tɛ wa hã okpikimanɔ, nɛ wa gbɛa obulu benɔ wa kua wa hã mi ni, we dɔnggɔ do okpikimanɔ ni.

³⁸ Nɛ dɛ ngɔ ki ni, nɛ wa faka 'bɔ Tɛmpɛloe 'da mi do kpo 'da fala ni. Nɛ wa zɔa kɔ̃ tũ ɔmɔ tɛ wi 'da mi li wa yala iko.

³⁹ Nɛ do kpo soe wa gbɛa do obulu benɔ 'da wa we dɔnggɔ do kpikimanɔ 'da wa ni, nɛ wa lia kɔ Tɛmpɛloe 'da mi, kɛ mɛ a tɔa 'da mi ngboo ni, nɛ wa faka ma.

⁴⁰ “Nɛ wa tumba 'bɔ Owi to we sa mɔ hã Owi wili tɛ ngɔ nùnɔ kɛ ma nyɛlɛ wena ni. Owi wilinɔ ni wa kpa toe, nɛ wa tɛa do ti. Nɛ oboko nya winɔ bɔa ni wa fɔlɔ tɛ wa, nɛ wa kɔ tili ngɔ li wa, nɛ wa he'de mɔ 'dafa tɛ winɔ 'da wa.

⁴¹ Nɛ wa ɔ nu ngɔ dia mɔ ɔi. Nɛ nde wa ia mɛsa dɛ kɛ zã mɔ ɔi ni, nɛ wa a fũ yɔmbɔ do nɔ yɔmbɔnɔ mi hã zi hã wa ni dɛ ngɔ nɛ.

⁴² Owi wilinɔ wa tɛa dɛlɛ wena, nɛ gba gili owinɔ ni wa lénggé mɔ gɔ, nɛ wa wele we sɔ̃ɛɛ. Owinɔ kɛ wa yula zi li gba zɔ̃ ni, wa sanga winɔ ni boe. Nɛ wa hi'da omɔ nu kɔ̃ wi hã oboko nya winɔ bɔa ni, nɛ wa gu 'bɔ ndasa nwa zu wa.

⁴³ Mi zɔa na mɛ ni, nɛ mi tɔ̃ dɛ ngɔ wuko wele kɛ wi wilinɔ wa ɔa do a gbaa, nɛ wa 'danga a do'do ni na, a nɛ yɛnggɛ 'bɔ makango mbé nɛ nde?

⁴⁴ Do gbãlã we, owi wilinɔ wa 'bana tɛ 'da wuke ni. Wa do nya a Oholiba, wa a owuko yɛnggɛ vĩ zu yɛli.

⁴⁵ Nɛ nde Owi bɔlɔ zu wa gɔnɔ sɛ we 'da wa, ɔ nɛ kɛ wa gɔnɔ do we 'da Owi ɔ do wilinɔ 'da ngba wa, do Owi gbɛ winɔ ni. Mba gɔ, owukonɔ ni wa ɔa do wilinɔ 'da ngba wa, nɛ tɔkɔ tɛ winɔ wa gbɛa wa ni, ma ti ɛ̃lɛ̃ kɔ̃ wa boe.

⁴⁶ “Mi NWA Gale, mi tɔ̃a na: Ogba gili wele wa tɛ́, nɛ wa zɛlɛ tɛ wa, nɛ wa kala dia mɔ tɛ wa.

⁴⁷ Wa lo wa do ta, nɛ wa 'bili sanga wa kisi kisi do kɔya. E kɔ wa gbɛ obulu benɔ do oboko benɔ 'da wa, nɛ wa dɔ tɔanɔ 'da wa.

⁴⁸ Mi dɛ sɛ na, wa tɛ dɛ̃ 'bɔ 'dã mɔ sapenɔ ni tɛ ngɔ nù gɛ gɔ. Nɛ mi mbese sɛ wukonɔ vɛ̃ na, wa tɛ nɛ̀ 'do dɛa mɔ ndumba 'da wukonɔ bɔa ni gɔ.

⁴⁹ Nɛ nde nɛ, Ohola do Oholiba, nɛ kpa sɛ etumbu we 'dã mɛnɔ kɛ nɛ dɛa, do we kpikimanɔ kɛ nɛ dɔnggɔ wa ni. Na mɛ ni, nɛ nɛ ĩ sɛ na, mi a NWA.”