EZEKIƐLƐ 21 - WE NU GALE 1995

Obe Israɛlɛ wa kpa sɛ 'dã sako

¹ NWA Gale tɔ̃a hã mi na:

² “Mɔ, be 'da wele, mɔ síkí li mɔ si ba gɔtɔ, tɛ ngɔ nùi kɛ kɔla se'de ni. Nɛ mɔ dãlã dɛ tɛ owinɔ i mɔ ni do zu li mi.

³ Mɔ tɔ̃ hã wa na, wa zele we mi NWA Gale, mi tɔ̃ hã wa gɛ: Mi nɛ fi we tɛ kɔla, nɛ ma bɛlɛ sɛ kula tenɔ do tɔlɔ tenɔ ngɔ nùi 'da nɛ vɛ̃, nɛ mɔ kpo wé sɛ tɛ bi we ni gɔ. Ma nyɔngɔ sɛ yolo si ba gɔtɔ we la si gbãlã ngɔ, nɛ ma dɔ sɛ owinɔ vɛ̃.

⁴ Nɛ wele do wele a ĩ sɛ na, mi NWA, mi a mi fi we ni, nɛ mɔ kpo wé sɛ tɛ bi ma gɔ.”

⁵ Nɛ nde mi gese hã NWA na: “Aa NWA Gale, mɔ mbɔkɔ mi, owinɔ vɛ̃ wa bi tɛ wa na, mi tɔ̃ hã wa a gba we iko.”

⁶ Nɛ NWA tɔ̃ hã mi na:

⁷ “Be 'da wele, mɔ ká mɔ dɛ Yeruzalɛmɛ, tɛ si fala wa dɔnggɔ do gale bɛlɛnɔ ni, nɛ mɔ dãlã dɛ tɛ obe Israɛlɛ do zu li mi.

⁸ Mɔ tɔ̃ hã wa na, mi NWA Gale, mi tɔ̃ hã wa na: Mi siki sɛ li mi dɛ tɛ nɛ, mi mana sɛ du kɔya 'da mi li foko nɛ, nɛ mi gbɛ sɛ nɛ, o'dã winɔ do odia winɔ vɛ̃.

⁹ Du kɔya 'da mi ma kpa sɛ owinɔ vɛ̃, yolo si ba gɔtɔ we hɔ si gbãlã ngɔ.

¹⁰ Nɛ owinɔ vɛ̃ wa ĩ sɛ na, mi NWA, mi gbɔtɔ du kɔya 'da mi li foko nɛ, nɛ mi yúlú sɛ ma dɛ olo nɛ gɔ.

¹¹ Nɛ nde mɔ, be 'da wele, mɔ hé mɔ ɔ nɛ wi kɛ sila a 'bɔa do'do ni. Mɔ hé mɔ do 'bako dɛ gbali winɔ vɛ̃.

¹² Nɛ wa aka sɛ mɔ we gulu kɛ mɔ he mɔ ni, nɛ mɔ gese sɛ hã wa na, mɔ zila 'dã sako. Kɔ winɔ wa zele ni, nɛ sila wa vɛ̃ ma gbini sɛ. Nɛ wa sɛ 'bɔ do ngawi bina. Hi wa ma ha sɛ, nɛ wa tana sɛ kili. 'Da fala ma wia ia, ma hɔ sɛ di dɔ̃ ni. Mi NWA Gale, mi tɔ̃a ni.”

Lɛnggɛ ngɔ du kɔya

¹³ NWA tɔ̃a 'bɔ mbé we hã mi. A na:

¹⁴ “Mɔ, be 'da wele, mɔ dálá dɛ tɛ owinɔ do zu li mi. Mɔ tɔ̃ we mi NWA, mi tɔ̃ hã wa gɛ na: Nɛ zɔ́ du kɔya gɛ, wa bɛngɛ nu nɛ, nɛ wa hɔnɔ tɛ nɛ.

¹⁵ Wa bɛngɛ nu nɛ takɔ ma gbɛ wi, wa hɔnɔ tɛ nɛ takɔ ma ndele.

¹⁶ Wa 'dafa ma vɛ̃ ia, takɔ wa e dɛ kɔ wi gbɛ wi.

¹⁷ Be 'da wele, mɔ hé mɔ 'bako, we kɛ wa 'dafa du kɔya we bi do owinɔ 'da mi, do gã winɔ ngɔ nù Israɛlɛ vɛ̃. Ogã winɔ wa ala sɛ li bolo, fala nɛ kpo do owinɔ 'da wa. Mɔ zɛ́ ngu'du mɔ do 'bako.

¹⁸ Mi nɛ yamba owinɔ 'da mi, nɛ ma nganda sɛ do wa wena. Mi NWA Gale, mi tɔ̃a ni.

¹⁹ “Hã mɔ be 'da wele, mɔ nɛ́, nɛ mɔ gba olo nu mi, mɔ zɛ́ kɔ̃ mɔ fala bɔa, fala talɛ. Ki ni a kɔya bolo kɛ wa kusu ma ngɔ, nɛ owinɔ wa tɛ ala li nɛ fai.

²⁰ Owinɔ 'da mi wa zɔa ní, nɛ sila wa ma 'bɔa, nɛ wa bɛmbɛ we te nɛ. Mi ia kɔya gbɛ wi tɛ nu tɔa kpo kpo, ma nyɛ nɛ́ nyɛa li kolo ni, nɛ ma 'bɔ we gbɛ wi iko.

²¹ “Aa mɔ, tɔ̃a nu kɔya gɛ, mɔ 'bílí si ngawili kɔ̃ do si ngɔ gale, mɔ síkí 'bɛ̃lɛ̃ nu mɔ si falanɔ vɛ̃.

²² Mi nɛ zɛ tɛ mɛ 'bɔ kɔ̃ mi, nɛ mi e dã 'da mi na, ma dɛ to. Mi NWA, mi tɔ̃a ni.”

Nwa ngɔ nù Babilonia bi le Yeruzalɛmɛ

²³ NWA tɔ̃a hã mi na:

²⁴ “Mɔ, be 'da wele, mɔ yɔlɔ fɛlɛ bɔa, nɛ ma be walanɔ bɔa kɛ nwa ngɔ nù Babilonia a tɛ sɛ do ma do du kɔya 'da a ni. Nɛ mɔ dɛ na, walanɔ bɔa ni ma yolo dɛ kɔ le kpo, sɛ nɛ ma la de. Nɛ mɔ e anggɛ, tɛ nu wala kpo kpo na, ma be le kɛ wala ni ma nɛ dɛ se'de ni.

²⁵ Nɛ 'da fala nwa ngɔ nù Babilonia hɔ di ni, nɛ a zɔ sɛ na, mbe wala kpo nɛ dɛ tɛ le Raba, le 'da Oamoni, nɛ mbee nɛ la si tɛ gba ngbo le Yeruzalɛmɛ, tɛ ngɔ nù Yuda.

²⁶ A hɔ di ni, nɛ a yolo sɛ nù dɛ ti anggɛnɔ bɔa ni, nɛ a 'bɛnɛ mɔ. A yaka sɛ okpili, nɛ a aka okpikima, nɛ a zɔ wili sila sa'de we ĩ ti wala kɛ a ba sɛ do ma ni.

²⁷ A dɛ na mɛ ni, nɛ kpili kɛ wa kɔma li le Yeruzalɛmɛ dɛ se'de ni, ma te sɛ si ngawili kɔ̃ a, nɛ ma be na, le a nɛ nɛ dɛ kɔ nɛ ni hã ni. A he sɛ hiamɔ bolo, nɛ a a mɔ bi bolo we gbini do nu ngbonɔ, nɛ a so nù dɛ ngɔ gbaa na, ma we kɔ̃ do zu ngbo le, nɛ a zã kɔ̃ zĩ do 'do le.

²⁸ Owi Yeruzalɛmɛ wa zɔ sɛ ni, nɛ wa ba sɛ kafi, nɛ wa lengge sɛ na, mɔ kpo dɛ́ sɛ lo gɔ, we duzu gba tɔkɔ kɛ wa gba zi ni. Nɛ nde nwa ngɔ nù Babilonia a gba sɛ ta zu wa ngɔ gba tɔkɛ wa yala ma ni, nɛ a mbese sɛ wa na, lo kala sɛ wa la do wa kɔlɔ 'duli.

²⁹ Ma kɛ mi NWA Gale, mi tɔ̃ hã wa na: 'Dã mɛnɔ 'da nɛ ma hɔa nza ia. Dɛa mɔ tɛ nɛ ma be 'da fala fai a 'dã wi 'da nɛ. Winɔ vɛ̃ wa ĩ na, nɛ a owi dɛ 'dã mɔ. Ma kɛ nɛ tia do ngbangga, nɛ nɛ ala sɛ dɛ kɔ̃ owi sɛnɛ nɛ.

³⁰ “Nɛ mɔ, nwa ngɔ nù Israɛlɛ, mɔ a 'dã nwa, mɔ kpolo nu mɔ fai. Kɔ̃ tũ etumbu 'da mɔ ma kɔlɔ ia.

³¹ Kɔ mɔ zélé we mi NWA Gale, mi tɔ̃ gɛ: Wa fo sɛ ndasa nwa zu mɔ, nɛ wa hɔlɔ tulu nwa tɛ mɔ do'do. Mɛnɔ ma kpolo sɛ ngbɛ ɛ. Obe winɔ wa ba sɛ fala olo ogã winɔ, nɛ wa isi zu wa dɛ nù.

³² Nɛ tɛ kɔ le Yeruzalɛmɛ, ma 'bana sɛ tati a o'dã tɔa iko. Nɛ ta kpo 'báná sɛ ngɔ ngbɛ ɛ kɔ le ni gɔ, wa gbini sɛ ma vɛ̃. Nɛ nde dati vɛ̃, nɛ wele kɛ mi tumba a na, a hã etumbu hã le ni, a hɔ sɛ do'do sɛ nɛ de.”

Wa bi sɛ 'bɔ le 'da Oamoni

³³ Nɛ NWA tɔ̃ 'bɔ hã mi na: “Be 'da wele, mɔ zɔ Oamoni wa dã obe Israɛlɛ. Mɔ nɛ́, nɛ mɔ dãlã dɛ tɛ wa do zu li mi. Mɔ tɔ̃ hã wa na: Owi sɛnɛ wa, wa 'dafa du kɔya ia, wa 'dafa ma we 'danga mɔ. Wa bɛngɛ nu nɛ we gbɛ wi, wa hɔnɔ tɛ nɛ, takɔ ma ndele.

³⁴ Nɛ tɔ̃ na, lo zɔa mɔ li yalɛ, nɛ nde nɛ zɔ̃ mɔ gɔ. Nɛ tɔ̃ we mɛnɔ kɛ ma nɛ hɔ do 'do nza ni, nɛ nde mɛ a bɛlɛ iko. Nɛ dè gɔ, nɛ dɛ 'dã mɔ wena. Nɛ nde kɔ tũi ma wia ia, nɛ kpa sɛ etumbu 'da nɛ. Du kɔya ma 'bili sɛ gɛlɛ nɛ fi nù.

³⁵ “Nɛ gésé du kɔya 'da nɛ dɛ li foko nɛ! Mi gɔnɔ sɛ we 'da nɛ dɛ ngɔ nùi kɛ wa dɛa nɛ se'de, do kɔ le kɛ wa kua do nɛ ni.

³⁶ Mi e sɛ dã 'da mi na, ma sulu dɛ ngɔ nɛ, nɛ ma bɛlɛ nɛ ɔ nɛ we ni. Mi e sɛ nɛ dɛ kɔ̃ owi kula li, kɛ wa fa we 'danga mɔ iko ni.

³⁷ We ma bɛlɛ sɛ nɛ, nɛ tɔkɔ tɛ nɛ ma fo sɛ kpa do ngɔ nùi vɛ̃. Nɛ li nɛ ma mbiti sɛ, nɛ ta zu wele kpo gbá sɛ 'bɔ ngɔ nɛ gɔ. Mi NWA Gale, mi tɔ̃a ni.”