EZEKIƐLƐ 20 - WE NU GALE 1995

Gale bɛ̃ gɛnɛ obe Israɛlɛ we nga zu 'da wa gɔ

¹ Do kɔ sabɛlɛ kɛ sambo, zɛkɛ 'da mɔlɔ, kɔ̃ nɛ 'bu, 'do kɛ lɛ la kɔlɔ 'duli ni, nɛ ombe kumu Israɛlɛ wa tɛa we aka mi, we ĩ ti linggamɛ 'da NWA.

² Nɛ NWA tɔ̃ hã mi na:

³ “Be 'da wele, mɔ wélé we do okumu Israɛlɛ, nɛ mɔ mbese wa na, mi NWA, mi tɔ̃a na: Nɛ tɛa we aka mi nde? Mi NWA Gale, mi kana tɛ mi na, mi kɔ̃̀ sɛ na nɛ aka mi gɔ. Mi NWA Gale, mi tɔ̃a ní.

⁴ “Mɔ, be 'da wele, mɔ nɛ́, kɔ mɔ gɔnɔ we 'da wa. Mɔ gba ta zu wa ngɔ 'dã mɛnɔ oyaa wa wa dɛa zi ni.

⁵ Nɛ mɔ tɔ̃ toe 'da mi hã wa na: 'Da fala mi saka zi obe Israɛlɛ ni, nɛ mi kpua zi mbulu hã wa. Mi bia tɛ mi hã wa tɛ ngɔ nù Ezipeto i, nɛ mi tɔ̃ zi hã wa na, mi a NWA 'da wa.

⁶ Do 'da fala ni, nɛ mi kana zi tɛ mi hã wa na, mi fo sɛ wa ngɔ nù Ezipeto dɛ nza, nɛ mi kã sɛ wa dɛ ngɔ nù kɛ mi saka ma hã wa ni. Mɛ a nù kɛ ma do nyɔngɔmɔ la li ngele, nɛ ma dia nɛa ngɔ tala nùnɔ vɛ̃.

⁷ Nɛ mi ba zi nu mi hã wa na, wa bɛ̃ gɛnɛ ogale bɛlɛnɔ kɛ wa kɔ̃a gɛnɛ wa ni. Nɛ wa tɛ dɔ̀nggɔ̀ 'bɔ ogale Ezipeto, kɔ wa hɔ wi ndi li mi gɔ. We kɛ mi a NWA Gale 'da wa.

⁸ “Nɛ nde wa dɛa nga zu dɛ tɛ mi, nɛ wa bɛ̃a we zele mi. Wa là fala ogale bɛlɛnɔ kɛ wa kɔ̃a gɛnɛ wa ni gɔ. Nɛ wa bɛ gɛnɛ ogale ngɔ nù Ezipeto gɔ. Mi zɔa zi ní, nɛ mi tɔ̃ na, mi úsú sɛ nɔ̃lɔ̃ zã 'da mi do wa gɔ, mi hã sɛ etumbu hã wa dɛ ngɔ nù Ezipeto i ngboo.

⁹ Nɛ nde mi dɛ̃ zi ma gɔ, we kɛ mi kɔ̃̀ zi na, mi kpa sape li ogele winɔ kɛ wa zila mbuli mi kpua zi hã obe Israɛlɛ na, mi fo sɛ wa ngɔ nù Ezipeto dɛ nza ni gɔ.

¹⁰ “Na mɛ ni, mi fua zi wa ngɔ nù Ezipeto dɛ nza, nɛ mi kã wa tɛ li gba zɔ̃ i.

¹¹ Nɛ mi bia zi mbulanɔ vɛ̃ kɛ wele wia tɛ dɛ ma, sɛ nɛ a kpasa de ni hã wa.

¹² Mi ia zi kɔ̃ tũ ɔmɔ tɛ wi hã wa, takɔ ma be dɛa na kɛ mi dɛa do wa ni. Nɛ kɔ̃ tũi ni, ma gba sɛ ta zu wa na, mi nwa, mi ia wa do wi tonɔ 'da mi.

¹³ Nɛ gɛnɛ kɔ tɛ li gba zɔ̃ i, nɛ nde obe Israɛlɛ wa dɛa nga zu dɛ tɛ mi. Mi bia zi mbulanɔ vɛ̃ do mɛnɔ kɛ ma wia na wele dɛ, sɛ nɛ a kpasa de ni hã wa. Nɛ nde wa zɔa ma li wa yala, nɛ wa bɛ̃ gɛnɛ nɛ. Nɛ wa faka kɔ̃ tũ ɔmɔ tɛ wi dè gɔ. Mi nɛa we zɔ ní, nɛ mi tɔ̃ 'bɔ na, mi úsú sɛ 'bɔ nɔ̃lɔ̃ zã 'da mi do wa gɔ, mi nɛ gbɛ wa dɛ li gba zɔ̃ɛ ni.

¹⁴ Nɛ nde mi dɛ̃ zi ma gɔ, we kɛ mi kɔ̃̀ zi na, mi kpa sape li ogele winɔ kɛ wa zɔa zi mi tɛ fo wa ngɔ nù Ezipeto dɛ nza ni gɔ.

¹⁵ Nɛ mi kana tɛ mi tɛ li gba zɔ̃ i na, wa lé sɛ ngɔ nùi mi saka zi hã wa ni gɔ. Mɛ a nù kɛ ma do nyɔngɔmɔ la li ngele, nɛ ma dia nɛa ngɔ nùnɔ vɛ̃.

¹⁶ Mi kana zi tɛ mi na mɛ ni, we duzu kɛ wa kɔ̃̀ zi we zele mi gɔ. Nɛ wa bɛ̃a mbulanɔ mi hã zi hã wa ni. Nɛ wa faka zi kɔ̃ tũ ɔmɔ tɛ wi, we duzu kɛ wa ba sila wa vɛ̃ hã kpikimanɔ.

¹⁷ Nɛ nde mi gbɛ̃ zi wa gɔ, we duzu kɛ mi zi do 'bako wena we wa. Mi kɔ̃̀ zi na, mi kumu wa dɛ li gba zɔ̃ i gɔ.”

Obe Israɛlɛ wa là fala bɛ nu Gale gɔ

¹⁸ “Mi mbisa zi obe zã wa tɛ li gba zɔ̃ i na: ‘Nɛ tɛ nɛ 'do mbulanɔ kɛ oyaa nɛ wa ia ma do tɛ wa wele nɛ ni gɔ. Nɛ nɛ tɛ dɔnggɔ kpikimanɔ 'da wa, kɔ nɛ hɔ wi ndi li mi gɔ.

¹⁹ Mi a NWA Gale 'da nɛ. Nɛ dɛ́ mɔ tɛ nɛ we do 'da mbulanɔ 'da mi, nɛ nɛ kɔ̃ gɛnɛ dɛ ma.

²⁰ Nɛ é kɔ̃ tũ ɔmɔ tɛ wi na, ma ɔ santo, takɔ ma be dɛa na 'da mi do nɛ. Nɛ ma gba sɛ 'bɔ ta zu nɛ na, mi a NWA Gale 'da nɛ.’

²¹ Nɛ nde obenɔ ni wa dɛa tɛ mɛ 'bɔ nga zu dɛ tɛ mi, nɛ wa bɛ̃a we nu mi, nɛ wa 'danga mbulanɔ 'da mi. Ĩ na, mɛ a ombula kɛ ma kpasa wele kɛ a dɛ ma ni kpasa. Wa faka 'bɔ kɔ̃ tũ ɔmɔ tɛ wi. Ma a mi nɛa we zɔ ní, nɛ mi tɔ̃ na, mi kúnú sɛ 'bɔ sila mi gɔ, mi nɛ be nɔ̃lɔ̃ zã 'da mi hã wa dɛ li gba zɔ̃ɛ ni.

²² Nɛ nde mi dɛ ma gɔ, we kɛ mi kɔ̃̀ zi na, mi kpa sape li ogele winɔ kɛ wa zɔa zi mi tɛ fo wa ngɔ nù Ezipeto dɛ nza ni gɔ.

²³ Nɛ nde mi kana 'bɔ mbé tɛ mi tɛ li gba zɔ̃ i na, mi pɛsɛ sɛ wa dɛ sanga ogele winɔ.

²⁴ Mi kana tɛ mi na mɛ ni, we duzu kɛ wa dɛ̃ zi mbulanɔ 'da mi gɔ, nɛ wa dɔnggɔ kɔ̃ tũ ɔmɔ tɛ wi gɔ. Nɛ nde wa ba zi tɛ wa hã okpikimanɔ 'da obaa wa.

²⁵ Mi ia wa na, wa dɛ mbulanɔ kɛ ma wè tɛ gala wa, nɛ ma hã kpasi hã wa gɔ ni.

²⁶ Mi ia wa na, wa hã odɔnggamɔ kɛ ma dɛ na, wa hɔ wi ndi li mi ni. Mi la wa na, wa dɔ kuti bulu benɔ 'da wa. Mi dɛa zi na mɛ ni, takɔ kili ba wa, nɛ wa ĩ na, mi a NWA.”

Gale ia te nu sambala kpikima

²⁷ “Kɔ mɔ, be 'da wele, mɔ tɔ̃ toe 'da mi Gale hã wa na: Oyaa nɛ wa bɛ̃a zi 'bɔ nu mi, nɛ wa nɔ̃lɔ̃ zã mi 'bɔ mbé nɛ.

²⁸ Mba gɔ, mi kã zi wa dɛ ngɔ nù kɛ mi kana tɛ mi we hã ma hã wa ni. Kɔ wa nɛa zi we zɔ zu kala do zu tenɔ kɛ ma 'bɔ wena ni, nɛ wa ma zi ngɔ hã dɔnggamɛnɔ 'da wa hã ogale bɛlɛnɔ dɛ di ni. Nɛ mi nɛa zi we zɔ dɔnggamɛnɔ kɛ wa dɔ, nɛ dɔ̃ɛ wa dɔnggɔ do ogale bɛlɛnɔ ni, nɛ ma hã nɔ̃lɔ̃ zã hã mi wena.

²⁹ Nɛ mi aka zi wa na: ‘Gulu falanɔ nɛ nɛ se'de ngɔ kalanɔ i ni a ge nde?’ Wa sa li falanɔ ni fai na, ofala dɔnggɔ gale bɛlɛnɔ.

³⁰ “We duzu ki ni, mɔ tɔ̃ lɛnggɛnɔ mi NWA Gale, mi tɔ̃ gɛ hã obe Israɛlɛ na: Gulu kɛ nɛ nɛ 'do dɛa mɔ tɛ oyaa nɛ ni we ge nde? Nɛ dɔngga kpo kpikimanɔ wa dɔnggɔ zi wa ni, nɛ nɛ hɔa Owi ndi ɔ nɛ wa ni.

³¹ Yolo gbaa we hɔ sɔɛ gɛ, nɛ 'bana tɛ hã dɔnggamɛnɔ hã okpikimanɔ ni. Nɛ nɛ 'bana 'bɔ tɛ gbɛ benɔ 'da nɛ hã wa. Kɔ nɛ dɛ ni, nɛ nɛ lengge na, nɛ wia we tɛ dati mi, we aka mi do we nde? Nɛ nde nɛ zélé mi NWA Gale, mi kana tɛ mi na, mi kɔ̃̀ 'bɔ na, wa aka mi gɔ.

³² “Nɛ kɔ̃a we ɔ nɛ owinɔ ngɔ gele nùnɔ ni. Nɛ nɛ kɔ̃a we dɔnggɔ ote do otanɔ ɔ nɛ wa ni, nɛ nde ma dɛ́ sɛ tɛ̃ ɛ gɔ.

³³ Mi NWA Gale, mi kana tɛ mi na, mi dɛ sɛ mɔ ngawi. Mi sulu sɛ dã 'da mi dɛ ngɔ nɛ, nɛ mi dungu sɛ nwa ngɔ nɛ do kula li.

³⁴ Mi kala sɛ nɛ sanga owinɔ do ngɔ nùnɔ kɛ nɛ pɛsɛ dɛ ngɔ nɛ ni, nɛ mi ngɛmɛ sɛ li nɛ. Nɛ nɛ ĩ sɛ ti ngawi do nɔ̃lɔ̃ zã 'da mi.

³⁵ Mi la sɛ do nɛ dɛ li gba zɔ̃ i, nyɛlɛ do ogele winɔ. Nɛ nɛ yolo sɛ dɛ dati mi, takɔ mi gɔnɔ we 'da nɛ.

³⁶ Mi hã sɛ etumbu hã nɛ, ɔ nɛ kɛ mi hã zi hã oyaa nɛ tɛ li gba zɔ̃ Ezipeto i ni. Mi NWA Gale, mi tɔ̃a ni.

³⁷ Mi tɔlɔ sɛ nɛ, ɔ nɛ kɛ wi fɔmɔ bata tɔlɔ obatanɔ 'da a ni. Nɛ mi dɛ sɛ na, nɛ dɛ mbula gba tɔkɔ kɛ lɛ gba zi do nɛ ni.

³⁸ Nɛ owanɔ kɛ wa dɛa nga zu, nɛ wa bɛ̃a we nu mi ni, mi kala sɛ wa sanga nɛ do'do. Mi kala sɛ 'bɔ wa ngɔ nùnɔ kɛ wa pɛsɛ dɛ ngɔ nɛ ni. Nɛ nde wa kpóló sɛ 'bɔ tɛ wa dɛ ngɔ nù Israɛlɛ gɔ. Na mɛ ni, nɛ wa ĩ sɛ na, mi a NWA.”

³⁹ Nɛ NWA Gale tɔ̃ 'bɔ na: “Nɛ obe Israɛlɛ, nɛ nɛ́, kɔ nɛ dɛ ɔ nɛ kɛ zã nɛ kɔ̃a ni. Nɛ nɛ́, nɛ wele do wele dɔnggɔ kpikimanɔ 'da a. Nɛ nde mi mbese nɛ na, 'do nɛ, nɛ nɛ dɛ sɛ mbula 'da mi. Nɛ hã́ sɛ 'bɔ dɔnggamɔ hã okpikimanɔ gɔ, nɛ nɛ ha sɛ 'bɔ sape hã zu li mi kɛ ma santo ni gɔ.

⁴⁰ Mba gɔ, owinɔ vɛ̃ ngɔ nù Israɛlɛ gɛ, wa dɔnggɔ sɛ mi tɛ ngɔ kala kɛ wa ia ma hã mi ni. Mɛ a gã kala tɛ ngɔ nù Israɛlɛ. Mi kɔ̃ sɛ gɛnɛ nɛ dɛ di ni, nɛ mi 'bɔ sɛ 'da nɛ na, nɛ tɛ do dɔnggamɛnɔ 'da nɛ, do odia mɛnɔ kɛ nɛ kɔ̃a we hã ma hã mi ni dɛ di ni.

⁴¹ 'Do kɛ mi kala sɛ nɛ sanga owinɔ ngɔ nùnɔ kɛ nɛ pɛsɛ zi dɛ se'de ni, nɛ mi ngɛmɛ li nɛ ni, nɛ mi kɔ̃ sɛ gɛnɛ dɔnggamɛnɔ 'da nɛ, nɛ fala tɛ nɛ ma unu sɛ mi de wena. Nɛ ogele winɔ wa zɔ sɛ ní, nɛ wa ĩ na, mi a NWA Gale kɛ mi santo.

⁴² Nɛ 'da fala mi gese sɛ nɛ dɛ ngɔ nù kɛ mi kana zi tɛ mi we hã ma hã oyaa nɛ ni, nɛ nɛ tɛ mɛ 'bɔ, nɛ ĩ sɛ na, mi a NWA.

⁴³ Nɛ tɛ ngɔ nùi ni, nɛ lengge sɛ mɔ ngɔ ã dɛa to tɛ nɛ kɛ ma la zi ni, do tɛlɛ tɛ kɛ nɛ dɛa zi na, nɛ hɔ owi ndi li mi ni. Nɛ nɛ sɛnɛ sɛ kili tɛ nɛ wele nɛ, we duzu 'dã mɛnɔ vɛ̃ kɛ nɛ dɛa zi ni.

⁴⁴ Mi gésé sɛ olo 'dã mɛnɔ nɛ dɛa ni hã nɛ gɔ. Nɛ nde mi dɛ sɛ ɔ nɛ kɛ ma wia do li mi kɛ ma santo ni, sɛ nɛ nɛ ĩ sɛ na, mi a NWA de. Mi NWA Gale, mi tɔ̃a ni.”