EZEKIƐLƐ 2 - WE NU GALE 1995

¹ Nɛ a tɔ́a hã mi na: “Aa mɔ be 'da wele, mɔ kùlù ngɔ, we kɛ mi nɛ wele we hã mɔ.”

² A tɛ tɔ̃ ní, nɛ Hi Wi 'da a le kɔ mi, nɛ a zĩ mi do nyanga mi. Nɛ mi zele gɛlɛ NWA tɛ wele we hã mi na:

³ “Be 'da wele, mi kɔ̃a we tombo mɔ hã obe Israɛlɛ. Wa dɛa nga zu, nɛ wa bɛ̃a gɛnɛ mi gbaa tia do sɔɛ gɛ. Wa siki 'do wa lua do mi kpasaa ɔ nɛ kɛ oyaa wa wa dɛa zi ni.

⁴ Zu wa nganda wena, nɛ sila wa dè gɔ. Ma kɛ mi NWA Gale, mi tombo mɔ hã wa na, mɔ tɔ̃ sɛ we hã wa do zu li mi.

⁵ Tabi wa zele mɔ, tabi wa bɛ̃ gɛnɛ mɔ do nga zui 'da wa nde, nɛ wa ĩ sɛ na, wi gba olo nu mi Gale sanga lo boe.

⁶ “Nɛ nde mɔ be 'da wele, mɔ tɛ dɛ̃ kili wa, tabi kili lɛnggɛ nu wa gɔ. Wa 'danga sɛ we nu mɔ, nɛ ma ɔ sɛ nɛ mɔ dungu dɛ ngbala otɛ̃ tabi ngbala ogbatɔalanga ni. Gɛnɛ kɔ na mɛ ni, mɔ tɛ dɛ̃ kili dɛa mɔ tɛ wa, tabi 'dã kɔa nu 'da wa gɔ, we kɛ wa a Owele zu wa nganda wena.

⁷ Mɔ gbá olo nu mi hã wa, nɛ gɛnɛ kɔ wa zele nu mɔ, tabi wa zèlè nu mɔ gɔ nde, nɛ mɔ tɔ̃ tɛ mɛ hã wa tɔ̃a iko.

⁸ “Be 'da wele, mɔ zélé we mi tɔ̃ hã mɔ gɛ, nɛ mɔ tɛ dɛ̀ nga zu ɔ nɛ wa ni gɔ. Mɔ bá mɛ mi nɛ hã hã mɔ gɛ, nɛ mɔ fi nu mɔ, nɛ mɔ nyɔngɔ.”

⁹ Nɛ mi nɛ ka mɔ, nɛ mi zɔ kɔ̃ wele, nɛ nde ma bɔlɔ dɛ 'da mi nga, nɛ kasa 'buku dɛ kɔ̃ wi ni.

¹⁰ Nɛ kɔ̃ wi ni yala kasa 'buki dɛ li mi. Ĩ na, wa kɔma zi mɔ li nɛ do 'do nɛ vɛ̃. Mɛnɔ wa kɔma ni, mɛ a olɛnggɛ 'bako do zɛa nu.