EZEKIƐLƐ 19 - WE NU GALE 1995

¹ Ezekiɛlɛ ga zuma 'bako NWA tɔ̃a hã mi na, mi ga zuma 'bakoe gɛ hã onwa ngɔ nù Israɛlɛ. Zuma ni ma kɛ:

² “Naa mɔ ɔ zi nɛ naa gbɔgbɔ, mɔ zɔ́ a sanga ongba a, nɛ mɔ ɔngbɔ. A ɔa nù tɛ sanga ogbɔgbɔnɔ, nɛ a dala obenɔ 'da a.

³ Nɛ a saka be kpo kɔ obenɔ 'da a, nɛ a dala a do dia nɛ ngboo. A hɔa be wili gbɔgbɔ, nɛ a yambala ba sa'de wena, nɛ a gbɛ 'bɔ wele.

⁴ Ogele winɔ wa zele we nɛ, nɛ wa ndɔ bili hã a, nɛ ma ba a. Nɛ wa kɔ'bɔ mɔ nu zɔ̃ a, nɛ wa gbɔtɔ a si do a dɛ ngɔ nù Ezipeto.

⁵ Nɛ naa gbɔgbɛ ni 'bɔa gbaa, nɛ a zɔ na, mɔ dɛ dɛa bina. Nɛ a saka gele be gbɔgbɔ sanga benɔ 'da a, nɛ a dala a gbaa, nɛ a gã, nɛ a nganda.

⁶ A yɛnggɛ zi dɛ sanga gele gbɔgbɔnɔ, nɛ a gã do dia nɛ. Nɛ a yambala tɛ mɛ 'bɔ ba sa'de, nɛ a gbɛ 'bɔ wele.

⁷ A 'dɔlɔ nu gba ngbonɔ 'da wa, nɛ a 'danga lenɔ 'da wa. Owinɔ ngɔ nùi wa zele ua dã gɛlɛ a, nɛ wa tana kili.

⁸ Ogele winɔ wa ngɛmɛ ngba wa, nɛ wa nɛ we bi a. Wa zã kɔ̃ siɔ̃, nɛ a te kɔ nɛ, nɛ wa fi gbanda dɛ ngɔ a.

⁹ Wa kɔ'bɔ mɔ nu zɔ̃ a, nɛ wa fi a kɔ be tɔa, nɛ wa nɛ do a hã nwa ngɔ nù Babilonia. Nɛ wa fi a kɔ ta, nɛ wa kpe nu nɛ na, da dɛ kɔ wa zélé 'bɔ ua dã 'da a ngɔ nù Israɛlɛ gɔ.

¹⁰ Naa mɔ ɔ zi nɛ́ te vinɔ kɛ wa mi ma nu kolo lì, nɛ te nɛ gã, nɛ nwá nɛ 'bɔ wena, we kɛ lì di ni wena.

¹¹ Ogbakɔ̃ te ni ma nganda zi wena, nɛ ma wia mɔ dɛ do dɔndɔlɔ nwa. Te vinɔ ngala gbaa, nɛ ma to kuti tɛ li nza, nɛ winɔ wa zɔa ngala nɛ, nɛ wa ɔngbɔ do ma. Nɛ gba gili ogbakɔ̃ nɛ ma sanza.

¹² Nɛ nde mbe wele tɛa do dã, nɛ a zu'du ma, nɛ a fi nù. Bũ yula si 'biti gba wese, nɛ ma dɛa, nɛ owala vinɔɛ kula ngaɔɔ. Odia gbakɔ̃ nɛ ma gbini, nɛ ma kolo, nɛ we bɛlɛ ma.

¹³ Wa ba te vinɔɛ, nɛ wa mi ma li go, tɛ fala kɛ lì bina, nɛ nùi kolo wena ni.

¹⁴ Nɛ we yula kɔ te ni, nɛ ma te tɛ ogbakɔ̃ nɛ do owala nɛ, nɛ ma bɛlɛ vɛ̃. Ogbakɔ̃ nɛ ma ngándá sɛ 'bɔ gɔ, nɛ wa dɛ́ sɛ 'bɔ ma do dɔndɔlɔ nwa gɔ.” Zuma gɛ, mɛ a zuma 'bako, kɛ wa ga zi ma fai.