EZEKIƐLƐ 18 - WE NU GALE 1995

Gale hã etumbu do 'da dɛa to tɛ wele

^1-2 NWA tɔ̃a hã mi na: “Nɛ, obe Israɛlɛ, nɛ tɔ̃ gba we we ge nde? Nɛ tɔ̃ na: ‘Obaa benɔ wa nyɔngɔ tɔlɔ wala te, nɛ gogo obenɔ ma fe gbato.’ Gulu kɛ nɛ tɔ̃̀ ni we ge nde?

³ Nɛ nde mi NWA Gale, mi kana tɛ mi hã nɛ na, nɛ tɔ̃́ sɛ 'bɔ gba we ni ngɔ nù Israɛlɛ gɔ.

⁴ Mba gɔ, kpasi 'da wele do wele, be tabi baa be, ma dɛ kɔ̃ mi. Nɛ tati a wele kɛ a dɛa 'dã mɔ ni, nɛ a fe sɛ.

⁵ “Mɔ lénggé mbe wele kpo, a a dia wi, nɛ zu a bɔlɔ wena. Nɛ a dɛ mɛnɔ vɛ̃ do wala olo nɛ.

⁶ A sámbálá kpikima kɛ obe Israɛlɛ wa dɔnggɔ wa ni gɔ. Nɛ a nyɔ́ngɔ́ sa'denɔ kɛ wa gbɛ wa we dɔnggɔ do gale bɛlɛnɔ ni gɔ. A fá wuko mɔ́ wili, tabi wuko kɛ a zɔ zɛkɛ ni gɔ.

⁷ A ɔ́lɔ́ wele gɔ, nɛ a zṹ mɔ gɔ. Wele e mɔ 'da a do tikɔɛ, nɛ a gese do 'da fala ma wia ni. A hã nyɔngɔmɔ hã wele kɛ a do wɔ ni, nɛ a e tulu tɛ wele kɛ a zɔlɔ tulu ni.

⁸ A e ku'da mbili zu wele, nɛ nde a fá we kpa ngɔ nɛ gɔ. A yu 'dã mɔ, nɛ a 'bili we do bɔlɔ nɛ.

⁹ A dɛ olo nu mi Gale, nɛ a nɛ 'do mbulanɔ kɛ mi ia ni. Nɛ a dɛ mɔ do wala olo nɛ. Wele kɛ a ɔ na mɛ ni, a a wi bɔlɔ zu, nɛ a kpasa sɛ. Mi NWA Gale, mi tɔ́a ni.

¹⁰ “Tabi lɛ ba na, wi wili ni a kua be. Nɛ be ni a wi zũ do wi gbɛ wi, nɛ a dɛ mɛnɔ

¹¹ kɛ baa a dɛ̀ zi gɔ ni. A nyɔngɔ sa'denɔ wa gbɛ wa we dɔnggɔ do gale bɛlɛnɔ ni. Nɛ a fa wukonɔ 'da winɔ.

^12-13 A ɔlɔ wi sãnɔ do wi 'bakonɔ. A zũ owinɔ, nɛ a gésé mɛnɔ wa e 'da a do tikɔɛ ni gɔ. A ba tɛ̀ a we dɔnggɔ kpikimanɔ, nɛ a dɛ gã 'dã mɛnɔ. Ní a wele kɛ a ɔ na mɛ ni, a wia we 'bana do kpasi nde? Fala kpo gɔ! A dɛa gã 'dã mɛnɔ vɛ̃, nɛ ma wia na a fe. Nɛ we fie 'da a sɛ dɛ zu a wele nɛ.

¹⁴ “Lɛ ba 'bɔ na, wi ni a kua tɛ mɛ 'bɔ be. Nɛ be ni zɔ 'dã mɛnɔ vɛ̃ kɛ baa a dɛ ni. Nɛ nde a nɛ̀ 'do mɛnɔ baa a dɛ ni gɔ.

¹⁵ Nɛ a sámbálá kpikima obe Israɛlɛ wa sambala ni gɔ. Nɛ a nyɔ́ngɔ́ sa'denɔ kɛ wa gbɛ wa we dɔnggɔ do gale bɛlɛnɔ ni gɔ. A 'dángá zu li wuko mɔ wele gɔ.

¹⁶ A ɔ́lɔ́ wele gɔ, nɛ a zṹ mɔ gɔ. Wele e mɔ 'da a do tikɔɛ, nɛ a gese do 'da fala ma wia ni. A hã nyɔngɔmɔ hã wele kɛ a do wɔ ni, nɛ a e tulu tɛ wi kɛ a zɔlɔ tulu ni.

¹⁷ A yu 'dã mɔ, nɛ 'da fala a e ku'da mbili zu wele, nɛ nde a fá we kpa ngɔ nɛ gɔ. A dɛ olo nu mi Gale, nɛ a nɛ 'do mbulanɔ kɛ mi hã ma ni. Wele ɔ na mɛ ni, a wè tɛ fe we 'dã mɛ baa a dɛa ni gɔ, a 'bana sɛ do kpasi.

¹⁸ Wi a baa a hã a zɛlɛ tɛ winɔ, nɛ a zũ owinɔ kɛ zã a ni. Na mɛ ni, a do tɛ̃ a hã a nɛ fe we 'dã mɛnɔ a dɛa ni.

¹⁹ “Mbe gɔ, nɛ nɛ aka sɛ mi na, gulu kɛ be wè do kpa ngamɔ we duzu 'dã mɛnɔ baa a dɛa ni gɔ we ge nde? Nɛ mi gese sɛ hã nɛ na, ma we duzu kɛ be ni dɛa mɔ kɛ ma a dia, nɛ ma a bɔlɔ ni. A dɛa we nu mi, nɛ a nɛ 'do mbulanɔ 'da mi. Na mɛ ni, a kpasa sɛ.

²⁰ Nɛ wi kɛ a dɛa 'dã mɔ ni, a fe sɛ. Obenɔ wa sí sɛ olo 'dã mɛnɔ kɛ baa wa wa dɛa ni gɔ. Nɛ obaa wa, wa sí sɛ tɛ mɛ 'bɔ olo 'dã mɛnɔ kɛ obenɔ wa dɛa ni gɔ. Wi dɛ dia mɔ, a kpa sɛ si olo bɔlɔ zu dɛa mɛ 'da a. Nɛ 'dã wi, a kpa sɛ etumbu olo 'dã mɛnɔ a dɛa ni.

²¹ “Nɛ nde fala kɛ 'dã wi la fala 'dã mɔ tɛ̃ a, kɔ a ndo dɛ mbulanɔ 'da mi do dɛ mɛnɔ vɛ̃ do bɔlɔ nɛ ngboo, nɛ a fé sɛ gɔ, a kpasa sɛ do gbãlã we.

²² Nɛ mi ele sɛ 'dã mɛnɔ 'da a, nɛ a kpasa sɛ tua we dia mɛ a dɛ ni.

²³ Nɛ lengge na, mi dɛ yangga fio mɔ́ 'dã wi dɛa nde? Mi NWA Gale, mi kɔ̃a na, a kifi sila a, nɛ a kpasa iko.

²⁴ “Nɛ nde fala kɛ wi bɔlɔ zu la fala dɛ de mɔ, kɔ a ndo dɛ 'dã mɛnɔ ɔ nɛ kɛ 'dã winɔ wa dɛ ni, nɛ nɛ lengge na, a wia sɛ we kpasa nɛ nde? Fala kpo gɔ. Wa lénggé sɛ 'bɔ dia mɛnɔ a dɛa zi ni gɔ. Nɛ a fe sɛ we kɛ a bɛ̃a gɛnɛ mi, nɛ a dɛa 'dã mɔ ni.

²⁵ “Nɛ nɛ tɔ̃ sɛ na: ‘Mɛ kɛ NWA dɛ gɛ ma dè gɔ.’ Nɛ nde nɛ obe Israɛlɛ, nɛ zélé mi sɛ! Nɛ lengge na mɛ mi dɛa ni, ma dè gɔ nde? Ĩ na, mɛ a mɛnɔ kɛ nɛ dɛa ni hã ma dè gɔ.

²⁶ Fala kɛ wi bɔlɔ zu la fala dɛ de mɔ, kɔ a dɛ 'dã mɔ, nɛ nɛ ĩ́ na, a fe sɛ we duzu 'dã mɛnɔ 'da a.

²⁷ Nɛ fala kɛ 'dã wi la fala dɛ 'dã mɔ, kɔ a ndo dɛ dia mɔ do bɔlɔ zu dɛa mɔ, nɛ a kpasa sɛ.

²⁸ Mba gɔ, a zɔa na, mɛ kɛ ɛ dɛ zi ni ma dè gɔ, nɛ a la fala nɛ. Na mɛ ni, a kpasa sɛ, nɛ a fé sɛ gɔ.

²⁹ Nɛ nde nɛ, obe Israɛlɛ, nɛ tɔ̃ na, mɛ kɛ mi dɛa ni ma dè gɔ. Ĩ na, ma na mɛ ni gɔ. Nɛ a nɛ dɛ mɛnɔ kɛ ma a bɔlɔ gɔ ni.

³⁰ “Na mɛ ni, mi NWA Gale, mi tɔ̃ hã nɛ na, mi 'bili we 'da wele do 'da dɛa mɔ tɛ̃ a wele nɛ. Ma kɛ nɛ kpóló dungu 'da nɛ, nɛ nɛ lá fala 'dã mɛnɔ vɛ̃ nɛ dɛ ni. Nɛ nɛ tɛ bà wala hã 'dã mɔ na, ma 'danga nɛ gɔ.

³¹ Nɛ lá fala 'dã mɛnɔ kɛ nɛ dɛ ni, nɛ nɛ kífí sila nɛ, nɛ nɛ 'dáfá linggamɔ zu nɛ. Gulu kɛ nɛ, obe Israɛlɛ, nɛ fa fio we ge nde?

³² Do gbãlã we, mi NWA Gale, mi kɔ̃̀ na, wele fe gɔ. Kɔ nɛ kífí 'do nɛ hã 'dã mɔ, hã nɛ kpasa.”