EZEKIƐLƐ 17 - WE NU GALE 1995

Gba we ngɔ ziki do te vinɔ

¹ NWA tɔ́a hã mi na:

² “Be 'da wele, mɔ tɔ̃ gba we gɛ hã obe Israɛlɛ,

³ takɔ wa ĩ ti linggamɔ zã mi NWA Gale. Mɔ tɔ̃ gba toe gɛ hã wa na: “Mbe gã ziki zi kpo, 'baka a do wili sala 'baka a dulu wena. Nɛ sala tɛ̃ a dĩlĩ ngɔ ngbɛ ɛ wena, nɛ tɛ nɛ gɛza do langi kpi do kpi. A bũlũ, nɛ a hɔ ngɔ kala Libanɛ, nɛ a gbini sɔti zu mbe te sɛdrɛ,

⁴ nɛ a ba ma la do nɛ dɛ ngɔ nùi 'da owi be golenɔ, nɛ a e ma kɔ mbe le di ni.

⁵ Nɛ a la 'bɔ dɛ ngɔ nù Israɛlɛ, nɛ a ba be bɔlɔ te, nɛ a nɛ, nɛ a mi ma dɛ nu kolo lì, tɛ fala kɛ mɛ a dia nù mi do kpalɛ ni.

⁶ Nɛ te ni hɔa, nɛ ma ngala, nɛ ma hɔ gã te vinɔ, nɛ ogbakɔ̃ nɛ ma dulu, nɛ ma 'bɔ wena. Nɛ ogbakɔ̃ te ni dulu dɛ ngɔ, nɛ ma la si 'da ziki i, nɛ oliã nɛ lia nù nyɛlɛ wena. Nɛ mbé gbakɔ̃ te tɛ hɔ nɛ, nɛ ma gã dɛ dati fai.

⁷ “Nɛ mbé gele ziki hɔa 'bɔ, sala 'baka a dulu wena, nɛ sala tɛ̃ a dĩlĩ ngɔ ngbɛ ɛ wena. Nɛ te vinɔɛ ma siki tɛ̃ ɛ, do oliã nɛ do ogbakɔ̃ nɛ dɛ 'da mbé ziki ni, takɔ a hã lì hã ma. Te vinɔɛ lengge zi na, ɛ kpa sɛ lì kɔ̃ ziki ni nɛ ngɔ kɛ ɛ kpa tɛ fala ɛ do ma ni.

⁸ Ĩ na, wa mi zi ma tɛ nù kɛ ma de wena, nɛ lì te'de wena ni, nɛ ma wia sɔ we hɔ dia te vinɔ kɛ ogbakɔ̃ nɛ dulu, nɛ ma ko wala te dɔ wena ni.

⁹ “Nɛ nde mi NWA Gale, mi aka na, te vinɔɛ ni ma kpasa sɛ kpaa nde? Ziki wele kɛ dati ni, a ángá sɛ oliã nɛ do'do gɔ nde? Nɛ a 'bílí sɛ ogbakɔ̃ kɛnɔ ma wala ni, nɛ ma kolo gɔ nde? Do gbãlã we, ombé nzɔ'di kɛnɔ ma hɔ ni, ma kolo sɛ. Nɛ gɛnɛ kɔ osulu wi wa dɔ̃ gɔ, nɛ wa we sɛ tɛ zu'du ma iko.

¹⁰ Wa mi ma mi gbãlã we, nɛ nde ma kpasa sɛ kpaa nde? Bũ ma yolo sɛ si 'biti gba wese, nɛ ma fi, nɛ te vinɔɛ ma kolo vɛ̃. Ma kolo sɛ dɛ fala ma hɔa nɛ ni.”

NWA tɔ̃a gulu gba we

¹¹ Nɛ NWA tɔ̃ hã mi na:

¹² “Mɔ aka obe Israɛlɛ, Owi nga zunɔ ni na, wa ĩ ti gulu gba we ni nde? Mɔ gba ta zu wa ngɔ nwa ngɔ nù Babilonia kɛ a tɛa tɛ Yeruzalɛmɛ ni. A kala nwa kɔ le, do Owi ti nu a, nɛ a si do wa dɛ ngɔ nù Babilonia i.

¹³ Nɛ a saka mbe wele kpo kɔ nu fɛlɛ nwa, nɛ a gba tɔkɔ do a. Nɛ a ba nu a hã wi ni na, a kana tɛ̃ a na, a dɛ sɛ mbula 'dɛ ɛ fai. Ĩ na, a fua okumunɔ ngɔ nùi ni do'do na,

¹⁴ dɔ winɔ wa kpá ngawi, kɔ wa kulu ngɔ gɔ, sɛ a wa 'bana dɛ olo gba tɔkɛ ni fai de.

¹⁵ Nɛ nde wi kɛ wa ia a do nwa ngɔ nù Yuda ni dɛa nga zu, nɛ a tombo Owi to tɛ ngɔ nù Ezipeto, takɔ Oezipeto wa hã mbe ombalata do ogba dɔa soda hã a. Kɔ nɛ lengge na, mɛ a dɛa ni, ma Sɔkpɔ sɛ do dia nɛ, nɛ a kpasa nùi 'da a nde? Ɔ nɛ kɛ a yala gba tɔkɛ ni, a kpá sɛ etumbu gɔ nde?

¹⁶ “Mi NWA Gale, mi kana tɛ mi na, nwa ni a fe sɛ. Mba gɔ, a gba tɔkɔ do nwa ngɔ nù Babilonia, nɛ a kana tɛ̃ a ngɔ nɛ, nɛ a yala 'bɔ ma. Ma kɛ a fe sɛ tɛ ngɔ nùi 'da wele kɛ a ia zi a ngɔ kpongbo nwa ni.

¹⁷ Nɛ gɛnɛ kɔ onga sodanɔ 'da nwa ngɔ nù Ezipeto, nɛ nde wa wé sɛ we kpasa a li bole Obabilonia wa nɛ bi do a ni gɔ. We kɛ Obabilonia wa zã sɛ kɔ̃ zĩ do le, nɛ wa so sɛ nù gbaa, nɛ ma we kɔ̃ do zu ngboe 'da wa, takɔ wa ba le, nɛ wa gbɛ ogba gili wele.

¹⁸ Nwa ni gba zi tɔkɔ, nɛ a kana tɛ̃ a ngɔ nɛ. Nɛ nde a yala gba tɔkɛ ni do'do. Na mɛ ni, a zɔ́lɔ́ sɛ kpa etumbu gɔ.

¹⁹ “Mi NWA Gale, mi kana tɛ mi na, mi hã sɛ etumbu hã a. We kɛ a gba tɔkɔ, nɛ a kana tɛ̃ a do zu li mi, nɛ nde a yala gba tɔkɛ ni.

²⁰ Mi ndɔ sɛ bili, nɛ ma ba a. Nɛ mi dɛ sɛ na, wa ba a la do a dɛ ngɔ nù Babilonia. Nɛ wa 'bili sɛ ngbangga 'da a dɛ i mɔ, we kɛ a la fala dɛ olo nu mi ni.

²¹ Onga sodanɔ 'da a, wa fe sɛ li bolo, nɛ tala wa, wa pɛsɛ sɛ si falanɔ vɛ̃. Na mɛ ni, nɛ nɛ ĩ sɛ na, mi nwa, mi wila we hã nɛ.”

NWA kpua mbulu hã mbé kpasi hã obe Israɛlɛ

²² NWA Gale tɔ̃a na: “Mi do tɛ mi, mi kũ sɛ tɛ sɔti zu te sɛdrɛ, nɛ mi saka gbakɔ̃ kɛ ma kunu 'da kala gɔ ni, nɛ mi gbini. Nɛ mi nɛ sɛ, nɛ mi mi ma tɛ ngɔ ngala kala.

²³ Mi mi sɛ ma ngɔ kala kɛ ma ngala wena tɛ ngɔ nù Israɛlɛ ni. Nɛ te ni ma gã sɛ, nɛ ma wala. Nɛ ma hɔ sɛ dia te sɛdrɛ ngboo. Nɛ onɔɛ kpi do kpi wa dɛ sɛ tɔa tɛ kɔ gbakɔ̃ te ni. Nɛ wa kpa sɛ fala ɔmɔ tɛ wi ti gɔ̃lɔ̃ onwá te ni.

²⁴ Na mɛ ni, nɛ otenɔ zamɔ i wa ĩ sɛ na, mi a NWA. Mi a mi gɔmɔ tenɔ kɛ ma ngala wena ni dɛ nù, nɛ mi dɛ na, kɛnɔ be sĩ ni, ma gã. Mi dɛ na, tenɔ kɛ nwá nɛ 'bɔ wena ni ma kolo, nɛ kɛnɔ ma kolo ni, ma kunu. Mi NWA, mi tɔ̃a ni, nɛ mi dɛ sɛ kɛ mi tɔ̃a ni.”