EZEKIƐLƐ 16 - WE NU GALE 1995

Le Yeruzalɛmɛ ɔ nɛ nzɔ be kɛ wa bɛ̃a gɛnɛ a ni

¹ NWA tɔ́a hã mi na:

² “Aa mɔ be 'da wélé, mɔ wele we hã Owi Yeruzalɛmɛ, nɛ mɔ tɔlɔ 'dã mɛnɔ 'da wa, takɔ wa ĩ ti nɛ.

³ Mɔ gbá 'da nu wenɔ mi NWA Gale, mi wele gɛ hã wa na: Aa mɔ, le Yeruzalɛmɛ, wa kua zi mɔ ngɔ nù Kanana. Baa mɔ zi a be Amori, nɛ naa mɔ a boko Hiti.

⁴ Nɛ do 'da fala wa kua zi do mɔ ni, nɛ wele kpo 'bìlì kunu mɔ gɔ, nɛ wele kpo fɔ̃lɔ̃ 'bɔ tɛ mɔ gɔ. Wa fɛlɛ tɛ mɔ do tɔ̃ gɔ, nɛ wa fì mɔ kɔ tulu gɔ.

⁵ Fo zi wi lengge do mɔ bina, nɛ wele kpo ĩ̀ 'bako hã mɔ, we dala mɔ gɔ. Wa kua mɔ, nɛ nde wa kɔ̃̀ gɛnɛ mɔ gɔ, nɛ wa da mɔ zamɔ.

⁶ “Nɛ mi la do di ni, nɛ mi zɔa mɔ tɛ kindi tɛ mɔ do zã tɔkɛ, nɛ ma kpa do tɛ mɔ vɛ̃. Nɛ mi tɔ̃ hã mɔ na: ‘Mi kɔ̃a na, mɔ kpasa, mɔ tɛ fè gɔ.’

⁷ Nɛ mi dɛa na, mɔ kpasa, nɛ mɔ gã ɔ nɛ kpalɛ ni. Mɔ gã, nɛ mɔ nganda, nɛ mɔ hɔ dia be zɔnga. Bele mɔ kunu de wena, nɛ sala ti mɔ hɔa, nɛ nde mɔ zi do kũlĩ tɛ mɔ iko.

⁸ “Nɛ mi la 'bɔ do di ni, nɛ mi zɔ na, mɔ wia sabɛlɛ ba wili ia. Nɛ mi ba gã tulu ngɔ, nɛ mi kele do tɛ mɔ. Nɛ mi kpua mbulu ba ngba wi hã mɔ na, mi kɔ̃a gɛnɛ mɔ fai, nɛ mi ba mɔ do wuko. Mi nwa, mi tɔ̃a ni.

⁹ “Nɛ mi sua lì, nɛ mi fɔlɔ tɔkɛ tɛ mɔ. Nɛ mi fɛlɛ tɛ mɔ do nɔ yɔmbɔ.

¹⁰ Nɛ mi kala otulu kɛ wa gɛzɛ ma de wena ni, do dia mɔ nyanga wi, do 'dɛ̃ kɛ wa dɛa ma do linɛ, do gã tulu ngɔ kɛ wa ngbɔa ma dia nɛ ge nde ni hã mɔ na mɔ he'de.

¹¹ Nɛ mi fa omɔ 'dafa tɛ wi kpi do kpi hã mɔ. Nɛ mi hi'da mɔ nu kɔ̃ wi, do mɔ gɛlɛ wi hã mɔ.

¹² Nɛ mi a mɔ zala wi zala mɔ, nɛ mi kɔ'bɔ pɛtɛ nu zɔ̃ mɔ, nɛ mi gu dia ndasa zu mɔ.

¹³ Wa dɛa mɔ 'dafa tɛ winɔ ni zi vɛ̃ do fɛ̃a mɔ bolo, do mɔ mbali, nɛ tulu tɛ mɔ zi vɛ̃ a tulu olo gã gole, kɛ wa ngbɔa ma dia nɛ ge nde ni. Nyɔngɔmɔ nu mɔ zi a mapa kɛ wa dɛa do dia farini, do nɔ gɔlɔ, do nɔ olivɛ. Mɔ de zi zɔnga wena, nɛ wa saka mɔ do wuko nwa.

¹⁴ Nɛ dia zɔnga 'da mɔ dɛa na, sako li mɔ yɛ'bɛ ngɔ nù gɛ vɛ̃. We duzu kɛ mi 'dafa zi mɔ de wena. Mi NWA Gale, mi tɔ̃a ni.

¹⁵ “Nɛ nde mɔ ia dia zɔnga do dɔ̃lɔ̃ li 'da mɔ do li mɔ we dɛ ndumba. Nɛ mɔ ia tɛ mɔ we yɛnggɛ vĩ zu yɛli do Owi la walanɔ.

¹⁶ Mɔ saka mbe kɔ tulunɔ 'da mɔ, kɛ ma dia nɛ ge nde ni, nɛ mɔ 'dafa fala dɔnggɔ do kpikimanɔ 'da mɔ do ma, nɛ mɔ dɛ ndumba dɛ ngɔ nɛ. 'Dã mɛ mɔ dɛa ni, ma dɛ̀ zi mbe tɛ̀ ɛ dati gɔ, nɛ ma dɛ́ sɛ 'bɔ tɛ̃ ɛ do 'do gɔ.

¹⁷ Mɔ kala mɔ mbali do fɛ̃a mɔ bole kɛ mi hã zi hã mɔ ni, nɛ mɔ dolo do hi owi wili, nɛ mɔ dɛ ndumba do ma.

¹⁸ Nɛ mɔ kala odia tulunɔ 'da mɔ, nɛ mɔ he'de hã ohi mɛnɔ ni. Nɛ mɔ ba nɔ olivɛ do nɔ yɔmbɛ kɛ mi hã zi hã mɔ ni, nɛ mɔ dɔnggɔ do ohi mɛnɔ ni.

¹⁹ Mi hã zi dia farini, do nɔ olivɛ, do nɔ gɔlɔ hã mɔ na mɔ nyɔngɔ, nɛ mɔ hã nyɔngɔmɛnɔ ni do dɔnggamɔ hã kpikimanɔ ni, takɔ mɔ de li wa. Mi NWA Gale, mi tɔ̃a ni.

²⁰ “Mɔ kala 'bɔ obulu benɔ do oboko benɔ mɔ kua wa hã mi ni, nɛ mɔ gbɛ wa we dɔnggɔ do okpikimanɔ ni. Mɔ hã tɛ mɔ we dɛ ndumba, nɛ ma gɛ sila mɔ gɔ nde?

²¹ Ma wia 'bɔ na, mɔ 'bili gɛlɛ obenɔ 'da mɔ we dɔnggɔ do kpikimanɔ nde?

²² 'Da fala mɔ hã tɛ mɔ we dɛ ndumba ni, nɛ tɛ mɔ gbà ngɔ kɛ mɔ zi a be ni gɔ. Mɔ lènggè do 'da fala mɔ zi do wila tɛ mɔ, nɛ mɔ kindi zi tɛ mɔ zã tɔkɛ ni gɔ.

²³ “Aa mɔ Yeruzalɛmɛ, 'bako do mɔ! Mɔ kpa sɛ ngamɔ. Mi NWA Gale, mi tɔ̃a ni. Mɔ yɛngga zi vĩ zu yɛlinɔ ni vɛ̃,

²⁴ nɛ nde sila mɔ gɛ gɔ. Nɛ mɔ 'dafa fala do ngɔ tɛ li fandanɔ vɛ̃,

²⁵ do tɛ nu mba walanɔ vɛ̃, nɛ mɔ hã tɛ mɔ we dɛ ndumba do Owi la walanɔ. Nɛ mɔ 'danga dia zɔnga 'da mɔ. Nɛ tũ kpo kpo, mɔ tɛ 'danga dɛ dati 'danga fai.

²⁶ Mɔ dɛa ndumba do Oezipeto, kɛ wa dɛ wɔ tɛ mɔ wena ni. Nɛ ovĩ zu yɛlinɔ 'da mɔ ma nɔ̃lɔ̃ zã mi nganda wena.

²⁷ Mi zɔa na mɛ ni, nɛ mi siki li mi dɛ tɛ mɔ, nɛ mi fua mbe tɛ nùi 'da mɔ. Nɛ mi ia mɔ dɛ kɔ̃ Ofilisti, Owi sɛnɛ mɔ, kɛ wa zɔa vĩ zu yɛlinɔ 'da mɔ, nɛ ma 'danga sila wa ni.

²⁸ Nɛ nde sila mɔ gɛ̃̀ gɔ. Nɛ mɔ hã tɛ mɔ hã Oasiri, nɛ wa tɛ mɛ 'bɔ, wa gɛ sila mɔ gɔ.

²⁹ Nɛ mɔ yɛnggɛ do Obabilonia, kɛ wa a Owi be gole ni. Nɛ nde wa tɛ mɛ 'bɔ, wa gɛ sila mɔ gɔ.

³⁰ “Gbãlã we, sila mɔ ngàndà sĩ gɔ. Mi NWA Gale, mi tɔ̃a na, mɔ dɛa nulĩ nɛa ngɔ wuko ndumbanɔ vɛ̃.

³¹ Mɔ 'dafa fala do ngɔ tɛ nu mba walanɔ 'bɔ, do tɛ li fandanɔ vɛ̃ we dɛ ndumba do owinɔ dɛ di ni. Nɛ nde mɔ àkà we mbili, ɔ nɛ kɛ ogele ndumbanɔ wa dɛ ni gɔ.

³² Mɔ ɔ nɛ wuko mɔ wili, kɛ a la wili a, nɛ a nɛ we ɔ do gele wi wili ni.

³³ Wuko dɛ ndumba we fa do mbili, nɛ nde kɛ 'da mɔ, mɔ futa winɔ mɔ kɔ̃a gɛnɛ wa ni do tɛ mɔ. Mɔ hã dia mɔ hã wa na wa tɛ, kɔ wa ɔ do mɔ.

³⁴ Mɛ kɛ mɔ dɛ ni, ma si tɛ̃ ɛ do kɛ 'da ogele ndumbanɔ. Owi wilinɔ wa fá mɔ gɔ, nɛ wa fútá mɔ gɔ. Nɛ nde mɔ a mɔ futa wa. Do gbãlã we, mɔ kpula dɛa mɛnɔ do'do.”

Gale a hã sɛ etumbu hã le Yeruzalɛmɛ

³⁵ NWA Gale tɔ̃a na: “Aa mɔ Yeruzalɛmɛ, kɛ mɔ ɔ nɛ wuko ndumba gɛ, mɔ zélé mi sɛ!

³⁶ Mɔ zélé we mi kɔ̃a we tɔ̃ hã mɔ gɛ. Sape li mɔ bina. Mɔ hɔlɔ tulu tɛ mɔ dɛ li Owi wilinɔ, kɛ wa do wɔ tɛ mɔ ni. Nɛ mɔ dɛ ndumba do wa, nɛ mɔ dɔnggɔ kpikima. Nɛ dɛ ngɔ nɛ, mɔ gbɛ 'bɔ obenɔ 'da mɔ, takɔ mɔ hã wa do dɔnggamɔ hã okpikimanɔ.

³⁷ Ma kɛ mi ngɛmɛ sɛ li owinɔ kɛ mɔ dia tɛ wa ni vɛ̃. Mi ngɛmɛ sɛ li wanɔ kɛ mɔ kɔ̃a gɛnɛ wa, do wanɔ kɛ mɔ sɛnɛ wa ni. Nɛ wa tɛ sɛ, nɛ wa zĩ sɛ mɔ takpa. Nɛ mi hɔlɔ sɛ tulu tɛ mɔ vɛ̃ dɛ li wa.

³⁸ Mi gɔnɔ sɛ we 'da mɔ, ɔ nɛ kɛ wa gɔnɔ do we mɔ́ wuko kɛ a ɔa do gele wili, tabi wuko kɛ a a tɔkɔ tɛ wi nù ni. Nɛ do gã nɔ̃lɔ̃ zã 'da mi, mi 'bili sɛ na, wa gbɛ mɔ.

³⁹ Mi e sɛ mɔ dɛ kɔ owinɔ ni, nɛ wa 'danga sɛ falanɔ kɛ mɔ dɛ do ndumba, nɛ mɔ dɔnggɔ 'bɔ do okpikimanɔ ni. Wa hɔlɔ sɛ tulu tɛ mɔ, nɛ wa kala sɛ omɔ 'dafa tɛ winɔ 'da mɔ vɛ̃, nɛ wa la sɛ mɔ do kũlĩ tɛ mɔ ngboo.

⁴⁰ “'Do nɛ, nɛ wa mu sɛ owinɔ dɛ tɛ mɔ. Nɛ winɔ wa lo sɛ mɔ do ta, nɛ wa 'bili sɛ sanga mɔ do du kɔyanɔ 'da wa sikili sikili.

⁴¹ Wa dɔ sɛ tɔanɔ 'da mɔ, nɛ gba dɔa owuko wa zɔ sɛ etumbui mi hã ma hã mɔ ni. Mi, dɛ sɛ na, mɔ tɛ dɛ̃ 'bɔ ndumba gɔ, nɛ mɔ tɛ hã̀ 'bɔ dia mɔ hã owinɔ mɔ kɔ̃a wa ni gɔ.

⁴² Mi dɛ na mɛ ni, nɛ nɔ̃lɔ̃ zã 'da mi ma mbɔkɔ sɛ, nɛ sila mi ma gɛ̃ sɛ. Nɛ zã mi nɔ̃́lɔ̃́ sɛ 'bɔ gɔ, nɛ mi dɛ́ sɛ 'bɔ bɔnɛ 'do mɔ gɔ.

⁴³ Tɛ mɔ ila ngɔ dia dɛa mɛnɔ kɛ mi dɛa zi do mɔ kɔ be tɛ mɔ ni, nɛ 'dã dɛa to tɛ mɔ hã nɔ̃lɔ̃ zã hã mi wena. Ma kɛ mi nɛ gese nu 'dã mɛnɔ ni vɛ̃ hã mɔ. Mba gɔ, mɔ tɛ dɔnggɔ kpikimanɔ, nɛ mɔ dɛ 'bɔ ndumba dɛ ngɔ nɛ. Mi NWA Gale, mi tɔ̃a ni.”

Le Yeruzalɛmɛ dɛa nulĩ nɛa ngɔ tala gele lenɔ

⁴⁴ Nɛ NWA tɔ̃a 'bɔ na: “Aa mɔ Yeruzalɛmɛ, wa tɔ̃ sɛ gba we dɛ ngɔ mɔ na: ‘Naa ko mi hã mi hɔ naa.’

⁴⁵ Mba gɔ, mɔ ɔ ngboo nɛ naa mɔ ni. Naa mɔ bɛ̃a gɛnɛ wili a do obenɔ 'da a. Nɛ mɔ wia kɔ̃ do oboko nya mɔ. Wa tɛ mɛ 'bɔ wa bɛ̃a gɛnɛ owili wa do obenɔ 'da wa. Naa mɔ a boko Hiti, nɛ baa mɔ a be Amori.

⁴⁶ “Kpasa boko nya mɔ a le Samaria kɛ ma si gbãlã ngɔ. A i mɔ do oboko benɔ 'da a, kɛ mɛ a be lenɔ kɛ zã a ni. Nɛ wele kɛ hɔa dɛ 'do mɔ a le Sodɔmɛ kɛ ma si ba gɔtɔ. A i mɔ do oboko benɔ 'da a, kɛ mɛ a be lenɔ kɛ zã a ni.

⁴⁷ Mɔ ba 'dã wala olo wa ni, nɛ mɔ yambala gã 'dã mɛnɔ wa dɛ ni. Nɛ nde sila mɔ gɛ gɔ. Nɛ mɔ dɛa 'bɔ 'dã mɔ nɛa ngɔ kɛ 'da wa wena.

⁴⁸ “Mi NWA Gale, mi tɔ̃a na, 'dã mɛnɔ kɛ Sodɔmɛ do obe lenɔ kɛ zã nɛ ni wa dɛa ni, ma wè kɔ̃ do kɛ mɔ do obe lenɔ kɛ zã mɔ gɛ, nɛ dɛa ni gɔ. Nɛ 'danga nɛa ngɔ wa wena.

⁴⁹ Mɔ zɔ́ mɛnɔ kɛ wa dɛa gɛ: Wa zi do nyɔngɔmɔ wena, nɛ wa lénggé zi 'bɔ mɔ gɔ, nɛ wa dɛa wali. Nɛ wa kɔ̃̀ we gala wi sãnɔ do wi 'bakonɔ gɔ.

⁵⁰ Wa dɛa gã zu, nɛ wa dɛ 'dã mɔ kɛ mi wè tɛ kunu sila mi tɛ nɛ gɔ ni. Mi zɔa ní, nɛ mi kumu wa nɛ́ kɛ mɔ ĩ ni.

⁵¹ “Nɛ Samaria, do obe lenɔ kɛ zã nɛ ni, wa dɛa o'dã mɔ. Nɛ nde kɛnɔ 'da mɔ Yeruzalɛmɛ, ma nɛa ngɔ a fala bɔa. Mɔ dɛa ogã 'dã mɔ la kɛ 'da wa wena. Owele wa we 'dã mɛnɔ 'da mɔ do kɛnɔ 'da oboko nya mɔ Sodɔmɛ do Samaria, nɛ wa zɔ ɔ nɛ kɛ oboko nya mɔ wa dɛ̃ 'dã mɔ gɔ ni.

⁵² Kɔ ngangga ni, ma wia na mɔ kpa sape olo 'dã mɛnɔ 'da mɔ kɛ ma la li vɛ̃ gɛ. 'Dã mɛnɔ 'da mɔ dɛa na, wa zɔ oboko nya mɔ nɛ́ wa a Owi bɔlɔ zu ni.

⁵³ “Ma kɛ mi 'dafa sɛ Samaria do Sodɔmɛ do obe lenɔ kɛ zã nɛ ni dɛ olo nɛ. Nɛ 'do nɛ, nɛ mi 'dafa sɛ tɛ mɛ 'bɔ mɔ, Yeruzalɛmɛ dɛ olo mɔ.

⁵⁴ Mɔ zɔ sɛ ni, nɛ sape ba li mɔ we 'dã mɛnɔ 'da mɔ. Nɛ 'da fala oboko nya mɔ Samaria do Sodɔmɛ, wa zɔ sape 'da mɔ, nɛ sila wa ma mbɔkɔ sɛ.

⁵⁵ Wa kpa sɛ 'bɔ dia mɛnɔ kɛ wa zi do ma dati ni. Nɛ 'do nɛ, nɛ mi 'dafa sɛ tɛ mɛ 'bɔ mɔ.

^56-57 Zi dati kɛ na 'dã mɛnɔ 'da mɔ be tɛ̃ ɛ nza ni, mɔ zi do wali wena, nɛ mɔ zɔ zi Sodɔmɛ li mɔ yala iko. Nɛ nde da dɔ́ ni, mɔ hɔa mɔ gbɔlɔ mɔmu li lenɔ 'da Oedɔmɛ do Ofilisti, nɛ owinɔ kɔ ogele lenɔ kɛ zã wa ni, wa zɔ mɔ li wa yala iko.

⁵⁸ Tɛ mɔ ma zɛlɛ sɛ we 'dã mɛnɔ mɔ dɛa ni. Mi NWA Gale, mi tɔ́a ni.

⁵⁹ “Mi NWA Gale, mi tɔ́a na, mɔ 'danga gba tɔkɛ kɛ lɛ gba zi do mɔ ni, nɛ mɔ yala mbuli lɛ kpua zi ni. Ma kɛ mi dɛ sɛ do mɔ, ɔ nɛ kɛ ma wia do mɔ ni.

⁶⁰ Nɛ nde tɛ mi ma gba sɛ ngɔ gba tɔkɛ, kɛ lɛ gba zi do mɔ ngɔ be tɛ mɔ ni, nɛ mi kpolo sɛ ma do gba tɔkɔ kɛ ma ɔ fai.

⁶¹ Mi gese sɛ kpasa boko nya mɔ, do wele kɛ hɔa dɛ 'do mɔ ni hã mɔ, nɛ wa ɔ sɛ nɛ boko benɔ 'da mɔ ngboo ni. Gɛnɛ kɔ ki ni kɔ gba tɔkɛ 'da lɛ do mɔ bina, nɛ nde mi dɛ sɛ ma. Nɛ do 'da fala ni, nɛ tɛ mɔ gba sɛ ngɔ 'dã mɛnɔ mɔ dɛa zi ni, nɛ sape ma ba li mɔ.

⁶² Mi gbangba sɛ 'da gba tɔkɛ 'da mi do mɔ, nɛ mɔ ĩ sɛ ngboo na, mi a NWA.

⁶³ Tɛ zu mɔ ma gba sɛ ngɔ 'da fala kɛ ma la zi ni, nɛ zu mɔ ma dĩlĩ sɛ do sape, nɛ mɔ wé sɛ we 'bã nu mɔ ngɔ lɛnggɛ gɔ. Nɛ mi fo sɛ ku'da 'dã mɛnɔ mɔ dɛa zi ni vɛ̃ zu mɔ do'do. Mi NWA, mi tɔ́a ni.”