EZEKIƐLƐ 14 - WE NU GALE 1995

Gale bɛ̃a gɛnɛ Owi dɔnggɔ okpikimanɔ

¹ Mbe ngba soe kpo, nɛ okumu Israɛlɛ wa tɛa we aka mi, takɔ mi tɔ̃ linggamɛ 'da NWA hã wa.

² Nɛ NWA tɔ̃ hã mi na:

³ “Be 'da wele, owinɔ gɛ wa ba tɛ wa we dɔnggɔ okpikima, nɛ kpikimanɔ ni tombo wa li wala dɛ 'dã mɔ. Kɔ wa lengge na, mi gese sɛ nu aka wenɔ 'da wa nde?

⁴ Mɔ tɔ̃ we mi NWA Gale, mi wele gɛ hã wa. Fala kɛ be Israɛlɛ kpo ba tɛ̃ a we dɔnggɔ okpikima, kɔ kpikimanɔ ni tombo a li wala dɛ 'dã mɔ, kɔ a tɛ do 'do nɛ we aka wi gba olo nu mi Gale, nɛ mi do tɛ mi, mi gese sɛ nu nɛ hã a. Nɛ nu we mi gese sɛ ni, ma we sɛ do 'da gili okpikimanɔ a dɔnggɔ wa ni.

⁵ Nɛ obe Israɛlɛ kɛ wa la fala mi we dɔnggɔ okpikimanɔ ni, wa zele sɛ gisa nu we 'da mi. Nɛ mbe gɔ, nɛ wa kpolo sɛ tɛ wa dɛ 'da mi.

⁶ Ma kɛ mɔ tɔ̃ hã obe Israɛlɛ na, mi NWA Gale, mi kɔ̃a na, wa la fala dɔnggɔ okpikimanɔ. Wa kifi sila wa dɛ 'da mi, nɛ wa la fala dɛ 'dã mɛnɔ.

⁷ “Fala kɛ be Israɛlɛ, tabi mbe gɛnɛ kɛ a ɔ sanga obe Israɛlɛ ni, a ba tɛ̃ a we dɔnggɔ okpikima, kɔ kpikimanɔ ni tombo a li wala dɛ 'dã mɔ, kɔ a tɛ do 'do nɛ we aka wi gba olo nu mi Gale, nɛ mi do tɛ mi, mi gese sɛ nu nɛ hã a.

⁸ Mi siki sɛ li mi dɛ tɛ̃ a, nɛ mi fo a sanga owinɔ 'da mi do'do, nɛ a ɔ sɛ nɛ mbisa we ni we duzu ongba a. Na mɛ ni, nɛ nɛ ĩ sɛ na, mi a NWA.

⁹ “Fala kɛ wele ɔlɔ mbe wi gba olo nu mi Gale na, a gese nu we do bɛlɛ, nɛ nɛ ĩ́ na, mi NWA mi dɛa na, wi gba olo nu mi ni 'bili bɛlɛ. Nɛ mi siki sɛ li mi dɛ tɛ wi ni, nɛ mi fo a sanga owinɔ 'da mi do'do.

¹⁰ Nɛ wi gba olo nu mi, do wi kɛ a tɛa we aka a ni, wa kpa sɛ etumbu we kɔ̃. We duzu kɛ wa bɔa nɛ, wa dɛa 'dã mɔ.

¹¹ Mi dɛ sɛ na mɛ ni na, da dɛ kɔ obe Israɛlɛ wa nyɛ́lɛ́ do mi, kɔ wa dɛ 'dã mɔ, kɔ wa hɔ wi ndi li mi gɔ. Na mɛ ni, wa sɛ a owinɔ 'da mi, nɛ mi sɛ a Gale 'da wa. Mi NWA Gale, mi tɔ̃a ni.”

Etumbu 'da NWA ma zɔ́lɔ́ sɛ owi dɛ 'dã mɛnɔ gɔ

¹² NWA tɔ́a hã mi na:

¹³ “Be 'da wele, fala kɛ owinɔ ngɔ mbe nù kpo wa bɛ̃ gɛnɛ mi, kɔ wa le kɔ 'dã mɔ, nɛ mi siki sɛ li mi dɛ tɛ wa, nɛ mi 'danga sɛ nyɔngɔmɔ nu wa. Mi tombo sɛ gba wɔ, nɛ ma gbɛ wa, mba do osa'denɔ ngɔ nùi 'da wa ni vɛ̃.

¹⁴ Nɛ gɛnɛ kɔ Owi bɔlɔ zu talɛ ɔ nɛ Nowe, Daniɛlɛ do Yɔbɔ wa ɔ sɔ sanga wa boe, nɛ bɔlɔ zui 'da wa ma kpasa sɔ tati a wa wele nɛ iko. Mi NWA, mi tɔ̃a ni.

¹⁵ “Mbe gɔ, nɛ mi e sɛ o'dã sa'de na, wa gbɛ owinɔ, nɛ nùi ma kifi sɛ li go, we kɛ wele ɔ́ sɛ 'bɔ di ni gɔ. Nɛ wele kpo yámbá sɛ we la wala do di ni gɔ, we kɛ wa dɛ sɛ kili sa'denɔ ni.

¹⁶ Nɛ gɛnɛ kɔ owinɔ talɛ kɛ lɛ tɔlɔ sɔ li wa ni, wa ɔ sɔ boe, nɛ tati a wa, hã wa nɛ kpasa sɔ iko. Mi NWA Gale, mi kana tɛ mi na, wa wé sɔ 'bɔ we kpasa obe kala zã wa ngboo ni gɔ. Nɛ nùi ma kifi sɔ li go.

¹⁷ “Tabi mi dɛ sɛ na, bolo te ngɔ nùi. Nɛ tɔ́a nu kɔya ma gbɛ sɛ owinɔ, mba do osa'denɔ ngɔ nùi 'da wa vɛ̃.

¹⁸ Nɛ gɛnɛ kɔ owinɔ talɛ kɛ lɛ tɔlɔ sɔ li wa ni, wa ɔ sɔ ngɔ nùi ni, nɛ tati a wa hã wa nɛ kpasa sɔ iko. Mi NWA Gale, mi kana tɛ mi na, wa wé sɔ 'bɔ we kpasa obe kala zã wa ngboo ni gɔ.

¹⁹ “Tabi mi fi sɛ 'dã zɛlɛ tɛ owinɔ, nɛ mi be nɔ̃lɔ̃ zã 'da mi hã wa. Nɛ 'dã zɛlɛ ni, ma gbɛ sɛ owinɔ do osa'denɔ ngɔ nùi 'da wa vɛ̃.

²⁰ Nɛ gɛnɛ kɔ Nowe, Daniɛlɛ do Yɔbɔ wa ɔ sɔ sanga owinɔ ni boe, nɛ bɔlɔ zui 'da wa ma kpasa sɔ tati a wa wele nɛ iko. Mi NWA Gale, mi kana tɛ mi na, wa wé sɔ 'bɔ we kpasa obe kala zã wa ngboo ni gɔ.”

²¹ 'Do nɛ, nɛ NWA Gale tɔ̃ 'bɔ na: “Mi tumba omɛnɔ nalɛ gɛ: bolo, gba wɔ, o'dã sa'de, do 'dã zɛlɛ we hã do etumbu hã Owi Yeruzalɛmɛ na, ma gbɛ wa mba do osa'denɔ ngɔ nùi 'da wa vɛ̃.

²² Nɛ gɛnɛ kɔ na mɛ ni, nɛ nde mbe Owele, Owi wili do owuko wa 'bana sɛ. Wa fua wa kɔ le dɛ nza, nɛ wa kala wa do 'duli, nɛ wa hɔ sɛ 'da nɛ tɛ kɔlɔ 'duli gɛ. Nɛ 'da fala nɛ zɔ sɛ dɛa mɔ tɛ wa, do 'dã mɛnɔ wa dɛ ni, nɛ nɛ ĩ sɛ ti gulu kɛ mi tumba gã 'bakonɔ ni vɛ̃ dɛ ngɔ Yeruzalɛmɛ ni, nɛ nɛ kɔ sɛ gɛnɛ nɛ.

²³ Nɛ zã nɛ ma mbɔkɔ sɛ kɔ ngamɛnɔ nɛ zɔ gɛ. We kɛ nɛ ĩ sɛ na, mɛnɔ vɛ̃ kɛ mi dɛa do le ni, mi dɛ ma iko gɔ, gulu nɛ boe. Mi NWA Gale, mi tɔ́a ni.”