EZEKIƐLƐ 13 - WE NU GALE 1995

Ezekiɛlɛ dãlã dɛ tɛ owi gba olo nu Gale do bɛlɛ

¹ NWA tɔ̃a hã mi na:

² “Be 'da wele, mɔ nɛ́ 'da owinɔ kɛ wa tɔ̃ na, lo a Owi gba olo nu mi Gale tɛ ngɔ nù Israɛlɛ, nɛ nde wa tɔ̃ tati a linggamɔ zu wa iko ni, nɛ mɔ dã́lã́ dɛ tɛ wa do zu li mi na, wa zele wenɔ 'da mi.

³ We kɛ mi NWA Gale, mi tɔ̃ hã wa gɛ ma kɛ: Ngamɔ ma kpa sɛ owi gba olo nu mi Gale, kɛ wa do gbãlã zã wa bina ni. Wa dɛ tati a linggamɔ zu wa wele nɛ. Nɛ wa tɔ̃ na lo zɔa mɛnɔ li yalɛ, nɛ nde mɛ a bele iko.

⁴ Aa nɛ, obe Israɛlɛ, owinɔ 'da nɛ kɛ wa gba olo nu mi ni, wa ɔ nɛ osa'de zamɔ kɛ wa yɛnggɛ kɔ bili tɔa ni.

⁵ Wa dɛ́ mɔ kpo we 'dafa 'da le gɛ gɔ. Ngbo nu le 'danga, nɛ wa 'dàfà ma dɛ olo nɛ gɔ. Na mɛ ni, do kɔ̃ tũ kɛ mi NWA, mi hɔ sɛ do nɔ̃lɔ̃ zã 'da mi ni, nɛ bolo ma bi sɛ nɛ, nɛ nɛ kpásá sɛ gɔ.

⁶ Owinɔ ni wa tɔ̃ na, lo zɔa omɔ li yalɛ, nɛ nde wa zɔ̀ mɔ gɔ. Wa tɔ̃ we mɛnɔ kɛ ma hɔ sɛ ni, nɛ nde ĩ na, wa 'bili bɛlɛ iko. Wa tɔ̃ na, mi tumba lo do to, nɛ nde mi tòmbò wa gɔ. Nɛ wa gbini 'bɔ zã wa na, mi dɛ sɛ mɛnɔ kɛ lo tɔ̃ ni.

⁷ Nɛ nde mi tɔ̃ hã wa na: Wenɔ kɛ nɛ tɔ̃ gɛ, mɛ a bɛlɛ, nɛ mɛnɔ nɛ tɔ̃ na, lo zɔa li yalɛ ni, nɛ kũ ma do tɛ nɛ wele nɛ iko. Nɛ tɔ̃ na, mi tumba lo do to, nɛ nde ĩ na, mi wèlè mbamba we hã nɛ gɔ.

⁸ “Ma kɛ mi NWA Gale, mi tɔ̃ hã wa na, ɔ nɛ kɛ wa yɛ'bɛ lɛnggɛ bɛlɛ, nɛ wa ɔlɔ winɔ do wenɔ wa tɔ̃ na lo zɔa li yalɛ, nɛ nde mɛ a bɛlɛ iko ni, mi siki sɛ li mi dɛ tɛ wa.

⁹ Wa lé sɛ kɔ mba li ngba wi 'da obe Israɛlɛ gɔ. Nɛ wele kpá sɛ 'bɔ li wa kɔ 'buki kɛ wa kɔmɔ do li obe Israɛlɛ ni gɔ. Wa sí sɛ 'bɔ mbé nɛ dɛ ngɔ nùi 'da wa gɔ. Na mɛ ni, nɛ wa ĩ sɛ ngboo na, mi a NWA Gale.

¹⁰ “Owi gba olo nu mi Gale wa ɔlɔ owinɔ 'da mi na, dungu fio boe, nɛ nde fo dungu fio bina. Owinɔ 'da mi wa dɛa ngbo kɛ ma ngàndà gɔ ni, nɛ nde owi gba olo nu mi wa zɛa mbu te'de.

¹¹ Kɔ mɔ tɔ̃ hã wa na, ngboe ni ma gbini sɛ. Gba kolo gbãlã mũlũ ma tɛ sɛ, nɛ gba bũ kamba ma fi,

¹² nɛ ma gbini ngboe. Nɛ Owele wa aka sɛ wa na, gulu kɛ wa zɛa mbu te'de we ge nde?

¹³ “Ma kɛ mi NWA Gale, mi tɔ̃ na: Zã mi ma nɔ̃lɔ̃ sɛ, nɛ mi tombo sɛ gba bũ kamba do gba kolo gbãlã mũlũ.

¹⁴ Nɛ mi 'danga sɛ ngbo le kɛ nɛ zɛa mbui te'de ni. Mi gbini sɛ dɛlɛ ngboe ni, nɛ wa zɔ sɛ a 'dikita tanɔ kɛ wa dɛa ngboe dɛ ngɔ nɛ ni. Ngboe ma gbini sɛ, nɛ ma zɛ nɛ, nɛ nɛ ĩ sɛ ngboo na, mi a NWA.

¹⁵ Zã mi ma nɔ̃lɔ̃ sɛ nganda wena dɛ tɛ ngboe, do tɛ owinɔ wa zɛa mbui te'de ni. Nɛ mi tɔ̃ sɛ hã nɛ na, ngboe ma 'danga, nɛ Owi zɛ mbunɔ wa kumu.

¹⁶ Owi gba olo nu mi Gale tɛ ngɔ nù Israɛlɛ wa 'báná sɛ 'bɔ gɔ. Wa tɔ̃a we mɛnɔ kɛ ma hɔ sɛ kɔ le Yeruzalɛmɛ ni, nɛ wa na dungu fio boe, nɛ nde fo dungu fio bina. Mi NWA Gale, mi tɔ̃a ni.”

Ezekiɛlɛ dãlã dɛ tɛ owuko dɛ sɔ̃nɔ

¹⁷ Nɛ NWA tɔ̃ hã mi na: “Be 'da wele, mɔ zélé! Mɔ zɔ́ owuko Israɛlɛ kɛ wa tɔ̃ we mɛnɔ ma hɔ sɛ 'do nza, nɛ nde wa tɔ̃ tati a linggamɔ zu wa iko ni, nɛ mɔ dã́lã́ dɛ tɛ wa do zu li mi,

¹⁸ nɛ mɔ tɔ̃ we mi NWA Gale, mi wele hã wa gɛ na: Aa nɛ owukonɔ gɛ, 'bako do nɛ! Nɛ dɛ omɔ nu kɔ̃ wi, nɛ nɛ fulu okitambala ina we ogã winɔ do obe winɔ vɛ̃ na, wa he'de. Nɛ nɛ dɛ na mɛ ni, takɔ nu tɛ wa vɛ̃ ma ɔ dɛ kɔ̃ nɛ. Nɛ fa we 'danga kpasi 'da owinɔ 'da mi, nɛ nɛ fɔmɔ kɛnɔ 'da nɛ.

¹⁹ Nɛ hã sape hã mi li owinɔ 'da mi, takɔ nɛ kpa be gbãlã ɔrzɛ kɔ̃ wi kpo, tabi be 'bili mapa iko. Nɛ ɔlɔ owinɔ 'da mi kɛ wa kɔ̃ we dɔ̃ iko ni. Na mɛ ni, nɛ gbɛa owinɔ kɛ ma wè sɔ na wa fe gɔ, nɛ nɛ kpasa wanɔ kɛ ma wè sɔ na wa 'bana nza gɔ ni.

²⁰ “Ma kɛ mi NWA Gale, mi tɔ̃ hã nɛ na, mi sɛnɛ omɔ nu kɔ̃ winɔ kɛ nɛ dɛ hã owinɔ na wa he'de, takɔ nu tɛ wa vɛ̃ ɔ dɛ kɔ̃ nɛ ni. Mi fo sɛ ma nu kɔ̃ wa do'do, nɛ mi kpasa sɛ wanɔ kɛ nɛ kala wa ni.

²¹ Mi ɛ̃ sɛ kitambalanɔ 'da nɛ, nɛ mi kpasa sɛ owinɔ 'da mi ti kɔ̃ nɛ. Na mɛ ni, nɛ nɛ ĩ sɛ na, mi a NWA.

²² Bɛlɛnɔ nɛ 'bili ni, ma mbɔkɔ owi bɔlɔ zunɔ kɛ mi kɔ̃̀ na, wa kpa 'dã mɔ gɔ ni do'do. Nɛ nɛ nganda sila o'dã winɔ na, wa tɛ là 'dã wala 'da wa, kɔ wa kpasa gɔ.

²³ Nɛ nde nɛ ĩ́ na, ma Sɔkpɔ. Nɛ tɔ̃́ sɛ 'bɔ we mɛnɔ kɛ nɛ tɔ̃ na lo zɔa li yalɛ, nɛ nde mɛ a bɛlɛ iko ni gɔ. Nɛ nɛ tɔ̃́ sɛ 'bɔ we mɛnɔ kɛ ma nɛ hɔ do 'do nza ni gɔ. Mi kpasa sɛ owinɔ 'da mi ti kɔ̃ nɛ. Na mɛ ni, nɛ nɛ ĩ sɛ ngboo na, mi a NWA.”