EZEKIƐLƐ 12 - WE NU GALE 1995

Ezekiɛlɛ dɛa tɛ ɛ ɔ nɛ wi nɛ kɔlɔ 'duli ni

¹ NWA Gale wele we hã mi na:

² “Be 'da wele, mɔ ɔ sanga Owi nga zu. Wa do gbali wa boe, nɛ nde wa zɔ́ mɔ gɔ. Wa do zala wa boe, nɛ nde wa zélé we gɔ. We kɛ zu wa nganda wena.

³ Kɔ mɔ zélé! Mɔ 'dáfá tole 'da mɔ ɔ nɛ kɛ mɔ nɛ si kɔlɔ 'duli ni. Mɔ 'dafa ma do gbo gba wese dɛ gbali winɔ vɛ̃. Nɛ mɔ kulu ngɔ tɛ fala mɔ ɔ nɛ ni, nɛ mɔ la kɔlɔ 'duli. Kɔ wa zɔ ní, nɛ mbe gɔ, nɛ wa ĩ sɛ na, zu lo nganda wena.

⁴ Mɔ kala tolenɔ 'da mɔ dɛ nza do gbo gba wese, hã wa zɔ ma. Kɔ wese gɛ̃, nɛ mɔ la dɛ gbali wa ni vɛ̃, ɔ nɛ kɛ wi 'duli la do ma ni.

⁵ Nɛ mɔ 'dɔlɔ li holo tɛ ngbo le, nɛ mɔ ba tole 'da mɔ, nɛ mɔ hɔ do di ni dɛ gbali wa ni vɛ̃.

⁶ Nɛ do tũi, nɛ mɔ e tole 'da mɔ zu 'baka mɔ, nɛ mɔ la. Mɔ kele li mɔ na, da dɛ kɔ mɔ zɔ́ fala mɔ nɛ dɛ tɛ nɛ ni gɔ. Mi kɔ̃a na mɔ dɛ ni dɛ gbali obe Israɛlɛ, takɔ ma mbese wa.”

⁷ Nɛ mi dɛa ɔ nɛ kɛ NWA ba do nu a hã mi ni. Mi kala tolenɔ 'da mi dɛ nza do gbo gba wese, ɔ nɛ kɛ wi la kɔlɔ 'duli nɛ dɛ sɔ ni. Nɛ do gɛ̃a wese ni, nɛ mi 'dɔlɔ li holo tɛ ngbo le, nɛ mi hɔ nza. Nɛ owinɔ vɛ̃ wa zɔa mi tɛ ba tole 'da mi dɛ zu 'baka mi we la nɛ.

⁸ Nɛ fala sa do titole, nɛ NWA tɔ̃ hã mi na:

⁹ “Be 'da wele, Obe Israɛlɛ, wi nga zunɔ gɛ, wa àkà mɔ we mɛ mɔ dɛa ni gɔ nde?

¹⁰ Wa aka mɔ, nɛ mɔ gese hã wa na, mɛ a mbisa we, kɛ mi NWA Gale, mi tombo hã nwa kɔ le Yeruzalɛmɛ, do obe Israɛlɛ kɔ le ni vɛ̃.

¹¹ Mɔ tɔ̃ hã wa na, mɛ mɔ dɛa ni, ma be mɔ kɛ ma nɛ dɛ sɛ tɛ̃ ɛ hã wa ni. Owele wa kala sɛ wa, nɛ wa la do wa kɔlɔ 'duli, nɛ wa hɔ sɛ ongbá.

¹² Nɛ nwa ngɔ wa ni, a kala sɛ tolenɔ 'da a, nɛ a hɔ sɛ nza kɔ le do tũ. Nɛ wa 'dɔlɔ sɛ li holo tɛ ngbo le na, a hɔ do di ni. Nɛ a kele sɛ li a na, da dɛ kɔ a zɔ́ fala a nɛ dɛ tɛ nɛ ni gɔ.

¹³ Nɛ mi nwa, mi ndɔ sɛ bili na ma ba a, nɛ mi la sɛ do a dɛ ngɔ nù Babilonia. A fe sɛ dɛ i mɔ, nɛ nde a zɔ́ sɛ le ni do gbali a gɔ.

¹⁴ Nɛ mi kala sɛ owinɔ kɔ tɔa 'da a vɛ̃, do osoda zɔ mɔ tɛ̃ a, do osoda bolonɔ 'da a, nɛ mi pɛsɛ wa dɛ falanɔ vɛ̃. Nɛ mi ndaka sɛ 'do wa do du kɔya 'da mi.

¹⁵ Nɛ 'da fala mi pɛsɛ wa dɛ sanga ogele winɔ tɛ ngɔ gele nùnɔ ni, nɛ wa ĩ sɛ na, mi a NWA.

¹⁶ Nɛ nde mi dɛ sɛ na, ombe sanga wa wa kpasa li bolo, do li gba wɔ, do li 'dã zɛlɛ. Nɛ wa tɔ̃ sɛ sako gã 'dã mɛnɔ wa dɛa ni hã ogele winɔ wa ɔ sanga wa ni. Nɛ ogele winɔ ni, wa ĩ sɛ tɛ mɛ 'bɔ na, mi a NWA.”

¹⁷ Nɛ NWA tɔ̃ 'bɔ na:

¹⁸ “Be 'da wele, 'da fala mɔ ma ngɔ nyɔngɔ mɔ, nɛ sila mɔ ɔ ngɔ, mɔ ma ngɔ nɔ lì, nɛ mɔ tana kili.

¹⁹ Nɛ mɔ tɔ̃ toe gɛ hã owi Yeruzalɛmɛ, kɛ wa 'bana tɛ ngɔ nù Israɛlɛ i ni na, mi NWA, mi tɔ̃ hã wa na, wa nyɔngɔ sɛ mɔ, nɛ wa nɔ lì, nɛ wa tana sɛ kili, nɛ mili kɔ̃a ma ala sɛ li wa.

²⁰ Mba gɔ, lenɔ ma 'danga sɛ, nɛ nùi ma hɔ sɛ li go, we duzu 'dã mɛnɔ 'da owinɔ wa ɔ di ni ni.”

Olo nu NWA ma dɛ sɛ tɛ ɛ

²¹ Nɛ NWA tɔ̃ 'bɔ hã mi na:

²² “Be 'da wele, mi zila obe Israɛlɛ tɛ tɔ̃ gba we dɛ ngɔ nùi 'da wa na: ‘Sabɛlɛnɔ ma la la, nɛ nde wenɔ kɛ wi gba olo nu Gale tɔ̃a zi ni ma dɛ́ tɛ̃ ɛ gɔ.’ Kɔ gulu kɛ wa tɔ̃ na mɛ ni we ge nde?

²³ Mɔ tɔ̃ hã wa na, mi NWA Gale, mi dɛ sɛ na, wa tɛ tɔ̃̀ 'bɔ gba we ni gɔ. Mɔ tɔ̃̀ hã wa na, kɔ tũi ma wia ia, nɛ we mi tɔa ni, ma dɛ sɛ tɛ̃ ɛ.

²⁴ Na mɛ ni, owi zɔ gulu mɔ, tabi owi gba olo nu mi do bele, wa ɔ́kɔ́lɔ́ sɛ 'bɔ winɔ gɔ.

²⁵ Mba gɔ, mi NWA Gale, mi tɔ̃ sɛ we hã wa, nɛ we mi tɔ́a ni 'da nɛ kálá sɛ gɔ, nɛ ma dɛ sɛ tɛ̃ ɛ do ti. Mi dɛ sɛ na, onga mɛnɔ kɛ mi tɔ̃a zi we nɛ hã nɛ ni, ma kpa nɛ, Owi nga zunɔ gɛ. Nɛ ma kpa sɛ nɛ dati kɛ na nɛ fe ni. Mi NWA Gale, mi tɔ̃a ni.”

²⁶ Nɛ NWA tɔ̃ 'bɔ na:

²⁷ “Be 'da wele, obe Israɛlɛ wa lengge na, mɛ mi bia hã mɔ do li yalɛ ni, ma dɛ́ sɛ tɛ̃ ɛ dɔ̃ɔ gɛ gɔ. Nɛ wenɔ mɔ tɔ̃a do zu li mi ni, ma dɛ sɛ tɛ̃ ɛ do 'do nza.

²⁸ Nɛ nde mɔ tɔ̃́ hã wa na, mi NWA, mi 'bɔ́ sɛ 'bɔa gɔ, we mi tɔ̃a ni, ma dɛ sɛ tɛ̃ ɛ dɔ̃ɔ gɛ. Mi NWA, mi tɔ̃a ni.”