EZEKIƐLƐ 11 - WE NU GALE 1995

NWA gɔnɔ we 'da Owi Yeruzalɛmɛ

¹ Nɛ Hi Hi 'da Gale ba mi dɛ ngɔ, nɛ a e mi tɛ nu tɔa Tɛmpɛloe kɛ ma ka mɔ si 'biti gba wese ni. Kɔ mi nɛ ka mɔ, nɛ mi zɔ Owi wili 'bu wa bɔa ngɔ wa mɔlɔ, nɛ nde wa yula dɔ̃ɔ do nu tɔa ni. Nɛ dɛ sanga wa ni, mi zɔa Yazania, be 'da Azurɛ, do Pɛlatia, be 'da Bɛnaya, kɛ wa a ogã wi ngɔ le.

² Nɛ nwa tɔ̃ hã mi na: “Be 'da wele, owinɔ gɛ wa a wa 'danga sila owi Yeruzalɛmɛ do 'dã bia wenɔ 'da wa, nɛ mɛnɔ wa 'dafa we dɛ ma ni, mɛ a 'dã mɔ.

³ Wa na, ma wia ia, lo dɛ́ sɛ 'bɔ mbé tɔa kɔ le Yeruzalɛmɛ dɔ̃ gɛ gɔ. Le gɛ ma ɔ nɛ kpana, nɛ lo ɔ nɛ mulu sa'de kɛ wa usu ma kɔ nɛ ni, mɔ dɛ́ sɛ lo gɔ.

⁴ Nɛ nde mɔ, be 'da wele, mɔ dálá dɛ tɛ wa do zu li mi.”

⁵ Nɛ Hi Wi 'da NWA ba mi, nɛ a tombo mi we tɔ̃ we gɛ hã obe Israɛlɛ na: “Aa nɛ, obe Israɛlɛ, mi ĩ ti wenɔ nɛ tɔ̃ ni, nɛ mi ĩ 'bɔ ti linggamɛnɔ 'da nɛ.

⁶ Nɛ gbɛa owinɔ gbaa, nɛ 'da le ma dunu do wɔlɔ wa.

⁷ Ma kɛ mi NWA Gale, mi tɔ̃ hã nɛ na: Mɛ a gbãlã we na, le gɛ mɛ a kpana. Nɛ nde mulu sa'de kɔ nɛ wi a wio nde? Mɛ a owɔlɔ winɔ kɛ nɛ gbɛa wa ni. Nɛ nde nɛ, mi ndaka sɛ nɛ kɔ le gɛ do'do.

⁸ Nɛ dɛ kili bolo wena, nɛ nde mi tombo sɛ bolo na, ma bi nɛ. Mi NWA Gale, mi tɔ̃a ní.

⁹ Mi ndaka sɛ nɛ kɔ le gɛ, nɛ mi e nɛ dɛ kɔ̃ ogele wele. Mi 'bili sɛ we 'da nɛ, nɛ mi dɛ sɛ olo nu mi kɛ mi tɔ̃a zi hã nɛ ni.

¹⁰ Bolo ma te sɛ dɛ ngɔ nùi 'da nɛ ngboo, nɛ ma gbɛ sɛ nɛ. Na mɛ ni, nɛ nɛ ĩ sɛ na, mi a NWA.

¹¹ Le gɛ sɛ 'bɔ a kpana gɔ, nɛ nɛ sɛ 'bɔ a mulu sa'de kɛ wa usu kɔ nɛ ni gɔ. Mi hã sɛ etumbu hã nɛ dɛ ngɔ nùi 'da nɛ ngboo.

¹² Na mɛ ni, nɛ nɛ ĩ sɛ na, mi a NWA kɛ nɛ 'danga mbula 'da a, nɛ nɛ bɛ̃a we nu a ni. Mba gɔ, nɛ nɛa 'do 'dã dɛa to tɛ ogele winɔ kɛ zã nɛ ni.”

¹³ Mi tɛ gba nu we ni hã wa, nɛ Pɛlatia, be 'da Bɛnaya fe. Mi nɛa we zɔ ni, nɛ mi te, nɛ mi gu li mi nù, nɛ mi he mɔ na: “Ee NWA Gale, mɔ nɛ gbɛ tala obe Israɛlɛ kɛ wa 'bana gɛ vɛ̃ nde?”

Gale a ngɛmɛ sɛ li owinɔ 'da a kɛ wa pɛsɛ ni

¹⁴ Nɛ NWA Gale tɔ̃ hã mi na:

¹⁵ “Be 'da wele, Owi Yeruzalɛmɛ wa tɛ tɔ̃ we dɛ ngɔ mɔ, do ngɔ onya mɔ obe Israɛlɛ kɛ nɛ a tɛ kɔlɔ 'duli gɛ ni. Wa na, nɛ 'báná dɛ i mɔ nyɛlɛ do nwa! Winɔ nwa hã nùi gɛ hã wa wi a lo.

¹⁶ Na mɛ ni, mɔ nɛ́ hã mɔ tɔ̃ hã onya mɔ wi 'dulinɔ na, mi pɛsɛ zi wa dɛ sanga ogele winɔ tɛ ngɔ nùnɔ kɛ ma nyɛlɛ wena ni. Gɛnɛ kɔ na mɛ ni, mi 'bana tɛ zɔ mɔ tɛ wa 'do be 'da fala sĩ tɛ ngɔ nùi wa tɛ nɛ ni.

¹⁷ Kɔ mɔ kpó mbuli gɛ hã wa do zu li mi na, mi NWA Gale, mi nɛ ngɛmɛ li wa sanga owinɔ ngɔ nùnɔ, kɛ mi pɛsɛ zi wa dɛ te'de ni, nɛ mi gese sɛ nù Israɛlɛ hã wa.

¹⁸ Kɔ wa hɔ i mɔ, nɛ wa 'danga sɛ o'dã kpikimanɔ kɛ wa kpa sɛ ma di ni ni, nɛ wa fo sɛ ma do'do.

¹⁹ “Mi hã sɛ mbé sila wi do mbé linggamɔ hã wa. Mi fo sɛ sila wa kɛ ma nganda ɔ nɛ ta ni, nɛ mi kpolo sɛ ma do mbɔkɔ sila kɛ ma kɔ̃ sɛ we dɔnggɔ mi ni.

²⁰ Na mɛ ni, nɛ wa dɛ sɛ mbulanɔ kɛ mi hã ma hã wa ni. Wa zele sɛ nu mi. Nɛ wa sɛ a winɔ 'da mi, nɛ mi sɛ a Gale 'da wa.

²¹ Nɛ nde wanɔ kɛ wa dɛ linggamɔ kɔ sila wa wele nɛ, nɛ wa dɔnggɔ sɛa tenɔ, do 'dã kpikimanɔ ni, wa kpa sɛ si olo mɛnɔ wa dɛ ni.” Mi NWA Gale, mi tɔ̃a ni.

Dɔ̃lɔ̃ li 'da NWA fua tɛ ɛ Yeruzalɛmɛ do'do

^22-23 'Do nɛ, nɛ Otunu li mɛnɔ ni, wa tata sala 'baka wa, nɛ kolonɔ ndo siki do ti. Nɛ mi zɔ na, dɔ̃lɔ̃ li 'da NWA Gale 'da obe Israɛlɛ tɛ to dɛ ngɔ wa. Nɛ nwa kulu ngɔ gbogbo le do dɔ̃lɔ̃ li 'da a vɛ̃, nɛ a la, nɛ a yolo nù tɛ ngɔ kala kɛ ma dɔ̃ɔ do Yeruzalɛmɛ, si 'biti gba wese ni.

²⁴ Nɛ Hi Wi 'da Gale ba mi dɛ ngɔ do kɔ yalɛ mi zɔ ni, nɛ a gese mi dɛ 'da owi 'dulinɔ tɛ ngɔ nù Babilonia i. Nɛ mɛnɔ mi zɔa kɔ yalɛ ni, ma bi tũ do'do.

²⁵ Nɛ mi ma ngɔ wele we do Owi 'dulinɔ, nɛ mi tɔ̃ we mɛnɔ kɛ nwa bia hã mi ni vɛ̃ hã wa.