EZEKIƐLƐ 10 - WE NU GALE 1995

NWA bia tɛ a 'bɔ mbé nɛ hã Ezekiɛlɛ

¹ 'Do nɛ, nɛ mi ka mɔ tɛ mɛ bili nɛ́ ndumbe dɛ zu Otunu li mɛnɔ nalɛ kɛ wa ɔ nɛ Owele ni, nɛ mi zɔ mɔ ɔ nɛ kpongbo nwa, kɛ wa sɛa ma do gã ta safirɛ ni.

² Nɛ Gale tɔ̃ hã wi wili kɛ a hi'da tulu linɛ ni na: “Mɔ lá do sanga okolonɔ kɛ ma dɛ ti Otunu li mɛnɔ ni, nɛ mɔ kpa sɛ okãlĩ we di ni, nɛ mɔ kala ma, nɛ mɔ nɛ hã mɔ kpã ma dɛ ngɔ le vɛ̃.” Nɛ mi zɔ wi wili ni tɛ nɛ we kala kalĩ wenɔ ni.

³ Do 'da fala ni, nɛ nde Otunu li mɛnɔ ni, wa yolo do kɛ zã Tɛmpɛloe do si ngɔ ngawili kɔ. Nɛ zɛ̃ we kpia kɔ ngbo Tɛmpɛloe kɛ ma do kɔ nɛ i ni.

⁴ Nɛ NWA kulu ngɔ ngɔ kpongbo nwa 'da a do dɔ̃lɔ̃ li 'da a vɛ̃, nɛ a la dɛ nu tɔa Tɛmpɛlo i. Nɛ zɛ̃ we kpe Tɛmpɛloe vɛ̃. Nɛ yele ngbala dɔ́lɔ́ li 'da NWA yele kɔ ngboe vɛ̃.

⁵ Nɛ giti sala 'baka Otunu li mɛnɔ ni wele tɛ kɔ ngbo Tɛmpɛloe kɛ kɔ nɛ i, nɛ wa zele gbaa kɔ ngbo Tɛmpɛloe kɛ nza nga ni. Ma wele ɔ nɛ gɛlɛ Gale kɛ a do nganda vɛ̃ ni.

⁶ Nɛ wi wili kɛ a hi'da tulu linɛ ni nɛa, nɛ a yolo dɛ kɛ zã mbe kolo kpo, takɔ a kala kalĩ we ngbala kolonɔ, ɔ nɛ kɛ Gale tumba do a ni.

⁷ Nɛ mbe kpo sanga Otunu li mɛnɔ nalɛ ni, ɛfɛ kɔ ɛ dɛ tɛ nyɛa we kɛ ma kɔlɔ do wi ni, nɛ a kala mbe kalĩ wenɔ, nɛ a a ma dɛ kɔ wi wili ni. Nɛ wi wili ni kala ma, nɛ a la.

⁸ Nɛ mi zɔa na, ti sala 'baka Otunu li mɛnɔ ni, kɔ wele zi kpo kpo boe.

^9-10 Mi nɛa we ka mɔ, nɛ mi zɔ kolo kpo kpo dɛ kɛ zã bula li wa nalɛ ni. Nɛ kolonɔ ni to ɔ nɛ dia ta olo gã gole ni, nɛ ma wia kɔ vɛ̃. Wa dɛa ma do tɛlɛ tɛ kɛ na, mɔ zɔ, nɛ nde ma lia dɛ kɔ ngbɛ ɛ.

¹¹ Nɛ ma tɛ la si 'biti falanɔ nalɛ, nɛ nde ma síkí gɔ. Ma la si fala kɛ Otunu li mɛnɔ wa siki zu wa si tɛ nɛ ni. Nɛ ma tɛ la do si 'biti falanɔ vɛ̃, nɛ nde ma síkí gɔ.

¹² Nɛ tɛ Otunu li mɛnɔ ni, do li 'do wa, do kɔ̃ wa, do osala 'baka wa, mba do okolonɔ vɛ̃, ma dunu do obe tolo we.

¹³ Nɛ mi zele gɛlɛ wele tɛ sa li okolonɔ ni na: “Kolo zikili.”

¹⁴ Nɛ Otunu li mɛnɔ ni kpo kpo do bula li wa nalɛ. Bula li kɛ dati mɛ a bula li ngɔmbɔ, nɛ kɛ bɔa, mɛ a bula li wele, nɛ kɛ talɛ, mɛ a bula li gbɔgbɔ, nɛ kɛ nalɛ, mɛ a bula li ziki.

¹⁵ Nɛ Otunu li mɛnɔ ni wa bũlũ dɛ Gbãlã ngɔ i. Ĩ na, mɛ a kpo tunu li mɛnɔ mi zɔa zi tɛ nu kolo lì Kebarɛ ĩ̀ ni.

¹⁶ 'Da fala tunu li mɛnɔ ni wa tili dɛ dati, nɛ kolonɔ ni tili do wa. Fala kɛ wa kũ dɛ ngɔ, nɛ kolonɔ kũ do wa. Kolonɔ 'báná 'do gɔ, ma la do wa fala nɛ kpo.

¹⁷ Fala kɛ Otunu li mɛnɔ ni wa yolo nù, nɛ kolonɔ yolo nu. Fala kɛ wa kũ dɛ ngɔ, nɛ kolonɔ kũ tɛ mɛ 'bɔ do wa. We kɛ ngawi 'da Otunu li mɛnɔ ni ma lia kɔ kolonɔ.

Dɔ̃lɔ̃ li 'da NWA fua tɛ ɛ kɔ Tɛmpɛloe do'do

¹⁸ Nɛ NWA kulu ngɔ nu tɔa Tɛmpɛloe ni do dɔ̃lɔ̃ li 'da a vɛ̃, nɛ a la, nɛ a dungu ngɔ Otunu li mɛnɔ ni.

¹⁹ Nɛ mi zɔ Otunu li mɛnɔ ni tɛ tata sala 'baka wa, nɛ wa bũlũ dɛ ngɔ i fala nɛ kpo do kolonɔ ni gbaa, nɛ wa yolo nù bi sĩ do gbãlã ngɔ dɔ̃ɔ do nu tɔa Tɛmpɛloe, kɛ ma ka mɔ si 'biti gba wese ni. Nɛ yele ngbala 'da Gale 'da obe Israɛlɛ tɛ to dɛ ngɔ Otunu li mɛnɔ ni.

²⁰ Mi ka mɔ, nɛ mi ĩ na, mɛ a kpo tunu li mɛnɔ kɛ mi zɔa zi wa tɛ ti kpongbo nwa 'da Gale 'da obe Israɛlɛ, tɛ nu kolo lì Kebarɛ i ni.

²¹ Nɛ tunu li mɔ kpo kpo do bula li ɛ nalɛ, do sala 'baka ɛ nalɛ. Nɛ ti sala 'bakanɔ nalɛ ni, kɔ̃ wele zi kpo kpo boe.

²² Nɛ bula li wa wia kɔ̃ do bula li Otunu li mɛnɔ, kɛ mi zɔa zi wa tɛ nu kolo lì Kebarɛ i ni. Nɛ Otunu li mɛnɔ ni kpo kpo wa la yɔrr dɛ dati.