EZEKIƐLƐ 1 - WE NU GALE 1995

NWA bia tɛ a hã Ezekiɛlɛ

^1-3 Mi, Ezekiɛlɛ, be 'da nganga Buzi, mi zi kɔ Oyudanɔ kɛ wa la zi kɔlɔ 'duli, nɛ wa a wa tɛ nu kolo lì Kebarɛ ni. Zi do kɔ sabɛlɛ kɛ 'bu nɛ talɛ, do zɛkɛ 'da nalɛ, kɔ̃ nɛ mɔlɔ, nɛ mi nɛ ka mɔ, nɛ mi zɔ li nza ma hũi, nɛ NWA Gale bia mɔ li mi kɔ yalɛ. 'Da fala ni, ma la zi sabɛlɛ mɔlɔ 'do kɛ wa 'dɔlɔ nwa Yoakinɛ ni. Nɛ nwa wila we hã mi ngɔ nu Babilonia i, dɛ nu kolo lì Kebarɛ ni. Nɛ ngawi 'da a lia mi.

⁴ Mi nɛ ka mɔ, nɛ mi zɔ gba bũ kamba, ma yula si gbãlã ngɔ, nɛ ma tɛa do gã tũ kolo. Nɛ kolo nyɛa li ɛ kɔ tũ kole ni. Nɛ yele ngbala zĩ do tũ kole ni takpa. Nɛ kɔ nɛ ni, mi zɔa we tɛ nyɛ ɔ nɛ talatala ni.

⁵ Nɛ mi nɛ ka mɔ, nɛ mi zɔ Otunu li mɔ nalɛ, kɛ wa ɔ nɛ Owele ni.

⁶ Nɛ tunu li mɔ kpo kpo do bula li ɛ nalɛ, do sala 'baka ɛ nalɛ.

⁷ Nyanga wa bɔlɔ yɔrr, nɛ zu nɛ wia kɔ̃ do zu nyanga be ngɔmbɔ. Nɛ ma to ɔ nɛ tũ mɔ bolo kɛ wa lɔa tɛ nɛ lɔa ni.

⁸ Obula li wa do osala 'baka wa, ma siki li ɛ tɛ̃ ɛ do tɛ̃ ɛ si 'biti falanɔ nalɛ tɛ nyanga nza gɛ. Nɛ ti sala 'bakanɔ nalɛ ni, kɔ̃ wele zi kpo kpo boe, nɛ ma siki 'bɔ li ɛ tɛ̃ ɛ do tɛ̃ ɛ si 'biti falanɔ nalɛ ni.

⁹ Nɛ nu osala 'baka wa dĩ ngbɛ ɛ. Wa la yɔrr dɛ dati, nɛ nde wa síkí tɛ wa gɔ.

¹⁰ Bula linɔ nalɛ ni ma wè kɔ̃ gɔ. Bula li kɛ dati nga, mɛ a bula li wele, nɛ kɛ si ngawili kɔ̃, mɛ a bula li gbɔgbɔ. Nɛ kɛ si ngɔ gale, mɛ a bula li wili ngɔmbɔ, nɛ kɛ 'do nga, mɛ a bula li ziki.

¹¹ Nɛ tunu li mɛnɔ ni vɛ̃, sala 'baka wa kala dɛ ngɔ bɔa bɔa, nɛ nu nɛ dĩ ngbɛ ɛ. Nɛ tala nɛ bɔa bɔa lɔmbɔ dɛ tɛ kili tɛ wa.

¹² Tunu li mɔ kpo kpo la zi dɛ fala zã a kɔ̃a ni. A la yɔrr dɛ dati, nɛ nde a síkí tɛ̃ a gɔ.

¹³ Mi ka mɔ, nɛ mi zɔ kalĩ we dɛ sanga wa, ma nyɛ ɔ nɛ tanda ni, nɛ ma tɛ yɛkɛ tɛ̃ ɛ. Mɛ zi a gba nyɛa we, nɛ mɔ nyɛ kɔ nɛ ngbangge ngbangge.

¹⁴ Nɛ tunu li mɛnɔ ni zi tɛ la dɛ dati, nɛ wa si 'do dɔ̃ dɔ̃, ɔ nɛ nyɛa lì kolo ni.

¹⁵ Mi tɛ ka mɔ tɛ wa, nɛ mi zɔ kolo nyanga mɔ kpo kpo dɛ kɛ zã bula li wa nalɛ ni, nɛ kolonɔ ni la do ngɔ nùi.

¹⁶ Kolonɔ nalɛ ni to ɔ nɛ dia ta olo gã gole ni, nɛ ma vɛ̃ ma wia kɔ̃. Wa dɛa ma do tɛlɛ tɛ kɛ na, mɔ zɔ, nɛ nde ma lia dɛ kɔ ngbɛ ɛ.

¹⁷ Nɛ ma tɛ la si 'biti falanɔ nalɛ, nɛ nde ma síkí gɔ.

¹⁸ Kolonɔ nalɛ ni ngala wena, nɛ li 'do nɛ ma dunu do obe tolo we.

¹⁹ Nɛ 'da fala Otunu li mɛnɔ ni wa tili dɛ dati, nɛ kolonɔ ni tili do wa. Fala kɛ wa kũ dɛ ngɔ, nɛ kolonɔ kũ do wa.

²⁰ Wa la dɛ fala kɛ zã wa kɔ̃a ni, nɛ kolonɔ la do wa, we kɛ ngawi 'da Otunu li mɛnɔ ni lia kɔ kolonɔ.

²¹ Na mɛ ni, 'da falanɔ vɛ̃ kɛ tunu li mɛnɔ ni wa la dɛ dati, tabi wa yolo nù, tabi wa kũ dɛ ngɔ, nɛ kolonɔ dɛ kpasaa ɔ nɛ kɛ wa dɛ ni, we kɛ ngawi 'da Otunu li mɛnɔ ni lia kɔ kolonɔ.

²² Nɛ mi zɔa mɔ kpo, ma bili dɛ zu Otunu li mɛnɔ ni ɔ nɛ ndumbe ni. Mɛ ni ndele ɔ nɛ dia vɛlɛ wa sa li nɛ na kristalɛ ni.

²³ Nɛ Otunu li mɛnɔ ti ndumbe ni, wa tata sala 'baka wa bɔa yɔrr dɛ 'da ongba wa. Nɛ nde mbe sala 'baka wa bɔa lɔmbɔ dɛ tɛ kili tɛ wa.

²⁴ 'Da fala kɛ wa la dɛ dati ni, nɛ wa zɛ sala 'baka wa, nɛ ma dɔ̃lɔ̃ ɔ nɛ giti gba fua lì, tabi nɔ mɔ́ osoda, tabi ɔ nɛ giti wala gɛlɛ Gale kɛ a do nganda vɛ̃ ni. Kɔ wa nɛ yolo nù, nɛ wa lɔmbɔ sala 'baka wa.

²⁵ Nɛ giti mɔ dɔ̃lɔ̃ do zu mɛ bili ɔ nɛ ndumbe ni, ɔ nɛ wala gɛlɛ wele ni.

²⁶ Nɛ mi zɔa mɔ ɔ nɛ kpongbo nwa, kɛ wa sɛa ma do gã ta safirɛ ni. Nɛ mi zɔ mɔ dɛ ngɔ kpongbo nwa ni ɔ nɛ wele ni.

²⁷ Mi nɛ ka mɔ tɛ wi ni, nɛ nde yolo 'dɛ tili a dɛ ngɔ ma ndele wena, nɛ ma nyɛ ɔ nɛ we ni. Nɛ kɛ dɛ nù ma to ɔ nɛ gã yele ngbala ni.

²⁸ Nɛ kɛ zã a vɛ̃ yele ɔ nɛ ndumbe zã kutu ni. Ĩ na, wi mi zɔa a ni, wi a NWA. A bia tɛ̃ a dɛ kɔ yele ngbala 'da a vɛ̃. Mi zɔa a, nɛ mi te, nɛ mi gu li mi nù. Nɛ mi zele gɛlɛ a tɛ wele we hã mi.