Ezai 9 - WE NU GALE 1995

¹ Owi yɛnggɛ tũ wa zɔa gba nyɛa we yele ngbaa. Owinɔ wa ɔ kɔ gba tũnɔ ni, fala sa kɔ le 'da wa ia.

² Mɔ NWA, mɔ hã yangga hã wa wena, mɔ dɛa na yangga 'da wa ma gã. Wa zɛ nu wa, nɛ wa dɛ sa dati mɔ, ɔ nɛ kɛ wele dɛ sa 'da fala kala kpalɛ ni. Wa he mɔ do yangga, ɔ nɛ owi kɛ̃ sanga kpamɔ, kɛ wa kala ma li bolo ni.

³ Mɔ fua owinɔ 'da mɔ kɔ ngamɔ. Mɔ gbini sanga te ngbangboe, kɛ ma zɛlɛ zu 'baka wa ni. Mɔ 'bili sanga zufa, kɛ wa zɛ do wa ni. Mɔ kpasa wa ɔ nɛ kɛ mɔ kpasa zi 'bɔ wa do tũi mɔ ndaka do Omadianɛ ni.

⁴ We ma bɛlɛ sɛ mɔ nyanga owi sɛnɛ wa, kɛ wa ma do nùi nganda nɛ ge nde ni. Nɛ ma te sɛ 'bɔ tɛ tulu tɛ wa, kɛ tɔkɛ 'danga tɛ nɛ ni, nɛ ma ngutu sɛ vɛ̃.

⁵ Mba gɔ, wa kua be hã lɛ, lɛ kpa bulu be mɔ lɛ. Nɛ Gale ia a na, a dɛ to nwa. Wa sa li a na: Wi tɔ̃ dia mbula, Gale wi ngawi, Baa lɛ kɛ a 'bana sɛ fai, Nwa kɛ a hã dungu fio.

⁶ Gale tombo a na, a e dungu fio ngɔ nù nga fai, nɛ dɛa to nwa 'da a ma gã dɛ dati. A dungu sɛ ngɔ kpongbo nwa 'da Davidi, nɛ a dɛ to nwa ngɔ nùi 'da a, takɔ ma nganda, nɛ ma ɔ fai. Ngangga gɛ, a dɛ sɛ toe 'da a do bɔlɔ zu, do wala olo nɛ ngboo, nɛ ma 'bana sɛ fai. Nɛ zɔ́, mɛnɔ kɛ NWA ngɔ mɔ nyanga nza vɛ̃, a do hɛ̃lɛ̃ we dɛ ma gɛ a ni.

Zã NWA Gale nɔ̃lã dɛ tɛ owinɔ 'da a

⁷ NWA gɔnɔ we 'da Owi ngɔ nù Israɛlɛ, a fi obe zã Yakɔbɔ li ngbangga.

⁸ Nɛ obe Israɛlɛ, do owi kɔ le Samaria wa ĩ fala nɛ. Nɛ nde wa lá fala dɛ wali 'da wa gɔ. Wa tɔ̃ na:

⁹ “Gɛnɛ kɔ otɔa nùnɔ, kɛ lɛ ba zi zu nɛ do ofu'da te sikɔmɔrɛnɔ ni ma tia, nɛ nde lɛ dɛ sɛ mbé nɛ do ta, nɛ lɛ ba sɛ zu nɛ do te sɛdrɛ, kɛ ma tó bu'da gɔ.”

¹⁰ NWA Gale zɔa ni, nɛ a hã ngawi hã nwa Rɛsinɛ, wi sɛnɛ wa. Nɛ a dɛa 'bɔ na,

¹¹ Osiri wa yolo si 'biti gba wese, nɛ Ofilisti wa yolo si 'biti gɛ̃a wese, hã wa bi owinɔ 'da ɛ, nɛ wa ɛ̃ sanga wa ɔ nɛ kɛ gogo wele ɛ̃ sanga Sanggo ni. Gɛnɛ kɔ na mɛ ni, nɛ nde sila Gale tɛ gɛ gɔ, a 'bana tɛ be kɔ̃ a li obe Israɛlɛ fai.

¹² Na mɛ ni, Gale zɛa owinɔ 'da a, obe Israɛlɛ. A hã ngamɔ hã wa, nɛ nde wa kpòlò tɛ wa dɛ 'da a gɔ. Wa sìkì li wa dɛ 'da NWA ngɔ mɔ nyanga nza vɛ̃ gɔ.

¹³ Ma kɛ 'do tũ kpo iko, NWA ɛ̃a sanga obe Israɛlɛ, yolo ngɔ we hɔ nù.

¹⁴ Wanɔ ngɔ, wi a ogã winɔ, do Owi tɔ̃ mbulanɔ. Nɛ wanɔ nù, wi a owinɔ wa gba olo nu Gale do bɛlɛ ni.

¹⁵ Owi zɔ mɔ tɛ obe Israɛlɛ, wa ba 'dã wala, nɛ wa yɔa wala do wa do'do.

¹⁶ Ma hã NWA kɔ̃̀ na, be zagbãlã be mɔ wa kpo 'bana gɔ. Nɛ a dɛ́ 'bako hã obe gulanɔ, do Owi fio wilinɔ kɔ le 'da wa ni gɔ. We kɛ wa vɛ̃, wa ĩ̀ ti Gale gɔ, wa dɛ 'dã mɔ, nɛ wila we nu wa ma dè gɔ. Gɛnɛ kɔ na mɛ ni, nɛ nde sila Gale tɛ gɛ gɔ, a 'bana tɛ be kɔ̃ a li obe Israɛlɛ fai.

¹⁷ Mɛ a gbãlã we, 'dã mɛnɔ ma yɛ'bɛ ɔ nɛ kɛ we yɛ'bɛ li zɔ̃ ni. Ma hɔ tɛ kundu mɛnɔ kɛ ma dɛa lu'di ni, nɛ ma dɛ galagula, nɛ zɛ̃ we 'ba'ba dɛ ngɔ nganda wena.

¹⁸ Zã NWA ngɔ mɔ nyanga nza vɛ̃ nɔ̃lã, a hã etumbu hã owinɔ 'da a. Etumbui ni, ma ɔ nɛ we ni, ma bɛlɛ sɛ owinɔ 'da a do nùi 'da wa vɛ̃. Wele do wele fa we kpasa kili tɛ̃ ɛ, nɛ a ĩ́ 'bako hã ngba a gɔ.

¹⁹ Wa fa nyɔngɔmɔ mba mba, hã wa kpa ma, nɛ wa wɛlɛ zu nɛ, nɛ wa nyɔngɔ, nɛ nde zã wa hɛ̃ gɔ. Gɛnɛ kɔ onya wa ngboo, nɛ wa nyɔngɔ mulu tɛ wa.

²⁰ Nu kpala Manase do nu kpala Efraimɛ wa bi ngba wa. Nɛ 'do nɛ, nɛ wa mba ngba wa kpo, nɛ wa bi nu kpala Yuda. Gɛnɛ kɔ na mɛ ni, nɛ nde sila Gale tɛ gɛ̀ gɔ, a 'bana tɛ be kɔ̃ a li obe Israɛlɛ fai.